SHaaho 5
Deꞌoy Gita Halchuwan Merettiis
1 Saꞌaynne an deꞌiyaabay merettido hanotay, Medhidaagee siiqiyaanne nuuyyo qoppiya Xoossa gidiyoogaa bessees. A Qaalay Geeshsha Maxaafaykka i nuuyyo qoppiyaagaa gidiyoogaa bessees; Geeshsha Maxaafay, Nuuni saꞌan deꞌiyoy aybissee? qassi, Nuuni sinttappe waananee? giya oyshatuyyo qoncce zaaruwaa yootees.
2 Ha oyshatu zaaruwaa eranau nuuni Geeshsha Maxaafaa pilggana koshshees. Xoossaa Qaalay hagaadan gees: “Intte a koyikko, i intteyyo beettana; shin intte a aggikko, ikka inttena aggana.” (2 Hanidabaa Odiya 15:2) Yaatin, Xoossaa Qaalaa pilggiyoogee i nuussi halchidobaa ay qonccissii?
Xoossay Asaa Medhidoy Aybissee?
3 Xoossay saꞌaa medhidoy asaa naatussa gidiyoogaa Geeshsha Maxaafay yootees. Hegaara gayttidaagan Isiyaasa 45:18y, Xoossay ‘asi deꞌanaadaanappe attin, biittaa coo medhibeennaagaa’ yootees. Xoossay asaa naati coo deꞌanaassa xallau gidennan, bantta deꞌuwan kumetta hanotan ufayttanaadan, etau koshshiya ubbabaa biittan medhiis.—Doomettaabaa, shemppo 1nne 2.
4 Xoossay koyro asata, Addaamanne Hewaano medhidoogaa, qassi i asaa naatuyyo ay halchidaakkokka ba Qaalan yootiis. I hagaadan giis: “Asa nu leemisuwan nuna milatissidi ane medhdhoos; medhdhin eti abbaa moliyaa, saluwaa kafuwaa, [kumetta biittaanne] biittaa bolli woxxi qaaxxiya mereta ubbaa haarona.” (Doomettaabaa 1:26) Asay “kumetta biittaanne” biittaa bolli deꞌiya mereta ubbaa haarana mala merettiis.
5 Xoossay Giddo bagga Arshshon, Edene giyoosan aaho ataakiltte sohuwaa giigissiis. Yaatidi, “bitanee Edene Gannatiyaa oottana malanne naagana mala, GODAI Xoossai a efiidi wottiis.” Koyro azinaynne machiyaa miyo ubbabay gannatiyan deꞌees. Gannatiyan “xeellanau lo77iya, maanaukka mal77iya ubba qommo” mittay, hara ataakilttee, qassi daro qommo meheenne doꞌay deꞌees.—Doomettaabaa 2:7-9, 15.
6 Koyro azinaynne machiyaa polo gididi merettidosona; yaatiyo gishshau, harggokkona, ceeggokkona woy hayqqokkona. Etau hara eeshshay, leemisuwau koyidobaa dooriyo maataykka imettiis. Eti ayba hanotan merettidaakko Doomettaabaa 1:27y kaallidi deꞌiyaagaadan yootees: “Xoossai asaa ba leemisuwan medhdhiis; i a Xoossaa leemisuwan medhdhiis; i eta attumaasanne maccaasa medhdhiis.” Nuuni Xoossaa leemisuwan merettido gishshau, asatettaaranne guuggiyaara gayttida eeshshatu xalla gidennan, kandduwaabaaranne ayyaanaabaara gayttida eeshshati imettidosona; nuuni tumuppe ufayttanau koyiyaaba gidikko, hegau koshshiyaabaa demmana bessees. Nuuyyo koshshiya qumaa, haattaanne carkkuwaa gujjin, harabaa ubbaa Xoossay giigissiis. Yesuus Kiristtoosi giidoogaadan, “asi Xoossai haasayiyo qaala ubban de7anaappe attin, oitta xalaalan de7enna.”—Maatiyoosa 4:4.
7 Qassi, Xoossay koyro azinaynne machiyaa Edenen deꞌiyo wode, “Yelettite; corattite; ha sa7aa [kumite]” yaagidi etau gita oosuwaa immiis. (Doomettaabaa 1:28) Hegaa gishshau, eti polo naata yelidi dichana danddayoosona. Qassi asaa naati coratti corattidi biyo wode, Edene gannatiyaa zawaa aassiyo ufayssiya oosuwaa oottana danddayoosona. Wurssettan, kumetta saꞌay gannate gidin, polo asay merinau ufayttiiddi an deꞌanaadan meretiis. Ha ubbabaa giigissoogaappe guyyiyan, “Xoossai ba medhdhido ubbabaakka xeelliis; xeellidi daro lo77o gididoogaa be7iis” yaagidi Geeshsha Maxaafay yootees.—Doomettaabaa 1:31; Mazamure 118:17kka xeella.
8 Asaa naati bantta haariyo biittaa banttana goꞌꞌiya ogiyan goꞌettana danddayoosona. SHin eti bessiya ogiyan goꞌettana koshshees. Asaa naati biittaa loytti naagana besseesippe attin, moorana bessenna. Ha wodiyan nuuni beꞌiyo, saꞌay moorettiyo hanotay Xoossaa shene gidenna; hegaadan oottiya asati deꞌuwan deꞌiyaabati saꞌan merettido halchuwaara phalqqettiyaabaa oottoosona. Geeshsha Maxaafay ‘saꞌaa xayssiyaageeta Xoossay xayssanaagaa’ yootiyo gishshau, eti qaxxayettana.—Ajjuutaa 11:18.
Xoossaa Halchoy Laamettibeenna
9 Hegaa gishshau, Xoossay koyroppe doommidi, polo gidida asaa naati gannate saꞌan merinau deꞌanaadan halchiis. Haꞌꞌikka a halchoy laamettibeenna! He halchoy polettiyoogee attenna. Geeshsha Maxaafay hagaadan gees: “Ubbaappe Wolqqaama GODAI hagaadan yaagidi caaqqiis; ‘Taani halchchidoogaadan hanana; taani qoppidoogaadankka polettana.’” “Taani giidoogaa taani polana; taani halchchidobaakka taani oottana.”—Isiyaasa 14:24; 46:11.
10 Sinttappe hananaban hidootaa wottanau koyida issi bitaniyau, Yesuus Kiristtoosi, “Neeni tanaara gannatiyan de7ana” giido wode, Xoossay saꞌaa zaarettidi gannate oottiyo halchuwaabaa yootiis. (Luqaasa 23:43) Kiitettida PHeexiroosikka, “Nuuni Xoossai immana giido ooratta saluwaanne [saluwan uttidi ayssiya ooratta haaruwaa] ooratta sa7aa [saꞌan deꞌana asaa naatu ooratta maabaraa] xilloi de7anasaa naagoos” yaagido wode, matan yaana ooratta alamiyaabaa yootiis.—2 PHeexiroosa 3:13.
11 Mazamuraawiyaa Daawitikka matan yaana ooratta alamiyaabaanne hegee woqqu wodiyau gamꞌꞌanaakko yootiis. I kasetidi, “Xilloti biittaa laattananne yan merinau de7ana” yaagidi yootiis. (Mazamure 37:29) Yesuusikka, “Ashkketi anjjettidaageeta; aissi giikko, eti sa7aa laattana” yaagidoy hegaassa.—Maatiyoosa 5:5.
12 Iitatetti, danoy, harggee, kayyoynne sahoy ubbi deꞌenna saꞌan gannatiyan merinau deꞌiyoogee ayba ufayssiya hidootee! Ha gita halchuwaa xeelliyaagan Geeshsha Maxaafan wurssetta maxaafay, Xoossay yootido hiraaga Qaalaa xaaxi waaxidi hagaadan gees: “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.” Qassikka gujjidi hagaadan gees: “Araatan uttidaagee, ‘Taani ubbabaa ooraxissais’ yaagiis. Qassikka zaarettidi tana, ‘Taani haasayiyoogee ammanettiyaagaanne tuma gidiyo gishshau xaafa.’”—Ajjuutaa 21:4, 5.
13 Ee, Xoossay gitabaa halchiis. He halchidobay, ba giidobaa oottana danddayiya, qassi oottiya Xoossay kasetidi yootidoogaadan ehiyo, xilloti deꞌana ooratta alame, giishin merinau deꞌiyo gannate. Yihooway “haasayiyoogee ammanettiyaagaanne tuma.”
[Oyshata]
1, 2. Xoossay nuussi qoppiyoogaa waati erana danddayiyoo, deꞌuwaa xeelliyaagan denddiya oyshatu zaaruwaa nuuni awuppe koyana koshshii?
3. Xoossay saꞌaa medhidoy aybissee?
4. Xoossay koyro asata medhidoy aybissee?
5. Koyro azinaanne machiyo Xoossay awan wottidee?
6. Asay merettiyo wode asatettaaranne guuggiyaara gayttidaagan ay mala eeshshay imettidee?
7. Koyro azinaunne macheessi imettida oosoy aybee?
8. Asaa naati biittaa waati oyqqana koshshii?
9. Xoossaa halchoy polettanaagaa nuuni ammanettiyoy aybissee?
10, 11. Gannatiyaa xeelliyaagan Yesuusi, PHeexiroosinne mazamuraawiyaa Daawiti woygidonaa?
12, 13. Xoossay asaa naatuyyo halchido gitabaa qanttan yoota.
[Sinttaa 21n deꞌiya misiliyaa qonccissuwaa]
Xoossay asaa naati saꞌan gannatiyan merinau deꞌanaadan halchiis. He halchoy haꞌꞌikka laamettibeenna
[Sinttaa 22n deꞌiya misiliyaa qonccissuwaa]
Keran deꞌiyo keettaa mooriya asata keettaa goday qaxxayana danddayees