Haggaazuwan Kaseegaappe Qara Gidiyoogaa—Haasayaa Esissiya Qofay Denddiyo Wode Zaariyoogaa

Hegee Keehi Koshshiyoy Aybissee? Neeni wolqqaama bashshay gakkana haniyoogaa eraasa giidi qoppoos. Asay baqatana xayikko hayqqees. Neeni ne shooruwaayyo hegaa yootanau bin, i ‘ooso oyqqaas’ giidi ne yootiyoobaa siyenna. SHin neeni a maaddanau baaxetiyoogaa aggakka. Nu moottan deꞌiya daroti nuuni yootiyoobay shemppo ashshiyaaba gidiyoogaa akeekenna gishshau siyokkona. Nuuni etakko biidi yootiyoobaa siyanau eti wode xayana danddayoosona. (Maa. 24:37-39) Woy eti asay nubaa yootiyo worddobaa siyidi nuna ixxana danddayoosona. (Maa. 11:18, 19) Eti nuuni iita ayfiyaa ayfiya hara haymaanootetuppe dummatennabadan qoppana danddayoosona. (2 PHe. 2:1, 2) Nuuni haasayissiyo wode keettaaway koyennaba gidikko, sohuwaara hidootaa qanxxana koshshenna.

Waatana Danddayiyoo?

Sooppe soo baada haggaazanaappe kase, asay haasayaa esissanau denttiyo qofay awugaakko erada, woygada zaarana danddayiyaakko qoppa.
Keettaaway ne qofaa maayennaba gidikkokka, ashkketettan tobbanau mala. Geella a galatiyoogan hegaadan oottana danddayaasa. Leemisuwau, i haymaanootee deꞌiyo asa gidiyoogaa yootiyaaba gidikko, “Taani neegaadan ayyaanaabaa dosiya uraara gayttana koyaas” yaagana danddayaasa. Keettaawaa qofaa eriyoogee neeni ayyo loytta markkattanau maaddees. Leemisuwau, i ooso oyqqidoogaa yootiyaaba gidikko, “Ee, tuma. SHin taani baanaappe kase neeyyo issibaa immana koyays” gaana danddayaasa. Woy qassi keettaaway siyanau koyennaagaa yootiyaaba gidikko, issi oysha oychana danddayaasa. “Neeni siyanau koyennay haymaanootebeeyye Geeshsha Maxaafaabee?” gaana danddayaasa.
Akeekancha gida. Yihooway asay baassi azazettanaadan wolqqanttennaagaa hassaya. (Zaa. 30:19) Ayyaanaaban ubba asay ba toohuwaa toohuwaa tokkana bessees. (Gal. 6:5) Keettaaway ba qofaa laammanau koyennan ixxikko, aggidi biyoogee loꞌꞌo. A qofaa borennan aggiyoogan, sinttappe hara uri au markkattanaadan hanotaa injjeyoos.—1 PHe. 3:15.

Ha Aginan Hagaa Oottanau Mala:

Issi uri haasayaa essissiya qofaa denttiyo wode aara tobba simmada, biyo wode ayyo hegaappe loꞌꞌo ogiyan woyga zaarana danddayishin attidaakko nenaara haggaaziya uraara tobba.