Seexaanay, Hewaaniyyo Xoossaa azazetennaba gidikko, hayqqakka yaagidi yootiis. Hegee worddo. Akka hayqqaasu, Addaamakka gidin hayqqiis. Seexaanay nagaraa oottido gishshau he wode hayqqana xayikkokka, sinttappe hayqqanaagee attenna. Gidikkokka i xayana gallassay gakkanaashin, asaa naata balettiyoogaa aggenna. I hanno gakkanaukka worddanchcha, qassi asay Xoossaa higgiyaa menttana mala i oottennabi baawa.—Yohaannisa 8:44.

Hara Kiitanchchatikka Makkalidosona

Takkidi, hara kiitanchchati iita gididosona. Ha kiitanchchati saꞌan deꞌiya macca asay puulanchcha gidiyoogaa beꞌidi etaara asho gayttotetta polanau koyidosona. Hegaa gishshau saꞌaa yiidi attuma asa gididi ashuwaa maayidosona. Hegaappe simmidi he macca asata banttassi ekkidosona. Hagee Xoossaa halchchuwaara eqettiyaaba.—Doomettaabaa 6:1, 2; Yihudaa 6.

Hagee asaa naatu bollikka daro metuwaa kaalettiis. Ha kiitanchchatu machchoti naata yelidosona, shin he naati asaa naatuppe dumma. Eti diccidi keehi wolqqaamanne gita, qassi makkalanchchanne meqetti baynnaageeta gididosona. Wurssettan biittay makkalan kummido gishshau Yihooway iita asata gita bashsha haattan xayssanau kuuyiis. He bashsha haattaappe attida asati xillo gidida Nohanne a so asaa xalaala.—Doomettaabaa 6:4, 11; 7:23.

SHin iita kiitanchchati, ayyaana alamiyau simmidi biidosonappe attin hayqqibookkona. Gidikkokka, qaxxayettidosona. Xoossaa yuushuwan deꞌiya xillo kiitanchchati deꞌiyoosa simmennaadan teqettidosona. Hegaa bollankka, Yihooway eti zaarettidi asadan ashuwaa maayennaadan digiis. Qassikka wurssettan eti gita pirddan hayqqidi xayana.—2 PHeexiroosa 2:4; Yihudaa 6.

Seexaanay Saluwaappe Goodettiis

Saluwan olay, 1914M.Ln denddiis. Geeshsha Maxaafan Ajjuutaa maxaafay he wode aybi hanidaakko odees: “Hegaappe guyyiyan, saluwan olai denddiis. Mikaa7eeli [hayquwaappe denddida Yesuus Kiristtoosi] ba [xillo] kiitanchchatuura issippe miimminttiyaara [Seexaanaara] olettiis; miimmintteekka ba [iita] kiitanchchatuura gididi, zaarettidi olettiis. SHin miimminttee xoonettiis. Xoonettin miimminttiyaassinne a kiitanchchatussi saluwan sohoi xayiis. Gita miimminttee, xalahe halaqaa woikko Seexaanaa giyoogee, beni shooshshai, sa7a ubbaa balettiyaagee olettiis; i ba kiitanchchatuura issippe duge sa7au olettiis.”

Wurssettan aybi hanidee? Qonccissoy hagaatuwaa gees: “Hegaa gishshau, saluwaunne salo giddon de7iyaageetoo, ufaittite.” Xillo kiitanchchati ufayttana danddayoosona; aybissi giikko, Seexaanaynne iita kiitanchchati woykko iita ayyaanati hegaappe guyyiyaan saluwan deꞌokkona. Saꞌan deꞌiya asaayyo shin? Geeshsha Maxaafay: “sa7aunne abbau aayye7ana! Aissi giikko, xalahe halaqai baayyo guutta wodee attidoogaa eriyo gishshau, wolqqaama hanqquwaara duge inttekko wodhdhiis” yaagees.—Ajj. 12:7-9, 12.

Ee, Seexaanaynne a kaalliya iita yameti saꞌan deꞌiya asaa balettoosonanne aayyeꞌana giissiya wolqqaamabaa oottiiddi deꞌoosona. Ha iita kiitanchchati daydanttata woykko xalaheta geeteti xeegettoosona. Eti Xoossaa morkketa. Eti ubbaykka iita.

Seexaanaynne daydanttati ubbato meqetti baynnageetanne daafaa ehiyaageeta gididi deˈ-idosona. Beni wode Seexaanay, ammanettiyaa Iyyooba mehiyaanne ashkkarata woriis. Kaallidi “wolqqaama gotiyaa” denttidi tammu Iyyooba naati deꞌiyo keettay kunddanaadan oottidi eta woriis. Hegaappe simmidi Seexaanay Iyyooba “tohuwaappe huuphiyaa gakkanaassi iita masunttai a bolli kiyanaadan oottiis.”—Iyyooba 1:7-19; 2:7.

Yesuusi saꞌan deꞌiyo wodekka, daydanttati issi issi asaa duudenne qooqe gidanaadan oottidosona. (Maatiyoosa 9:32, 33; 12:22) Eti issi bitaniyaa ba bolla shuchchan gaarana mala oottidi barchchiyaa bessidosona. (Marqqoosa 5:5) Eti issi naꞌakka boroodanaadan, saꞌan kunddanaadaninne “kokkoranaadan” oottidosona.—Luqaasa 9:42.

Nu wodiyan, Seexaanaynne daydanttati ay wodeppekka aattidi shemppo woriyaageeta. Saluwaappe olettoosappe haa simmin, eta iita oosoy dari dari biidoogee beettiyaaba. Alamiyaa yuushshuwan hanettiidi deꞌiyaaba beꞌiyoogeenne siyiyoogee eta iitatetta qonccissees. Issi issi asaa harggiyan keehi qohoosona. Haraata qassi qamman xiskkuwa xayanaadan woy yashshiya aymuwaa aymottanaadan oottiyoogan unꞌꞌettoosona. Haraatu bolli mattuma qohuwaa gattoosona. Haraata qassi gooyanaadan, banttana banttarkka woy hara asa woranaadan oottoosona.

Surinaame giyo biittan deꞌiya Linttina, daydanttati woykko tuna ayyaanati i soo asaappe 16ta woridoogaanne 18 layttaayyo i bollaaninne guuggiyaan wolqqaama barchchiyaa gattoogaa yootausu. Banan gakkidabaappe, daydanttati “banttayyo eeno geenna asaa hayqqana gakkanaashin barchchiyaa bessiyoogan ufaytoosona” yaagausu.

SHin Yihooway ba aylleta Seexaanaa qohuwaappe naagana danddayees.—Leemiso 18:10