Ha xuufee bayzettiyaaba gidenna. Kumetta saꞌan Geeshsha Maxaafaa tamaarissanawu giigissiyoobaappe issuwaa gidishin, he oosoy asay ba dosan immiyo miishshan oosettees.

Miishsha immanawu koyikko, www.jw.org xomoosa.

Hara qonccissoy imettana xayikko, xiqiseti ekettidoy Wolayttatto Geeshsha Maxaafaappe. “NW” giyaagee xiqisee Ooratta Alamiyaa Geeshsha Maxaafaappe ekettidoogaa bessees.

Hidaare 2015n Attamettidaagaa

Wolaita (sp-WL)

Seeraaliyone giyo biitta asa gidida Dawudi “Taani diccidoy huuphessa awuraajjan guutta moottaana. Taani naatettan deꞌishin issi wode, nu so asaaranne hara keetta asaara gadiyaan ooshshay denddiis. Naꞌꞌaykka gadee banttabaa yaagoosona. Ooshsha makkanaayo, issi kaayiya bitanee xeesettiis. I hara bitaniyaayyo heregaa immiis, hegaappe simmidi bitaniya bootta maayuwaan kammiis. Sohuwaara maayo giddon deꞌiya bitanee kokkoriyoogaanne cawattiyooga doommi bayiis. I heregaakko xeellidi, dagaman cenggurssaa xoqqu oottidi yaagiis: ‘Taani cima bitaniya beꞌayiis, haa matattidi deꞌees! bootta maayuwaa maayiis. I aduussanne cima, puulunttaamanne i hemettiyooykka hokkidi loddaana.’

“I yootiiddi deꞌiyoy ta Aawaa aawaaba! Yaatin ayyo wozanay yashshan tahiin: ‘Intte taani giiyoobaa ammanana xaaykko, intte huuphiyau yiidi xeellite!’ giidi waasuwa xulluusiis. Tuma, nu giddoppe heregaakko shiqidi xeellanau xalida oonikka baawa! Kaayiya bitanee boonccuwaa haattaara gatti bitidi gosiyan ehiidoogaappe a bolli caccafidi coꞌꞌu oottiis.

“Heregaa giddon deꞌiyaa bitaniyaa baggaara, ‘Aawa aawaay’ biittay nusoo asaassa gidiyoogaa odiis. I ta aayee aayeeyyo a hirggi baynnan biitta oottana bessiyoogaa odiis. Hankko keettaa asay pirddaa maayidosona. Yohoy hegaan makettiis” yaagidi yootiis.

Hagaa mala hanotay Arggo Afirkkan meeze gididaaba. Alamiyan hara heeratun asay ammaniyoogaadan ha heerankka daro miilooniyaan qoodettiya asay hayqqida asati ayyaana alamiyau pinnoosona, he sohuwan uttidi saꞌan deꞌiya asaa beꞌanaayonne qohuwa gattanaayo danddayoosona yaagidi ammanoosona. Ha ammanoy likkee? Hayqqidaageeti tumu deꞌuwaan deꞌiyonaa? Deꞌana xayikko, banttana hayqqida asa ayyaana giyaageeti oonee? Ha oyshatuyyo bixe zaaruwaa eriyoogee keehi koshshees. Hagee deꞌonne hayqo xeelliyaa yoho.

Ayyaanati deꞌoosona! Ayfiyan beettenna ayyaana alamiyaa giddon, iita ayyaanatinne loꞌꞌo ayyaanati deꞌoosona. Eti saꞌan deꞌidi hayqqida asateeyye?

CHii, gidokkona. daro asay qoppiyoogaadan, Issi asi hayqqiyo wode, i woy a ayyaana alamiyaa pinnokkona. Hagaa nuuni aybin eriyoo? Geeshsha Maxaafay hegaadan odiyo gishshaassa. Geeshsha Maxaafay  tuma gidida maxaafanne sunttay Yihoowa gidido issi tumu Xoossaappe yiidaba. Yihooway asaa medhdhiis; eti hayqqiyo wode waaniyakkokka  loyttidi erees.—Mazamure 83:18; Kessaabaa 6:3 (1879 M.L Amaarattuwan attamettidaagaa) 2 Ximootiyoosa 3:16.

Geeshsha Maxaafay Xoossay, koyro asa Addaama “biittaa baanaappe medhdhiis” yaagees. (Doomettaabaa 2:7) Xoossay Edene giyo ataakiltte sohuwan, Gannatiyaan a wottiis. Addaamee Yihoowa higgiyaa azazettidaba gidiyaakko, i hayqqennan, ha wode gakkanaashin saꞌan deꞌanau danddayees. SHin Addaamee eriidi Xoossaa higgiyaa azazettennan ixxido wode, Xoossay ayyo: “Neeni biittaappe ekettadasa; neeni baana; neeni baanau simmana” yaagiis.—Doomettaabaa 3:19.

Hagaa giyoogee woyigiyoogee? Yihooway a baanaappe medhdhanaappe kase Addaamee awan deꞌii? I awankka baawa. I yelettibeenna ayyaana gididi saluwaan deꞌibeenna. Addaame merettanaappe kase deꞌibeenna. Yaatiyo gishshau, Yihooway Addaama “biittau simmaasa,” giido wode Addaamee hayqqiyoogaa yootiis. I ayyaana alamiyaa pinnibeenna. Hayqqido wode, Addaamee wodhdhi eqqidi deꞌoy baynnabanne deꞌennaba gidiis. Hayqo giyoogee deꞌuwan deꞌennaagaa giyoogaa.

Gido shin hara hayqqidaageetubaa woyiganee? Etikka deꞌuwaan deꞌokkonaa? Geeshsha Maxaafay zaaruwa immees:

• “Eti naa77aikka [meheenne asay] issi sohuwaa boosona; naa77aikka biittaappe merettido gishshau, biittau simmoosona.”—Eranchchaa 3:20.

• “Hayqqidaageeti. . .aibanne erokkona.”— Eranchchaa 9:5.

• “Eta siiqoi, ixoinne qanaatee ubbai etaara issippe xayiichchiis.”— Eranchchaa 9:6.

• “Neeni baanasan duufuwan oosoi, woikko halchchoi,woikko eri, woikko aadhdhida eratetti baawa.”— Eranchchaa 9:10.

• “Eti biittau simmoosona; eta halchchoi ubbai he gallassikka atti aggees.”—Mazamure 146:4.