Likkenne Ammanttiyaagaa

Luqaasa 1:3

TAMAARANABAA: Ezggiyaageeti likke gididabaa kuuyanaadan maaddanawu ammanttiya naqaashaa goꞌetta.

WAATANA DANDDAYAY?

• Ammanttiya naqaashaa goꞌetta. Yootiyoobaa Xoossaa Qaalaappe yoota; danddayettikko appe nabbaba. Saynisebaa, odobaa, deꞌuwan hanidabaa woy maaddiya hara naqaashaa goꞌettana koyikko, hegee ammanttiyaaba gidiyoogaanne mata wodeba gidiyoogaa akeeka.

• Naqaashata bessiyaasan goꞌetta. Xiqiseta eta yuushuwan deꞌiya qofaara, Geeshsha Maxaafaa waanna qofaara, qassi ‘ammanettida wozannaama ashkkaray’ giigissido xuufiyan deꞌiya qofaara maayiya ogiyan qonccissa. (Maa. 24:45) Geeshsha Maxaafaappe kareera deꞌiya naqaashaa, an deꞌiya qofaa laammennan woy hegaa xaafida uraa qofaappe dummayennan suure goꞌetta.

• Akeekanaadan maadda. Xiqisiyaa nabbabada woy naqaashaa yoota simmada, ezggiyaageeti kuuyanaadan maaddanawu oyshaa woy leemisuwaa goꞌetta.