Haasayaa Doommanawu Xoossaa Qaalaa Gidduwaa Erissuwaa Goꞌetta
1. Haggaazuwawu maaddiya ayba ooratta miishsha demmidoo?
1 Zaaretti giigissido Ooratta Alamiyaa Birshshettaa doomettan, “Xoossaa Qaalaa Gidduwaa Erissuwaa” giya huuphe yohoy deꞌees; hegee Wolayttattuwan bukleetiyan giigiis. Haggaazuwan asaa waati haasayissanaakko giigettiyo wode, ha ooratta miishshaa waati goꞌettana danddayiyoo? Hegee Akeekissiyoogaa giyo maxaafaagaadan xiqiseta dumma dumma huuphe yoho garssan qonccissiyo gishshawu, asaa haasayissiyoogaa doommanawu keehi maaddana danddayees.
2. Haggaazuwan, Xoossaa Qaalaa Gidduwaa Erissuwaa giyo bukleetiyaa waati goꞌettana danddayiyoo?
2 Leemisuwawu, oysha 8 goꞌettada, “Daroti, ‘Asay tuggatanaadan oottiyay Xoossay?’ yaagidi qoppiyo gishshawu, asaara hegaabaa haasayiiddi deꞌoos” gaana danddayaasa. [Issi issi heeran ha oyshaa keettaawaa bessiyoogee loꞌꞌo.] Hegaara gayttidaagan ne qofay aybee? [Zaaranaashin takki ga.] Geeshsha Maxaafay ha oyshawu aliya zaaruwaa yootees. Hegan deꞌiya xiqisetuppe issuwaa woy naaꞌꞌaa Geeshsha Maxaafaappe nabbaba. Keettaaway tobbana koyiyaaba gidikko, bukleetiyan deꞌiya 20 oyshaa bessada, zaaretti gayttiyo wode tobbanawu issuwaa dooranaadan yootana daddayaasa. Woykko intte tobbido qofaa loytti qonccissiya, nuuni xannaꞌissanawu goꞌettiyo xuufetuppe issuwaa immana danddayaasa.
3. Kiristtaane giyo haymaanootiyaappe haraa kaalliya asay deꞌiyo moottan Xoossaa Qaalaa Gidduwaa Erissuwaa giyo bukleetiyaa waati goꞌettana danddayiyoo?
3 Oysha 4ninne 13ppe 17 gakkanaassi deꞌiya qofay Kiristtaane giyo haymaanootiyaappe haraa kaalliya asay deꞌiyo moottan nuuni haggaaziyo wode keehi maaddana danddayees. Leemisuwawu, oysha 17n deꞌiya qofaa goꞌettada hagaadan gaana danddayaasa: “So asaa maaddiya qofaa asaayyo yootiiddi deꞌoos. So asay ha wodiyan daro metuwaa genccidi deꞌees giyaakko maayikkii? [Zaaranaashin takki ga.] Daro aqo laggeti, “Maccaasa ubbaikka bantta azinaa azinaa bonchchanau bessees” yaagiya zoree goꞌꞌiyoogaa akeekidosona. [Ha qofay Efisoona 5:33ppe ekettidaagaa gidiyoogaa yootiyoogee koshshennan aggana danddayees. Neeni haasayissiyoy maccaasa gidikko, Efisoona 5:28n deꞌiya qofaa yootana danddayaasa.] Ha zoriyaa kaalliyoogee aqo deꞌuwawu maaddees gaada qoppay?”
4. Kiristtaane giyo haymaanootiyaappe haraa kaalliya uraara koyro gallassi tobbiyoogaa wurssi simmidi waatana danddayiyoo?
4 Koyro gallassi tobbi simmidi, hara wode gayttidi tobbanawu hanotaa giigissite. Geella intte tobbido oyshaa garssan deꞌiya hara xiqisetuppe issuwaa tobbanawu halchana danddayeeta. Bessiya wode ubban, neeni yootiyo loꞌꞌo zoree Geeshsha Maxaafaappe demmidobaa gidiyoogaa keettaawaayyo yoota. Kase intte tobbido qofaanne keettaaway Geeshsha Maxaafaa aybidan xeelliyaakko akeekada, a ufayssana gaada neeni qoppiyo xuufiyaa imma.—Tisaase 2013 Nu Kawotetta Haggaazuwaa giddon gujettida qofaa xeella.