Kiristtaanetu Deꞌuwaanne Haggaazuwaa SHiiquwaa Xannaꞌiyo Xuufiyan Odettida Xuufeta
ICHCHASHE 3-9
XOOSSAA QAALAN DEꞌIYA ALꞌꞌOBAA | DAANNATA 15–16
“Kaddiyoogee Keehippe Iitaba!”
Kaddiyoogee Wodiyaa Malaata Gidida Hirggissiyaaba!
4 Koyruwan, Daannaa Samssooni keehippe siiqido, ammanettabeenna Daliilibaa qoppa. Samssooni Xoossaa asaa gishshaa Pilisxxeematuura olettiyo olaa kaalettanau koyiis. Pilisxxeematu halaqati ichashati Daliila Samssoonau ammanettennaaro gidiyoogaa erennan aggokkona. Eti Samssoona woranau koyidi, ayyo asaagaappe aadhiya minotettay deꞌidoy aybissakko Daliila erikko, iyyo daro miishshaa immanau qaalaa gelidosona. Yaaretiya Daliila etau eeno giidaba gidikkokka, Samssoona xuuraa eranau a heezzutoo malada danddayabeykku. A hegaappe simmin Samssoona “hachchi hachchi zaara zaara oichchada” wayissaasu. Wurssettan, i “haniyoobaa xayiis.” Yaatiyo gishshau, i ba huuphiyaa binnaanay meedetti erennaagaa, qassi meedettiyaaba gidikko ba wolqqay xayanaagaa iyyo yootiis. Daliila hegaa erada, Samssoona ba kiyuwan xiskkissada a huuphiyaa meedaasu; yaatada a morkketi bantta koyidobaa oottanaadan etau aatta immaasu. (Daan. 16:4, 5, 15-21) A keehi iitabaa oottaasu! Daliila yaaretiyoogaappe denddidaagan, bana siiqiya ura kaddaasu.
w05 1/15 27 ¶5
Daannatu Maxaafan Deꞌiya Kulkka Qofata
14:16, 17; 16:16. Yeekkiyoogaaninne wayssiyoogan issi uraa unꞌꞌissiyoogee loꞌꞌo dabbotay moorettanaadan oottana danddayees.—Leemiso 19:13; 21:19.
Kaddiyoogee Wodiyaa Malaata Gidida Hirggissiyaaba!
15 Aqo oyqqidaageeti bantta aqo laggiyau ammanettidi deꞌana danddayiyoy ayba ogiyaanee? Geeshsha Maxaafay, “Yelagatettan neeni ekkido ne maccaaseera [woykko azinaara] ufaitta,” qassi “Neeni siiqiyo ne machcheera [woykko azinaara] ufaittada de7a” yaagees. (Lee. 5:18; Era. 9:9) Aqo laggeti gastti gastti biyo wode, bantta dabbotay minnidi deꞌanaadan asatettaaninne qofan banttau danddayettida ubbabaa oottana bessees. Hegaa giyoogee issoy issuwau kehiyoogan, issoy issuwau koshshiyaabaa kunttiyoogaaninne issoy issuwaara wodiyaa aattiyoogan aqo laggeti matattidi deꞌana koshshees giyoogaa. Eti bantta aqo deꞌoynne banttau Yihoowaara deꞌiya dabbotay moorettennaadan minnidi naagana koshshees. Hegaadan oottanau, aqo laggeti Geeshsha Maxaafaa issippe xannaꞌana, ubbatoo issippe haggaazananne Yihoowa anjjuwaa demmanau issippe woossana koshshees.
YIHOOWAYYO AMMANETTADA DEꞌA
16 Deexo nagaraa oottin, ‘etau mino ammanoy deꞌanaadan minttidi seerido’ issoti issoti gubaaꞌiyan deꞌoosona. (Tii. 1:13, 14) Etappe issoti issoti bantta oottidobaa gaasuwan gubaaꞌiyaappe bohettidosona. Qixaatee ‘an loohidaageeti’ ayyaanaaban minnanaadan maaddiis. (Ibr. 12:11, NW) Nuuyyo bohettida dabboy woy mata laggee deꞌikko shin? Hegaa mala wodiyan nuuni oottiyoobay nuuni ammanettiyoy he uraassakko woy Yihoowassakko paacettanaadan oottees. Yihooway bohettida oonaaranne issippe gayttennaadan i azazido azazuwaa nuuni naagiyaakkonne beꞌanau nuna wochees.—1 Qoronttoosa 5:11-13 nabbaba.
Ayyaanaaban Alꞌꞌobaa
w05 3/15 27 ¶6
Samsooni Yihooway Immido Wolqqan Xooniis!
Samsooni Pilisxxeematuura olettiyoogaa xallaa halchiis. I Gaazan shaaramuxa maccaasee son aqanawu gelidoy Xoossaa morkketuura olettanaassa. Samssoonawu morkketu kataman aqiyoosay koshshido gishshawu, shaaramuxa maccaasee soo aqanawu geliis. I yaa gelidoy shaaramuxanaassa gidenna. I he maccaasee sooppe bilahe kiyidi katamaa dirssaa penggiyaa, qoriyaanne qosilettaa hashiyan tookkidi, Kebroonappe sintta baggaara 60 kilo meetiriyaa haakkidi deꞌiya keraa huuphiyaa kessiis. I hegaa oottidoy Xoossay an ufayttidonne awu wolqqaa immido gishshataassa.—Daannata 16:2, 3.
ICHCHASHE 10-16
XOOSSAA QAALAN DEꞌIYA ALꞌꞌOBAA | DAANNATA 17-19
“Xoossaa Higgiyawu Azazettennaagee Metuwaa Kaalettees”
it-2-E 390-391
Miika
1. I Efireema asa. Xoossay Muuse baggaara immido hosppuntta Higgiyawu (Kes 20:15) Miiki azazettennan ixxidi, ba aayeeppe 1,100 xaqara biraa wuuqqiis. I ba nagaraa paaxidi hegaa iyyo zaarin A hagaadan gaasu: “Qanggettai ta na7aa gakkennaadan, taani ha miishshaa ta GODAAYYO dummayana. Yaatobare biraa seerissidi, mittaappe masettidi giigida eeqaa misiliyaa an sheeshshanau go7ettana. Hegaa gishshau, biraa taani neessi zaarana.” Yaatada A he xaqara biraappe naaꞌꞌu xeetaa ekkada, ‘biraa seerissidi eeqaa misiliyaa’ medhdhiya bitaniyawu immaasu; yaatin he bitanee medhdhido misiliyaa Miika son wottidosona. ‘Eeqawu goynniyo keettay deꞌiyo’ Miiki eefuudiyaanne so giddo eeqaa misileta giigissidi, he keettan ba naatuppe issuwaa qeese oottidi sunttiis. Hegee Yihoowa bonchchissanawu giigissidoba milatikkonne, eeqawu goynnennaadan kessido higgiyaaranne (Kes 20:4-6) Yihoowa dunkkaaniyan qeeseti oottiyo oosuwaara maayettennaba. (Daan 17:1-6; Zaa 12:1-14) Muuse naꞌaa Gershshoomappe yelettida leewa zare gidida Yonaataana giyo yelagawu damoozaa qanxxin qeese gididi oottanaadan Miiki ba soo efiis. (Daan 18:4, 30) Bala gididaban ufayttidi Miiki hagaadan giis: ‘Yihooway taayyo ubbabaa loyttanaagaa erays.’ (Daan 17:7-13) SHin Yonaataani Aaroona zare gidenna gishshawu, qeese gididi oottana danddayenna. Yaatiyoogan Miiki koyro oottido balaa bolli haraa gujjiis.—Qoo 3:10.
it-2-E 391 ¶2
Miika
Hegaappe simmin daro takkennan, Miikinne aara deꞌiya daro asati Daana asata kaallidi biidosona. Eti gakkin Daana asati ‘metoy aybee’ yaagidi oychchin, Miiki hagaadan giis: “Taani medhdhido ta xoossatanne tau oottiya qeesiyaa ekki yiichchideta. Tau harai aibee attidai?” Yaatin Daana asati Miiki banttana kaalliyoogaanne waassiyoogaa aggana xayikko, A soo asaa ubbaa woranaagaa yootidi A yashissidosona. Yaatin Miiki eti baappe keehi wolqqaamiyoogaa beꞌidi, ba soo simmidi biis. (Daan 18:22-26) Daana asati Laayisha katamaa xuuggi simmidi he katamaa wotti yeggi keexxidi, yan deꞌidosona. Yoonaataaninne A naati Daana asawu qeese gididosona; yaatin “Xoossaa Dunkkaanee Seelon de7ido laittatun ubban Miiki masissido misileti yan gam77idosona.”—Daan 18:27-31.
Ayyaanaaban Alꞌꞌobaa
Ha Wodiyaa Qaalan Birshshettida Xoossaa Qaalaa
6 Xoossaa sunttaa Geeshsha Maxaafan goꞌettana koshshiyoogaa bessiyaabay yaa gujjiis. Zaarettidi 2013n giigissido Ooratta Alamiyaa Birshshettan he sunttay 1984n attamettidaagaappe 6 gujjidi 7,216 sohuwan deꞌees. He gujettidaageetuppe ichashati 1 Sameela 2:25; 6:3; 10:26; 23:14, 16n deꞌoosona. He xiqisetun Xoossaa sunttay zaarettidi xaafettidoy, Ibraawetto Maasoretike xuufee xaafettanaappe 1,000ppe dariya laytta kasetidi xaafettida, Maxine Abbaa matan beettida xaaxettida maxaafan deꞌiyo gishshataassa. Qassi, kushiyan beni xaafettidabaa loytti xannaꞌido gishshawu, Daannata 19:18n issi sunttay gujettiis.
ICHCHASHE 17-23
XOOSSAA QAALAN DEꞌIYA ALꞌꞌOBAA | DAANNATA 20-21
“Ubbatoo Kaaletuwaa Yihoowa Oychchite”
w11 9/15 32 ¶2
Nena Metoy Gakkiyo Wode Piinihaasi Oottidoogaadan Oottana Danddayay?
Biniyaama zare gidida Gibꞌꞌa katamaa asay Leewa zare gidida bitaniyaa kaadumateera wolqqan zinꞌꞌidi O worido gishshawu, hara zareti Biniyaama zaretu bolli olaa denttidosona. (Daan 20:1-11) Eti olettanaappe kase Yihooway banttana maaddana mala woossidosona; shin eti naaꞌꞌutookka xoonettin daro asay hayqqiis. (Daan 20:14-25) Eti Yihooway bantta woosaa siyibeennabadan qoppidonaa? Qassi eti haluwaa kiyanawu oottidoban Yihooway ufayttibeenna giyoogee?
w11 9/15 32 ¶4
Nena Metoy Gakkiyo Wode Piinihaasi Oottidoogaadan Oottana Danddayay?
Hegaappe ay tamaarana danddayiyoo? Cimati minnidi oottiyaabanne Xoossay maaddana mala woossiyaaba gidikkonne, issi issi metoti gubaaꞌiyaappe xayennan takkana danddayoosona. Yaatikko, cimati Yesuusi yootidobaa hassayana koshshees. I hagaadan giis: “Woossite, intte ekkana; koyite, intte demmana; kare yiidi xeesite; karee intteyyo dooyettana.” (Luq 11:9) Cimati bantta woosaa zaaroy takkidaba milatikkonne, Yihooway ba keerido wodiyan zaaranaagaa ammanettana koshshees.
Ayyaanaaban Alꞌꞌobaa
Eray?
Beni wode olan asay yambbarshshaa waati goꞌettii?
Daawiti wolqqaama gidida Gooliyaada woranawu yambbarshshaa goꞌettiis. Daawiti yambbarshshaa yambbariyoogaa tamaaridoy naatettan dorssaa heemmiyo wode gidennan waayi aggana.—1 Sameela 17:40-50.
Beni wode Gibxxeeninne Asooren yambbarshshaa misilee darosan deꞌees. Yambbarshshawu gomppay galbbaappe woy curqqaappe giigees; qassi naaꞌꞌu gaxay wodoruwaappe oosettees. Yambbariya uri diyametiree 5ppe 8 santi meetire qassi deexoy 250 graame gidido muyla shuchchaa yambbarshshawu gomppan wottees. Hegaappe simmin, I yambbarshshaa yambbaridi issi bagga wodoruwaa yeddees; yaatin shuchchay I koyidosaa wolqqappe eesuwan bees.
Beni wode, yambbarshshawu goꞌettiyo daro shuchchata Giddo Arshshon biittaa bookki xannaꞌiyaageeti demmidosona. Issi gooba olanchchay yambbarshshan zambbido shuchchay, keehi eesuwan biya issibay issi saatiyan 160ppe 240 kilo meetiriyaa baana danddayiyoogaadan eesotidi baana danddayees. Yambbarshshan yambbarido shuchchay wonddafiyaagaa keenaa haahosaa biyoogaa eranchchati maayettana xayikkonne, yambbarshshan yambbaridobay wonddafiyaadan asa worana danddayees.—Daannata 20:16.
ICHCHASHE 24-30
XOOSSAA QAALAN DEꞌIYA ALꞌꞌOBAA | URUTO 1–2
“Aggenna Siiquwaa Bessite”
Yihoowayyo Mata Dabbota Milata
5 Uruta baassi koshshiyaabaa kunttiya so asay, i aayyiyaanne hara dabboti deꞌiyo Mooꞌaaba biitti baanawu qoppana danddayawusu shin. Mooꞌaabi a yelettido biitta. A eriyoy he biittaa wogaa, qaalaanne asaa. Uruta hegaa malabaa Beetaliheemen demmanaagaa Naaꞌooma qaalaa gelana danddayukku. Uruta Mooꞌaaba biittan deꞌanaadan a zoraasu. Naaꞌooma ba naꞌaa machiyaa keetta woy azina demmanaagaa siraasu. Uruta waataneeshsha? ‘Ba asaakkonne ba xoossatukko simmida’ Orppi hanotay Urutigaappe keehi dummatiyoogaa akeeka. (Uru. 1:9-15) Uruta ba asaakkonne eta xoossatukko simmanawu koyadee? CHii, koyabeykku.
Yihoowayyo Mata Dabbota Milata
6 Uruta Xoossaa Yihoowaabaa hayqqida ba azinaappe woy Naaꞌoomippe erennan aggukku. Yihooway Mooꞌaaba xoossatu mala gidenna. Uruta Yihoowa siiqananne ayyo goynnana bessiyoogaa erawusu. SHin era xallay gidenna. Uruta qofaa qachana bessees. A Yihoowa ba Xoossaa oottada dooraneeshsha? Uruta loꞌꞌobaa dooraasu. A Naaꞌoomissi, “Ne asai ta asaa gidana; ne Xoossai ta Xoossaa gidana” yaagaasu. (Uru. 1:16) Uruta Naaꞌoomo siiqaasu; shin keehi garamissiyaabay a Yihoowa siiqidoogaa. Qassi Booꞌeezikka Uruta Yihoowa qefiyaa garssan shemppanawu koyido gishshawu O galatiis. (Uruto 2:12 nabbaba.) Hegee kafo maray ba aayee qefiyaa giddon baqati attiyoogaa nuuni hassayanaadan oottana danddayees. (Maz. 36:7; 91:1-4) Yihooway Urutiyyo baqati attiyo soho gidiis. I ammanuwaa gishshawu Yihooway o woytiis; qassi a kuuyidoban zilꞌꞌettiyo ayba gaasoynne baawa.
Ayyaanaaban Alꞌꞌobaa
w05 3/1 27 ¶1
Uruti Maxaafan Deꞌiya Kulkka Qofata
1:13, 21—Naaꞌoomi deꞌuwaa camettidaynne I bolli metuwaa gattiday Yihooway? CHii, Naaꞌooma hegaadan giidoy Xoossay ba bolli metuwaa gattiis gaada mootanaassa gidenna. SHin ha ubba metoy O gakkiyo wode Yihooway bana aggibayidabadan qoppaasu. A unꞌꞌettaasunne hidootaa qanxxaasu. He wode, asay yeluwaa Xoossaa anjjodan qassi mayne gidiyoogaa Xoossay qanggidobadan qoppees. I naaꞌꞌu attuma naati hayqqidonne naatu naata beꞌabeenna Naaꞌooma, Yihooway bana kawushshidabadan qoppaasu.
ICHCHASHE 31–USUPPUNE 6
XOOSSAA QAALAN DEꞌIYA ALꞌꞌOBAA | URUTO 3-4
“Ubbatoo Loꞌꞌo Sunttay Deꞌiyoogeeta Gidite”
“Lo77obaa Haniya Maccaasa”
18 Booꞌeeza liiqo haasayay Uruto minttettidoogee qoncce. I hagaadan giis: “Ta na7ee, GODAI nena anjjo! Hagee ne oishai neeni kase ne bolloteessi oottido kehatettaappekka aadhdhees; neeni manqqo woikko dure gidiya yelaga attuma asata koyabaakka.” (Uru. 3:10) Booꞌeezi Uruti mala yelaga maccaasi, appe yelagiya attuma asa hiyyeesa gidin dure gidin gelana danddayiyoogaa akeekiis. SHin Uruta hayqqida Naaꞌoomi azinaa sunttaa a biittan xeegissiyaabaa oottiyoogan Naaꞌoomiyyo xalla gidennan, hayqqida ba bolluwawukka kehaasu. Ha yelaga maccaasiyaa bessido kehatettan Booꞌeezi keehi ufayttidoy aybissakko akeekana danddayoos.
“Lo77obaa Haniya Maccaasa”
21 Booꞌeezi asa ubbay Uruta “lo77obaa haniya maccaasa” gidiyoogaa eriyoogaa yootin, a hegaa wotta dentta qoppaydda keehi ufayttidoogee qoncce! Yihoowa eranawunne awu oottanawu amottidoogee, a hegaa mala loꞌꞌo asa gidanaadan maaddiis. Qassi a kase erenna wogaa meezetanawu eeno giyoogan Naaꞌoomiyyoonne i asawu daro kehaasu. Nuuni Urutiigaadan ammaniyaaba gidikko, hara asaanne eta wogaa bonchoos. Hegaadan oottikko, asay nunakka loꞌꞌobaa haniya asa ootti xeellana danddayees.
“Lo77obaa Haniya Maccaasa”
25 Hegaadan oottidi, Booꞌeezi Uruto ayssiis. Hegaappe simmin, Yihooway “iyyo uluwan yeluwaa tilin, attuma na7aa yelaasu.” Beetaliheemen deꞌiya maccaasay Naaꞌoomo anjjiis; qassi Naaꞌoomiyyo laappun attuma naati deꞌiyaakkokka kehiyoogaappe aaruwan Uruta iyyo kehido gishshawu, eti o nashshidosona. Uruti naꞌay gita Kawuwaa Daawitayyo aawaa aawa gidiis. (Uru. 4:11-22) Daawiti qassi Yesuus Kiristtoosayyo mayzza aawa gidiis.—Maa. 1:1.
Ayyaanaaban Alꞌꞌobaa
w05 3/1 29 ¶3
Uruti Maxaafan Deꞌiya Kulkka Qofata
4:6—Mata dabbo gidida uri gadiyaa woziyoogee A buzo laataa qohana danddayiyoy ayba ogiyaanee? Issi uri hiyyeesidi ba gadiyaa bayzzikko, woziya uri kaalliya Ishatamantto Layttaa Baalaa gakkanawu deꞌiya layttaa qoodidi attida layttaa miishshaa, shammidaagaayyo immidi ba gadiyaa zaarana koshshees. (Wogaabaa 25:25-27) Hegee A aquwaa qohana danddayees. Hegaa bollikka he gadiyaa, wozida urawu mata dabbota gidennan, Uruta yeliyo naꞌay laattana bessees.
USUPPUNE 7-13
XOOSSAA QAALAN DEꞌIYA ALꞌꞌOBAA | 1 SAMEELA 1–2
“Neeyyo Siyettiya Ubbabaa Woosan Yihoowawu Yoota”
Ba Wozanaabaa Woosan Xoossawu Yootaasu
12 Woosaara gayttidaagan Haanna Xoossaayyo oottiya ubbaassi leemiso gidawusu. Issi naꞌay bana qofissidabaa bana siiqiyaa aawaassi yootiyoogaadan, Yihoowaykka ba asay aynne yayyennan ba wozanaabaa assi yootanaadan siiquwan minttettees. (Mazamure 62:8; 1 Tasalonqqe 5:17 nabbaba.) Kiitettida PHeexiroosi Yihoowakko woossiyoogaa xeelliyaagan, “I intteyyo qoppiyo gishshau, inttena hirggissiya ubbabaa a bolli olite” yaagidi minttettiyaabaa ayyaanaa kaaletuwan yootiis.—1 PHe. 5:7.
w07 3/15 16 ¶4
Haanna Woppu Giidoy Ayba Ogiyaanee?
Hegaappe ay tamaarana danddayiyoo? Nuna qofissidabaa Yihoowakko woossiyo wode, nuuyyo siyettiyaabaa yootananne wozanappe woossana koshshees. Nu metuwaa giigissanawu nuuni aynne oottana danddayenna wode, Yihoowa bolli olana koshshees. Hegee nuuni oottana koshshiya aybippenne aadhdhiyaaba.—Leemiso 3:5, 6.
Ayyaanaaban Alꞌꞌobaa
w05 3/15 21 ¶5
Koyro Sameela Maxaafan Deꞌiya Kulkka Qofata
2:10—Israaꞌeelan kawoy baynna wodiyan Haanna Yihooway “ba kawuwaayyo wolqqaa immana” gaada woossidoy aybissee? Israaꞌeelan kawoy kawotanaagee Muuse Higgiyan kasetidi odettiis. (Zaarettido Wogaa 17:14-18) Yaaqoobi hayqqana haniiddi hagaadan giidi hiraagaa yootiis: “Kawotaa xam77ai Yihudaappe . . . shaahettenna.” (Doomettaabaa 49:10) Israaꞌeelatu mayzza aayo gidida Saaro xeelliyaagan Yihooway hagaadan giis: “Asaa kawoti ippe yaana.” (Doomettaabaa 17:16) Yaatiyo gishshawu, Haanna sinttappe yaana kawuwaa xeelliyaagan woossaasu.
USUPPUNE 14-20
XOOSSAA QAALAN DEꞌIYA ALꞌꞌOBAA | 1 SAMEELA 3-5
“Yihooway Qarettiya Xoossaa”
Ubbaa Danddayiyaagaa Gidikkonne Qarettees
3 Sameeli Xoossaa dunkkaaniyan Yihoowawu ‘oottiyoogaa’ naatettan doommiis. (1 Sam. 3:1) Issi qammi Sameeli xiskkidaashin issi oorattabay haniis. (1 Sameela 3:2-10 nabbaba.) I ba sunttaa xeesiyoogaa siyiis. Xeesiday Qeese Ubbatu Halaqaa cimida Eela gi qoppidi, Sameeli akko woxxi biidi, “Neeni xeesin hekko yaas” yaagiis. Eeli xeesibeennaagaa yootiis. Haranttuwaa naaꞌꞌutoo hegaadan hanin, Sameela xeesiday Xoossaa gidiyoogaa Eeli akeekiis. Yaatiyo gishshawu, I naꞌay woygi zaaranaakko yootiis; yaatin Sameeli azazettiis. Yihooway koyrokka xeesiyay bana gidiyoogaa Sameelawu yootibeennay aybissee? Geeshsha Maxaafay aybissakko yootenna; Yihooway hegaadan oottidoy yelaga Sameelawu siyettiyaabaa qoppiyo gishshataassa gidana danddayees.
Ubbaa Danddayiyaagaa Gidikkonne Qarettees
4 Koyro Sameela 3:11-18 nabbaba. Naati cimata, ubba qassi deriyaa haariyaageeta bonchchanaadan Yihooway Higgiyan azaziis. (Kes. 22:28; Wog. 19:32) Sameeli maallado Eelakko biidi Xoossay pirddido yashshiyaabaa xalidi yootana gaada neeni qoppay? Yootennaagee qoncce! Geeshsha Maxaafay Sameeli “ajjuutaabaa Eelayyo yootanau” yayyidoogaa yootees. SHin Xoossay Sameela I xeesidoogaa Eelawu qonccissiis. Hegaappe denddidaagan, Eeli Sameeli yayyennan yootanaadan minttettiis. Eeli, “Xoossai neeyyo yootidobaappe issibaanne taappe [qottoppa]” yaagiis. Sameeli eeno giidi “ubbabaa Eelayyo yootiis.”
Ayyaanaaban Alꞌꞌobaa
w05 3/15 21 ¶6
Koyro Sameela Maxaafan Deꞌiya Kulkka Qofata
3:3—Sameeli xiskkidoy Ubbaappe Aadhdhiya Geeshsha Sohuwaanee? Akkay, gidenna. Sameeli Leewa zare gidikkonne, Qahaata yara gidiyo gishshawu qeese gididi oottana danddayenna. (1 Hanidabaa Odiya 6:33-38) Yaaniyo gishshawu, “ubbaappe aadhdhiya geeshshabata . . . be7anau” awu paqqadettenna. (Qoodaabaa 4:17-20) Sameeli gelana danddayiyoy beeta maqidasiyaa gibbe xalla. I xiskkidoykka yaana gidennan waayi aggana. Eelikka he wode xiskkidoy beeta maqidasiyaa gibbiyaa giddoona gidennan aggenna. Hegaa gishshawu, “Xoossaa Taabootai de7iyo” sohuwaa giya qofay beeta maqidasiyaa heeraa qonccissiyaaba gidennan aggenna.
USUPPUNE 21-27
XOOSSAA QAALAN DEꞌIYA ALꞌꞌOBAA | 1 SAMEELA 6-8
“Intte Kawoy Oonee?”
it-2-E 163 ¶1
Xoossaa Kawotettaa
Asa Kawotettaa Oychchidosona. Israaꞌeelati, Xoossay Abrahaameera maacettoosappe 800ppe dariya layttay aadhdhin, qassi eti Gibxxeppe kiyoosappe 400 gidiya layttaappe simmin, hara deretuugaadan banttawu kawoy deꞌanaadan oychchidosona. Eti hegaadan oychchidoogee Yihooway banttana haaranaadan koyibeennaagaa bessees. (1Sam 8:7, 8) Xoossay Abrahaamawunne Yaaqoobawu qaalaa gelido gishshawu, kawotettay eqqanaagaa asay naagidoogee bessiyaaba. Yaaqoobi hayqqana haniiddi Yihuuda xeelliyaagan yootido hiraagay (Doo 49:8-10), Yihooway Israaꞌeelati Gibxxeppe kiyi simmin yootidobay (Kes 19:3-6), Higgiyaa maachchay yootiyoobay (Zaa 17:14, 15), ubba qassi Xoossay he kawotettaabaa hananabaa yootiya Balaami yootanaadan oottidoogee eti kawuwaa naaganaadan oottiis (Qoo 24:2-7, 17). Sameela aayyiyaa Haanna he kawotettaabaa woosan qonccissaasu. (1Sam 2:7-10) SHin Yihooway he Kawotettaa xeelliyaagan ‘xuura’ gidida ubbabaa qonccissibeenna. Hegaa bollikka, he Kawotettay eqqana wodiyaa, he Kawotettay ay mala gidanaakko, qassi I haaranay saluwaanakko woy saꞌaanakko yootibeenna. Yaatiyo gishshawu, Israaꞌeelati banttawu kawuwaa oychchidoogee otorettidoogaa bessiyaaba.
Azzanttiyaabay Deꞌishinkka Gencciis
18 He yohuwaa xeelliyaagan Sameeli woossin, Yihooway ayyo, “Asai nena giyo qaalaa ubbaa siya; aissi giikko, taani eta bolli kawotennaadan, eti tana ixxidosonappe attin, nena ixxibookkona” yaagidi zaariis. He qaalay Sameela minttettiis; shin eta hanotay Ubbaa Danddayiya Xoossaa cayiyoogaa mala! Israaꞌeelati kawoyiyo asi eta naaqqidi haaranaagaa etawu yootanaadan Yihooway Sameela azaziis. Sameeli etawu hegaa yootin, eti, “CHii! CHii! Nuussi kawoi de7o” yaagidi i yootiyoobaa siyennan ixxidosona. Ubba wode Xoossaayyo azazettiya Sameeli Yihooway doorido kawuwaa zaytiyan tiyanawu biis.—1Sam. 8:7-19.
Yihooway Haariyo Ogee Suure Gidiyoogee Qoncciis!
9 Yihooway giidobay tuma gidiyoogaa taarikee qonccissiis. Asan haarettiyoogee, ubba qassi haariya kawoy ammanettennaagaa gidiyo wode, Israaꞌeeletu bolli wolqqaama metuwaa kaalettiis. Israaꞌeeletu hanotan qonccida ha leemisuwaa qoppiyo wode, Yihoowa erenna asaa naati haariyo aysoy taarike wode ubban asaa adussa wodiyau goꞌꞌiyabaa ehaana danddayibeennaagee garamissenna. Haariya issoti issoti sarotettaanne woppatettaa ehaanau baaxetiyo wode, Xoossay banttana anjjanaadan woossoosona; shin Xoossay ba haaruwau aqennaageeta waatidi anjjana danddayii?—Mazamure 2:10-12.
Ayyaanaaban Alꞌꞌobaa
w02 4/1 12 ¶13
Xammaqettana Koshshiyoy Aybissee?
13 Issi asi xammaqettidi Yihoowa Markka gidanaappe kase laamettana bessees. Laamettiyoogee issi uri Kiristtoos Yesuusa kaalliyaagaa gidanawu ba dosan wozanappe kuuyiyooba. Hegaadan oottiya asati kase oottiyo iitabaa aggidi Xoossaa xeelan likke gididabaa oottanawu murttoosona. Geeshsha Maxaafan laamettiyoogaa qonccissanawu goꞌettido Ibraawettonne Giriiketto qaalay, simmiyoogaa woy aggiyoogaa qonccissees. Hegee bala oosuwaa aggidi Xoossaakko simmiyoogaa bessiyaaba. (1 Kawotu Maxaafaa 8:33, 34) Issi uri laamettanawu, ‘nagaraappe simmanawu bessiyaabaa oottana’ koshshees. (Oosuwaa 26:20) Hegaadan oottanawu, worddo goynuwaa aggidi Xoossay azazidoogaadan oottananne Yihoowa xallawu goynnana koshshees. (Zaarettido Wogaa 30:2, 8-10; 1 Sameela 7:3) Laamettanawu nu qofaa, nu halchchuwaanne nu eeshshaa laammana koshshees. (Hizqqeela 18:31) Nuuni Xoossaa ufayssenna oosuwaa aggidi ooratta asatettaa maayanawu ‘simmana’ koshshees.—Oosuwaa 3:19; Efisoona 4:20-24; Qolasiyaasa 3:5-14.
USUPPUNE 28–LAAPPUNE 6
XOOSSAA QAALAN DEꞌIYA ALꞌꞌOBAA | 1 SAMEELA 9–11
“Saaꞌooli Koyro Heeran Bana Ziqqi Oottiyaanne Ashkke Asa”
ena Ziqqi Oottada Ashkketettan Ne Xoossaara Hemetta
11 Kawuwaa Saaꞌoola gakkidabaa qoppa. I yelagatettan ba abbiyaa pacaa eriya asa; ubba I aawatettaa ekkanawu mammottiis. (1 Sam. 9:21; 10:20-22) SHin guyyeppe, I otorettiyaagaa gidiis, qassi I oottana bessenna oosuwaa oottiis. I kawo gididi takkennan he iita eeshshaa bessiyoogaa doommiis. Issitoo, I hananabaa yootiya Sameela naagiyo wode danddayennan aggiis. Saaꞌooli bana ziqqi oottidi Yihooway ba asaa gishshawu issibaa oottanaagaa ammanettiyoogaa aggidi, I oottana bessennaba gidiyoogaa erikkonne, xuuggiyo yarshshuwaa shiishshiis. Hegaappe denddidaagan, Saaꞌooli Yihoowan nashettibeenna, qassi wurssettan Yihooway kawotettaappe A diggiis. (1 Sam. 13:8-14) Nuuni naagettanaadan odettida ha leemisuwaappe tamaaridi, nuussi maatay imettibeennabaa oottennan aggikko, akeekanchcha gidoos.
Ubbatoo Waatidi Nu Goꞌꞌaa Aggibayana Danddayiyoo?
8 Israaꞌeela Kawuwaa Saaꞌoola hanotay, nu xalaalaa dosiyoogee waatidi nuuni nu goꞌꞌaa aggibayennaadan oottana danddayiyaakko akeekanaadan maaddees. Saaꞌooli kawo gidiyo wode ashkkenne bana kawushshiya asa. (1 Sam. 9:21) A karidi i kawo gidanaadan koyibeennaageeta qaxxayibeenna; i Xoossay baassi immido maataa naagissanau qaxxayiyaakkonne hegee bessiyaaba giidi qoppana danddayees. (1 Sam. 10:27) Kawuwaa Saaꞌooli Xoossaa ayyaanay maaddin, Israaꞌeelata kaalettidi Amoonatuura olettidi xooniis. Hegaappe simmin, i xoonido gishshau banan ceeqettiyoogaappe Yihoowa sabbiis.—1 Sam. 11:6, 11-13.
w95 12/15 10 ¶1
Amoonati Yihooway Etawu Oottido Kehatettaa Iitatettan Zaaridosona
Zaarettidikka Amoonati Yihooway etawu oottido kehatettaa iitatettan zaaridosona. Eti oottido keehi iitabaa Yihooway xaasayi xeellibeenna. “[Naaꞌoosa] qaalaa Saa7ooli siyido wode, Xoossaa Ayyaanai a bollan wolqqan wodhdhiis; Saa7ooli hanqquwaa suulliis.” Xoossaa ayyaanay kaalettin Saaꞌooli 330,000 gooba olanchchata shiishshidi Amoonata xoonin, etappe ‘attida naaꞌꞌu asi issippe’ gayttanawukka danddayibeenna.—1 Sameela 11:6, 11.
Ayyaanaaban Alꞌꞌobaa
w05 3/15 22 ¶8
Koyro Sameela Maxaafan Deꞌiya Kulkka Qofata
9:9—“Ha wodiyan hananabaa yootiyaagee beni wodiyan xeelliyaagaa geetettees;” he qofay woygiyoogee? Sameela wodiyaaninne Israaꞌeelan kawotu wodiyan hananabaa yootiyaageeti keehi erettiyoogaa doommido gishshawu, “xeelliyaagaa” giya qaalay ‘hananabaa yootiyaagaa’ giya qaalan laamettidoogaa he qofay qonccissennan waayi aggana. Sameeli hananabaa yootida koyro asa.—Oosuwaa 3:24.