Buzo Haggaazo Moottan Haggaaziyoogaa Goꞌꞌaa
1. Buzo haggaazo moottay aybee?
1 Buzo haggaazo moottay aybee? Aaho haggaazo moottay deꞌiyo gubaaꞌetun, intte heeran buzo haggaazo moottaa ekkidi haggaazana danddayeeta. Giigettidaageeta giya maxaafay sinttaa 103n hagaadan gees: “Intteyyo injjetiya heeran oottanau buzo haggaazo moottaa ekkiyoogee daro saatiyaa haggaazanaadan maaddees. Qassi intte buzo haggaazo moottan inttenaara haggaazanaadan hara ura shoobbana danddayeeta.”
2. Buzo haggaazo moottan oottiiddi citan haggaaziyoogaa waatidi maaddana danddayiyoo?
2 Citan Haggaaziyoogaa Maaddanau: Neeni oottiyo heeran buzo haggaazo moottaa ekkiyaaba gidikko, laaxau kiyo wode woy soo simmiyo wode, geella hegaa heeran oottiya uraara haggaazana danddayaasa. Ne deꞌiyo heeran buzo haggaazo moottaa ekkiyaaba gidikko, injjetiyo wode ne soo asaara omarssan haggaazana danddayaasa. Haggaazuwaa kiyanau shiiqiyo shiiquwaa beennabaa gidikko, haggaazuwaa doommanaappe kase Yihooway kaalettanaadan woossiyoogee bessiyaaba. (Pili. 4:6) Hegaa bollikka, ne buzo haggaazo moottaa xallan gidennan, gubaaꞌiyaarakka citan haggaazana koshshees. Daroti haggaazuwaa kiyanau shiiqiyo, Qeeraanne Woggaa gallassi citaara haggaaziyoogee darotoo loꞌꞌo.
3. Buzo haggaazo moottaa goꞌꞌay aybee?
3 Goꞌꞌaa: Neeyyo buzo haggaazo moottay deꞌiyaaba gidikko, injjetiyo wode awudenne yan haggaazana danddayaasa. Haakkada beenna gishshau, daro saatiyaa haggaazana danddayaasa. Hegaappe denddidaagan, issoti issoti kaafiya aqinye woy kumetta wode aqinye gididosona. Tumaa eranau koyiya asay deꞌiyoy ne shooroona gidiyo gishshau, eta zaarettada oychanaunne Geeshsha Maxaafaa xannaꞌissanau metootakka. Buzo haggaazo moottan, ubba qassi moottaa zaaranaappe kase darotoo haggaaziyoogee he moottan deꞌiya asay etaara meezetanaadan maaddidoogaa daroti akeekidosona. Buzo haggaazo moottan oottiyoogee inttenne intte soo asay mishiraachuwaa loyttidi sabbakanaadan maaddanee?—2 Xim. 4:5.