Xoossay Oonee?

1. Nuuni Xoossau goynnana koshshiyoy aybissee?

Tumu Xoossay ubbabaa Medhidaagaa. I merinaappe merinaa gakkanau deꞌiyaagaa. (Mazamure 90:2) Geeshsha Maxaafan deꞌiya mishiraachuwau Pulttoy a. (1 Ximootiyoosa 1:11) Nuussi deꞌuwaa immiday Xoossaa gidiyo gishshau, nuuni a xallau goynnana koshshees.​—Ajjuutaa 4:11 nabbaba.

2. Xoossay ay mala Xoossee?

Xoossay Ayyaana gidiyo gishshau ay asinne a beꞌi erenna; hegee, saꞌan deꞌiya asaa naatuugaappe a deꞌoy aadhees giyoogaa. (Yohaannisa 1:18; 4:24) Gidikkokka, Xoossaa eeshshaa i medhidobaappe akeekana danddayoos. Leemisuwau, dumma dumma mittaa ayfeenne ciishshay, i siiqiyaagaanne aadhida eratettay deꞌiyoogaa gidiyoogaa qonccissees. Saluwaanne saꞌaa aahotettay a wolqqaa qonccissees.​—Roome 1:20 nabbaba.

Geeshsha Maxaafaa nabbabiyoogan Xoossaa eeshshaabaa darobaa tamaarana danddayoos. Leemisuwau, Geeshsha Maxaafay Xoossay dosiyoobaanne ixxiyoobaa, i asaa waati oyqqiyaakko, asay loꞌꞌobaa woy iitabaa oottiyo wode, i waatiyaakko yootees.​—Mazamure 103:​7-10 nabbaba.

3. Xoossau suntti deꞌii?

Yesuusi, “Saluwan de7iya nu Aawau, ne geeshsha sunttai anjjetto” yaagiis. (Maatiyoosa 6:9) Xoossaayyo daro boncho sunttay deꞌiyaaba gidikkokka, au issi suntta xallay deꞌees. Dumma dumma qaalan he sunttaa, asay dumma dumma ogiyan xeegees. Wolayttattuwan he sunttay “Yihoowa” geetettees. SHin issi issi asay “Yahweh” yaagidi xeegees.​—Mazamure 83:18 nabbaba.a

Asay Xoossaa sunttaa daro Geeshsha Maxaafaa birshshettatuppe kessidi, a sohuwan Godaa woy Xoossaa yaagidi xaafiis. SHin Geeshsha Maxaafay xaafettiyo wode, Xoossaa sunttay 7,000 gidiya sohuwan xaafettiis. Yesuusi Xoossaabaa asaa tamaarissido wode, Xoossaa sunttaa erissiis.​—Yohaannisa 17:26 nabbaba.

Xoossawu Suntti Deꞌii? Giya Biiduwaa Xeella

4. Yihooway nuussi qoppii?

Metoy daridoogee Yihooway nuussi qoppenna Xoossaa gidiyoogaa bessiyaabee? Issi issi asay, i nu bolli metoy gakkanaadan oottiyoy nuna paaccanaassa yaagees; shin hegee tuma gidenna.​—Yaaqooba 1:13 nabbaba.

Koyidobaa dooriyo maataa immidi Xoossay asaa bonchiis. Nuuni he maataa goꞌettidi Xoossau oottiyoogaa nashshana bessennee? (Yaasa 24:15) SHin daro asay harata qohiyaabaa oottanau koyiyo gishshau, metoy dariis. Hegaa mala iita oosuwaa Yihooway beꞌiyo wode azzanees.​—Doomettaabaa 6:​5, 6 nabbaba.

Yihooway nuussi qoppiya Xoossa. I nuuni ufayttidi deꞌanaadan koyees. Mata wode, i metuwaanne metuwau gaaso gidiyaageeta xayssana. He wodee gakkanaashin, amarida wodiyau metoy deꞌanaadan i paqqadido gaasoy deꞌees. He gaasoy aybakko, Timirtte 8n beꞌana.​—2 PHeexiroosa 2:9; 3:​7, 13 nabbaba.

5. Xoossaakko waanidi shiiqana danddayiyoo?

Nuuni woosaa baggaara baakko shiiqanaadan Yihooway shoobbees. I nuna ubbaa maaddanau koyees. (Mazamure 65:2; 145:18) I nu nagaraa atto gaanau koyees. Issi issitoo nuuni qoppiyoogaadan hanana xayikkokka, nuuni a ufayssanau baaxetiyoogaa akeekees. Nuuni polo gidana xayikkokka, Xoossaakko shiiqana danddayoos.​—Mazamure 103:​12-14; Yaaqooba 4:8 nabbaba.

Yihooway nuuyyo deꞌuwaa immido gishshau, nuuni ooppenne aaruwan a siiqana bessees. (Marqqoosa 12:30) Xoossaabaa darobaa tamaarada i koyiyoogaadan oottiyoogan a siiqiyo wode, kaseegaappe aaruwan akko shiiqaasa.​—1 Ximootiyoosa 2:4; 1 Yohaannisa 5:3 nabbaba.