SHaahuwaa 4

Xoossay Abrahaameera Maachaa Maacettiis

Abrahaamee ammanuwan Xoossaayyo azazettiis; hegaa gishshau, Yihooway a anjjanaunne a zerettata corayanau qaalaa geliis

NOHE wode Bashsha Haattay gakkoosaappe 350 gidiya layttay aadhiis. Abrahaamee deꞌidoy ha wodiyan Iiraaqe geetettiya sohuwan deꞌiya, dure katamaa Uuraana. Abrahaamee gita ammanoy deꞌiyo asa. SHin a ammanuwaa issi wode paacciyaabay gakkiis.

Abrahaamee ba yelettido biittaa aggidi Kanaane geetettiya allaga biitti baanaadan Yihooway yootiis. Abrahaamee aynne mammottennan azazettiis. I ba machiyo Saaronne ba ishaa naꞌaa Looxa gujjin, ba soo asaa banaara ekkidi biis; adussa ogiyaa manddari biidi, Kanaanen dunkkaaniyan deꞌiyoogaa doommiis. Abrahaameera maacettido maachan, appe gita deree kiyanaadan oottanaagaa, saꞌan deꞌiya asa ubbay a baggaara anjjettanaagaanne a zerettay Kanaane biittaa laattanaagaa Yihooway qaalaa geliis.

Abrahaaminne Looxee daro dorssa wudiyaanne daro mehiyaa wudiyaa haaridi duretidosona. Abrahaamee kehatettan, Looxee ba koyido sohuwaa dooranaadan oottiis. Looxee Yorddaanoosa SHaafaa heeran deꞌiya aradda sohuwaa dooridi, Sadooma katamaa matan deꞌiis. SHin Sadooman deꞌiya asati shori baynna kanddoy deꞌiyoogeeta; Yihoowa bolli gita nagaraa oottiyaageeta.

Xoossaa Yihooway takkidi, Abrahaama zerettay saluwaa xoolinttiyaadan corattanaagaa ayyo yootiis. Abrahaamee he qaalaa ammaniis. SHin Abrahaami siiqiyo machiyaa, Saara naꞌa yelabuukku. Guyyeppe, Abrahaamayyo layttay 99 gidido wodenne Saariyyo 90 matido wode, Abrahaaminne Saara attuma naꞌa yelanaagaa Xoossay yootiis. Xoossay giidoogaadan, Saara Yisaaqa yelaasu. Abrahaamayyo hara naatikka deꞌoosona; shin Edenen qaalaa gelido, Ashshiyaagee yaanay Yisaaqa baggaara.

He wode, Looxeenne a soo asay Sadooman deꞌoosona; shin xillo Looxee he kataman deꞌiya asatu shori baynna kandduwaa ixxees. Yihooway Sadooma xayssanau qofaa qachido wode, bashshay yiiddi deꞌiyoogaa Looxa kasetidi akeekissanaadan kiitanchata kiittiis. Kiitanchati Looxeenne a soo asay Sadoomappe kiyidi baqatanaadaaninne guyye xeellennaadan mintti yootidosona. Tamaynne dinnee bukkanaadan oottidi, Sadoomanne a matan deꞌiya iita katamaa Gamoora, qassi he katamatun deꞌiya ubbaa Xoossay xayssiis. Looxeenne a naaꞌꞌu macca naati baqatidosona. SHin Looxe machiyaa geella agga bayada kiyidobaa amottada gidennan aggenna guyye xeellaasu. A azazettennan aggido gishshau, hayqqaasu.

—Doomettaabaa 11:10–19:38n baasettidaagaa.

◼ Abrahaamee Kanaane biidoy aybissee?

◼ Yihooway Abrahaameera ayba maachaa maacettidee?

◼ Yihooway Sadoomanne Gamoora aybissi xayssidee?

SHaahuwaa 5

Xoossay Abrahaamanne A Soo Asaa Anjjiis

Abrahaama zareti anjjettidosona. Xoossay Yooseefa Gibxxe biittan naagiis

YIHOOWAY ba siiqiyo issi Naꞌay barchetanaagaanne issi wode hayqqanaagaa erees. Doomettaabaa 3:15n deꞌiya hiraagay he tumaa yootees. Ba Naꞌaa yarshsho oottidi immiyoogee ay keena alꞌꞌobakko Xoossay asaa naati akeekanaadan oottana danddayii? Geeshsha Maxaafay hegaa akeekissiya loꞌꞌo leemisuwaa yootees. Abrahaamee ba siiqiyo naꞌaa Yisaaqa yarshshanaadan Xoossay yootiis.

Abrahaamee gita ammanoy deꞌiyo asa. Kasetidi odettida Ashshiyaagee woykko Zerettay, Yisaaqa zariyaa baggaara yaanaagaa Xoossay Abrahaamayyo qaalaa gelidoogaa hassaya. Koshshiyaaba gidikko Xoossay Yisaaqa hayquwaappe denttanaagaa ammanettidi, Abrahaamee azazettiyoogan ba naꞌaa yarshshanau qoppiis. SHin Xoossay kiittido issi kiitanchay Abrahaamee ba naꞌaa yarshshana hanishin teqqiis. Abrahaamee baayyo keehippe alꞌꞌo gididabaa yarshshanau eeno giido gishshau Xoossay a galatidi, ha ammanettida bitaniyau Ba gelido qaalaa zaarettidikka yootiis.

Guyyeppe, Yisaaqi Eesawanne Yaaqooba geetettiya naaꞌꞌu naata yeliis. Eesawaagaappe dumma ogiyan, Yaaqoobi ayyaanabaa nashshiis; hegaa gishshau anjjettiis. Xoossay Yaaqooba sunttaa laammidi, Israaꞌeela gi sunttiis; Israaꞌeela 12u attuma naati Israaꞌeela zaretuyyo aawata gididosona. SHin he keettaa asay waanidi gita dere gididee?

He attuma naatuppe daroti bantta kaalo ishaa Yooseefa qanaatido wode, wodiyaappe wodiyan issi issibay haniyoogaa doommiis. Eti a aylletettau bayzzidosona; yaatin i Gibxxe biitti biis. SHin Xoossay he ammanettidanne mino yelagaa anjjiis. Wolqqaama metoy gakkikkokka, wurssettan Yooseefa Gibxxe kawuwaa, Paarooni dooridi, gita maataa ayyo immiis. He wode, namisaa gishshau Yaaqoobi ba attuma naatuppe amaridaageeta kattaa shammanaadan Gibxxe biitti kiittiis; he wode Yooseefi katta ubbau halaafe! Bantta mooruwaappe simmida ba ishatuura ufayssiya hanotan gaytti simmidi, Yooseefi etau atto giisinne so asay ubbay Gibxxe yaanaadan oottiis. Eti daranaadaaninne duretanaadan, etau aradda biittaa immiis. Xoossay ba gelido qaalaa polanau hanotata hegaadan giigissidoogaa Yooseefi akeekiis.

Cimida Yaaqoobi, ba attida layttaa corattiiddi deꞌiya ba soo asaara Gibxxen deꞌiis. I hayqqanaappe kasetidi, yaana geetettida Zerettay woykko Ashshiyaagee ba naꞌaa Yihudaa zariyaappe yelettidi, Haariya wolqqaamaa gidanaagaa kasetidi yootiis. Yooseefikka hayqqanaappe amarida layttaa kasetidi, Xoossay issi galla Yaaqooba soo asaa Gibxxeppe kessanaagaa hiraagaa yootiis.

—Doomettaabaa shemppo 20ppe 50 gakkanaashin; Ibraawe 11:17-22n baasettidaagaa.

◼ Abrahaami ay oottanaadan Xoossay yootidee? Yaatiyoogan I asaa naati ay akeekanaadan oottidee?

◼ Yooseefi Gibxxe biitti waanidi biidee? Wurssettan hanidabay aybee?

◼ Yaaqoobi hayqqanaappe kasetidi ayba hiraagaa yootidee?