Oyshaa Saaxiniyaa
◼ Naati ayyaanaaban kayma gidanawu ay tamaarana koshshii?
Kiristtaaneti bantta naata Yihoowa “seeraaninne zoriyan” dichchanawu baaxetoosona. (Efi. 6:4) Leemisuwawu, yelidaageeti ubba wode gallassaa xiqisiyaa bantta naatuura issippe tobbiyoogee keehi goꞌꞌiyoogaa akeekoosona. So asaa goynuwaa omarssinne hara wodetun so asay biiduwaa beꞌidi, beꞌidobaa issippe tobbees; Yelagati Oychiyo Oyshaa giyo maxaafaappe issi issi qofaa tobbees; qassi Geeshsha Maxaafan deꞌiya issi taarikiyaa ootti-besuwan shiishshees; woy haggaazuwawu meezetees. SHin, naati “wozannaama asa timirttiyau sinttau” baana mala eti Geeshsha Maxaafan deꞌiya ciimma tumaa tamaarana bessees.—Ibr. 6:1.
Haggaaziyo wode demmiyo asaa nuuni ay tamaarissiyaakko qofaa. Nuuni asaa koyro haasayissiyo wode woykko zaarettidi bi oychiyo wode, Tumuppe Geeshsha Maxaafay Tamaarissiyoy Aybee? giyo maxaafaa goꞌettidi xinaatiyaa doomissanawu maloos. He maxaafaa xannaꞌissi wurssidi, ‘Xoossaa Siiquwan Deꞌa’ giyo maxaafaa xannaꞌissoos. Ayssi? Geeshsha Maxaafay Tamaarissiyoy giyo maxaafay tumawu koyro timirttiyaa eranawu maaddees. Qassi “Xoossaa Siiquwan” giyo maxaafay Geeshsha Maxaafaa maaraa galla galla nu deꞌuwan waatidi polanaakko eranawu maaddees. Ha naaꞌꞌu maxaafata xannaꞌiyoogee izaawu Kiristtoosan “xaphuwaa yeddidi” deꞌanaadaaninne ‘ammanuwan minnanaadan’ maaddees. (Qol. 2:6, 7) Ha maxaafati nu naatakka hegaadan maaddokkonaa? Naatikka wozuwaabaa, Xoossaa Kawotettaabaanne hayqqidaageeti ayba hanotan deꞌiyaakko tamaarana koshshees. Naati Xoossay tuggaa paqqadidoy aybissakko, qassi ha alamiyaa wurssetta gallassata waati shaakki erana danddayiyaakko akeekana koshshees. Qassi Yihoowa Markkati tumaa tamaarissiyoogaa eti ammanana koshshees. Yelagati Geeshsha Maxaafaa maaraa akeekana, qassi bantta akeekaa abbiyaa waati loohissana danddayiyaakko erana koshshees. (Ibr. 5:14) Yelidaageeti bantta naatu hanotaanne eti ay keenaa akeekiyaakko erana bessees. SHin daro naati guutta naatettaappe doommidi Geeshsha Maxaafan deꞌiya ciimma tumaa akeekana danddayoosona.—Luq. 2:42, 46, 47.
Yelidaageeta maaddiya, Geeshsha Maxaafay Tamaarissiyoy giyo maxaafaappe giigida, xannaꞌanawu maaddiya qofay jw.org Weyb sayttiyan kiyana. So asay hegaa nu Weyb sayttiyan demmana danddayees. Sinttappe “Xoossaa Siiquwan” giyo maxaafaappe xannaꞌanawu maaddiya hara qofay giigana. Attamettida ha maxaafata goꞌettana danddayiyoogeekka qoncce. Yelidaageeti So Asaa Goynuwaa omarssan tobbiyo wode, bantta naatuppe issuwaa xannaꞌissiyo wode woy bantta naꞌay buzo xinaatiyaa xannaꞌanaadan loohissiyo wode hegaappe amarida qofaa goꞌettana danddayoosona.