SHaahuwaa 10

Solomoni Aadhida Erancha Kawo

Yihooway Kawuwaa Solomonayyo aadhida eratettaa wozanaa immiis; Solomona haaruwaa wode Israaꞌeelati laggetiyaabi baynna sarotettaaninne ishaluwan deꞌidosona

ISSI biittan deꞌiya asay ubbaynne he biittaa haariya kawoy banttana Ubbaappe Bollaara Haariyaagaa oottidi Yihoowa kaallikkonne A higgiyau azazettikko, deꞌoy ay mala gidanee? Hegaa zaaroy Kawuwaa Solomoni haarido 40u layttaa haaruwan qoncciis.

Daawiti hayqqanaappe kase, ba naꞌaa Solomona ba sohuwan sunttiis. Solomoni koyiyoobaa oychanaadan Xoossay aymuwan ayyo yootiis. Solomoni asau suurenne eratettan pirddanaadan aadhida eratettaanne eraa oychiis. Yihooway ufayttidi, Solomonayyo aadhida eratettaanne akeeka wozanaa immiis. I azazettidi deꞌikko, Yihooway duretettaanne bonchuwaa immanau, qassi a bariyaa adussanau qaalaa geliis.

Solomoni aadhida eratettan pirddiyoogan erettidaagaa gidiis. Issi wode, issi gacino naꞌaa, issinniyaa taagaa haranakka taagaa giidi naaꞌꞌu macca asati palamettidosona. Naꞌaa naaꞌꞌusan shaakkidi baggaa issinnissi baggaa harannissi immanaadan Solomoni azaziis. Issinna hegaa maayaasu; shin tumuppe naꞌaa aayo gididaara naꞌay hankko maccaaseessi imettanaadan woossaasu. Naꞌaayyo qarettidaara naꞌaa aayyiyo gidiyoogaa Solomoni eridi, naꞌaa iyyo immiis. Israaꞌeela asay ubbay he pirddaabaa siyidi, Solomonau Xoossaa aadhida eratettay deꞌiyoogaa akeekiis.

Solomoni oottido gita oosotuppe issoy Yihoowa beeta maqidasiyaa keexxiyoogaa; hegee Yerusalaamen deꞌiya, Israaꞌeelan goynuwau kane gidida wolqqaama keetta. Beeta maqidasee anjjettiyo wode, Solomoni: “Be7a, saloti, ubbaappe xoqqan de7iya saloikka neeyyo gidanau danddayenna. Yaatin, ha taani keexxido Beeta Maqidasee neeyyo ai keenaa guuxxanddeeshsha!” yaagidi woossiis.—1 Kawotu Maxaafaa 8:27.

Solomonabay hara biittatunkka, ubba Araba biittan deꞌiya Saaba gakkanaashin siyettiis. Saaba kawiyaa Solomona bonchuwaanne duretettaa beꞌanaunne a aadhida eratettaa paaccanau baasu. Kawiyaa Solomona aadhida eratettaaninne Israaꞌeela biittaa duretettan keehippe maalaalettada hegaa mala aadhida erancha kawuwaa kawoyido gishshau Yihoowa sabbaasu. Yihooway anjjin, Solomona haaroy beni Israaꞌeelatu taarikiyan ubbaappe aaruwan ishaloynne sarotettay kumidoogaa gidiis.

Solomoni Yihoowa aadhida eratettaara moggiyaabaa oottiyoogaa aggidoogee azzanttiyaaba. I Xoossaa higgiyaa kanttidi, allaga xoossatuyyo goynniya darota gujjin, xeetan qoodettiya maccaasaa ekkiis. A machoti loddan loddan a wozanaa Yihoowappe deshissidi eeqau i goynnanaadan oottidosona. Solomona kawotettaappe shaahettidi harau imettanaagaa Yihooway yootiis. Xoossay, Solomona aawaa Daawitau gelido qaalaa gishshau, a kawotettaappe guuttay a zerettau attanaagaa yootiis. Solomoni Yihoowayyo azazettibeennaba gidikkokka, Yihooway Daawitaara maacettido Kawotettaa maachaa naagiis.

—Koyro Kawotu shemppo 1ppe 11 gakkanaashin; 2 Hanidabaa Odiya shemppo 1ppe 9 gakkanaashin; Zaarettido Wogaa 17:17n baasettidaagaa.

◼ Xoossay Solomona oyshaa waatidi zaaridee?

◼ Solomoni aadhida erancha gidiyoogaa waatidi bessidee?

◼ Solomoni Yihoowappe deshanaadan oottiday aybee? Hegee ay kaalettidee?

SHaahuwaa 11

Ayyaanay Deꞌiyo, Minttettiyaanne Timirtte Demmiyo Mazamureta

Daawitinne harati goynuwaa wode goꞌettiyo mazamureta giigissidosona. Mazamure maxaafan hegeetuppe 150tu danttoti deꞌoosona

GEESHSHA MAXAAFAN adussa maxaafay geeshsha mazamureta oyqqidaagaa. Mazamure maxaafay 1,000 laytta gidiya wodiyan xaafettidi wuriis. Ammanuwaa xeelliyaagan hanno gakkanaashin xaafettida keehippe wolqqaamanne denttettiya qaalatuppe amaridaageeti Mazamure maxaafan deꞌoosona. Mazamuretun ufayssaa, sabaanne galataa, qassi kayyuwaa, azzanuwaanne nagaraappe simmiyoogaa milatiya, asaa naatussi siyettiya dumma dummabati deꞌoosona. Mazamuraaweti Xoossan ammanettiyoogeenne mata dabbotaa aara medhidoogee qoncce. Ha mazamuretuppe issotu issotu waannatiya qofaa ane beꞌoos.

Yihooway goynoynne sabay bessiyo, ubbabaa haarana bessiyaagaa. Mazamure 83:18n: “Ne xalaalai GODAA [“Yihoowa,” NW] gidiyoogaa, neeni Ubbaappe Xoqqiya Xoossai sa7aa ubbaa haariyoogaa eti erona” yaagiyaagaa nabbaboos. Daro mazamureti, xoolinttiyan kumida saluwaa, saꞌan deꞌuwan deꞌiyabatanne asaa bollaa milatiya maalaaliya meretatu gishshau, Yihoowa sabbiyoogeeta. (Mazamure 8, 19, 139, 148) Hara mazamureti baayyo ammanettidaageeta ashshiyaanne naagiya Xoossa gidiyoogau Yihoowa xoqqu xoqqu oottiyoogeeta. (Mazamure 18, 97, 138) Harati qassi, huqqunnettidaageeta shemppissiyaanne iitata qaxxayiya, suure pirddiya Xoossa gidiyoogau a sabbiyoogeeta.—Mazamure 11, 68, 146.

Yihooway bana siiqiyaageeta maaddeesinne minttettees. Keehippe erettida mazamuree, Yihooway ba dorssata kaalettiya, naagiyaanne etassi qoppiya, siiqiya Henttancha gidiyoogaa Daawiti qonccissido 23tta mazamuriyaa gidennan aggenna. Mazamure 65:2y Yihooway ‘woosaa siyiyaagaa’ gidiyoogaa ayyo goynniyaageeta akeekissees. Daawiti ba oottido gita nagaraappe simmidoogaanne Yihooway atto giyaagaa gidiyoogaa ammaniyoogaa wozanappe qonccissido Mazamure 39⁠ynne 51, gita nagaraa oottida darota keehippe minttettees. Mazamure 55:22y Yihoowan ammanettanaadaaninne nu toohuwaa ubbaa A bolli wottanaadan zorees.

Yihooway Masiyaa Kawotettaa baggaara alamiyaa laammana. Mazamure maxaafan deꞌiya daro qofay, kasetidi odettida Kawuwaa, Masiyaa malaatiyaagaa. He Kawoy banaara eqettiya iita kawotettata xayssanaagee Mazamure 2n kasetidi odettiis. Mazamure 72y he Kawoy namisaa, pirddaa pacaanne huqqunnaa xayssanaagaa qonccissees. Mazamure 46:9y qonccissiyoogaadan, Xoossay Masiyaa Kawotettaa baggaara olaanne olaa miishshata xayssana. Mazamure 37n iitaa oottiyaageeti xayanaagaa, qassi xilloti saꞌa ubban sarotettaaninne moggotidi biittan merinau deꞌanaagaa nabbaboos.

—Mazamure maxaafan baasettidaagaa.

◼ Mazamure maxaafay Yihoowa haaroy bessiyaaba gidiyoogaa waatidi kaafii?

◼ Xoossay bana siiqiyaageeta waatidi maaddiyaakkonne minttettiyaakko bessiya mazamureti awugeetee?

◼ Mazamure maxaafay qonccissiyoogaadan, Yihooway alamiyaa waatidi laammanee?