SHaahuwaa 2

Xayida Gannatiyaa

Issi iita kiitanchay koyro bitaneenne maccaasiyaa, Addaameenne Hewaana makkalidi, Xoossa haaruwau haarettennaadan oottiis. Hegaappe denddidaagan, asaa naati nagaraanne hayquwaa laattidosona

ASAA naati merettanaappe daro wodiyaa kasetidi, Xoossay ayfiyan beettenna daro ayyaana meretata, giishin kiitanchata medhiis. Edene Gannatiyan, guyyeppe Seexaanaa Dabloosa geetettida makkalancha kiitanchay, Xoossay mooppite giido mittaa ayfiyaappe Hewaana maanaadan cimmanau baaxetiis.

SHooshshaa haasayiyaaba milatissidi, Seexaanay maccaasiyoonne i azinaa Xoossay eta goꞌꞌiyaabaa diggidabadan yootiis. He kiitanchay Hewaananne i azinay digettida mittaa ayfiyaappe miyaaba gidikko hayqqennaagaa yootiis. Yaatiyoogan Xoossay ba naata gidida, asaa naatuyyo worddotiis giidi Seexaanay a mootiis. Xoossaayyo azazettennan ixxiyoogee dumma eraanne laꞌatettaa demissiya ufayssiyaabadan Seexaanay yootiis. SHin hegee worddo; ubba saꞌan odettida koyro worddo. Denddida oyshay, Xoossay ubbabaa haariyaagaa gidiyoogaara gayttidaagaa; hegeekka baayyo haarettiyaageeta goꞌꞌiyaanne suure ogiyan haariyo maatay Xoossaayyo deꞌii deꞌennee yaagiyaagaa.

Hewaana Seexaanaa wordduwaa ammanaasu. A he mittaa ayfiyaa amottiyoogaa doommaasu; yaatada appe ekkada maasu. Guyyeppe, ba azinaayyo immaasu; ikka miis. Hegaa gishshau, eti nagarancha gididosona. Eti oottido he laafaba milatiyaabay makkalancha gidiyoogaa bessiyaaba gidiis. Xoossaa azazuwau eriiddi azazettennan ixxiyoogan, Addaameenne Hewaana eta polo deꞌuwaa gujjin etau ubbabaa immida Medhidaagaa haaruwau haarettennan ixxidosona.

Xoossay makkalidaageetu bolli wolqqaama pirddaa pirddiis. SHooshshan leemisettida Seexaanaa xayssiya, yaana geetettida Zerettay woykko Ashshiyaagee yaanaagaa i kasetidi yootiis. Xoossay Addaamenne Hewaani bolli pirddido hayquwaa pirdday guutta wodiyau takkanaadan oottiyoogan, yelettibeenna eta naatuyyo maarotaa bessiis. Edenen oosettida makkalay kaalettido iitabaa Xoossay kiittiyo Uray xayssiyo gishshau, he naatuyyo hidootay deꞌees. Yaana geetettida Ashshiyaagaa xeelliyaagan Xoossaa halchoy polettido ogeenne kiitettiya Uray oona gidanaakko, Geeshsha Maxaafan qonccissoy wodiyaappe wodiyan imettiis.

Xoossay Addaamanne Hewaano Gannatiyaappe kessiis. Banttau koshshiyaabaa demmanau Edene ataakilttiyaa sohuwaappe gaxan deꞌiya biittaa minnidi oottiyoogaa koshshiis. Guyyeppe Hewaana shahaarada Qaayeela yelaasu; Qaayeeli Addaameyyoonne Hewaaniyyo bayra naꞌa. He azinaynne maccaasiyaa Aabeela, qassi Nohe mayzza aawaa Seeta gujjin, hara attuma naatanne macca naata yelidosona.

—Doomettaabaa shemppo 3ppe 5 gakkanaashin; Ajjuutaa 12:9n baasettidaagaa.

◼ Koyro worddoy aybee, qassi hegaa yootiday oonee?

◼ Addaameenne Hewaana Gannatiyaappe waani kiyidonaa?

◼ Eti oottido makkalau eta bolli pirddiyo wode, Xoossay ayba hidootaa immidee?

SHaahuwaa 3

Asaa Zaree Bashsha Haattaappe Attiis

Xoossay iita alamiyaa xayssiis; shin Nohanne a soo asaa ashshiis

ASAA naati dari dari biido wode, nagaraynne iitatettay biittan eesuwan aakkiis. He wode hananabaa yootiyay Heenooka xalla; i Xoossay issi galla iita asaa xayssanaagaa akeekissiis. Gidikkokka, iitabay aakkiis; ubbaa yaa iitiis. Issi issi kiitanchati etau imettida sohuwan deꞌiyoogaa aggiyoogan, saꞌan asaa naatudan deꞌanau amottiyoogaaninne yaaretidi macca asaa machiyoogan Yihoowa bolli makkalidosona. Meretan baynna he gaytotettay, minotettan asaa naatuppe wolqqaamiya naati yelettanaadan oottiis; he qareti baynna wogga asati Nefilim geetettoosona; eti alamiyan makkalaynne asaa woriyoogee daranaadan oottidosona. Xoossay saꞌan medhidobay keehi moorettidoogan daro azzaniis.

Heenooki hayqqi simmin, he iita asatu giddon issi bitanee dumma gididi deꞌiis. A sunttay Noha. Inne a soo asay Xoossaa sinttan suure gididabaa oottanau baaxetidosona. He wode deꞌiya iita asaa xayssanau Xoossay qofaa qachido wode, i Noha, saꞌan deꞌiya mehiyaanne doꞌaa ashshanau koyiis. Hegaa gishshau, gita markkabiyaa keexxanaadan Xoossay ayyo yootiis. A giddo gelidi, mata wode saꞌa ubban yaana bashsha haattaappe Noheenne a soo asay, cora qommo mehiyaaranne doꞌaara attana. Nohee Xoossaayyo azazettiis. Nohee 40 woy 50 gidiya layttau markkabiyaa keexxiis; i asau ‘xillotettaabaakka yootiis.’ (2 PHeexiroosa 2:5) I Bashsha Haattay yaanaagaa asaa akeekissiis; shin eti siyibookkona. Noheenne a soo asay mehiyaaranne doꞌaara markkabe giddo geliyo wodee gakkiis. Eti geli simmin, Xoossay markkabiyaa penggiyaa gorddiis. Hegaappe simmin, iray bukkiyoogaa doommiis.

Biittay muleera kamettana gakkanaashin wolqqaama iray 40u gallassaanne 40u qammaa bukkiis. Iita asati muleera xayidosona. Daro aginay aadhi simmin, haattay wodhi wodhi bin, markkabee issi deriyaa bolli uttiis. Nohee, a so asay, meheenne doꞌay markkabe giddon muleera issi layttaa takkidi, hegaappe kiyidosona. Nohee Yihoowa galatanau yarshshuwaa yarshshiis. Xoossay naaꞌꞌantto saꞌan deꞌiya paxa mereta ubbaa xayssanau bashsha haattaa mule eheennaagaa Noheyyoonne a soo asaayyo akeekissiyoogan zaaruwaa immiis. Xoossay minttettiya, ba gelido qaalaa hassayissiya, zuullaa, ayfiyan beꞌiyo ammanttiya malaatadan giigissiis.

Bashsha Haattaappe simminkka, Xoossay asaa naatuyyo amarida ooratta azazuwaa immiis. I mehiyaa ashuwaa eti maanaadan paqqadiis. SHin eti suuttaa meenna mala yootiis. I Nohe zerettati saꞌan ubbasan aakkidi deꞌanaadankka azaziis; shin etappe issoti issoti azazettibookkona. Asati Naamiruuda geetettiya bitaniyaa kaaletuwan issippetettaa medhidi, guyyeppe Baabiloone geetetti xeegettida, Baabeele kataman gita gimbbiyaa gimbbiyoogaa doommidosona. Eti halchidoy saꞌa ubban aakkidi deꞌanaadan, Xoossay azazido azazuwaa eqettanaassa. SHin Xoossay makkalanchati issoy giyoobaa haray akeekennaadan eti haassayiyo issi doonaa laammidi, dumma dumma doonan haasayanaadan oottiyoogan bantta qofaa polennaadan oottiis. Eti issoy giyoobaa haray akeekana danddayibeenna gishshau, bantta oosuwaa aggi bayidi laalettidosona.

—Doomettaabaa shemppo 6ppe 11 gakkanaashin; Yihudaa 14, 15n baasettidaagaa.

◼ Iitatettay saꞌan waanidi aakkidee?

◼ Nohee ammanettiya asa gidiyoogaa waatidi bessidee?

◼ Bashsha Haattaappe simmin, asaa naati ay meenna mala Xoossay yootidee?