Haggaazuwan Kaseegaappe Qara Gidiyoogaa—Hanqqettiya Urawu Zaariyoogaa

Hegee Keehi Koshshiyoy Aybissee? Nuuni haggaaziyo wode demmiyo daro asay ashkke. SHin, Yesuusi amarida asay nuna ixxanaagaa yootiis. (Yoh. 17:14) Hegaa gishshawu, hanqqettiya uri nunaara gayttikko, garamettana bessenna. Hegaa mala uraara gayttiyo wode, nuuni a sunttan xeesettiyo Yihoowa ufayssiya ogiyan zaaranawu koyoos. (Roo. 12:17-21; 1 PHe. 3:15) Yaatiyoogee hanotay yaa iitennaadan maaddana danddayees. Hegee keettaawaayyoonne hara beꞌiya urawu markka gidana; qassi haroode Yihoowa Markkati yootiyoobaa eti siyanaadan oottees.—2 Qor. 6:3.

Hegaa Waatidi Oottana Danddayiyoo?

Woppu giite; qassi loꞌꞌo eeshshaa bessite. Hegee he hanotay maarattanaadan maaddees. Keettaaway hanqqettidoy intte bollaana giidi qoppoppite. (Era. 7:9) I hanqqettidoy ba bolli gakkiya metuwaa gishshataassa woy intte injjetenna saatiyan biido gishshataassa gidana danddayees. I hanqqettidoy nuuni yootiyo mishiraachuwaa gaasuwan gidikkokka, darotoo i hegaadan haniyoy cimettido gishshataassa gidana danddayees.—2 Qor. 4:4.
Kehanne liiqo qaalan zaarite. (Lee. 15:1) Intte i xiskkuwaappe denddanaadan oottidetii woy i oottishin kelttiyaa gelidetii? Nuuni mishiraachuwaa yootanawu biido gishshawu mooraas gaana xayikkonne, intte injjetenna saatiyan biido gishshawu intte huuphiyaa kawushshidi atto gaanaadan oychana danddayeeta. I hanqqettidoy nubaa worddobaa siyido gishshataassee? Hegaassa gidikko, hagaadan gaana danddayeeta: “Neeni hanqqettidoy aybissakko akeekaas. Gidoppe attin, neeni nubaa siyidobay likke milatenna. Taani neeyyo qonccissada yootoo?” I nuuni ammaniyoobaappe issibaa, hegeekka bohiyoogaa woy suuttaara gayttidabaa eqettii? Hagaadan gaana danddayeeta: “Ne qofaa akeekaas. Hegee qofissiyoogaa haratikka yootoosona. Hegee Geeshsha Maxaafay tamaarissiyoobaa gidiyoogaa taani nena bessoo?”
He uri keehi hanqqettikko, zaaranawu malennan aggidi biyoogee loꞌꞌo gidana danddayees. I Yihoowa Markkati zaarettidi yeennaadan yootikko, intte i koyiyoobaa bonchanaagaa yootana danddayeeta.

Ha Aginan Hagaa Oottanawu Mala:

Intte Soo Asaa Goynuwaa omarssan hegaa meezetite.
Hanqqettida keettaawaappe shaahetti simmidi, hegaappe loꞌꞌo ogiyan woyga zaarana danddayishin attidaakko nenaara haggaaziya uraara tobba.