Yihoowa Markkatuura Issippetetta Medhdha

Seexaanaasinne daydanttatussi saꞌaa bollan iitabaa tamaarissiyanne oottiyaa asati deꞌoosona. Gidoppe attin Yihoowassikka oottiya asati deꞌoosona. Eti Yihoowa Markkata. (Isiyaasa 43:10) Usuppun miilooniyaappe dariya Markkati saꞌa yuushuwan deꞌoosona. Eti ubbay loꞌꞌobaa oottanau baaxettoosonanne asaa tumaa tamaarisoosona. Daro biittan Kawotettaa Adaraashshan etaara gayttana danddayaasa, eti ufayssan nena mokkana.

Eta oosoy haraati Xoossaayyo haggaazzana mala maaddiyooga. Neeni tumu ogiyan Yihoowassi waatada goynnanaakko erana mala nena eti ne son Geeshsha Maxaafaa xannaꞌissanau koyoosona. Hegaassi miishsha qanxxakka. Markkati asaanne Xoossaa Yihoowa siiqiyo gishshatau ufayttidi tumaa tamaarisoosona.

Seexaanaynne daydanttati hagaappe sinttau daro wodiyau asaa naata balettokkona. Yihooway saluwaappe eta kessidi oliichchiis. (Ajjuutaa 12:9) Xoossay mata wodiyan, Seexaanaa bollinne daydanttatu bolli haranttuwakka tangguwaa ekkana. Xoossaappe yiida ajjuutan, Yesuusi kiittido Yohaannisi hagaadan yaagiis: “Ciimma ollaa qulppiyaanne gita sanssalataa ba kushiyan oiqqida issi kiitanchchai saluwaappe yiyaagaa taani be7aas. Kiitanchchai miimminttiyaa, he ceega shooshshaa, xalahe halaqaa woi Seexaanaa giyoogaa oiqqiis; oiqqidi sha7u laittau qachchiis. Kiitanchchai ciimma ollan a yeggidi, sha7u laittai wuranaashin, asa zareta naa77anttuwaa balettenna mala, he ciimma ollaa qulppi gorddidi attamiis.” (Ajjuutaa 20:1-3) Hegaappe takkidi, Dablloosinne daydanttati merinau xayana.—Ajjuutaa 20:10.

Saꞌaa bollan deꞌiya iita asaykka hegaatuwa xayana.—Mazamure 37:9, 10; Luqaasa 13:5

Hayqqidaageeti Simmidi Deꞌuwan Deꞌana!

Seexaanaynne daydanttati xayi simmin, Yihooway asaa naatussi daro anjjuwaa ehaana. Hayqqidaageeti haꞌꞌi deꞌuwan deꞌenaagaa hassyaasa. Yesuusi hayquwaa xiskkuwan, hary atto, aymoy baynna kayrissiya xiskkuwan leemissiis. (Yohaannisa 11:11-14) Hayquwan xiskkidaageeti sinttappe denddiyo wodee deꞌiyoogaa i eriyo gishshau hegaato giis. I “Duufuwan de7iyaageeti a cenggurssaa siyiyo wodee yees. . . . duufuwaappe gaxi kiyana” yaagiis.—Yohaannisa 5:28, 29; Oosuwaa 24:15 ra gatta xeella.

Eti ha saꞌaa bolli deꞌuwau simmidi yaana. Asay hayqqin kiitay odettiyooga gishshaa, ufayssan deꞌuwayyo denddida asaabay odettana! Issi asi ba siiqiyo hayqqidaageeta duufuwaappe mokkiyoogee ayba ufayssiyaaba gidaneesha!