Xoossaa “Eratettai Ai Keena Xoqqee?”

“Xoossaa duretettai ai keena daroo? A hayyoinne a eratettai ai keena xoqqee? A pirddaa yootanai oonee? I ba oottiyoogaa i aissi oottiyaakko, oonee akeekiyai?”—ROO. 11:33.

1. Xammaqettida Kiristtaanetuyyo aybippenne aadhiya maatay aybee?

INTTE demmido maata ubbaappe aadhiya maatay aybee? Koyruwan, intte polanaadan imettidabaa woy intteyyo imettida maataa qoppana danddayeeta. Gidikkokka, xammaqettida Kiristtaanetuyyo aybippenne aadhiya maatay, a xallay tumu Xoossaa gidida Yihoowaara mata dabbotaa medhana danddayiyo maataa. Hegee nuuni ‘Xoossan erettanaadan’ oottiis.—1 Qor. 8:3; Gal. 4:9.

2. Yihoowa eriyoogeenne an erettiyoogee keehi gita maata gididoy aybissee?

² Yihoowa eriyoogeenne an erettiyoogee keehippe xoqqa maata gididoy aybissee? Hegee i ubbaappe Aadhiyaagaa gidiyo gishsha xallaassa gidennan, bana siiqiya ubbaa Naagiyaagaa gidiyo gishshataassa. Hananabaa yootiya Naahoomi geeshsha ayyaanay denttettin hagaadan giis: “GODAI keha; metuwaa gallassikka baqati attiyo soho; i banan ammanettiyaageeta erees.” (Naho. 1:7; Maz. 1:6) Merinaa deꞌuwaa hidootay nuuni tumu Xoossaanne a Naꞌaa, Yesuusi Kiristtoosa eriyoogaara gayttidaba.—Yoh. 17:3.

3. Xoossaa eriyoogee ay ay gujjii?

³ Xoossaa eriyoogee a sunttaa eriyoogaappe aadhiyaaba. Nuuni i dosiyoobaanne ixxiyoobaa akeekiyoogan, dabbodan a erana bessees. Nuuni he eridobaara moggottiya ogiyan deꞌiyoogeekka, Xoossaa loyttidi eriyoogaa bessanau keehippe koshshiyaaba. (1 Yoh. 2:4) SHin nuuni Yihoowa eranau tumuppe koyikko, harabaakka koshshees. I oottidobaa xalaala gidennan, hegaa waatidinne aybissi oottidaakko erana koshshees. Nuuni Yihoowa halchuwaa loyttidi akeekiyo wode, ‘Xoossaa eratettay keehi xoqqa’ gidiyoogan kaseegaappe aaruwan maalaalettoos.—Roo. 11:33.

Yihooway Halchoy Deꞌiyo Xoossa

4, 5. (a) Geeshsha Maxaafan goꞌettidoogaadan, halchuwaa giya qaalay ay qonccissii? (b) Halchuwaa dumma dumma ogiyan waatidi polana danddayiyaakko leemisuwan qonccissa.

⁴ Yihooway halchoy deꞌiyo Xoossa; qassi Geeshsha Maxaafay a ‘merinaa qofaabaa woy halchuwaabaa’ yootees. (Efi. 3:10, 11) Ha qofay tumuppe woygiyoogee? Geeshsha Maxaafay ‘halchuwaa’ yaagiya qaalaa goꞌettiyoy, dumma dumma ogiyan gakkana danddayiyo hoolliyaa yootanaassa.

⁵ Leemisuwau, issi uri issisaa baanau koyana danddayees. He sohuwaa gakkiyoogee i kessido hoolle woy halchido halcho. I he sohuwaa baanau goꞌettiyoobaa woy biyo ogiyaa ba koyidoogaadan doorana danddayees. I ba doorido ogiyaara biishin, i qoppibeenna hanotan carkkuwaa hanotay laamettana, ogiyan biyaabay darananne ogee gorddettana danddayees; hegee i hara ogiyaara baanaadan oottees. I darobaa laammana koshshidaba gidikkonne, ba koyido sohuwaa gakkiyo wode ba hoolliyaa gakkiis.

6. Yihooway ba halchuwaa poliyo ogiyaa hanotaadan laammiyoogaa waatidi bessidee?

⁶ Manddara baanau kiyida uray ba ogiyaa laammana danddayiyoogaadan, Yihooway ba merinaa halchuwaa poliyo ogiyan issi issibaa laammiis. Qoppiyo abbee deꞌiyo ba meretatuyyo deꞌiya bantta koyidoogaa dooriyo maataa akeekiyoogan, i ba halchuwaa poliyo ogiyaa laammees. Leemisuwau, qaalaa gelido Zerettaa xeelliyaagan Yihooway ba halchuwaa waatidi poliyaakko ane qoppoos. Doomettan, Yihooway koyro azinaunne a macheeyyo, “Yelettite; corattite; ha sa7aa kumitenne haarite” yaagiis. (Doo. 1:28) Edenen denddida makkalay he halchoy polettennaadan oottidee? Mule oottibeenna! Yihooway ba halchuwaa polanau hara “ogiyaa” goꞌettiyoogan, he hanotaa sohuwaara giigissiis. Makkalanchati medhido metuwaa giigissiya ‘zerettay’ yaanaagaa i kasetidi yootiis.—Doo. 3:15; Ibr. 2:14-17; 1 Yoh. 3:8.

7. Kessaabaa 3:14n Yihooway babaa yootidobaappe ay akeekiyoo?

⁷ Yihooway ba halchuwaa poliyo ogiyaa hanotaadan laammana danddayiyoogee, i babaa qonccissidobaara moggiyaaba. Muusee baayyo imettida oosuwaa polennaadan teqqana danddayiyaabaa yootido wode, Yihooway a hagaadan giidi minttettiis: “‘Hanana koshshiyaaba taani hanana.’ Gujjidikka, ‘Neeni Israaꞌeela naatuyyo hagaadan ga; “Hanana koshshiyaabaa taani hanana (Xoossay) tana inttekko kiittiis”’ yaagiis.” (Kes. 3:14, NW) Ee, ba halchuwaa muleera polanau, Yihooway koshshiyaaba ubbabaa hanana danddayees! Kiitettida PHauloosi Roome maxaafaa shemppo 11n hegaa loꞌꞌo leemisuwan qonccissiis. He sohuwan i leemiso gidida wogaraa mittaabaa yootiis. Nu hidootay saluwaa biyoogaa gidin saꞌan merinau deꞌiyoogaa gidin, he leemisuwaa pilggiyoogee Yihoowa eratettay keehi xoqqa gidiyoogaa loytti akeekanaadan maaddees.

Kasetidi Odettida Zerettaa Xeelliyaagan Yihooway Halchidobaa

8, 9. (a) Wogaraa mittaa leemisuwaa nuuni akeekanaadan maaddiya oyddubati aybee? (b) Yihooway ba halchuwaa poliyo ogiyaa hanotaadan laammiyoogaa woygiya oyshaa zaaroy qonccissii?

⁸ Nuuni wogaraa mittaa leemisuwaa akeekanaappe kase, Yihooway kasetidi yootido zerettaa xeelliyaagan ba halchuwaa polanau oottido oyddubaa erana koshshees. Koyruwan, saꞌan deꞌiya ubba dere asay Abrahaama zerettaa woy a naatu ‘baggaara anjjettanaagaa’ Yihooway ayyo qaalaa geliis. (Doo. 22:17, 18) Naaꞌꞌanttuwan, Abrahaama naata gidida Israaꞌeele dere asaappe ‘qeesetu kawotettay’ yelettanaagee odettiis. (Kes. 19:5, 6) Heezzanttuwan, Israaꞌeele gulbbataappe yelettidaageetuppe daroti Masiyaa ekkennan ixxido wode, harata ‘qeesetu kawotetta’ kessanau Yihooway tangguwaa ekkiis. (Maa. 21:43; Roo. 9:27-29) Wurssettan, Yesuusi Abrahaama zerettau waannatiyaagaa gidikkonne, haratikka he zerettaa bagga gidiyo maataa demmidosona.—Gal. 3:16, 29.

⁹ Ha oyddu yohotu bolli gujjidi minttiya qofaa, Yesuusaara issippe kawonne qeese gididi saluwan haaranaageeti muleera 144,000 gidiyoogaa Ajjuutaa maxaafaappe akeekoos. (Ajj. 14:1-4) Hageeti ‘Israaꞌeela zarekka’ geetettidosona. (Ajj. 7:4-8) SHin 144,000ti ubbay Israaꞌeela gulbbataappe yelettidaageetee, woy Ayhudatee? Ha oyshaa zaaroy, Yihooway ba halchuwaa poliyo ogiyaa hanotaadan laammiyoogaa qonccissees. Kiitettida PHauloosi Roome Kiristtaanetuyyo xaafido dabddaabbee, nuuni hegaa zaaruwaa akeekanaadan waatidi maaddiyaakko ane beꞌoos.

‘Qeesetu Kawotettaa’

10. Israaꞌeela gulbbataappe yelettidaageetu xallaayyo deꞌiya hidootay aybee?

¹⁰ Qommoora beꞌidoogaadan, “qeesetu kawotettanne geeshsha kawotetta” gidanaageeti Israaꞌeele kawotetta xallaappe kiyoosona. (Roome 9:4, 5 nabbaba.) SHin, qaalaa gelido Zerettay yiido wode aybi polettanee? Abrahaama zerettau naaꞌꞌantto shaaho gidiya, 144,000 ayyaana Israaꞌeelati ubbay Israaꞌeele gulbbataappe yelettidaageetee?

11, 12. (a) Saluwaa Kawotettan haariyaageeta dooriyoogee doommidoy awudee, qassi he wode deꞌiya daro Ayhudati ayba zaaro immidonaa? (b) Abrahaama zeretta gidiyaageetu ‘kumetta qoodaa’ Yihooway waatidi kunttidee?

¹¹ Roome 11:7-10 nabbaba. Koyro xeetu layttan deꞌida Ayhuda deree Yesuusa ixxiis. Yaatiyo gishshau, Abrahaama zerettay eta xallaappe yiyoogee attiis. SHin, saluwan ‘qeesetu kawotetta’ gidiyaageeta, PHenxxaqosxxe gallassi 33 M.Ln dooriyoogaa doommido wode, suure wozanay deꞌiyo, he shoobiyaa ekkida amarida Ayhudati deꞌoosona. Amarida shaꞌan qoodettiya hageeti Ayhuda kawotetta ubbaara geeddarssiyo wode ‘amaridaageeta.’—Roo. 11:5.

¹² Gidoshin, Abrahaama zeretta gidiyaageetu ‘kumetta qoodaa’ Yihooway waatidi kunttanee? (Roo. 11:12, 25) Kiitettida PHauloosi hegau immido zaaruwaa akeekite: “SHin taani, ‘Xoossai immana giidoogee attana’ yaagikke. Aissi giikko, Israa7eela asa [Israa7eela gulbbataappe yelettiya] ubbati Xoossai dooridoogeeta gidokkona. Qassi Abrahaama zare [naati] ubbati Xoossaa naata [Abrahaama zerettaa shaaho] gidokkona; . . . hegaa giyoogee eti Xoossai immana giido ogiyan yelettida naatu zaredan qoodettana; shin asa qofaadan yelettidaageeti Xoossaa naata gidokkona yaagiyoogaa.” (Roo. 9:6-8) Hegaa gishshau, Abrahaama gulbbataappe yelettiyoogaa xallay zerettaa xeelliyaagan Yihooway halchidobaa polanau koshshiya gida gidenna.

Leemiso Gidida Wogaraa Mittaa

13. (a) Wogaraa mittay, (b) a xaphoy, (c) a anoynne (d) a tashee aybau leemisoo?

¹³ Kiitettida PHauloosi Abrahaama zerettaa shaaho gidiyaageeta wogaraa mittaa tashiyan leemisiis.a (Roo. 11:21) Ha tokkido wogaraa mittay, Xoossay Abrahaameera maacettido maachaa poliyoogaara gayttida halchuwau leemiso. He mittaa xaphoy geeshsha; qassi hegee ayyaana Israaꞌeeletuyyo deꞌuwaa immiya Yihoowa leemiso. (Isi. 10:20; Roo. 11:16) Anoy Abrahaama zerettau waannatiyaagaa gidida Yesuusau leemiso. Tashe ubbay Abrahaama zerettau naaꞌꞌantto shaahuwan deꞌiyaageetu ‘kumetta qoodaa’ leemiso.

14, 15. Gaden tokkido wogaraappe ‘karettiday’ oonee, qassi aara issippe gattidi qachidoy oonee?

¹⁴ Wogaraa mittaa leemisuwan, Yesuusa ixxida Ayhudati ‘karettida’ wogaraa tashiyan leemisettidosona. (Roo. 11:17) Yaatiyo gishshau, Abrahaama zerettaa shaaho gidiyo maatay etappe haliis. Yaatin, eta sohuwan doorettanaageeti oonee? Eti Abrahaama naata gidiyoogan otorettiya Ayhudatu qofan, hegaa zaaroy qoppanaunne danddayettennaba. SHin Xammaqiya Yohaannisi, Yihooway koyiyaaba gidikko, shuchaa Abrahaamayyo naꞌa kessana danddayiyoogaa kasetidi eta akeekissiis.—Luq. 3:8.

¹⁵ Yaatin, Yihooway ba halchuwaa polanau ay oottidee? PHauloosi gaden tokkido wogaraappe karettida tashiyaa sohuwan woran mokkida wogaraa tashiyaa gatti qachidoogaa yootiis. (Roome 11:17, 18 nabbaba.) Hegaa gishshau, Ayhuda gidenna, Roome gubaaꞌiyan deꞌiyaageetuppe amaridaageetu mala, ayyaanan tiyettida Kiristtaaneti ha leemiso gidida wogaraa mittaara leemiso hanotan issippe qashettidosona. Eti hegaadan Abrahaama zerettaa shaaho gididosona. Eti kase, ha dumma maachaa shaaho gidiyo maati baynna, woran mokkida wogaraa tashe mala. SHin, eti ayyaanaaban Ayhuda gidanaadan Yihooway etau ogiyaa dooyiis.—Roo. 2:28, 29.

16. Ooratta ayyaana deree yelettido hanotaa kiitettida PHeexiroosi waatidi qonccissidee?

¹⁶ Kiitettida PHeexiroosi he hanotaa hagaadan qonccissiis: “Hegaa gishshau, ha shuchchai [Yesuus Kiristtoosi] intteyyo [Ayhuda gidenna Kiristtaaneta gujjin, ayyaanaa Israaꞌeeletuyyo] ammaniyaageetuyyo daro al77o; shin ammanennaageetuyyo, ‘Gimbbiyaageeti karidi ixxido shuchchai godaa xaphuwaa minttiya, ubbaappe aadhdhiya shuchcha gidiis’ yaagees. Qassikka, ‘Ha shuchchai asa xubbiya shuchchanne asa ooggiya zaalla’ yaagees; . . . SHin Xoossai xumaappe garamissiya ba poo7uwau inttena xeesiis; intte a ooratta oosuwaa yootanau doorettida zare; intte kawo qeeseta; geeshsha asanne Xoossaassi buzo asa. Intte kase Xoossaa asa gidekketa; shin ha77i intte a asa; intte kase maarotettaa ekkibeekketa; shin ha77i maarotettaa ekkideta.”—1 PHe. 2:7-10.

17. Yihooway oottidobay ‘meretaadan gidennay’ ayba ogiyaanee?

¹⁷ Yihooway daroti mule qoppennabaa oottiis. Hanidabaa PHauloosi, ‘Meretaadan gidennaba’ yaagidi qonccissiis. (Roo. 11:24) Hegaadan hanidoy ayba ogiyaanee? Woran mokkida mittaa tashiyaa gaden tokkido mittaara gattidi qachiyoogee meeze gidennabanne ubba meretaadaana gidennaba malatees; shin koyro xeetu layttan deꞌida issi issi goshshanchati hegaadan oottidosona.b Hegaara issi mala ogiyan, Yihooway keehi dumma gididabaa oottiis. Ayhuda asaa xeelan, Ayhuda gidennaageeti Xoossaa ufayssiya ayfiyaa ayfana danddayokkona. SHin Yihooway eti Kawotettaa ayfiyaa ayfiya dere gidanaadan oottiis. (Maa. 21:43) Ayhuda gidenna, qaxxarettibeenna asatuppe Kiristtaane ammanuwau koyro laamettida, Qornneliyoosi 36 M.Ln ayyaanan tiyettoosappe doommidi, Ayhuda gidenna, qaxxarettibeenna asati leemiso gidida ha wogaraa mittaara qashettanaadan hanotay injjetiis.—Oos. 10:44-48.c

18. Ayhudati 36 M.Lppe simminkka waanana danddayiyoonaa?

¹⁸ Hegaa giyoogee Ayhudati 36 M.Lppe simmin, Abrahaama zerettaa shaaho gidana danddayokkona giyoogee? CHii gidenna. PHauloosi hagaadan qonccissiis: “Aihudatikka qassi ammanennan ixxiyoogaa aggikko, Xoossai kase eti de7iyoosan zaaridi wottana; aissi giikko, i eta zaaridi wottanau danddayees. Aissi giikko, Xoossai nena woran de7iya wogaraappe qanxxidi, ne meretaadan gidennan gaden tookkido wogaraara gatti qachchidabaa gidikko, yaatin, he karetti wodhdhida tasheta zaarettidi, eta anuwaara gatti qachchanau, a aibi waissanee?”d—Roo. 11:23, 24.

“Israa7eela Asai Ubbai Attana”

19, 20. Wogaraa mittaa leemisuwan qonccidaagaadan Yihooway poliyoobay aybee?

¹⁹ Ee, ‘Xoossaa Israaꞌeeleta’ xeelliyaagan Yihoowa halchoy maalaalissiya ogiyan polettiiddi deꞌees. (Gal. 6:16, NW) PHauloosi giidoogaadan “Israa7eela asai ubbai attana.” (Roo. 11:26) Yihooway keerido wodiyan, “Israa7eela asai ubbai,” giishin ayyaanaa Israaꞌeeletu kumetta qooday saluwan kawonne qeese gididi oottana. Yihoowa halchoy polettennaadan oottana danddayiyaabi aybinne baawa!

²⁰ Kasetidi odettidaagaadan Abrahaama zerettay, giishin Yesuus Kiristtoosinne 144,000ti “Aihuda gidenna asau” anjjuwaa ehaana. (Roo. 11:12; Doo. 22:18) Hegaadan, Xoossaa asa ubbay ha giigissuwan goꞌettees. Yihoowa merinaa halchoy polettiyoogaara gayttidaagan hanettiyaabaa wotti denttidi qoppiyo wode, ‘Xoossaa eratettay keehi xoqqa’ gidiyoogan nuuni maalaalettiyoogee tuma.—Roo. 11:33.

[Tohossa qofata]

Hassayay?

• Yihooway ba halchuwaa poliyo ogiyaappe abaa ay tamaariyoo?

• Roome shemppo 11n deꞌiya . . .

wogaraa mittay,

a xaphoy,

a anoy,

a tashee aybaa leemiso?

• Woraa wogaraa tashiyaa karidi gade wogaraara gattidi qachiyoogaa leemisoy ‘meretaadaana gidennay’ aybissee?

[Sinttaa 26n deꞌiya saaxiniyaa]

▪ Rooma wotaaddaranne goshshancha gidida, Luushes Juunes Maadraates Kaaliyamel giyo bitanee koyro xeetu laytta M.Ln deꞌida asa. I gaxariyaa deꞌuwaabaanne goshshaabaa xaafido 12 maxaafatun keehi erettees.

Ichashantta maxaafan, i beni asay goꞌettiyo ha leemisuwaa xaafiis: “Wogaraa tokkiya uri ayfanaadan oychees; pituwaa yeggiya uri i ayfanaadan woossees; qaxxariya uri i ayfanaadan wolqqanttees.”

Dalqqidalqqiyaaba gidikkonne ayfenna mittaabaa qonccissi simmidi, i kaallidi deꞌiya hanotaa yootiis: “He mittaa woocidi he woocido sohuwan woraappe ehiido wogaraa tashiyaa minttidi oyttiyoogee loꞌꞌo; hegaadan oottido mittay aacidi keehi ayfiya maraa yelees.”

[Sinttaa 26n deꞌiya misiliyaa qonccissuwaa]

Woran Mokkida Wogaraa Tashiyaa Gade Wogaraara Gattidi Qachiyoy Aybissee?