Kawotettawu Maaddiyaabaa Oottiyoogaa Goynuwawu Keettaa Keexxiyoogaanne Daafabay Gakkiyo Wode Maaddiyoogaa

NEENI intte Kawotettaa Addaraashaa geliyo wode, he sohoy kase erennaba milatees. He keettay nena ubbatoo keehi ufayssees. Amarida layttaappe kase hegaa keexxiyo wode neeni maaddido ufayssiya wodiyaa hassayennan aggakka. SHin haꞌꞌi Kawotettaa Addaraashay guutta wodiyawu daafaban qohettidaageeta maaddiyo soho gidido gishshawu, kaseegaappe aaruwan ufayttadasa. Mata wode abbaa dambbalaa gaasuwan diꞌꞌida diꞌoy intte heeraa qohi simmin, Macara Biiruwaa Konttee he daafaban qohettidaageetussi qumaa, maayuwaa, haattaanne harabaa sohuwaara giigissiis. Qohettidaageeta maaddanawu immidobaa maaran mankkan oyqqidosona. Ishanttinne michontti salppidi banttawu koshshiyaabaa ekkoosona; qassi daroban ufayttidi yeekkidaageeti afuttaa quccoosona.

Yesuusi ba asaa shaakki eranaadan oottiya loꞌꞌobay eti issoy issuwaa siiqiyoogaa gidiyoogaa yootiis. (Yoh. 13:34, 35) Yihoowa Markkati keettaa keexxiyoogeenne daafabay gakkiyo wode maaddiyoogee eti siiqettiyoogaa waatidi bessiyaakko ha shaahuwan beꞌana. Hegaa mala siiqoy nuuni Yesuusi ba Kawotettan haariyo wodiyan deꞌiyoogaa loyttidi bessiyaaba.