SHaaho 6

Tuggaynne Naaqoy Hagaa Keeni Daridoy Aybissee?

¹ Ubbaappe Bolla Xoossay polo gidida asay saꞌan gannatiyan merinau deꞌanaadan halchidabanne a halchoy haꞌꞌikka laamettibeennaba gidikko, saꞌay haꞌꞌi gannate gidennay aybissee? Qassi, asay daro xeetu layttau tuggaynne naaqoy gakkishin deꞌidoy aybissee?

² Asaa naati olay, kawo haaruwaa woraajjoy, huqqunnay, naaqo oosoy, hiyyeesatettay, daafabay, harggeenne hayqqoy kaalettiyo metuwan waayettiiddi deꞌidosona. Suure asatu bolli hegaa mala keehi iitabay aybissi gakkii? Xoossaayyo gita wolqqay deꞌiyaaba gidikko, ha daro tuggaa shaꞌan qoodettiya layttau coꞌꞌu giidi xeellidoy aybissee? Xoossay saluwaanne saꞌaa loytti giigissidi, maaran mankkan deꞌanaadan oottidaba gidikko, saꞌan maaray mankkay xayiyo wode coꞌꞌu giidi xeelliyoy aybissee?

Leemisuwaa

³ Saꞌan maaray mankkay xayiyo wode Xoossay coꞌꞌu giidi xeelliyoy aybissakko, ane issi leemisuwaa beꞌoos. Wora giddon hemettaydda issi keettaa demmidabadan qoppa. He keettaa neeni loytta xeelliyo wode, keehi moorettidoogaa akeekaasa. Maskkootee meqqiis, korniisee keehi daahettiis, barandday olla xalla, penggee issi maaxafe xallan oyqettiis, qassi so giddon deꞌiya ubbabay gatiyaa xayi uttiis.

⁴ Ha ubbabay moorettido gishshau, ha keettau pilaaniyaa giigissidi keexxida erancha uri baawa gaada qoppay? Keettay maaraa mankkaa xayidoogee, ooninne keexxennan bau yiis gaada neeni qoppanaadan oottii? Woy issi uri pilaaniyaa kessidi keexxiis gaada qoppiyaaba gidikko, he uri eri baynnanne yuushshi qoppenna asa gaada qoppay?

⁵ Neeni he keettay keexettido hanotaa loytta xeelliyo wode, koyro loꞌꞌo hanotan loytti qoppidi keexxidoogaa akeekaasa. SHin haꞌꞌi keehi moorettidi laalettana hanees. He hanotaappe ay akeekana danddayiyoo? (1) Keettaa goday hayqqidoogaa, (2) i loytti keexxidaba gidikkokka, ba keettaa aggi bayidoogaa, woy (3) ba keettaa loytti oyqqenna uraayyo amarida wodiyau keraa immidoogaa akeekoos. Ha saꞌaa xeelliyaagan hanotay heezzanttan deꞌiya qofaa mala.

Ayba Metoy Merettidee?

⁶ Asay tuggatanaadan woy hayqqanaadan Xoossay halchibeennaagaa Geeshsha Maxaafan beni xaafettidabaappe akeekoos. Asaa naatu koyro aawanne aayo gidida, Addaameenne Hewaana Xoossaayyo azazettibeenna gishshau hayqqidosona. (Doomettaabaa, shemppo 2nne 3) Eti Xoossaayyo azazettibeenna gishshau, a sheniyaa oottiyoogaa aggidosona. Xoossay banttana naagana mala koyibookkona. Eti yaatiyoogan, ‘deꞌuwau pultto’ gidida Xoossaara banttau deꞌiya dabbotay duuxxanaadan oottidosona.—Mazamure 36:9.

⁷ Buddeenaa bashiyaa korinttiyaara gattiyo sookeetee shodettiyo wode, he bashee irxxi irxxi biidi sasiyoogaadan, Addaamenne Hewaani bollaynne guuggee mooretti mooretti biis. Hegaa gishshau, abbee wuri wuri bin eti ceeggidi, wurssettan hayqqidosona. SHin hayqqidi waanidonaa? Eti merettidoy biittaa baanaappe gidiyo gishshau, ‘baanau simmidosona.’ Eti a higgiyau azazettennaba gidikko ‘tumu hayqqanaagaa’ Xoossay etau yootiis.—Doomettaabaa 2:17; 3:19.

⁸ Addaamenne Hewaani xalla gidennan, eta zeretta ubbay, asaa naati ubbay hayqqoosona. Aybissi giikko, ubba meretatun akeekiyoogaadan, naati banttana yelidaageetu eeshshaa laattoosona. Asaa naati ubbay nu koyro aawaappenne aayeeppe nagaraanne hayquwaa laattidosona. Roome 5:12y hagaadan gees: “Hegaa gishshau, nagarai ha sa7aa issi asa [asaa naatu aawaa Addaama] baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido [laattido] gishshau, haiqoi asa zare ubbaa gakkiis.” Asay nagaraanne hayquwaa meezetido gishshau, issoti issoti hegee asau meretan deꞌiyaabanne mule attennaba giidi qoppoosona. SHin koyro bitaneenne machiyaa merinau deꞌana mala, qassi hegaadan deꞌanau koyiya asa gididi merettidosona. Daro asay daro deꞌennan hayqqiyo gishshau, keehi azzaniyoy hegaassa.

Hagaa Keeni Takkidoy Aybissee?

⁹ Asaa naati bantta sheniyaadan deꞌiyoogaa Xoossay hagaa keena wodiyau coꞌꞌu giidi xeelliyoy aybissee? Hagaa keena keehi daro wodiyau i tuggaa paqqadidoy aybissee? Issi gaasoy, ‘Haarana bessiyay oonee? Asaa naata Xoossay haarana koshshiiyye, woy eti Xoossaappe haakkidi banttana loytti haarana danddayiyoonaa?’ giya gita oyshay denddido gishshataassa.

¹⁰ Asaa naati banttau koyidobaa dooriyo maatay deꞌiyoogeeta gididi merettidosona. Asaa naati, rooboote mala woy, banttau meretan imettidaagaadan deꞌiya mehiyaa woy doꞌaa mala gidokkona. Hegaa gishshau, asaa naati ooyyo oottanaakko doorana danddayoosona. (Zaarettido Wogaa 30:19; 2 Qoronttoosa 3:17) Xoossaa Qaalay, “Ailletettaappe kiyidi, Xoossaa ailledan de7iteppe attin, he ailletettaappe kiyidoogaa iitatetta genttiyoobaa oottoppite” yaagidi zorees. (1 PHeexiroosa 2:16) SHin asaa naatuyyo gita imota gidida, koyidobaa dooridi oottiyo maatay deꞌiyaaba gidikkokka, eti dooridobaa gaasuwan gakkiyaabaa ammanidi ekkana bessees.

¹¹ Addaameenne Hewaana iita dooruwaa dooridosona. Eti Xoossaappe haakkidi deꞌanau dooridosona. Koyro azinaynne machiyaa koyidobaa dooridi oottiyo maataa suure goꞌettennan aggidi makkalido wode Xoossay eta sohuwaara xayssana danddayees. SHin hegee, Xoossay asaa naata haarana bessi bessennee giya oyshaa zaarenna. Koyro azinaynne machiyaa Xoossaappe haakkidi deꞌanau koyido gishshau, ‘Hegaadan deꞌiyoogee ufayssiya giiga deꞌuwaa deꞌanaadan ootti?’ giya oyshaayyo zaaro demmana bessees. Qassi he zaaruwaa demmanau, eta naata gujjin koyro asati bantta dooridoogaadan deꞌana mala paqqadana bessees. Asaa naati Medhidaagaappe haakkidi banttana suure haarana danddayiya danddayennaakko akeekanau amarida wodee aadhana koshshees.

¹² Geeshsha Maxaafaa xaafida asatuppe issuwaa gidida Ermmaasi hegee kaalettanabaa akeekiis. I Xoossaa geeshsha ayyaanaa kaaletuwan, tuma gididabaa hagaadan giidi xaafiis: “Abeet GODAU, asa de7oi he aawussi buzo gidennaagaanne ba hemetaa suurissanaagee aawu shene gidennaagaa taani erais. Abeet GODAU, tana seera.” (Ermmaasa 10:23, 24) Asaa naatuyyo Xoossay immiyo aadhida eratettaa kaaletoy koshshiyoogaa i eriis. Ayssi giikko, Xoossaa kaaletoy baynnan assa naati giiga deꞌuwaa deꞌanaadan merettibookkona.

¹³ Asaa naati haarido shaꞌan qoodettiya layttay, asay bana Medhidaagaappe haakkidi ba hemetaa addinaa suurissana danddayennaagaa loytti qonccissees. Bantta oottidobaa gaasuwan gakkida wolqqaama metuwau oyshettana bessiyay eta. Geeshsha Maxaafay qoncciyan hagaadan gees: “I nu zaallaattennee. A oosuwan wotoi baa; a oge ubbaikka suure. Nu Xoossai ammanettiyaagaanne iitatettai bainnaagaa; i tumanchchanne suure. Intte ammanettennanne aibaunne pattenna, nagaranchchanne balettiya yeleta gidiyo gishshau, a asa gidanau intte bessekketa.”—Zaarettido Wogaa 32:4, 5.

Xoossay Mata Wode Kelttiyaa Gelana

¹⁴ Asaa naati haarido daro layttatun eta haaroy giiga gidennaagaa bessiya darobay qonccana mala Xoossay hanotaa injjeyiis; qassi i mata wode asaa naatu allaalliyan kelttiyaa gelidi, metuwaa, kayyuwaa, harggiyaanne hayquwaa xayssana. Asaa naati saynisiyan, inddusttiriyan, akkamuwaaninne haraban keehi xoqqasaa gakkanaadan paqqadido gishshau, eti hannippe guyye banttana Medhidaagaappe haakkidi xeetan qoodettiya hara wodetun sarotettay deꞌiyo gannate alamiyaa ehaana danddayiya danddayennaakko mali beꞌanaadan Xoossay paqqadenna. Eti hegaadan oottanau danddayibookkona; qassi mule danddayokkona. Xoossaappe haakkiyoogee maari baynna, keehi iita alamee deꞌanaadan oottiis.

¹⁵ Asaa naata maaddanau wozanappe koyiya issi issi loꞌꞌo asati haaridosona; shin etaukka hanibeenna. Ha wodiyan ubbasan deꞌiya hanotay asaa naatu haaroy giigaa xayidoogaa bessees. Geeshsha Maxaafay, “Asi ashshanau danddayenna gishshau, asaa halaqatun ammanettoppite” giyoy hegaassa.—Mazamure 146:3.

[Oyshata]

1, 2. Asaa naatu bolli gakkiya hanotaara gayttidaagan, woygiya oyshati denddana danddayiyoonaa?

3-5. (a) Maaraa mankkaa dosiya Xoossay saꞌan maaray mankkay xayiyo wode coꞌꞌu giidi xeelliyo gaasuwaa akeekanau maaddiya leemisoy awugee? (b) Saꞌaara gayttida hanotaa loytti qonccissiya qofay awugee?

6, 7. Addaameenne Hewaana Xoossaa higgiyau azazettibeenna gishshau waanidonaa?

8. Koyro asati oottido nagaray asaa naata ubbaa qohiyaagaa gididoy ayba ogiyaanee?

9. Xoossay tuggaa paqqadido wodee hagaa keeni takkidoy aybissee?

10. Asaa naatuyyo waatiyo maatay imettidee, he aawatettay ay kaalettii?

11. Asaa naati Xoossaappe haakkidi giiga deꞌuwaa deꞌana danddayiya danddayennaakko erana danddayiyo issi ogee aybee?

12. Ermmaasi asaa naatu haaruwaa xeelliyaagan woygidee, hegee tuma gididoy aybissee?

13. Asaa naati haarido shaꞌan qoodettiya layttay ay qonccissidee?

14. Xoossay asaa naatu allaalliyan mata wode kelttiyaa geliyoy aybissee?

15. Geeshsha Maxaafan deꞌiya woygiya zoriya nuuni kaallana bessii?

[Sinttaa 25n deꞌiya misiliyaa qonccissuwaa]

Alamiyan haaranau denddida issi issi loꞌꞌo asatikka sarotettay deꞌiyo gannate alamiyaa ehaana danddayibookkona

SHaaho 7

Xoossaa Halchoy Mata Wode Polettana

¹ Asa xeelan, keehi daro milatiya wodiyau nagaraynne tuggay deꞌanaadan Xoossay paqqadidaba gidikkokka, iitabaa merinau coꞌꞌu giidi xeellenna. Hegaa malabay haniyo wodiyaa Xoossay keeri wottidoogaa Geeshsha Maxaafay yootees.

² “Ubbabau wodee de7ees.” (Eranchchaa 3:1) Iitabaynne tuggay deꞌanaadan Xoossay keerido wodee wuriyo wode, i asaa naatu allaalliyan kelttiyaa gelana. I iitatettaanne tuggaa xayssidi, polonne ufayttiya asaa naati sarotettaaninne ishaluwan Gannatiyan deꞌanaadan oottiyoogan ba koyro halchidobaa polana.

Xoossaa Pirddaa

³ Xoossay kelttiyaa geliyo wode, giishin a pirddaa wode, asaa naati waananaakko yootiya, Geeshsha Maxaafan deꞌiya daro hiraagatuppe amaridaageeta beꞌa:

⁴ “Suure asatinne boree bainna asati biittan gam77idi de7ana. SHin iitati biittaappe xoqollettana; ammanttennaageetikka shodettidi xayana.”—Leemiso 2:21, 22.

⁵ “Iitaa oottiyaageeti xoqollettidi xayana; shin GODAN ufaissaa oottiyaageeti biittaa laattana. Iitaa oottiyaageeti guutta wodiyaappe guyyiyan de7okkona . . . SHin ashkketi biittaa laattana; eti sarotettaaninne duretettaani ufaittidi daana.”—Mazamure 37:9-11.

⁶ “GODAN ufaissaa wottada, a ogiyaa naaga. Neeni biittaa laattana mala, i nena gitayana. Iita asati xoqollettidi xayishin, neeni be7ana. Ane lo77o asa akeeka; suure asa be7a; aissi giikko, saro asaassi sintta yeletai de7ana. SHin mooranchchati mule xayana; iitatu yeletaikka xoqolletti xayana.”—Mazamure 37:34, 37, 38.

⁷ Hegaa gishshau, ubbaappe wolqqaama gidida, Medhidaagee nuna haarana bessiyoogaa ammaniyaageeti mata wode demmana maalaalissiyaabaa xeelliyaagan, “Ta azazotakka ne wozanan wotta. Aissi giikko, eti ne bariyaa adussana; ishalo de7uwaakka neeyyo gujjana” yaagiya zoree imettiis. Xoossaa sheniyaa oottanau dooriyaageeti ubba merinaa deꞌuwaa demmoosona! Hegaa gishshau, Xoossaa Qaalay hagaadan nuna zorees: “Ne polo wozanan GODAA ammanetta; ne akeekan zemppoppa. Neeni oottiyo ooso ubban a sinttaya; i nena likke ogiyaa kaalettana.”—Leemiso 3:1, 2, 5, 6.

Saluwan Deꞌiya, Xoossaa Haaruwaa

⁸ Xoossay ha saꞌan deꞌiya hanotaa, asaa naati beꞌi erenna, ubbaappe aadhiya kawotettaa baggaara giigissana. He kawotettay Xoossaa kaaletuwan saluwan uttidi haariyo gishshau, saluwaappe yiya aadhida eratettaa qonccissiyaagaa gidana. Saluwan deꞌiya he Kawotettay saꞌan deꞌiya asaa haaro ubbaa xayssana. Xoossaappe haakkidi haariyo qaaday asaa naatuyyo hegaappe guyyiyan mule deꞌenna.

⁹ Hegaa xeelliyaagan Daaneela 2:44y hagaadan gees: “He kawotu [ha wodiyan deꞌiya kawotu] laittan, saluwaa Xoossai mulekka kunddenna, hara asaukka [asaa naati Xoossaappe haakkidi haaranaadan] imettenna kawotettaa [saluwan] essana. He eqqida kawotettai he kawotettata ubbaa [ha wodiyan deꞌiyaageeta] gaaceretti xaissana; shin i merinau eqqidi daana.”—Ajjuutaa 19:11-21; 20:4-6kka xeella.

¹⁰ Yaatiyo gishshau, Xoossay ha iita alamiyaa xayssi simmin, appe haakkida asaa naatu haaroy hegaappe guyyiyan mule deꞌenna gishshau, asay zaarettidi giigi baynna haaruwan metuwaa beꞌenna. Xoossaa Kawotettaa Giigissidaageenne Naagiyaagee Xoossaa gidiyo gishshau, he haaroy keehippe suure. He Kawotettay au haarettiya asau keehi goꞌꞌiyaabaa oottana. Xoossaa shenee saluwan hanidoogaadan kumetta saꞌankka hananaadan oottana. Yesuusi ba erissiyo ashkkarati, “Ne kawotettai yo; ne shenee saluwan hanidoogaadan, sa7ankka hano” giidi Xoossaa woossanaadan tamaarissidoy hegaassa.—Maatiyoosa 6:10.

Ay Keenaa Matattidee?

¹¹ Xoossay ha iita alamiyaa xayssidi ooratta alamiyaa ehiyo wodee ay keenaa matattidee? Geeshsha Maxaafaa hiraagay qoncce zaaruwaa yootees. Leemisuwau, Geeshsha Maxaafay ‘wodiyaa wurssettaa’ giyo wodiyaara gayttidaagan nu hanotaa yigganau nuuni tishshi oottidi kaallana bessiyoobaa Yesuusi kasetidi yootiis. Hegee Maatiyoosa 24⁠ninne 25n, qassi Marqqoosa 13⁠ninne Luqaasa 21n deꞌees. Qassi 2 Ximootiyoosa 3n odettidaagaadan, nuuni deꞌiyo wodiyaa hanotaa loyttidi qonccissiya dumma dummabati polettiyo wodee ‘wurssetta gallassa’ geetettanaagaa kiitettida PHauloosi kasetidi yootiis.

¹² He wodiyaa doomettan hananabaa Yesuusi, “Issi biittaa asai hara biittaa asaara olettana; qassi issi kawotettai hara kawotettaara olettana; koshainne biittaa qaattai ubbasan de7ana” yaagidi yootiis. (Maatiyoosa 24:7) Yesuusi ‘wurssiya harggeekka yaanaagaa’ yootidoogaa Luqaasa 21:11 bessees. ‘Makkalay daranaagaakka’ i yootiis.—Maatiyoosa 24:12.

¹³ Kiitettida PHauloosi kasetidi hagaadan giis: “SHin wurssetta gallassi waissiya wodee yaanaagaa akeeka. Aissi giikko, asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, cayiyaageeta, banttana yelidaageetuyyo azazettennaageeta, galatennaageeta, geeshshatetti bainnaageeta, siiqoi bainnaageeta, sigettennaageeta, zigirssanchchata, banttana naagennaageeta, kehennaageeta, lo77obaa dosennaageeta, kashi erikke giyaageeta, eesotiyaageeta, otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana. Eti nu ammanuwaa bolla doonan ekkidabaa milatana; shin a tumu wolqqaa erikke gaana. . . . Iita asatinne balettiyaageeti harata balettiiddinne bantta huuphiyau baliiddi, kaseppe iiti iiti boosona.”—2 Ximootiyoosa 3:1-5, 13.

¹⁴ Yesuusinne PHauloosi kasetidi yootidobati nu wodiyan polettidonaa? Ee, polettidosona. Koyro Alamiyaa Olay hegaappe kase olettido ola ubbaappe keehi wolqqaama ola. Hegee alamee ubbay olettido olanne alamiyan darobay laamettanaadan oottida ola. He olaa wode koshay, wurssiya harggeenne hara wolqqaama metoy denddiis. Yesuusi yootidoogaadan, ha hanotati 1914ppe doommidi, “koiro leesso mala.” (Maatiyoosa 24:8) Ha hanotati, kaseti odettidaagaadan ‘wurssetta gallassaa’ doomettan, Xoossay iitatettaanne tuggaa xayssiyo wode deꞌiya wurssetta yeletaa doomettan polettoosona.

¹⁵ Ha xeetu layttatun hanettidabata erennan aggakka. Metiyaabaynne unꞌꞌissiyaabay daridoogaa eraasa. Olan 100 miiloone gidiya asay hayqqiis. Qassi xeetu miilooniyan qoodettiyaageeti namisaaninne harggiyan hayqqidosona. Biittaa qaattan qoodau zawi baynna asay hayqqiis. Asa shemppuwaunne aquwau qarettiya asay guutta. Asay galla galla danobay gakkanaakkonne giidi yayyees. Kandduwaa maaraa kaalliyoogee attiis. Asaa qooday keehi dari dari biyoogee wolqqaama meto gidiis. Heeray hambbalaashettiyoogee qohiyaabanne wolqqaama metuwaa gattiyaaba gidiis. Ee, 1914ppe doommidi wurssetta gallassan deꞌoos; qassi Geeshsha Maxaafay nu wodiyaa xeelliyaagan yootiyo hiraagay polettanau matattiis.

¹⁶ Ha wurssetta gallassay woqqu wodiyau takkanee? Yesuusi 1914ppe simmin deꞌiya, “koiro leesso mala” gidida wode hananabaa yootido wode, “Ha ubbabai hanana gakkanaassi, ha wodiyaa asai haiqqiichchenna” yaagiis. (Maatiyoosa 24:8, 34-36) Yaatiyo gishshau, wurssetta gallassan hanana ubbabay amarida wodetun polettana bessees. Ajjuutaa 12:12y Seexaanay saꞌau olettoogaappe guyyiyan guutta wodiyau deꞌanaagaa yootees.

¹⁷ Ha iita alamee mata wode xayanaagaa bessiya hara hiraagay kiitettida PHauloosi yootidoogaa; i hagaadan giis: “Godaa gallassai kaisoi qammi yiyoogaadan yaanaagaa intte loitti ereeta. Asai, ‘Ubbabai saro; aibikka hanenna’ giishin, . . .  bashshai eti qoppennan eta bolli yaana. Eti mulekka kessi ekkokkona.”—1 Tasalonqqe 5:2, 3; Luqaasa 21:34, 35kka xeella.

¹⁸ Ha wodiyan Amarkkaa biittaynne Ruusiyaa biittay beniigaadan kobattokkona; qassi kaseegaadan alamiyaa olay denddana giidi asay hirggennan aggana danddayees. Yaatiyo gishshau, alamiyaa asay ooratta alamee yaana hanees giidi qoppana danddayees. SHin eti oottiyoobay ushachana hanees giidi qoppiyoogaa doommiyo wode, eti qoppiyoobaappe dumma gididabay hanana; Xoossay ha iita alamiyaa xayssana haniyoogau hegee malaata gidana. Deriyaa haariyaageeti issoy issuwaara sigettiyoogee asaa hanotay kaseegaappe laamettanaadan oottibeennaagaa hassaya. Hegee asay issoy issuwaara siiqettanaadan oottibeenna. Deriyaa haariyaageeti danuwaa, harggiyaanne hayquwaa xayssibookkona. Hegaa gishshau, ha alamiyaa metoy giigees ga qoppada, asaa naati sarotettaanne woppaatettaa ehaanau oottiyooban ammanettoppa. (Mazamure 146:3) Asay ‘ubbabay saro gidana hanees’ giyo wodee, ha alamee xayana haniyoogaa bessiyaaba.

Mishiraachuwaa Yootiyoogaa

¹⁹ Nuuni 1914ppe doommidi wurssetta gallassan deꞌiyoogaa erissiya, Yesuusi yootido hara hiraagay, “Wonggeliyaa mishiraachchoi koiroora dere ubbau odettiichchanau bessees” yaagiyaagaa. (Marqqoosa 13:10) Woykko Maatiyoosa 24:14y giyoogaadan, “asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana.”

²⁰ Ha alamee mata wode xayanaageenne Xoossaa Kawotettay haariyo ooratta alamee, Gannatee matan yaanaagee awudeegaappenne aaruwan, ha wodiyan kumetta saꞌan awaajettiiddi deꞌees. Awaajjiyaageeti oonee? Miilooniyan qoodettiya Yihoowa Markkata. Eti saꞌan deꞌiya ubba biittan sabbakiiddi deꞌoosona.

²¹ Yesuusi, “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagido gishshau, Yihoowa Markkati Xoossaa Kawotettaabaa sabbakiyoogaappekka harabay, tumuppe Kiristtoosa kaalliyaageeta gidiyoogaa shaakki erissiya hanotan deꞌoosona. Hegaa gishshau, Yihoowa Markkati alame yuusho ishatu maabaraa giddon deꞌiya duuxxenna siiquwan issippetettaa medhidosona.—Yohaannisa 13:35; qassi Isiyaasa 2:2-4; Qolasiyaasa 3:14; Yohaannisa 15:12-14; 1 Yohaannisa 3:10-12; 4:20, 21; Ajjuutaa 7:9, 10 xeella.

²² Yihoowa Markkati, “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa [galatees]” yaagidi Geeshsha Maxaafay yootiyoobaa ammanoosona. (Oosuwaa 10:34, 35) Ubba biittan deꞌiya bantta mala Yihoowa Markkatu zaree woy meray ayba gidikkokka, issoy issuwaa ayyaanaaban ishadaaninne michodan xeelloosona. (Maatiyoosa 23:8) Ha wodiyan deꞌiya hegaa mala alame yuusho ishatu maabaray, Xoossaa halchoy mata wode polettanaagau hara naqaasha.

[Oyshata]

1, 2. Xoossay iitatettaanne tuggaa xayssanaagaa ammanettanaadan oottiyaabay aybee?

3, 4. Xoossay kelttiyaa geliyo wode hananabaa Leemiso maxaafay woygidi qonccissii?

5, 6. Xoossay kelttiyaa geliyo wode hananabaa Mazamure 37 woygii?

7. Xoossaa Qaalay nuna woygidi loꞌꞌo zoriyaa zorii?

8, 9. Xoossay ha saꞌan deꞌiya hanotaa aybaa baggaara giigissanee?

10. Saluwan deꞌiya, Xoossaa Kawotettay haariyo wode, iita gidida haaroy zaarettidi mule deꞌenna gaana danddayiyoy aybissee?

11. Ha alamee xayiyo wodee matattidoogaa nuuni akeekanaadan maaddiya hiraagati Geeshsha Maxaafan awan deꞌiyoonaa?

12, 13. Wurssetta gallassaa xeelliyaagan Yesuusinne PHauloosi woygidonaa?

14, 15. Ha wodiyan haniiddi deꞌiyaabati nuuni deꞌiyoy wurssetta gallassaana gidiyoogaa bessiyoy ayba ogiyaanee?

16. Wurssetta gallassay woqqu wodiyau takkanee?

17, 18. Ha alamee xayana haniyoogaa bessiya hiraagay awugee?

19, 20. Wurssetta gallassan sabbakiyo oosuwaara gayttidaagan polettiiddi deꞌiya hiraagay awugee?

21, 22. Yihoowa Markkati tumu Kiristtaane gidiyoogaa shaakki erissiya dummabay aybee?

[Sinttaa 26n deꞌiya misiliyaa qonccissuwaa]

Ooratta alamiyan asaa naata haaranay saluwan deꞌiya polo gidida Xoossaa Kawotettaa xalla gidana