Hananabaa Yootidaageetu Leemisuwaa Kaallite—Naahooma
1. Naahooma maxaafaappe ay tamaariyoo?
1 Naahoomi kasetidi yootidoogaadan, Nanawe katamay xayishin attidabay Yihooway ba morkketu bolli haluwaa kiyiya Xoossa gidiyoogaa, qassi ay wolqqaama morkkeenne a eqettana danddayennaagaa bessees. (Naho. 1:2, 6) Naahooma hiraagaa loytti pilggiyoogee haggaazuwan nuna keehi maaddana danddayees.
2. Sabbakiyo wode ubbatoo asaa ufayssiyaabaa ay yootana danddayiyoo?
2 Asaa Minttettiyaabaa Yoota: Coo xeelliyo wode, Naahooma maxaafay otorettiya Asooretu waana katamay Nanawe xayanaagaa qonccissiya pirdda kiita xalla yootiyaaba milatees. (Naho. 1:1; 3:7) Gidikkokka, he wode Yihoowa asawu hegee ufayssiya mishiraacho gidiis. A sunttawu “Minttettiyaagaa” giyo birshshettay deꞌiyo Naahoomi eta morkke gidida kawotettay matan xayanaagaa yootidi ba asaa minttettiis! Qassi i Yihooway “metuwaa gallassikka baqati attiyo soho” gidiyoogaa yootiis. (Naho. 1:7) Nuunikka sabbakiyo wode asawu mishiraachuwaa yootoos; qassi eti Yihoowa baqati attiyo soho oottanaadan maaddoos.—Naho. 1:15.
3. Tamaarissiyo wode leemisuwaa goꞌettiyoogan Naahooma leemisuwaa waati kaallana danddayiyoo?
3 Asawu Leemisuwan Yoota: Naahoomi Nanawe xayoy Asoore asay xayssido Gibxxe katamaa Tebeesa (No-amon) mala gidanaagaa yootanaadan Yihooway ba geeshsha ayyaanan a denttettiis. (Naho. 3:8-10) Nuunikka ha iita alamee xayanaagaa asawu yootiyo wode, Yihooway ba gelido qaalaa aybanne ashshennan ubbabaa poliyaagaa gidiyoogaa bessiya Geeshsha Maxaafaa hiraagata loytti yootana danddayoos. Leemisuwawu, Baabiloonetinne Meedoonati Nanawe katamaa olanawu 632 K.K. yiido wode, wolqqaama iray bukkin Xegiroosa shaafay kixxiis; hegee qassi wolqqaama gidida Nanawe dirssay kunddanaadan oottiis. Yihooway kasetidi yootidoogaadan, Nanawe katamay sohuwaara oyqetti aggiis.—Naho. 1:8; 2:6.
4. Haggaaziyo wode harati akeekanawu waayettenna ogiyan waati tamaarissana danddayiyoo?
4 Qonccenne Akeekanawu Wayssennabaa Yoota: Naahoomi akeekanawu wayssennanne ufayssiya ogiyan xaafiis. I gaanawu koyidobay qoncce. (Naho. 1:14; 3:1) Hegaadan, nuunikka harati akeekanawu waayettenna ogiyan haasayana bessees. (1 Qor. 14:9) Haggaazuwan asaara koyro gayttiyo wode, neeni etakko ayssi biidaakko yoota. Geeshsha Maxaafaa xannaꞌissiyo wode, eti Yihoowanne Geeshsha Maxaafaa ammananaadan, qassi eti tamaaridobaa waatidi oosuwan peeshshana danddayiyaakko akeekanaadan maadda.—Roo. 10:14.
5. Naahooma hiraagay nuna ammanttiyaabaa ay yootii?
5 Yihoowa qaalay polettennan attennaagaa Naahoomi ammaniyoogee a sunttan xaafettida maxaafan qoncciis. Seexaanaa alamee xayanawu matattido ha wodiyan, “Metoikka naa77antto denddenna” yaagiya qofay nuna keehi minttetees.—Naho. 1:9.