Yihoowa Anjjuwaa Wozanappe Koyite

“Xoossai . . . bana koyiyaageetuyyo woituwaa [immees].”—IBR. 11:6.

1, 2. (a) Daro asay Xoossaa anjjuwaa koyiyoy ayba ogiyaanee? (b) Yihoowa anjjuwaa demmanau nuuni keehippe koyana koshshiyoy aybissee?

“XOOSSI anjjo!” Issi issi biittan issi uri hedhishiyo wode, a erenna urikka hegaadan giyoogee meeze gididaba. Dumma dumma haymaanootiyaa qeeseti asaa, mehiyaanne issibaa anjjana danddayoosona. Asay anjjuwaa demmanau xoqqu oottidi xeelliyo issi issi haymaanoote sohota baana danddayees. Polotikaa asati Xoossay bantta biittaa anjjanaadan ubbatoo woossoosona. Asay anjjuwaa demmanau hegaadan woossiyoogee bessiyaaba giidi qoppeetii? Eti koyiyoobaa demmiyoonaa? Tumuppe Xoossaa anjjuwaa demmiyaageeti oonee, aybissi?

² Ixoynne yedetay deꞌishinkka ubba deriyaappe shiiqida, saꞌa gaxaa gakkanaashin Kawotettaa mishiraachuwaa sabbakiya, sarotettaa dosiyaanne geeshsha asay wurssetta gallassatun deꞌanaagaa Yihooway kaseti yootiis. (Isi. 2:2-4; Maa. 24:14; Ajj. 7:9, 14) Nu giddoppe he asaa yame gidiyo maataa demmidaageeti, Xoossaa anjjoy baynnan murutana danddayenna gishshau, he anjjoy nuussi koshshees; qassi nuunikka hegaa koyoos. (Maz. 127:1) SHin nuuni Xoossaa anjjuwaa waatidi demmana danddayiyoo?

Azazettiyaageeti Anjjettoosona

3. Israaꞌeelati azazettidaba gidiyaakko, ay demmanee shin?

³ Leemiso 10:6, 7 nabbaba. Israaꞌeelati hidootaa biittaa gelana hanishin, i yootiyoobaa azazettiyaaba gidikko, eti keehippe ishalanaagaanne naaguwaa demmanaagaa Yihooway yootiis. (Zaa. 28:1, 2) Ha sohuwan “nebaa gidana” geetettida qaalay koyro xaafettido qaalan “nena kaallidi gakkana” giya qofaa oyqqiis. Yaatiyo gishshau, Yihoowa anjjoy Xoossaa asay demmiyooba xalla gidennan, eta ‘kaallidi gakkiyaaba.’ Azazettiyaageetuyyo anjjoy attennaba.

4. Tumuppe azazettiyoogee ay gujjii?

⁴ Israaꞌeelati ay mala qofaa oyqqidi azazettana koshshii? Xoossaa asay “ufaissaaninne galatan” ayyo oottana xayikko, i ufayttennaagaa Xoossaa Higgee yootees. (Zaarettido Wogaa 28:45-47 nabbaba.) Meheenne daydanttati azazettana danddayiyoogaadan issi issiban coo azazettiyoogaappe aadhiya ogiyan, nuuni Yihoowassi azazettana koshshees. (Mar. 1:27; Yaaq. 3:3) Xoossau wozanappe azazettiyoogee siiquwaa qonccissees. Yihoowa azazoy deexo gidennaagaanne i “bana koyiyaageetuyyo woituwaa immiyoogaa” ammaniyoogan ufayttiyoogee hegau denttettees.—Ibr. 11:6; 1 Yoh. 5:3.

5. Yihooway gelido qaalaa ammaniyoogee Zaarettido Wogaa 15:7, 8n deꞌiya higgiyaa azazettanaadan beni waatidi maaddidee?

⁵ Zaarettido Wogaa 15:7, 8n (Nabbaba.) odettida higgiyaa naagiyoogee hegaadan ammanettidi azazettiyoogan waanidi qonccana danddayiyaakko akeekite. He higgiyau undduudiiddi azazettiyoogee amarida hanotan hiyyeesata maaddana danddayees; shin hegee Xoossaa asaa giddon loꞌꞌo gaytotettaynne siiqoy deꞌanaadan maaddanee? Hegaappekka aaruwan, Yihooway baassi oottiyaageetuyyo koshshiyaabaa kunttanau danddayiyoogaa ammaniyoogaanne aagaadan kehatettaa bessiyo injjiyaa nashshiyoogaa bessii? Bessenna! Tumuppe kehiya uraa wozanan deꞌiyaabaa Xoossay akeekeesinne i oyqqiyoonne yedhiyo ubbaban anjjanaagaa qaalaa geliis. (Zaa. 15:10) Hegaa ammaniyoogee oosuwau denttetteesinne daro anjjuwaa demmanaadan oottees.—Lee. 28:20.

6. Ibraawe 11:6y nuuni ay ammanettanaadan oottana koshshii?

⁶ Ibraawe 11:6y, Yihooway ba asaa Woytiyaagaa gidiyoogaa ammanana koshshiyoogaa xalla gidennan, Xoossaa anjjuwaa demmanau hara eeshshaykka koshshiyoogaa qonccissees. Yihooway wozanappe “bana koyiyaageetuyyo” woytuwaa immiyoogaa hassayite. Koyro xaafettido doonan ha sohuwan gelida qaalay keehippe baaxetiyoogaa malaatees. Hegee nuuni anjjuwaa demmanaagaa keehippe ammanettanaadan oottana koshshees! Hegau pulttoy “worddotenna,” tumu Xoossaa. (Tii. 1:2) I gelido qaalay keehippe ammanttiyaagaa gidiyoogaa shaꞌan qoodettiya layttau bessiis. I yootidobay polettennan mule attenna. (Isi. 55:11) Nuuni tumuppe ammaniyaaba gidikko, i nunakka Woytiyaagaa gidiyoogaa keehi ammanettana danddayoos.

7. Nuuni Abrahaama ‘zerettaa’ baggaara yiya anjjuwaa waatidi demmana danddayiyoo?

⁷ Yesuus Kiristtoosi Abrahaama ‘zerettau’ waannatiyaagaa gidiyoogee qoncciis. Tiyettida Kiristtaaneti odettida ‘zerettau’ naaꞌꞌantto shaaho. Xoossay ba ‘ooratta oosuwaa yootanaadan xumaappe garamissiya ba pooꞌuwau eta xeesiis.’ (Gal. 3:7-9, 14, 16, 26-29; 1 PHe. 2:9) Yesuusi babaa ubbaa bolli sunttidoogeeta nuuni siyanau koyennaba gidikko, Yihoowaara loꞌꞌo dabbotaa medhana giidi qoppana danddayokko. ‘Ammanettida wozannaama ashkkaraa’ maadoy baynnan, nuuni Xoossaa Qaalaappe nabbabiyoobaa loyttidi akeekanau woykko hegaa waatidi oosuwan peeshshanaakko eranau danddayokko. (Maa. 24:45-47) Geeshsha Maxaafaappe tamaariyoobaa oosuwan peeshshiyoogan Xoossaa anjjuwaa demmana danddayoos.

Ubbatoo Xoossaa SHeniyan Xeelaa Wottiyoogaa

8, 9. Israaꞌeelatu aawaa Yaaqoobi ba woosaara moggiyaabaa oottanau waanidi baaxetidee?

⁸ Xoossaa anjjuwaa demmanau keehippe baaxetiyoogaa xeelliyaagan Israaꞌeelatu aawaa Yaaqooba hassayana danddayoos. Xoossay Abrahaamayyo gelido qaalay waanidi polettanaakko i eribeenna; shin Yihooway Abrahaama zerettaa keehippe corayanaagaanne gita dere oottanaagaa ammaniis. Hegaa gishshau, Yaaqoobi 1781 K.K., macho ekkanau Kaaraane biis. I bana ufayssiya lagge xalla gidennan, ba naatussi loꞌꞌo aayo gidana danddayiya, ayyaanaaban tishsha gidida, Yihoowayyo goynniya macho koyiis.

⁹ Yaaqoobi ba dabbee Raaheeliira gayttidoogaa eroos. I Raaheelo siiqidi, o ekkanau i aawaa Laabaanayyo laappun layttaa oottanau eeno giis. Hegee erettida siiqo taarike xalla gidenna. Yaaqoobi Ubbaa Danddayiya Xoossay ba aawaa aawaa Abrahaamayyo gelido qaalaanne ba aawaa Yisaaqayyo zaarettidi yootidobaa erees. (Doo. 18:18; 22:17, 18; 26:3-5, 24, 25) Yisaaqi qassi ba naꞌaa Yaaqoobayyo: “Ubbaa Danddayiya Xoossai nena anjjo nena yeletisso; neeni issi dere asa keena gakkanaassi nena corisso. Neeni ha77⁠i betetettan uttido ha biittaa nebaa oottana mala neeyyoonne ne zerettaayyo Xoossai Abrahaama anjjuwaa immo” yaagiis. (Doo. 28:3, 4) Yaatiyo gishshau, Yaaqoobi bau bessiya macho demmidi, naata yelanau baaxetidoogee Yihooway yootidoban ammanettiyoogaa bessees.

10. Yihooway Yaaqooba anjjanau ufayttidoy aybissee?

¹⁰ Yaaqoobi ba soo asay duretanau koshshiyaaban ba xeelaa wottibeenna. I ba zerettaayyo Yihooway gelido qaalan xeelaa wottiis. I xeelaa wottidoy Yihoowa shenee polettiyo hanotaana. Yaaqoobi xubbiyaabay deꞌishinkka, Xoossaa anjjuwaa demmanau bau danddayettidabaa aybanne oottanau murttiis. Yaaqoobi cimana gakkanaashinkka hegaa mala xeelaa oyqqidi deꞌiis; hegaa gishshau Yihooway a anjjiis.—Doomettaabaa 32:24-29 nabbaba.

11. Qonccida Xoossaa sheniyaara moggiya ogiyan nuuni ay oottanau baaxetana koshshii?

¹¹ Yihoowa halchoy polettiyo hanotaa xeelliyaagan nuunikka Yaaqoobaagaadan ubbabaa erokko. Gidikkonne, Yihoowa ‘gallassaa’ xeelliyaagan ay naagana koshshiyaakko Xoossaa Qaalaa xannaꞌiyoogan amaridabaa erana danddayoos. (2 PHe. 3:10, 17) Leemisuwau, nuuni he gallassay awude yaanaakko shaakkidi erokko; shin matattidoogaa eroos. Attida guutta wodiyan loyttidi markkattiyoogan nunanne nuuni yootiyoobaa siyiyaageeta ashshanaagaa Xoossaa Qaalay yootiyoogaa ammanoos.—1 Xim. 4:16.

12. Nuuni ay ammanettana danddayiyoo?

¹² Wurssettay ay saatiyankka yaanaagaa eroos; Yihooway keerido wodee saꞌan deꞌiya ubba asau mishiraachuwaa yootiyoogaara gayttidaba gidenna. (Maa. 10:23) Qassi, nuuni sabbakiyo oosuwaa muruta ogiyan waatidi polana danddayiyaakko loꞌꞌo kaaletuwaa demmoos. Nuuyyo deꞌiya ubbabaa goꞌettidi, nuuni danddayiyo ubban ha oosuwaa ammanuwan oottoos. Nuuni ubbatoo ayfe demmana danddayiyo haggaazo moottan sabbakaneeshsha? Hegaa kasetidi waati erana danddayiyoo? (Eranchchaa 11:5, 6 nabbaba.) Nu oosoy, Yihooway nuna anjjanaagaa ammanettidi sabbakiyoogaa. (1 Qor. 3:6, 7) I nuuni wozanappe baaxetiyoogaa beꞌiyoogaanne ba geeshsha ayyaanaa baggaara nuussi koshshiya kaaletuwaa ubbaa immanaagaa ammanettana danddayoos.—Maz. 32:8.

Geeshsha Ayyaanaa Koyiyoogaa

13, 14. Geeshsha ayyaanay Xoossau oottiyaageeta maaddiyoogee waanidi qonccidee?

¹³ Nuuyyo imettida hara oosuwaa woykko sibikate oosuwaa oottanau gidi baynnabadan nuussi siyettikko shin? Nuuni a oosuwaa oottanau eraanne abbiyaa dichana mala ba ayyaanaa immanaadan Yihoowa oychana koshshees. (Luqaasa 11:13 nabbaba.) Kase eta hanotay woy eta deꞌoy aybanne gido, asay issi oosuwau woykko maatau gidaa kunttanaadan Xoossaa ayyaanay maaddana danddayees. Leemisuwau, henttanchanne aylle gidida Isiraaꞌeelati ola meezee baynnaageeta gidikkokka, Gibxxeppe kiyi simmidi sohuwaara bantta morkketa xoonanaadan Xoossaa ayyaanay maaddiis. (Kes. 17:8-13) Hegaappe simmin takkennan, Baxaaliꞌeelinne Oholiꞌaabi gayttiyo dunkkaaniyaa Xoossay kessido keehippe loꞌꞌiya pilaaniyaadan keexxanaadankka he ayyaanay maaddiis.—Kes. 31:2-6; 35:30-35.

¹⁴ Ha wodiyan deꞌiya Xoossaa ashkkarati xuufiyaa attamiyoogaa doommana koshshido wode, Xoossaa dirijjitiyau koshshiyaabaa oottanaadan he wolqqaama ayyaanay eta maaddiis. He wode he paabirkkaa bollaara xeelliya, Ishaa R. J. Marttini, 1927n oosettidabaa dabddaabbiyan qonccissiis. “Goday bessiya wodiyan ogiyaa dooyiis; attamiyo he gita maashiniyaa waati tokkanaakkonne waatidi an goꞌettanaakko erenna nuuni he maashiniyaa demmida. SHin banttana muleera ayyo immidaageeti kaseegaappe aaruwan bantta qofaanne eraa dichanaadan waatidi maaddanaakko Goday erees. . . . Guutta saaminttaa giddon nuuni he maashiniyaa ootissana danddayida; hanno gakkanaukka oottiiddi deꞌees; ubba a medhidaageetikka qoppibeennabaa oottees.” Hegaadan ba asay wozanappe baaxetiyoogaa hanno gakkanaukka Yihooway anjjiiddi deꞌees.

15. Roome 8:11 paacee gakkiyoogeeta waatidi minttettiyaagaa gidana danddayii?

¹⁵ Yihoowa ayyaanay dumma dumma ogiyan oottees. He ayyaanaa Xoossaa ashkkarati ubbay demmana danddayoosona; he ayyaanay wolqqaama xubiyaa xooni kiyanaadan eta maaddees. Nu bolli gakkiya paacee keehi daridaba milatikko shin? Roome 7:21, 25⁠ninne 8:11n deꞌiya, PHauloosi giidobaappe minttettuwaa demmana danddayoos. Ee, “Yesuusa haiquwaappe denttida Xoossaa Ayyaanai” nuuni ashuwaa amuwaara baaxetiyo baaxiyaa xoonanaadan maaddana danddayees. He qofay xaafettidoy ayyaanan tiyettida Kiristtaanetussa gidikkonne, he baaso siraatay Xoossau oottiya ubbau haniyaagaa. Nuuni ubbay Kiristtoosan ammaniyoogaa oosuwan bessiyoogan, bessenna amuwaa woranau baaxetiyoogaaninne ayyaanaa kaaletuwaa kaallidi deꞌiyoogan deꞌuwaa demmoos.

16. Xoossaa ayyaanaa demmanau nuuni ay oottana bessii?

¹⁶ Nuuni aybanne baaxetennan Xoossay ba ayyaanaa immees giidi qoppana danddayiyoo? Danddayokko. Nuuni ayyaanaa demmanau woossiyoogaa bolli, Xoossaa Qaalaa minnidi xannaꞌana koshshees. (Lee. 2:1-6) Hegaa bollikka, Kiristtaane gubaaꞌiyan Xoossaa ayyaanay deꞌiyo gishshau, nuuni ubbatoo shiiquwan beettiyoogee ‘geeshsha ayyaanay gubaaꞌiyau giyoobaa siyanau’ koyiyoogaa bessees. (Ajj. 3:6) Qassi, nuuni tamaariyoobaa ashkketettan oosuwan peeshshana koshshees. Leemiso 1:23y: “Ta seeran simmite; be7⁠ite; taani ta eraa [“ayyaanaa,” NW] intte bolli gussana” yaagidi zorees. “Xoossai baassi azazettiyaageetussi” geeshsha ayyaanaa immees.—Oos. 5:32.

17. Xoossay nu oottiyoobaa anjjiyoogaa aybin leemisana danddayiyoo?

¹⁷ Xoossaa anjjuwaa demmanau wozanappe baaxetana koshshiyaaba gidikkonne, Yihooway ba asau palahissidi immido loꞌꞌobau minnidi oottiyoogaa xallay gaaso gidennaagaa hassayite. Nuuni oottiyoobau i immiyo anjjoy kaalettiyoobaa, loꞌꞌo qumay nu bollau goꞌꞌiyo hanotaara geeddarssana danddayoos. Nuuni qumaa miidi appe goꞌettanaadan oottidi Xoossay nu bollaa medhiis. I qumaakka immees. Nu bollau goꞌꞌiyaabay qumaa giddon waanidi deꞌana danddayidaakko erokko; qassi nuuni miyo qumaappe nu bollay wolqqaa waatidi demmiyaakko nuuppe daroti qonccissana danddayokko. He hanotay ubbatoo deꞌiyoogaanne nuuni qumaa miyoogan hegau koshshiyaabaa oottiyoogaa xallaa eroos. Nuuni bollau keehippe koshshiya qumaa miikko, demmiyo goꞌꞌaykka kaseegaappe aadhees. Hegaara issi mala hanotan, Yihooway merinaa deꞌuwaa demmanau nuuni ay oottana koshshiyaakko maaraa kessiis; qassi nuuni he maaraa naaganaadan maaddees. I nuna keehippe maaddiyo gishshau, ayyo galatay bessiyoogee qoncce. Gidikkokka, nuuni anjjuwaa demmanau, Xoossaa ufayssiyaabaanne a sheniyaara moggottiyaabaa oottana koshshees.—Hag. 2:18, 19

18. Neeni ay oottanau murttadii, aybissi?

¹⁸ Intteyyo imettida oosoy ayba gidikkokka wozanappe oottite. Muruta ogiyan polanau ubbatoo Yihoowa woossite. (Mar. 11:23, 24) Intte hegaadan oottiyo wode, “woossiya ubbai” ekkanaagaa ammanettite. (Maa. 7:8) Ayyaanan tiyettidaageeti saluwan “de7⁠uwaa akiliiliyaa” demmiyoogan anjjettana. (Yaaq. 1:12) Yesuusi: “Ta Aawai anjjidoogeetoo, haa yiidi sa7ai merettoosappe hachchi gakkanaashin, intteyyo giigida kawotettaa laattite” yaagiyo wode, Abrahaama zerettaa baggaara anjjuwaa demmanau baaxetiya, Kiristtoosa “hara dorssatikka” ufayttana. (Yoh. 10:16; Maa. 25:34) Ee, “GODAN anjjettidaageeti . . . biittaa laattananne yan merinau de7ana.”—Maz. 37:22, 29.

Qonccissana Danddayay?

• Tumuppe azazettiyoogee ay ay gujjii?

• Xoossaa anjjuwaa demmanau aybi koshshii?

• Nuuni Xoossaa ayyaaanaa waatidi demmana danddayiyoo, qassi i nuna waatidi maaddana danddayii?

[Sinttaa 11n deꞌiya misiliyaa]

Yaaqoobi Yihoowa anjjuwaa demmanau kiitanchaara baaxetiis.

[Sinttaa 11n deꞌiya misiliyaa]

Neenikka hegaadan wozanappe baaxetay?

[Sinttaa 12n deꞌiya misiliyaa]

Xoossaa ayyaanay Baxaaliꞌeelinne Oholiꞌaabi qara oosancha gidanaadan maaddiis