SHemppuwaa Tammanne Heezza

Deꞌuwaa Xoossaagaa Mala Ogiyan Xeelliyoogaa

Xoossay deꞌuwaa aybidan xeellii?

SHahaaraa kesissiyoogaa Xoossay aybidan xeellii?

Nuuni deꞌuwaa bonchchiyoogaa waatidi bessiyoo?

1. Deꞌoy deꞌiyooba ubbaa medhdhidaagee oonee?

HANANABAA yootiya Ermmaasi: ‘GODAY tumu Xoossaa; i deꞌo Xoossaa’ yaagiis. (Ermmaasa 10:10) Hegaa bollikka, Xoossaa Yihooway deꞌoy deꞌiyooba ubbaa Medhdhidaagaa. Saluwan deꞌiya ayyaana meretati: “Ubbabaa neeni medhdhadasa; qassi ubbabaikka neeni koyidoogaadan haniisinne de7⁠iis” yaagidosona. (Ajjuutaa 4:11) Kawuwaa Daawiti Yihoowa sabbiyo yettan: “De7⁠uwaa pulttoi ne achchan de7⁠ees” yaagiis. (Mazamure 36:9) Hegaa gishshau, deꞌoy Xoossaa imota.

2. Xoossay nuuni deꞌuwan deꞌanaadan koshshiyaabaa ay ay immidee?

² Yihooway nu deꞌuwaassi koshshiyaabaakka immees. (Oosuwaa 17:28) I nuussi maanau qumaa, uyanau haattaa, shemppanau carkkuwaanne deꞌanau biittaa immiis. (Oosuwaa 14:15-17) Yihooway deꞌoy ufayssiyaagaa gidanaadan hegaadan oottiis. SHin deꞌuwan kumetta ufayssaa demmanau, nuuni Xoossaa higgiyaa tamaaridi hegau azazettana koshshees.—Isiyaasa 48:17, 18.

DEꞌUWAU BONCHCHUWAA BESSIYOOGAA

3. Qaayeeli Aabeela woridoogan Yihoowau aybi siyettidee?

³ Xoossay nuuni nuugaakka gido haratu deꞌuwaa bonchchana mala koyees. Leemisuwau, beni Addaamenne Hewaani wode, eta naꞌay Qaayeeli ba kaalo ishaa Aabeela bolli keehippe yiillotiis. Yiilloy a iita nagaran yeggana danddayiyoogaa yootidi, Yihooway Qaayeela seeriis. Qaayeeli he seeraa sheneho giis. I ‘ba ishaa Aabeela bolli denddinne a wori aggiis.’ (Doomettaabaa 4:3-8) Qaayeeli ba ishaa worido gishshau, Yihooway a qaxxayiis.—Doomettaabaa 4:9-11.

4. Xoossay Muuse higgiyan, deꞌuwaa xeellanau bessiya ogiyaa waatidi qonccissidee?

⁴ SHaꞌan qoodettiya layttatuppe guyyiyan, Yihooway Israaꞌeeleti bana ufayssiya ogiyan haggaazanaadan etassi higgiyaa immiis. He higgee hananabaa yootiya Muuse baggaara imettido gishshau, issitoo issitoo Muuse higgiyaa geetettidikka xeegettees. Muuse higgiyaappe issoy: “Asa woroppa” yaagees. (Zaarettido Wogaa 5:17) Israaꞌeeletussi hegee, Xoossay asaa deꞌuwaa xoqqu oottidi xeelliyoogaanne asaykka haratu deꞌuwaa xoqqu oottidi xeellana bessiyoogaa qonccissiis.

5. SHahaaraa kesissiyoogaa aybidan xeellana bessii?

⁵ Yelettibeenna naꞌa deꞌuwaashin woygana danddayettii? Muuse higgee bessiyoogaadan ba aayee uluwan deꞌiya naꞌi hayqqanaadan oottiyoogee bala. Ubba hegaa mala deꞌoykka Yihoowayyo alꞌꞌo. (Kessaabaa 21:22, 23; Mazamure 127:3) Hegaa giyoogee shahaaraa kesissiyoogee nagara giyoogaa.

6. Nu mala asaa nuuni ixxana bessennay aybissee?

⁶ Deꞌuwaa bonchchiyoogee, nu mala asaa deꞌuwaa bessiyaagaadan xeelliyoogaakka gujjees. Geeshsha Maxaafay: “Ba ishaa ixxiya ooninne shemppo woridaagaa; qassi shemppo woridaagan merinaa de7⁠oi bainnaagaa intte ereeta” yaagees. (1 Yohaannisa 3:15) Nuuni merinau deꞌana koyiyaaba gidikko, nu mala asaa ixxiyo ayba hanotanne nu wozanaappe xayssana bessees; hegeekka darotoo dano oosuwau gaasoy ixuwaa gidiyo gishshataassa. (1 Yohaannisa 3:11, 12) Nuuni issoy issuwaa siiqiyoogaa tamaarana koshshees.

7. Deꞌuwaa bonchchennaagaa bessiya meezetuppe amaridaageeti awugeetee?

⁷ Nu huuphe deꞌuwaa bonchchiyoogaa xeelliyaagan shin, woygana danddayettii? Asay hayqqanau koyennaagee erettidaba; shin amaridaageeti ufayttiyoobau giidi hayquwaa kaalettiyaabaa oottoosona. Leemisuwau, daroti ufayssa demmanau giidi tambbuwaa cuwayoosona, gaayyiyaa sarbboosona woy jallissiya xaliyaa goꞌettoosona. Hegeeta malatiyaabati goꞌettiya asaa bolli qohuwaa gattoosona; ubba darotoo woroosona. Hegeeta meeze ootti goꞌettiya uri deꞌuwaa geeshshabadan xeellenna. Hegaa mala oosoy Xoossaa xeelan tunaba. (Roome 6:19; 12:1; 2 Qoronttoosa 7:1) Nu haggaazoy Xoossan ekettiyaagaa gidana mala, hegaa mala oosuwaa aggana bessees. Hegaadan oottiyoogee deexxiyaaba gidikkonne, Yihooway nuussi koshshiya maaduwaa immana danddayees. Qassi nu deꞌuwaa appe ekkido alꞌꞌo imotadan xeellanau nuuni oottiyo baaxiyaa nashshees.

8. Nuuni qoho gattiyaabaappe naagettanau bessiyoy aybissee?

⁸ Nuuni deꞌuwaa bonchchiyaageeta gidikko, nuna qohana danddayiyaabaappe naagettoos. SHeneho giyaageeta gidokko, qassi ufayttiyoobaa koshshan hayquwaa kaalettiyaabaa oottokko. Kaamiyaa naagettidi laaggoos; qassi hanttaara woykko daafan yeggiya ispporttiyaa oottokko. (Mazamure 11:5) Xoossay beni wode, Israaꞌeeletussi immido higgiyan: “Ooratta keettaa keexxiyo wode, xoqqa kaaraappe asi kunddi haiqqin ne oishettennaadan, zemppidi attiyoogaa giigissa” yaagiis. (Zaarettido Wogaa 22:8) He higgiyan deꞌiya baaso siraataara moggottiya ogiyan, issi uri xubetti kunddidi keehi qohettenna mala, ne darkkuwan daarinchchan olli deꞌikko a doonaa loyttada kamma. Neeyyo kaamee deꞌiyaaba gidikko, laaggishin qoho gattennaagaa shaakkada era. Ne keettaa yuushuwan deꞌiyaabay woy ne kaamee, hara ura bolli qoho gattennaadan naagetta.

9. Nuuni deꞌuwaa bonchchiyaageeta gidikko, mehiyaanne doꞌaa waatidi oyqqiyoo?

⁹ Mehe woy doꞌa deꞌo xeelliyaaganshin, woygana danddayettii? Hegeetu deꞌoykka Medhdhidaagau geeshsha. Miyoobaanne maayiyoobaa demmanau woykko qohuwaappe naagettanau, mehiyaa woy doꞌaa woriyoogaa Xoossay diggenna. (Doomettaabaa 3:21; 9:3; Kessaabaa 21:28) Gidikkonne, mehiyau woykko doꞌau qareta xayiyoogeenne coo kaassau eta woriyoogee bala; hegee deꞌuwaa geeshshatettaa bonchchennaagaa bessiyaaba.—Leemiso 12:10.

SUUTTAU BONCHCHUWAA BESSIYOOGAA

10. Deꞌoy suuttaara gayttidaagaa gidiyoogaa Xoossay waatidi qonccissidee?

¹⁰ Qaayeeli ba ishaa Aabeela wori simmin, Yihooway Qaayeelassi: “Ne ishaa suuttai biittaappe taakko waassees” yaagiis. (Doomettaabaa 4:10) Xoossay Aabeela suuttaabaa yootiyo wode, i giiddi deꞌiyoy a deꞌuwaabaa. Qaayeeli Aabeela shemppuwaa worido gishshau, qaxxayettana bessees. Hanotay, Aabeela suuttay pirddaa demmanau Yihoowakko waassiiddi deꞌiyoogaa bessees. Deꞌoy suuttaara gayttidoogaa bessiyaabay, Nohe wode Bashshaa Haattaappe simminkka qoncciis. Bashshaa Haattaappe kase asay mittaa teeraa, ataakilttiyaanne kattaa xallaa mees. Bashshaa Haattaappe simmin, Yihooway Nohessinne a naatussi: “Taani mokkiya dumma dumma kattata intteyyo immidoogaadankka, paxa de7⁠iya woxxi qaaxxiya mereta ubbai intteyyo quma gidana” yaagiis. Gidikkonne Xoossay hegau zawaa wottiiddi: “SHin biron shemppoora [woy, deꞌuwan] de7⁠iya suuttai a giddon de7⁠iyo ashuwaa mooppite” yaagiis. (Doomettaabaa 1:29; 9:3, 4) Yihooway issi meretaa deꞌuwaa a suuttaara issi mala oottidi xeelliyoogee qoncce.

11. Xoossay Nohe wodeppe doommidi, suuttaa ayba ogiyan goꞌettennaadan diggidee?

¹¹ Nuuni suuttaa bonchchiyoogaa bessiyoy a meennaagaana woykko uyennaagaana. Yihooway etau immido higgiyan Israaꞌeeleta azaziiddi: “Israa7⁠eela asaappe . . . ooninne miyo do7a woi kafo shankkatidi worikko, a suuttaa sa7an gussidi, biittaa kammo. . . . Taani Israa7⁠eela asaa, ‘Asho maayida meretaa ubbaa . . . suuttaa mooppite’ yaagaas” yaagiis. (Wogaabaa 17:13, 14) Xoossay 800⁠u gidiya layttaappe kase, mehiyaa suuttaa meennaadan Nohessi koyro immido azazoy he wodiyankka oottiyoogaa aggibeenna. Yihoowa xeelay qoncce: A ashkkarati suuttaa aggidi, mehiyaanne doꞌaa ashuwaa maana danddayoosona. Eti suuttaa saꞌan gussana bessees; hegee he meretaa deꞌuwaa Xoossaassi zaaridi immiyoogaa mala.

12. Geeshsha ayyaanaa baggaara koyro xeetu layttan suuttaa xeelliyaagan imettida, hanno gakkanaashin oottiya azazoy woygiyaagee?

¹² Kiristtaanetussikka hegaa mala azazoy imettiis. Koyro xeetu layttan Yesuusa kaalliyaageetu giddon aawatetta maataa oyqqida kiitettidaageetinne harati, Kiristtaane gubaaꞌiyan deꞌiya ubbay kaallanau bessiya azazoti awugeetakko qofaa qachchanau issippe shiiqidosona. Wurssettan qofaa kuuyiiddi: “Eeqassi yarshshidobaa mooppite; suutta uyoppite [“suuttaappe haakkite,” NW]; sulettida [suuttay ashuwaappe gukkibeenna] mehe asho mooppite; shaaramuxoppite. Ha koshshiyaageetuppe attin, hara tooho inttena toossenna mala, nuuninne Geeshsha Ayyaanai yohuwaa maayida” yaagidosona. (Oosuwaa 15:28, 29; 21:25) Yaatiyo gishshau nuuni, ‘suuttaappe haakkana’ bessees. Xoossaa xeelan, nuuni hegaadan oottiyoogee eeqaappenne shaaramuxiyoogaappe haakkiyoogaa keena keehi koshshiyaaba.

13. Suuttaappe haakkanaadan imettida azazoy suutta xapho baggaara suuttaa ekkiyoogaa gujjiyoy aybissakko leemisuwan yoota.

¹³ Suuttaappe haakkanaadan imettida azazoy, suuttaa suutta xapho baggaara ekkiyoogaa gujjii? Ee. Leemisuwau: Issi dottoree mattoyiya ushshaappe haakkana mala neeyyo yootiis giidi qoppoos. Hegaa giyo wode, neeni ushshaa uyiyoogaa xallaappe attin, suutta xapho baggaara a ekkiyoogaappe haakkiyoogaa gujjenna gaanau danddayettii? Hegaadaana gidennaagee qoncce! Hegaattuwaakka, suuttaappe haakkiyoogaa giyoogee, suuttaa ayba ogiyankka nu bollaa giddo gelissennaagaa giyoogaa. Hegaa gishshau, suuttaappe haakkanaadan odettida azazoy, ooninne suutta xapho baggaara nuussi suuttaa immanaadan eeno gookko giyoogaa.

14, 15. Dottoreti suutta xapho baggaara suuttaa ekkana bessiyoogaa issi Kiristtaanessi yootikko, i ay zaaro immana bessii? Aybissi?

¹⁴ Issi Kiristtaanee daafabi gakkin keehi qohettidaba woykko shukettanaadan oottiya harggiyan oyqettidaba gidikkoshin? Dottoreti i suutta ekkana bessees; hegee xayikko hayqqees giidosona yaagidi qoppoos. He Kiristtaanee hayqqana koyennaagee qoncce. Xoossaappe ekkido alꞌꞌo imota gidida ba deꞌuwaa ashshanau, suuttaa bala ogiyan goꞌettiyoogaa gujjenna, hara ogiyan xalettana danddayees. I hegaa mala akkamoy deꞌiyaaba gidikko koyidi, suuttaa koshshennan akkamettiyo dumma dumma ogetun goꞌettana danddayees.

¹⁵ Issi Kiristtaanee ha siraatan guutta wodiyau ba deꞌuwaa adussanau giidi Xoossaa higgiyaa kanttanee? Yesuusi: “Ba shemppuwaa ashshana koyiya urai bashshana; shin ba shemppuwaa ta gishshau bashshiya urai ashshana” yaagiis. (Maatiyoosa 16:25) Nuuni hayqqanau koyokko. SHin Xoossaa higgiyaa kanttidi ha siraatan nu deꞌuwaa adussanau malikko, merinaa deꞌuwaa xayana danddayoos. Yaatiyo gishshau, Xoossaa higgee suure gidiyoogau nuuyyo deꞌiya ammanuwaa minttiyoogee eratetta; nuuni aybiininne hayqqikko Deꞌo-Immiyaagee dendduwaa wode nuna hassayidi alꞌꞌo imota gidida deꞌuwaa zaarettidi nuussi immanaagaa ammanettana koshshees.—Yohaannisa 5:28, 29; Ibraawe 11:6

16. Suuttaa xeelliyaagan Xoossaa ashkkarati ay oottanau murttidonaa?

¹⁶ Ha wodiyan Xoossaassi ammanettida ashkkarati, suuttaa xeelliyaagan a azazuwaa kaallanau murttidosona. Eti ayba ogiyaaninne suutta uyokkona woy mookkona. Woy qassi sahettidi akkamettiyo wode suuttaa ekkokkona.a Suuttaa Medhdhidaagee etassi aybippenne aadhdhiya loꞌꞌobaa eriyoogaa ammanettoosona. Hegaa neenikka ammanay?

SUUTTAA BESSIYAAGAADAN GOꞌETTIYO MEXI ISSI OGIYAA

17. Xoossaa Yihoowan ekettiyaagaa gidida, beni wode Israaꞌeeleti suuttaa goꞌettiyo mexi issi ogee aybee?

¹⁷ Suuttaa goꞌettanau bessiya mexi issi ogiyaa Muuse higgee qonccissidi bessiis. Yihooway beni wode Israaꞌeeleti baassi goynnanau bessiya ogiyaa xeelliyaagan: “Asho maayida ubbaa de7⁠oi a suuttaa giddon de7⁠ees; suuttaikka . . . nagaraa atto giissiyaagaa gidiyo gishshau, intte nagaraa atto giissanaadan, taani intteyyo yarshshiyoosaa bollan yarshshanaadan immaas” yaagidi azaziis. (Wogaabaa 17:11) Israaꞌeeleti nagaraa oottiyo wode, issi mehe immidinne gayttiyo dunkkaaniyan woy guyyeppe Xoossaa beetamaqidasiyan deꞌiya yarshshiyoosan he mehiyaa suuttaappe amaridaagaa yarshshidi atotettaa demmana danddayoosona. Suuttaa goꞌettana bessiya mexi issi ogee hegaa mala yarshshuwaa wode goꞌettiyoogaa.

18. Yesuusa suuttay gukkidoogan, nuuni ayba goꞌꞌaanne anjjuwaa demmana danddayiyoo?

¹⁸ Tumu Kiristtaaneti Muuse higgiyaa garssan deꞌokkona; yaatiyo gishshau, mehe yarshsho shiishshokkonanne mehiyaa suuttaa yarshshokkona. (Ibraawe 10:1) Gidoppe attin, Israaꞌeeleti beni yarshshiyoosaa bolli suuttaa goꞌettiyoogee Xoossaa naꞌaa Yesuus Kiristtoosa alꞌꞌo yarshshuwaa malaatees. Nuuni ha maxaafau SHemppuwaa 5n tamaaridoogaadan, Yesuusi ba suuttay yarshsho gididi gukkanaadan eeno giidi, ba deꞌuwaa nuussi immiis. Hegaappe i saluwaa biidi ba gukkida suuttaa waagaa naaꞌꞌanttennan issitoo Xoossaassi immiis. (Ibraawe 9:11, 12) Hegee nagaraappe atotettaa demmanau baaso gidiisinne nuuni merinaa deꞌuwaa demmana danddayiyo ogiyaa dooyiis. (Maatiyoosa 20:28; Yohaannisa 3:16) Suuttaa goꞌettiyo he ogee ayba keehi goꞌꞌiyaabee! (1 PHeexiroosa 1:18, 19) Nuuni atotettaa demmana danddayiyoy gukkida Yesuusa suuttan ammaniyoogaa xallaana.

19. Nuuni ubba asa suuttan ashettennaadan ay oottana bessii?

¹⁹ Xoossaa Yihooway nuuyyo siiquwan immido deꞌuwaa imotay ay keena a galatanaadan oottiyaabee! Qassi hegee Yesuusa yarshshuwaa baggaara merinaa deꞌuwaa demmiyo injjee deꞌiyoogaa haratussi yootanaadan nuna denttettana bessennee? Nu mala asaa deꞌuwaassi Xoossaagaadan qoppiyoogee, nuuni mishettidinne wozanappe koyidi hegaa oottanaadan denttettees. (Hizqqeela 3:17-21) Nuuni ha aawatettaa zirxxayidi poliyaaba gidikko, PHauloosaagaadan: “Intteppe issi urai bayikkokka taani hegan gelennaagaa [“a suuttan ashettennaagaa,” NW] hachchi intteyyo geeshshada yootais. Aissi giikko, Xoossai oottanau qoppidobaa ubbaa intteyyo ainne ashshennan yootaas” gaana danddayoos. (Oosuwaa 20:26, 27) Asaassi Xoossaabaanne a halchchuwaabaa yootiyoogee nuuni deꞌuwaanne suuttaa xoqqu oottidi xeelliyoogaa bessiya misee baynna oge.

[Tohossa qofaa]

GEESHSHA MAXAAFAY TAMAARISSIYOOBAA

▪ Deꞌoy Xoossaa imota.—Mazamure 36:9; Ajjuutaa 4:11.

▪ Yelettibeenna naꞌa deꞌoy Xoossaa xeelan alꞌꞌo gidiyo gishshau, shahaaraa kesissiyoogee bala ooso.—Kessaabaa 21:22, 23; Mazamure 127:3.

▪ Nuuni deꞌo qohiyaabaa oottennaagaaninne suuttaa uyennaagan woy meennaagan deꞌuwaa bonchchiyoogaa bessoos.—Zaarettido Wogaa 5:17; Oosuwaa 15:28, 29.

[Sinttaa 126n diya misiliyaa]

NUUNI DEꞌUWAA BONCHCHIYOOGAA BESSIYOY

▪ yelettibeenna naꞌa woriyaaba oottennaagaana

▪ nu mala asaa ixxiyoogaa bessiya ayba hanotaanne nu wozanaappe xayssiyoogaana

▪ iita eeshshaa aggiyoogaana

[Sinttaa 131n diya misiliyaa]

Dottoree ushshaappe haakkanaadan neeyyo yootiyaakko, suutta xapho baggaara immiyo ushshaa neeni ekkanau bessii?

[Sinttaa 132n diya misiliyaa]

Neeni deꞌuwaanne suuttaa bonchchiyoogaa waatada bessana danddayay?