SHaahuwaa 11
Haꞌꞌi Oosettiiddi Deꞌiya Ooratta Alamiyaa Baasuwaa
1, 2. Geeshsha Maxaafaa hiraagaa poluwan, aybi hanishin beꞌꞌiiddi deꞌiyoo?
HARA maalaalissiyaabay qassi, Seexaanaa alamee laalettiiddi deꞌiyo wodiyan, Xoossaa ooratta alamiyaa baasoy haꞌꞌi oosettiiddi deꞌiyoogaa. Mata wodiyan, haꞌꞌi deꞌiya issippetettay baynna alamiyaa sohuwan eqqana ooratta asaa maabaraassi, baaso gidiyaageeta Xoossay ubba dere asaappe shiishshiiddi deꞌiyoogaa nu ayfiyan beꞌiiddi deꞌoos. Geeshsha Maxaafan, 2 PHeexiroosa 3:13n, ha ooratta maabaray “ooratta sa7aa” geetetti xeegettiis.
2 Geeshsha Maxaafaa hiraagaykka hagaadan gees: “Wurssetta gallassatun [haꞌꞌi nuuni deꞌiyo wodiyan] . . . daro asai yiidi, ‘Haayite! GODAA deriyaa [a tumu goynnuwau], . . . ane pude kiyoos. I koyiyoogaadan nuuni baana mala, i nuna ba ogiyaa tamaarissana.’”—Isiyaasa 2:2-3.
3. (a) Isiyaasa hiraagay polettiiddi deꞌiyoy o bollanee? (b) Hegaa xeelliyaagan Geeshsha Maxaafan wurssetta maxaafay woygii?
3 He hiraagay ‘Xoossaa ogiyaa tamaaridi, an baanau’ azzazettiya asatu bolli haꞌꞌi polettiiddi deꞌees. Geeshsha Maxaafan wurssetta maxaafay, sarotettaa dosiya saꞌa yuushuwan deꞌiya ha asaa maabaraa “zare ubbaappe, qommo ubbaappe, yara ubbaappenne dumma dumma biitta qaala ubbaappe . . . zawai bainna daro asaa” yaagees; eti issippetettan Xoossaassi oottiya saꞌa yuushuwan deꞌiya tumu ishantta. Qassikka Geeshsha Maxaafay: “Hageeti daro waayiyaa waayidi yiidaageeta” yaagees. Hegaa giyoogee, ha iita siraatay xayiyo wode eti attana yaagiyooga.—Ajjuutaa 7:9, 14; Maatiyoosa 24:3.
Saꞌa Yuushuwan Deꞌiya Tumu Ishatettaa Maabaraa
4, 5. Yihoowa Markkatu saꞌa yuushuwaa ishatettay waanidi deꞌana danddayidee?
4 Miilooniyan qoodettiya Yihoowa Maarkkati Xoossaa kaaletuwaaranne ogiyaara maayettidi deꞌanau wozanappe baaxetoosona. Eta merina deꞌuwaa hidootay baasettidoy, Xoossaa ooratta alamiyaana. Xoossaa higgiyaa azazettiyoogan bantta ubba galla duussan, haꞌꞌi gidin ooratta alamiyan gidin a haaruwau azazettana koyiyoogaa bessoosona. Eti au biitta asa woy ay zarekka gidin, Xoossaa Qaalan deꞌiya issi mala gidida wogatun aqoosona. Eti Xoossay giigissido ooratta alamiyaa woykko saꞌa yuushuwan deꞌiya tumu ishatettaa maabaraa yame gidana danddayidoy hegaassa.—Isiyaasa 54:13; Maatiyoosa 22:37, 38; Yohaannisa 15:9, 14.
5 Yihoowa Markkati dumma gidida saꞌa yuushuwaa ishatettaa demmoogau sabaa banttassi ekkokkona. Hagee Xoossaa higgiyaa azazettiyaageetu bolli oottiya wolqqaama gidida Xoossaa ayyaanaa ayfe gidiyoogaa eroosona. (Oosuwaa 5:29, 32; Galaatiyaa 5:22, 23) Hegee Xoossay oottiyooba. Yesuusi giidoogaadan, “Asau danddayettennabai Xoossau danddayettees.” (Luqaasa 18:27) Hegaa gishshau, merinau laamettennan deꞌiya yuniverssiyaa oottida Xoossay, ooratta alamiyaa maabaraakka merinau laamettennan deꞌanaadan oottana danddayees.
6. Yihoowa Markkatu saꞌa yuushuwaa ishatettay, ha wodiyan oosettida maalaalissiyaaba geetettana danddayiyoy aybissee?
6 Yaatiyo gishshau, Yihoowa ooratta alamiyaa haaroy, ooratta alamiyaa baasuwankka haꞌꞌi i oottiiddi deꞌiyooban beettana danddayees. Yihooway ba Markkatuura gayttidaban oottidobay, nu wodiyan polettida maalaalissiyaaba. Ayssii? Asaa shaakkiya yeleta biittaa, zariyaa woy hayimaanotiyaa mishoy duuttana danddayenna, Yihoowa Markkatu saꞌa yuushuwaa ishatettaa medhdhido gishshataassa. Markkati 235 biittatun deꞌiyaageetanne miilooniyan qoodettiyaageeta gidikkonne, duuxxenna issippetettan deꞌoosona. Taarike ubban beetti erenna ha saꞌa yuushuwaa ishatettay, tumukka nu wodiyan oosettida maalaalissiyaaba; hegeekka, Xoossa ooso.—Isiyaasa 43:10, 11, 21; Oosuwaa 10:34, 35; Galaatiyaa 3:28.
Xoossaa Asata SHaakki Eriyoogaa
7. Yesuusi bana tumuppe kaalliyaageeti waani erettoosona giidee?
7 Ooratta alamiyaa baasodan Xoossay goꞌettiiddi deꞌiyo asata, hara ogiyaara waati eranau danddayiyoo? Yesuusi Yohaannisa 13:34, 35n, yootidoogaa poliyay oonee? Yesuusi hagaadan giis: “Taani inttena ooratta azazuwaa azazais; issoi issuwaa siiqite. Taani inttena siiqidoogaadankka, intte issoi issuwaa siiqana bessees. Intte issoi issuwaara siiqettikko, ta erissiyo ashkkarata gidiyoogaa asai ubbai erana.” Yihoowa Markkati Yesuusa qaalaa ammanoosonanne a qaalaadan deꞌoosona. Xoossaa Qaalay tamaarissiyoogaadan, ‘issoy issuwaara wozanappe siiqettoosona.’ (1 PHeexiroosa 4:8) Eti ‘issippe shiishshi qachchiya siiquwaa maayidosona.’ (Qolasiyaasa 3:14) Yaatiyo gishshau, ishatetta siiqoy alame yuushuwan eta issuwa oottidi oyttiya “shida.”
8. Koyro Yohaannisa 3:10-12y Xoossaa asata hara ogiyaara eranau waati maaddii?
8 Haray qassi, 1 Yohaannisa 3:10-12y: “Xoossaa naatu giddooninne xalahe halaqaa naatu giddon de7iya dummatettai hagan erettees; xillobaa oottenna urai woikko ba ishaa siiqenna urai ooninne Xoossaa Na7a gidenna. Aissi giikko, koiroosappe intte siyido kiitai, ‘Issoi issuwaara siiqettanau bessees’ yaagiyaagaa. Nuuni Qaayeela mala gidanau bessenna. Qaayeeli xalahe halaqaassa; yaanidi ba ishaa woriis” yaagees. Hagaadan gidiyo gishshau, Xoossaa asati makkalenna saꞌa yuushuwan deꞌiya ishantta.
SHaakki Eranau Maaddiya Hara Ogiyaa
9, 10. (a) Wurssetta gallassan, Xoossaassi haggaaziyaageeti ayba oosuwan erettiyoonaa? (b) Yihoowa Markkati Maatiyoosa 24:14 waati polidonaa?
9 Xoossaassi haggaaziyaageeta shaakki eriyo hara ogeekka deꞌees. Yesuusi alamiyaa wurssettaabaa yootido hiraagan, ha wodee wurssetta gallassa gidiyoogaa malaatiya darobaa yootiis. (SHaahuwaa 9 xeella.) Ha hiraagau issi ayfe yohoy Maatiyoosa 24:14n, i odido qaalan qoncciis: “Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana.”
10 Ha hiraagay polettishin beꞌidoo? Ee. Wurssettay 1914n doommoosappe doommidi, Yihoowa Markkati Xoossaa Kawotettaa mishraachchuwaa alame yuushuwan, Yesuusi azazido ogiyan asau huuphiyan huuphiyan eta soo biidi sabbakkidosona. (Maatiyoosa 10:7, 12; Oosuwaa 20:20) Miilooniyan qoodettiya Markkati ubba biittan deꞌiya asau eta soo biidi ooratta alamiyaabaa odoosona. Ha brooshree nena gakkidoy Yihoowa Markkatu oosoy Xoossaa Kawotettaabaa yootiya biilooniyan qoodettiya xuufeta attamiyoogaanne asau gishiyoogaakka gujjiyo gishshataassa. Alame yuushuwan sooppe soo biidi Xoossaa Kawotettaabaa sabbakkiya etappe attin hara asa eray? Marqqoosa 13:10y qassi, ha sabbakkiyonne tamaarissiyo oosoy wurssettay yaanaappe “koiroora” oosettana bessiyoogaa yootees.
Gita Gidida Naaꞌꞌantto Oyshaa Zaariyoogaa
11. Yihoowa Markkati Xoossaa haaruwau azazettiyoogan harabaa ay poliyoonaa?
11 Yihoowa Markkati Xoossaa higgiyaanne baaso siraataa azazettiyoogan harabaakka poloosona. Asay paacettiyo wode, Xoossaassi ammanettidi deꞌenna yaagidi, Seexaanay asaa naatu suuretetta equwaa xeelliyaagan, denttido gita gidida naaꞌꞌantto oyshaa zaariyoogan i worddanchcha gidiyoogaa bessoosona. (Iyyooba 2:1-5) Ubba biittaappe shiiqida miilooniyan qoodettiya asaa maabara gididi, Markkati issi bolladan, Xoossaa haaruwau ammanettidaageeta gidiyoogaa bessoosona. Eti polo gidenna asa gidikkokka, Seexaanaa qohuwa danddayidi, ubbaappe bollaara haariyo maataa xeelliyaagan denddida oyshau Xoossaa miyyiyan eqqoosona.
12. Markkati bantta ammanuwaassi, leemiso oottidi kaalliyoogeeti oonee?
12 Ha wodiyan, ha miilooniyan qoodettiya Yihoowa Markkati, aadhdhida wodetun Xoossau ammanettida hara markkatu maaran eqqidi markkatiiddi deꞌoosona. Hegeetuppe amaridaageeti Aabeela, Noha, Iyyooba, Abrahaama, Yisaaqa, Yaaqooba, Dibooro, Uruto, Daawitanne Daaneela. (Ibraawe, shemppo 11) Geeshsha Maxaafay yootiyoogaadan, eti ‘shaaraa keena daro ammanettida markkata.’ (Ibraawe 12:1) Hageetinne Yesuusi erissiyo ashkkarata gujjidi haraatikka, Xoossaassi ammanettidi deꞌidosona. Yesussikka ba huuphe polo gidida ogiyan ba suuretettaa naagiyoogan, ubbaappe aadhdhiya leemiso gidiis.
13. Yesuusi Seexaanaabaa yootido tumattidabay aybee?
13 Hagee Yesuusi hayimaanotiya kaalettiyaageetussi Seexaanaabaa yootidoogee tuma gidiyoogaa bessees: “SHin Xoossaappe siyido tumaa yootida tana intte woranau koyeeta. . . . Intte intte aawaa xalahe halaqaa naata; qassi intte intte aawai amottiyoobaa oottanau koyeeta. I kaseppe doommidi, shemppo woridaagaa; tumatetti aani bainna gishshau, tumatettaakko shiiqi erenna. I wordduwaa haasayiyo wode, baappe haasayees; aissi giikko, i worddanchchanne qassi wordduwaukka aawa.”—Yohaannisa 8:40, 44.
Ne Dooroy Aybee?
14. Ha wodiyan ooratta alamiyaa baasoy waaniiddi deꞌii?
14 Saꞌa yuushuwan deꞌiya Yihoowa Markkatu maabaran, Xoossay haꞌꞌi giigissiiddi deꞌiyo ooratta alamiyaa baasoy wodiyaappe wodiyan minniiddi bees. Layttan layttan xeetu shaꞌan qoodettiya asay suure eraa goꞌettidi, bantta dooriyo maatan Xoossaa haaruwaa dooriiddi deꞌoosona. Eti ooratta alamiyaa maabaraa yame, qassi ubbaappe bollaara haariyo maataa xeelliyaagan denddida oyshaassi Xoossaa miyyiyan eqqidosonanne Seexaanay worddanchcha gidiyoogaa bessoosona.
15. Nu wodiyan Yesuusi ay shaakkiyo oosuwaa oottanau deꞌii?
15 Eti Xoossaa haaruwaa dooriyoogan, Kiristtoosi “dorssata deeshshatuppe” shaakkiyo wode “ushachcha baggaara” eqqanau gidaa demmoosona. Wurssetta gallassaa xeelliyaagan yootido hiraagan Yesuusi: “Sa7an de7iya asai ubbai ta sintti shiiqana; heemmiyaagee dorssata deeshshatuppe shaakkiyoogaadan, taani he asaa naa77u kessada shaakkana. Qassi dorssata taappe ushachcha baggaara essada, deeshshata taappe haddirssa baggaara essana” yaagiis. Dorssati Xoossaa haaruwau azazettiyanne Kiristtoosa ishata maaddiya ashkke asata. Deeshshati qassi Kiristtoosa ishata dosennanne Xoossaa haaruwaa dooroanau aynne oottenna morggee zozzidoogeeta. Wurssettay ay gidanee? Yesuusi: “Hegeeti [deeshshati] merinaa qaxxayuwau baana; shin xilloti [dorssati] merinaa de7uwau baana” yaagiis.—Maatiyoosa 25:31-46.
16. Yiya Gannatiyan deꞌanau koyikko, ne ay oottana bessii?
16 Tumuppe Xoossay nuussi qoppees! Keehippe mata wodiyan i ufayssiya gannate biittaa giigissana. He Gannatiyan deꞌanau koyay? Koyiyaaba gidikko, Yihoowabaa tamaariyoogaaninne tamaaridoogaadan deꞌiyoogan a giigissota nashshiyoogaa bessa. “GODAI beettiyo wode a koyite; matan de7iyo wode a xeesite. Iitai ba oosuwaa, nagaranchchaikka ba qofaa aggo; GODAAKKO i simmo. Simmin i a maarana.”—Isiyaasa 55:6, 7.
17. Oossi haggaazana koyiyaakko dooranau, wodiya hada aattanau bessennay aybissee?
17 Coo hada aattiyo wodee baawa. Ha ceega siraatay xayiyo wodee keehippe matattiis. Xoossaa Qaalay: “Ha sa7aa woi sa7an de7iya aibanne siiqoppite. Intte ha sa7aa siiqikko, Xoossaa siiqoi inttenan baawa. . . . Ha sa7ainne ha sa7an asi amottiyo ubbabai aadhdhana. SHin Xoossai giidoogaa oottiya urai merinau de7ana” yaagidi zorees.—1 Yohaannisa 2:15-17.
18. Xoossay ehiyo ooratta alamiyan deꞌanau, ammanettada naaganaassi ay oottiyoogaa koshshii?
18 Xoossaa asati ooratta alamiyan demmiyo merinaa deꞌuwau haꞌꞌi loohettiiddi deꞌoosona. Gannatiya aassanaassi koshshiya ayyaana timirttiyaanne hara hiillatakka tamaariiddi deꞌoosona. Xoossaa, Haariyaagaa oottada dooranaadaninne ha wodiyan saꞌa yuushuwan i oottissiiddi deꞌiyo shemppuwa ashshiya oosuwaa maaddanaadan nuuni nena minttidi hassayisoos. Neessi tumuppe qoppiyaanne tuggaa xayissana deꞌiya Xoossaa eranau, Yihoowa Markkatuura Geeshsha Maxaafaa xannaꞌa. Hegaadan oottiyoogan neenikka ooratta alamiyaa baasuwaa yame gidana danddayaasa. Yaatiyoogan Xoossan nashshettanaunne he maalaalissiya ooratta alamiyan merinau deꞌanau ammanettada naagana danddayaasa.
[Sinttaa 31n deꞌiya misiliyaa]
Yihoowa Markkatussi saꞌa yuushuwaa tumu ishatettay deꞌees
[Sinttaa 32n deꞌiya misiliyaa]
Ooratta alamiyaa baasuwaa