Nuuyyo Atotettay Koshshiyoy Aybissee?

Benippe doommidi, asay payyanne yelaga gididi merinawu deꞌanawu amottiiddi takkiis. SHin azzanttiyaabay, nuuni ubbaykka hayqqoos. Heezzu shaꞌu layttappe kase Iyyoobi yootido, qommoora deꞌiya qofay ha wodiyankka tuma.[1]

Kumetta saꞌan deꞌiya asay merinawu deꞌanawu keehi amottees. Geeshsha Maxaafay Xoossay asaa wozanan merinatettaa wottidoogaanne asay hegaabaa eranawu amottanaadan oottidi medhidoogaa yootees. (Eranchchaa 3:11) Hegaadan gidiyo gishshawu, siiqo Xoossay nuuni demmana danddayennabaa amottanaadan oottees gaada qoppay? Neeni ‘chii’ gaada zaarikko, likke. Xoossaa Qaalay hayqoy morkke gidiyoogaa, qassi i ‘xayanaagaa’ yootees.—1 Qoronttoosa 15:26.

Hayqoy morkke gidiyoogee erettidaagaa. Saro gidida asi ooninne hayqqana koyenna. Nuna qohiyaabaappe qosettoos woy baqatoos. Nuuni harggiyo wode paxanawu baaxetoos. Nuna worana danddayiyaabaappe halanawu nuuyyo danddayettida ubbabaa oottoos.

Yaatin, daro wodiyawu takkida ha morkkee xayana giidi ammananaadan oottiyaabi deꞌii? Ee, deꞌees. Xoossaa Yihooway asaa medhidoy amarida layttaa deꞌidi hayqqanaadaana gidenna. Xoossay koyro, asay hayqqanaadan halchibeenna. I asay saꞌan merinawu deꞌanaadan qoppiis; qassi i halchidobay polettennan attenna.—Isiyaasa 55:11.

SHin hayqoy waani xayanee? Asay hayquwaa xayssanawu daro wodiyawu baaxetiis; shin mule xayssana danddayibeenna. Ha wodiyankka asay keehi baaxetees. Saynttistteti issi issi harggiyaa xayssiya marppiyaanne xaliyaa giigissidosona. Qassi deꞌon deꞌiyaabaa meretaa pilggoosona. Hegaa gishshawu, daro heeran deꞌiya asaa baree he heeran xeetu layttappe kase deꞌida asaagaappe aduqqiis. SHin hayqqiyoogee attibeenna. Geeshsha Maxaafay giyoogaadan, eti ubbay “biittau simmoosona.”—Eranchchaa 3:20.

Gidikkokka, daro wodiyawu takkida ha metuwaa asay ba hiillan xayssana giidi nuuni qoppokko. Xoossaa Yihooway nuuni atotettaa demmanaadan woy hayquwaappe attanaadan gitabaa giigissiis; hegaara gayttidaagan Yesuus Kiristtoosi wolqqaamabaa oottiis.