SHaahuwaa 8

Israaꞌeelati Kanaane Biittaa Gelidosona

Israaꞌeeleti Yaasu kaalettin Kanaaneta xoonidosona. Ba asaa huqqunaappe kessanaadan Yihooway daannatussi wolqqaa immiis

ISRAAꞌEELATI Kanaane biittaa gelanaappe daro xeetu layttaa kasetidi, Yihooway he biittaa Abrahaama zerettau immanaagaa qaalaa geliis. Israaꞌeelati Yaasu kaalettin Hidootaa Biittaa laattanau giigetti uttidosona.

Kanaaneti xayanaadan Xoossay pirddiis. Keehippe sheneyiya asho gaytotettaa poliyoogeenne meqetti baynna hanotan asa woriyoogee eta biittan kumiis. Yaatiyo gishshau, Israaꞌeelati xooniyo Kanaane katamati muleera xayana bessees.

Gidoppe attin, eti he biittaa gelanaappe kase, Yaasu biittaa xomoosanaadan naaꞌꞌu asata kiittiis; he asati Yarkko kataman Raꞌaabo giyo maccaasee son shemppidosona. Eti Israaꞌeelata gidiyoogaa eriyaaba gidikkokka, xomoosiyaageeta a ba son mokkaasunne qottaasu. Yihooway ba asaa ashshanau oottidobaa Raꞌaaba siyido gishshau, Israaꞌeeletu Xoossaa ammanaasu. Bananne ba soo asaa hayquwaappe ashshanaadan xomoosiyaageeta caaqissaasu.

Guyyeppe, Israaꞌeelati Kanaane biittaa olanau yiido wode, Yihooway Yarkko gimbbee maalaalissiya ogiyan kunddanaadan oottiis. Yaasunne a olanchati sohuwaara katamaa gelidi, he katamaa xayssidosona; shin Raꞌaabonne i soo asaa ashshidosona. Hegaappe simmin, usuppun laytta takkida olan, Yaasu Hidootaa Biittaappe dariya baggaa xooniis. Hegaappe guyyiyan, biittay Israaꞌeelatuyyo zariyan zariyan shaahetti imettiis.

Yaasu Xoossau oottido adussa wodiyau wurssetta heeran, asaa issippe shiishshiis. Yihooway eta mayzza aawatussi oottidobaa Yaasu yootidi, Yihoowassi goynnanaadan eta minttettiis. Gidikkokka, Yaasunne aara oottida cima asay hayqqi simmin, Israaꞌeelati Yihoowa aggidi eeqa xoossatussi goynnidosona. He deree 300 gidiya layttau, Yihoowa higgiyau azazettidoy ubbatoo gidenna. He wode, Pilisxxeematinne hara Israaꞌeelatu morkketi eta huqqunnanaadan Yihooway paqqadiis. SHin Israaꞌeelati maaduwau Yihoowakko simmido wode, eta ashshanau muleera 12u daannata sunttiis.

Daannatu maxaafan xaafettida, daannatu wodee, Otiniꞌeelappe doommidi bollaa minotettan hanno gakkanaashin deꞌida asaappe aadhiya Samssoona gakkanaashin deꞌiyaagaa. Geeshsha Maxaafan, daannatu maxaafan xaafettida ufayssiya taarikee zaari zaari qonccissiyo tumay: Yihoowassi azazettiyoogee anjjuwaa, qassi azazettennan ixxiyoogee bashshaa kaalettiyoogaa bessees.

—Yaasunne Daannatu maxaafan; Wogaabaa 18:24, 25n baasettidaagaa.

◼ Yihooway Raꞌaabonne i soo asaa hayquwaappe ashshidoy aybissee?

◼ Yaasu hayqqi simmin, Israaꞌeelati ay oottidonaa?

◼ Geeshsha Maxaafan Daannatu maxaafay qonccissiyo tumay awugee?

SHaahuwaa 9

Israaꞌeelati Kawo Koyidosona

Israaꞌeelatu koyro kawoy Saaꞌooli Yihoowassi azazettibeenna. Xoossay merinaa kawotettaa maachaa aara maacettido Daawiti a sohuwan kawotiis

SAMSSOONA wodiyaappe simmin, Sameeli Israaꞌeelan hananabaa yootiyaagaanne daanna gididi oottiis. Hara biittaagaadan asi kawo gididi banttana haaranaadan koyiyoogaa Israaꞌeelati Sameelassi zaari zaari yootidosona. He oyshay Yihoowa yiilloyikkokka, eti giidoogaa oottanaadan Sameela azaziis. Xoossay Saaꞌoola giyo ashkke bitanee kawo gidanaadan dooriis. SHin, Kawuwaa Saaꞌooli guyyeppe otorettiyaagaanne azazettennaagaa gidiis. Yihooway i kawo gidennaadan ixxidi, Daawita giyo yelaga naꞌaa sunttanaadan Sameelau yootiis. Gidikkokka, Daawiti haariyoogaa doommanaashin daro layttay aadhiis.

Daawiti panttatetta wodiyan deꞌiiddi gidennan aggenna, Saaꞌoola wotaaddara gididi oottiya ba ishantta oychanau biis. Olanchati ubbay etanne eta Xoossaa zaari zaari naassiya issi morkkiyaa, Gooliyaada giyo wogga bitaniyau yayyidosona. Daawiti yiillotidi, he naassiya bitaniyaara olettanau maayiis. He yelagay yambbarshshaanne amarida shucha xallaa oyqqidi, heezzu meetire gidiya ba morkkiyaara olaa gayttanau biis. Gooliyaadi a bolli qilliiccido wode, Daawiti Xoossaa Yihoowa sunttan olettiyo gishshau, aagaappe aaruwan olau gixxidoogaa yootiis! Daawiti issi shucha xallan Gooliyaada woriis; qassi a bisuwan a qooriyaa muuci oliis. Pilisxxeema olanchati shabbirettidi baqatidosona.

Koyro wode, Saaꞌooli Daawita xalatettan ufayttidi, a ba olanchatu bolli sunttiis. SHin Daawiti oottiyooban murutiyoogee Saaꞌooli keehippe qanaatanaadan oottiis. Daawiti ba shemppuwaa ashshanau baqatiis; qassi daro layttau bete gididi deꞌiis. Gidikkokka, Saaꞌoola Kawo oottidi sunttiday Xoossaa Yihoowa gidiyoogaa eriyo gishshau, Daawiti bana woranau koyiya kawuwau ammanettidi deꞌiis. Wurssettan Saaꞌooli olan hayqqiis. Hegaappe simmin sohuwaara, Yihooway qaalaa gelidoogaadan Daawiti kawotiis.

Kawuwaa Daawiti Yihoowa beeta maqidasiyaa keexxanau keehippe koyiis. Gidikkokka, Yihooway a naatuppe issoy hegaa keexxanaagaa Daawitassi yootiis. Beeta maqidasiyaa keexxiday Daawita naꞌaa Solomona. Gidoppe attin, Xoossay Daawitaara ufayssiya maachaa maacettidi a anjjiis: A zariyaappe denddiya kawotettaa haaroy haraappe dumma gidana. Wurssettan, Edenen qaalaa gelido Ashshiyaagee, woykko Zerettay a zariyaappe yaana. He zerettay Masiyaa gidana; hegee Xoossay sunttidoogaa woykko “Tiyettidaagaa” giyoogaa. Yihooway Masee merinaa Kawotettan Haariyaagaa gidanaagaa qaalaa geliis.

Daawiti wozanappe galatiyoogaa bessanau beeta maqidasiyaa oosuwaassi, keexxanau koshshiya darobata, worqqaanne biraa shiishshiis. I ayyaanay denttettin daro mazamuretakka giigissiis. Daawiti ba deꞌuwaa wurssettaa heeran: “GODAA Ayyanai ta baggaara haasayees; a qaalai ta inxxarssan de7ees” yaagiis.—2 Sameela 23:2.

—Koyro Sameelan; 2 Sameelan; 1 Hanidabaa Odiya maxaafan; Isiyaasa 9:7n; Maatiyoosa 21:9n; Luqaasa 1:32n; Yohaannisa 7:42n baasettidaagaa.

◼ Yihooway Saaꞌoola sohuwan Daawita kawoyidoy aybissee?

◼ Daawiti kawo gidanaappe kasekka gidin ayba eeshshaa qonccissidee?

◼ Daawita zariyaa baggaara yaana geetettida, qaalaa gelido Zerettay woykko Ashshiyaagee oonee?