Kiristtaanetu Deꞌuwaanne Haggaazuwaa SHiiquwaa Xannaꞌiyo Xuufiyan Odettida Xuufeta
© 2022 Christian Congregation of Jehovah’s Witnesses
ICHCHASHE 2-8
XOOSSAA QAALAN DEꞌIYA ALꞌꞌOBAA | 2 KAWOTU MAXAAFAA 22-23
“Nuna Ziqqi Oottana Koshshiyoy Aybissee?”
lfb 134 2
Yoosiyaasi Xoossaa Higgiyaa Siiqees
Beeta maqidasiyan, qeese ubbatu halaqay, Hilqqee, Higgiyaa maxaafaa demmiis; hegee Muusee xaafido koyro maxaafaa gidennan waayi aggana. Kawuwaa xaafee Saafaani maxaafaa Yoosiyaasayyo ehiidi, cenggurssaa xoqqu oottidi Higgiyaa nabbabiyoogaa doommiis. Yoosiyaasi hegaa siyido wode, asay Yihoowayyo daro layttawu azazettibeennaagaa akeekiis. Kawuwaa Yoosiyaasi Hilqqiyaayyo hagaadan giis: ‘Yihooway nu bolli keehi hanqqettiis. Baada a oycha. Nuuni ay oottana koshshiyaakko Yihooway nuussi odana.’ Yihooway hananabaa yootiya Hulddi baggaara, ‘Yihudaa asay tana aggiis. Eti qaxxayettana; shin Yoosiyaasi ba huuphiyaa kawushshido gishshawu, i haariyo wodiyan qaxxayikke’ yaagidi zaariis.
Yihoowa Keettau Mishettiyaageeta Gidite!
20 Kawuwaa Yoosiyaasi beeta maqidasiyaa bottokonissiyo wode, Qeese Ubbatu Halaqaa Hilqqee “GODAI Muuse baggaara immido Higgiyaa Maxaafaa demmiis.” I kawuwaa xaafiyaa Saafaanayyo immin, Saafaani Yoosiyaasayyo nabbabiyoogaa doommiis. (2 Odiya 34:14-18 nabbaba.) Hegaappe hanidabay aybee? Kawoy azzanidi sohuwaara ba maayuwaa pooshshiisinne asati Yihoowa oychanaadan azaziis. Yihudaa biittan oosettida issi issi haymaanoote oosota ixxiyoogaa Xoossay hananabaa yootiya Hulddi baggaara yootiis. Gidikkokka, ubba asaa bolli bashshay gakkanaagee odettidaashin, Yoosiyaasi eeqaa goynuwaa xayssiyoogan loꞌꞌo oosuwaa oottiisinne Yihoowa ufayssiya ogiyan deꞌiis. (2 Odiya 34:19-28) Nuuni hagaappe ay tamaarana danddayiyoo? Nu koshshay Yoosiyaasaagaara issi mala gidiyoogee qoncce. Kaddiyo hanotaynne ammanettenna hanotay nu goynuwan deꞌanaadan oottiyaaba gidikko, aybi hanana danddayiyaakko akeekidi, Yihoowa kaaletuwau sohuwaara zaaruwaa immanau koshshees. Qassi Yihooway Yoosiyaasaara gayttidaagan oottidoogaadan, nuuni tumu goynuwau mishettiyoogaa i akeekidi hegan ufayttiyoogaa ammanettana danddayoos.
Ayyaanaaban Alꞌꞌobaa
w01 4/15 26 ¶3-4
Intte Diccido Hanotay Ayba Gidikkonne, Muruta Gidana Danddayeeta
Yoosiyaasi naatettan iita hanotan diccikkonne, Yihoowa sinttan loꞌꞌobaa oottiis. I ba haaruwaa wode keehi loꞌꞌobaa oottidoogaa Geeshsha Maxaafay yootees: “Muuse higgiyaadan ba kumetta wozanan, ba kumetta shemppuwaaninne, ba kumetta wolqqan GODAAKKO simmidaban Yoosiyaasa mala, kawoi, appe kase gidin, appe guyye gidin, mulekka denddibeenna.”—2 Kawotu Maxaafaa 23:19-25.
Yoosiyaasa hanotay metiyaabaa naatettan genccidaageeta keehi minttettiyaaba gidiyoogee qoncce! Nuuni A hanotaappe ay tamaarana danddayiyoo? Loꞌꞌobaa dooranaadaaninne hegaadan deꞌanaadan Yoosiyaasa maaddidabay aybee?
ICHCHASHE 9-15
XOOSSAA QAALAN DEꞌIYA ALꞌꞌOBAA | 2 KAWOTU MAXAAFAA 24-25
“Nuuni Deꞌiyo Wodiyaa Akeekite”
w01 2/15 12 ¶2
Yihoowa Pirddaa Gallassay Keehi Matiis!
2 Sofonaasi yootido hiraagay yelaga Yoosiyaasi eeqaa goynuwaa Yihudaa biittaappe xayssana koshshiyoogaa loytti akeekanaadan oottidoogee tuma. SHin kawoy he biittaappe worddo haymaanootiyaa xayssiyo wode asaa giddoppe iitatetta ubbaa xayssibeenna woy ‘xillo asaa suuttaa gussidi Yerusalaamen kunttida’ A aawaa aawaa, Kawuwaa Minaase nagaray atto geetettanaadan oottibeenna. (2 Kawotu Maxaafaa 24:3, 4; 2 Hanidabaa Odiya 34:3) Yaatiyo gishshawu Yihoowa pirddaa gallassay yiyoogee attenna.
w07 3/15 11 ¶10
Ermmaasa Maxaafan Deꞌiya Kulkka Qofata
Layttay 607 K.K. Sedeqiyaasi kawotoosappe 11tta laytta. Baabiloone Kawoy Naabukadanaxoori Yerusalaame katamaa dooddoosappe 18 aginay aadhdhiis. Naabukadanaxoori kawotido 19tta laytti, ichchashantta aginan, laappuntta gallassi kawuwaa naagiyaageetu halaqay Naabuzaraadaani Yerusalaame ‘geliis,’ woy gakkiis. (2 Kawotu Maxaafaa 25:8) Naabuzaraadaani hanotaa xannaꞌiisinne I oottanabaa halchchiis; geella he wode I katamaa dirssaappe kareera dunkkaanidosan deꞌennan waayi aggana. Heezzu gallassaappe simmin, he aginan tammantta gallassan I Yerusalaame ‘geliis,’ woy gakkiis. Qassi I katamaa xuuggiis.—Ermmaasa 52:12, 13.
Ayyaanaaban Alꞌꞌobaa
w05 8/1 12 ¶1
Naaꞌꞌantto Kawotu Maxaafan Deꞌiya Kulkka Qofata
24:3, 4. Minaase suuttaa gussido gishshawu, Yihooway ‘Yihudaa asaayyo atto gaanawu koyibeenna.’ Xoossay xillo asaa suuttaa xoqqu ootti xeellees. Yihooway xillo asaa suuttaa gussidaageeta xayssiyoogan haluwaa kessanaagaa ammanettana danddayoos.—Mazamure 37:9-11; 145:20.
ICHCHASHE 16-22
XOOSSAA QAALAN DEꞌIYA ALꞌꞌOBAA | 1 HANIDABAA ODIYA 1-3
“Geeshsha Maxaafay Tumubaa Yootiya Maxaafaappe Attin, Coo Medhdhi Xaafidobaa Gidenna”
Addaameenne Hewaana Tumuppe Deꞌida Asee?
Leemisuwawu, Geeshsha Maxaafan Koyro Hanidabaa Odiya maxaafaa shemppo 1ppe biidi 9 gakkanaashin deꞌiyaanne Luqaasa Wonggeliyaa shemppo 3n deꞌiya Ayhudatu mayzza aawatubaa yootiya taarikiyaa qoppite. Koyro Hanidabaa Odiya maxaafay 48 yeletatubaa, qassi Luqaasa Wonggelee 75 yeletatubaa loyttidi qonccissees. Luqaasa maxaafay Yesuus Kiristtoosa yeletaabaa yootees, qassi Hanidabaa Odiya maxaafay Israaꞌeelan kawotida kawotunne qeesetu yeletaabaa yootees. He naaꞌꞌu maxaafatun Solomona, Daawita, Yaaqooba, Yisaaqa, Abrahaama, Nohanne wurssettan Addaame mala loytti erettiya asatu sunttaykka deꞌees. He naaꞌꞌu sohuwan odettida sunttati ubbay tumuppe deꞌida asatu suntta, qassi Addaamee koyro deꞌida asa gidiyoogee he sohotun odettiis.
w08 6/1 3 ¶4
Nohebaanne Bashshaa Haattaabaa Yootiya Taarikee Tumu Taarikeppe Attin, Coo Medhdhi Xaafidobaa Gidenna
Geeshsha Maxaafan yeletaabaa yootiya naaꞌꞌu taariketi Nohee deꞌida asa gidiyoogaa qonccissoosona. (1 Hanidabaa Odiya 1:4; Luqaasa 3:36) Loytti pilggiya Izirinne Luqaasi he yeletaabaa xaafidosona. Luqaasi Yesuus Kiristtoosa zariyaa Noha gakkanaashin yootiis.
Addaameenne Hewaana Tumuppe Deꞌida Asee?
Leemisuwawu, wozoy woosa keettaa biya darota ufayssiya Geeshsha Maxaafaa timirtte gidiyoogaa qoppite. He timirttiyaa maaran, Yesuus Kiristtoosi asaa eta nagaraappe ashshanawu wottiyoobi baynna ba shemppuwaa wozo ootti immiis. (Maatiyoosa 20:28; Yohaannisa 3:16) Wozoy xayidabaa woy issi uraappe halidabaa zaaretti demmanawu woykko shammanawu qanxxettiya bixe waaga gidiyoogaa nuuni eroos. Yesuusi ‘bixe wozo’ gididoogaa Geeshsha Maxaafay yootiyoy hegaassa. (1 Ximootiyoosa 2:6) Bixe gididoy aybaassee? giidi nuuni oychchana danddayoos. Geeshsha Maxaafay hegaa zaaruwaa hagaadan gees: “Asai ubbai Addaameera dabbotido gishshau haiqqidoogaadan, Kiristtoosaara dabbotido gishshau, ubbai de7uwaassi denddana.” (1 Qoronttoosa 15:22) Azazettiya asaa ashshanawu Yesuusi yarshshido wottiyoobi baynna deꞌoy Addaamee Edenen nagaraa oottidoogaa gaasuwan appe halida wottiyoobi baynna deꞌuwaara bixe. (Roome 5:12) Addaamee deꞌuwan deꞌibeennaba gidiyaakko, Kiristtoosa wozuwaa yarshshoy aynne maaddennaba gidiyoogee qoncce.
Ayyaanaaban Alꞌꞌobaa
it-1 911 ¶3-4
Yeletaa
Maccaasatu Sunttata. Taarikiyaara gayttidaagan koshshiyo wode, maccaasaa sunttay yeletaabaa yootiya taarikiyan issi issitoo xaafettiis. Doomettaabaa 11:29, 30y, Saarayibaa (Saaribaa) odees; ayssi giikko, qaalaa gelido Zerettay yaana koshshiyoy Abrahaami ekkido hara maccaasee baggaara gidennan, I baggaara gidiyo gishshataassa. Yisaaqi hara zareppe machchiyo ekkibeenna gishshawu Ribiqa Abrahaama zare gidiyoogaa yootiyaasan, Milkka Yisaaqa machchee Ribiqissi aayee aayo gidiyoogaa gaasuwan he taarikiyan odettennan aggukku. (Doo 22:20-23; 24:2-4) Doomettaabaa 25:1y, Abrahaami guyyeppe ekkido machchee Qaxuri sunttaa yootees. Hegee Abrahaami Saara hayqqa simmin haranttuwaa machchidoogaanne Yihooway maalaalissiya ogiyan Abrahaami yelanaadan ootti simmin 40ppe dariya layttaappe guyyiyankka I yelana danddayiyoogaa qonccissees. (Roo 4:19; Doo 24:67; 25:20) Hegee Midiyaama asawunne Araba asawu Israꞌeelatuura gaytotettay deꞌiyoogaakka qonccissees.
Liyi, Raaheeli, Yaaqooba kaadumatatinne eti yelido attumaa naatu sunttay issippe odettiis. (Doo 35:21-26) Hegee Xoossay guyyeppe he attuma naatuura gayttidaagan oottidobaa akeekanaadan nuna maaddees. Hara maccaasatu sunttay yeletaabaa yootiya taarikiyan xaafettidoy hegaa mala gaasuwaana. Laatay imettiyoy eta baggaara gidiyo wode, eta sunttay xaafettana danddayees. (Qoo 26:33) Tiꞌimaari, Raꞌaabinne Uruti hanotay keehi dummatees. Ha maccaasati Masiyaa, Yesuus Kiristtoosawu mayzza aayo gidido ogee keehi maalaalissiyaagaa. (Doo 38; Uru 1:3-5; 4:13-15; Maa 1:1-5) Koyro Hanidabaa Odiya 2:35, 48, 49; 3:1-3, 5y yeletaabaa yootiya taarikiyan xaafettida hara macca asatubaa yootees.
ICHCHASHE 23-29
XOOSSAA QAALAN DEꞌIYA ALꞌꞌOBAA | 1 HANIDABAA ODIYA 4-6
“Ta Woosay Tabaa Ay Qonccissii?”
‘Woosaa Siyiyaagaa’
Yaabeexi woossiyoogan erettiya asa. I bana Xoossay anjjanaadan mintti woossiyoogaa doommiis. I wozanappe ammaniyoogaa bessiya heezzubaa he wode oychchiis.
Koyro, hagaadan Xoossaa mintti woossiis: ‘Ta gadiyaa aassa.’ (Paydo 10) Ha bonchchettida bitanee hara asa gadiyaa wolqqan ekkanawu amottibeenna. I gadiyaappe aaruwan asaara gayttidaagan wozanappe woossennan aggenna. Tumu Xoossawu goynniya daroti deꞌana mala I ba haaruwaa sarotettan aassanawu oychchennan waayi aggana.
Naaꞌꞌantto, Yaabeexi banaara Xoossay issippe gidanaadan woy A kushee banaara gidanaadan woossiis. Leemiso hanotan qonccida Xoossaa kushee, I baassi goynniyaageeta maaddanawu goꞌettiyo A wolqqa. (1 Hanidabaa Odiya 29:12) Yaabeexi wozanappe woossido woosaa zaaruwaa demmanawu Xoossan ammanettiyaageeta ashshanawu kushee qantta gidenna Xoossaakko xeelliis.—Isiyaasa 59:1.
Heezzantto, Yaabeexi hagaadan woossiis: “Tana sakkennaadan tana qohiyaabaappe neeni naaga.” Yaabeexi ‘tana qohiyaabaappe naaga’ giidi woossido woosay, azzanttiyaabay woy iitabay gakkiyo wode I baqatanawu gidennan, hegaa genccanawu koyiyoogaa bessiyaaba gidana danddayees.
Yaabeexa tumu goynoynne A ammanoy qofissiyoogaa, qassi Woosaa Siyiyaagan I ammanettiyoogaa A woosay qonccissees. Yihooway waati zaaridee? Ha qantta taarikee “Xoossai a woosaa siyiis” giya qofan kuuyettees.
Ayyaanaaban Alꞌꞌobaa
w05 10/1 9 ¶7
Koyro Hanidabaa Odiya Maxaafan Deꞌiya Kulkka Qofata
5:10, 18-22. Kawuwaa Saaꞌoola wode, Aggaari yarati naaꞌꞌu kushe dariyaaba gidikkonne, Yorddaanoosappe arshsho baggaara deꞌiya yarati eta xoonidosona. Eti xoonidoy he yaran deꞌiya xala asati Yihoowan ammanettido gishshataassanne maaduwaa demmanawu A oychchido gishshataassa. Keehi daro gidida nu morkketuura nuuni ayyaanaabaa olaa olettiyo wode kumetta wozanaappe Yihoowan ammanettoos.—Efisoona 6:10-17.
ICHCHASHE 30–USUPPUNE 5
XOOSSAA QAALAN DEꞌIYA ALꞌꞌOBAA | 1 HANIDABAA ODIYA 7-9
“Deexo Oosuwaa Yihoowa Maaduwan Polana Danddayeeta”
w05 10/1 9 ¶8
Koyro Hanidabaa Odiya Maxaafan Deꞌiya Kulkka Qofata
9:26, 27. Penggiyaa naagiya Leewati keehi ammanettiyoogaa bessiya oosuwaa oottidosona. Beeta maqidasiyan geeshsha sohuwaa geliyo kariyaa qulppee etawu imettiis. Eti ubba gallassi kareta dooyiyoogan ammanettiyaageeta gidiyoogaa bessidosona. Nu moottan deꞌiya asawu markkattiyoonne eti Yihoowawu goynnanaadan maaddiyo aawatettay nuussi imettiis. Penggiyaa naagiya Leewatuugaadan ammanettiyaageeta gidana koshshiyoogee qoncce.
w11 9/15 32 ¶7
Metoy Inttena Gakkiyo Wode Piinihaasa Mala Gidana Danddayeetii?
Israaꞌeelan beni Piinihaasi keehi gita aawatettaa kiyidaba gidikkonne, gakkida metuwaa xalatettan, akeekaaninne Xoossan ammanettiyoogan gencciis. Qassi Piinihaasi Xoossaa gubaaꞌiyawu minnidi oottido gishshawu Yihooway A sabbiis. Issi shaꞌu laytta gidiya wodiyaappe simmin, Iziri ayyaanay denttettin hagaadan giis: “El77aazara na7ai Piinihaasi beni wode Qoraaha yaratu halaqaa; GODAI aara de7iis.” (1 Odi. 9:20) Ha wodiyan Xoossaa asaa giddon aawatettay deꞌiyoogeetuurakka awu ammanettidi haggaaziya ubba Kiristtaanetuurakka I gidanaadan amottoos.
Ayyaanaaban Alꞌꞌobaa
Yihoowayyo Yexxite!
6 Ee, Yihooway baassi goynniyaageeti mazamuriyan bana sabbanaadan hananabaa yootiyaageetu baggaara azaziis. Mazamuriyaa yexxiya qeese yarati, mazamuriyaa giigissanaunne geella meezetanaukka gidiya wodiyaa demmanaadan, hara Leewati oottiyo oosuwaa oottokkona.—1 Odi. 9:33.
USUPPUNE 6-12
XOOSSAA QAALAN DEꞌIYA ALꞌꞌOBAA | 1 HANIDABAA ODIYA 10-12
“Xoossaa SHeniyaa Polanawu Mintti Koyite”
“Ne Sheniyaa Oottana Mala, Tana Tamaarissa”
12 Daawiti Higgiyau baaso gidida maaraa akeekidoogeenne hegaadan deꞌanau amottidoogeekka nuuni kaallana bessiyooba. Daawiti “Beetaliheeme katamaa penggiyaa lanqqen de7iya pultto haattaappe” uyanau qaaqqatido wode aybi hanidaakko qoppa. Daawita asatuppe heezzati, he wode Pilisxxeemati deꞌiyo katamaa biidi haattaa ehiidosona. “SHin Daawiti uyennan ixxiis; ixxidi i he haattaa GODAA sinttan tigiis.” Daawiti aybissi uyennan ixxidaakko hagaadan giis: “Hagaa uyanaagee taappe haakko! Bantta shemppuwaa olidi biida ha asatu suuttaa taani uyoo? Aissi giikko, eti bantta shemppuwaa aatti immidi, haattaa ehiidosona.”—1 Odi. 11:15-19.
13 Suuttaa uyana bessennaagaanne Yihoowayyo gussana koshshiyoogaa Daawiti Higgiyaappe erees. I hegaadan oottana koshshiyoy aybissakkokka akeekiis. “Asho maayida ubbaa de7oi a suuttaa giddon” deꞌiyoogaa Daawiti erees. SHin hegee haattappe attin, suutta gidenna. Yaatin, Daawiti uyennan ixxidoy aybissee? I ixxidoy he higgiyau baaso gidida maaraa akeekido gishshataassa. Daawiti he haattaa he heezzu asatu suuttaadan xeelliis. Yaatiyo gishshau, Daawiti he haattaa uyanau koyibeenna. I hegaa uyiyoogaappe biittan gussanau qofaa qachiis.—Wog. 17:11; Zaa. 12:23, 24.
Xoossaa Higgiyaaninne Maaran Ne Kahaa Loohissa
5 Nuuni Xoossaa higgiyan goꞌettanawu, hegaa nabbabiyoogaa woy eriyoogaa xallay gidenna. He higgeta keehi siiqananne bonchchana bessees. Xoossaa Qaalay, “Iitabaa ixxite. Lo77obaa dosite” yaagees. (Amo. 5:15) SHin waatidi hegaadan oottiyoo? Hegawu maaddiya waannabay ubbabaa Yihoowaagaadan xeelliyoogaa tamaariyoogaa. Leemisuwawu, neeni loytta xiskkanawu metootidabadan qoppa. Maanabaa, bollaa minttanawu oottanabaanne ne deꞌuwan laammanabaa haakimee neeyyo yootiis. Hegaadan oottada hegee maaddiyoogaa akeekadasa! Ne deꞌoy giiga gidanaadan haakimee maaddido gishshawu, neeni A keehi nashshennan aggakka.
6 Hegaadankka, nuna Medhdhidaagee nagaray gattiyo qohuwaappe nuuni naagettanaadaaninne loꞌꞌo deꞌuwaa deꞌanaadan maaddiya higgeta immiis. Wordduwaa, iita maqquwaa, wuussaa, pokkobaa oosuwaa, kobaanne iita ayyaanaa oosuwaa xeelliyaagan nuuni Geeshsha Maxaafaa higgiyaa kaallidi waani goꞌettidaakko qoppa. (Leemiso 6:16-19 nabbaba; Ajj. 21:8) Yihooway koyiyoobaa oottiyoogan nuuni daro anjjuwaa demmiyo wode, nu wozanan Yihoowanne A ogiyaa kaseegaappe aaruwan nashshoos.
Ayyaanaaban Alꞌꞌobaa
it-1 1058 ¶5-6
Wozanaa
‘Kumetta Wozanan’ Haggaaziyoogaa. Wozanay maara oottanawu kumetta gidana bessees, shin leemiso wozanay shaahettana danddayees. Daawiti hagaadan woossiis: “Taani ne sunttaayyo yayyana mala, taayyo issi wozanaa imma,” siiqiyoogeenne yayyiyoogee issi uraa wozanay shaahettanaadan oottana danddayiyoogaa hegee bessees. (Maz 86:11) Hegaa mala asi ‘naaꞌꞌu qofay deꞌiyoogaa,’ hegeekka Xoossawu goynniyoogan bolꞌꞌo gidana danddayees. (Maz 119:113; Ajj 3:16) Issi uri naaꞌꞌu godatussi oottanawu baaxetiya woy qoppiyoobay haraba gidikkonne balettiyaabaa haasayiya naaꞌꞌu wozanay deꞌiyoogaakka gidana danddayees. (1Odi 12:33; Maz 12:2) Yesuusi hegaa mala naaꞌꞌu wozanay deꞌiyo cimmiyaageeta mintti seeriis.—Maa 15:7, 8
Xoossaa ufayssanawu koyiya uri naaꞌꞌu qofay woy naaꞌꞌu wozanay deꞌiyoogaa gidennan, kumetta wozanan ayyo haggaazana bessees. (1Odi 28:9) Wozanaa qofay keehi iita gidiyo gishshawu kumetta wozanan haggaazanawu mintti baaxetana koshshees. (Erm 17:9, 10; Doo 8:21) Wozanappe woossiyoogee (Maz 119:145; Zil 3:41), Xoossaa Qaalaa ubba galla xannaꞌiyoogee (Izi 7:10; Lee 15:28), mishiraachchuwaa minnidi sabbakiyoogee (Erm 20:9ra gatta xeella), qassi Yihoowa xeelan kumetta wozanay deꞌiyoogeetuura laggetiyoogee kumetta wozanay deꞌiyoogeeta gidanaadan nuna maaddees.—2Kaw 10:15, 16ra gatta xeella.
USUPPUNE 13-19
XOOSSAA QAALAN DEꞌIYA ALꞌꞌOBAA | 1 HANIDABAA ODIYA 13-16
“Kaaletuwaa Kaalliyoogee Ushachchanaadan Oottees”
“GODAI Awan De7ii?” Giidi Oychchi Eretii?
12 Maachchaa taabootay Israaꞌeela biittaa zaari yi simmiininne Qiriyaati-Yiꞌaariiman daro layttaa takki simmin, Kawuwaa Daawiti maachchaa taabootaa Yerusalaame ehaanawu koyiis. I asaa halaqatuura zorettidi ‘etayyo loꞌꞌo milatiyaabaa gidikkonne Yihoowa shene gidikko’ Taabootaa ehaanaagaa yootiis. SHin hegaa xeelliyaagan Yihoowa sheniyaa loytti eranawu pilggibeenna. I pilggiyaakko, Taabootay gaariyan mule caanettenna. Xoossay azazidoogaadan, Qahaata yara gidida Leewati Taabootaa bantta hashiyan tookkana koshshees. Daawiti darotoo Yihoowa sheniyaa oychchiya asa gidikkonne, he wode maara oychchibeenna. Hegee keehi iitabaa kaalettiis. Guyyeppe Daawiti hagaadan giis: “Nuuni a wogaadan waati efaanaakko Xoossaa oichchibeenna gishshau, GODAI nu Xoossai nuna qaxxayiis.”—1 Hanidabaa Odiya 13:1-3; 15:11-13; Qoodaabaa 4:4-6, 15; 7:1-9.
“GODAI Awan De7ii?” Giidi Oychchi Eretii?
13 Wurssettan Leewati Taabootaa Obeedi-Eedooma keettaappe Yerusalaame ehiido wode, Daawiti xaafido mazamuree yexettiis. He mazamuriyan, “GODAANNE a wolqqaa xomoosite; ubbatoo a sinttaa koyite. . . . I oottido maalaalissiyaabaa, a malaataanne i pirddido pirddaa hassayite” giya minttettiya qofay deꞌees.—1 Hanidabaa Odiya 16:11-13.
Ayyaanaaban Alꞌꞌobaa
Merinaa Kawuwau Yihoowau Goynna
14 Daawiti maachaa taabootaa Yerusalaame ehiis. He ufayssiya wodiyan, Leewati sabaa mazamuriyaa yexxiyo wode 1 Hanidabaa Odiya 16:31n xaafettidaagaadan, “Kawotettatu giddon eti, ‘GODAI kawotiis!’ yaagona” yaagidosona. Issi uri, ‘Yihooway merinaa Kawo gidiyo gishshau, he wode waanidi kawotidee?’ giidi qoppana danddayees. Yihooway ba haaruwaa qonccissiyo wode woy issi wode bana kalꞌꞌatanaadan woykko issibaa giigissanaadan issi ura sunttiyo wode Kawotees. Yihooway waani kawotiyaakko akeekiyoogee keehi koshshiyaaba. Daawiti hayqqanaappe kase Yihooway, “Ne gulbbataappe yelettida na7aa taani denttana; denttada a kawotettaa minttana” yaagidi, a haaroy merinaassa gidiyoogaa yootiis. (2 Sam. 7:12, 13) Wurssettan, Daawita ‘gulbbataappe yelettida naꞌay’ 1000 layttappe dariya wodiyaappe simmin qoncciis. He qonccidaagee oonee, qassi i Kawo gidanay awudee?
USUPPUNE 20-26
XOOSSAA QAALAN DEꞌIYA ALꞌꞌOBAA | 1 HANIDABAA ODIYA 17-19
“Azzanttiyaabay Deꞌishinkka Ubbatoo Ufayttite”
w06 7/15 19 ¶1
Yihoowa Dirijjitiyan Deꞌiya Loꞌꞌobaa Qoppite
BENI Israaꞌeelan deꞌida Daawiti Ibraawettuwan Xaafettida Geeshsha Maxaafan etabay odettido keehi erettida asatuppe issuwaa. Ha henttanchchay, yettanchchay, hananabaa yootiyaageenne kawoy Xoossaa Yihoowan kumetta wozanaappe ammanettiis. Daawiti Yihoowaara loytti dabbotidoogee Xoossaayyo keettaa keexxanawu koyanaadan A denttettiis. He keettay, woy beeta maqidasee Israaꞌeelan tumu goynuwawu waanna soho gidana. Beeta maqidasiyaara gayttidaagan oosettiyaabay Xoossaa asaa ufayssanaagaanne etassi anjjuwaa ehaanaagaa Daawiti erees. Yaatiyo gishshawu Daawiti hagaadan yexxiis: “Neeni [Yihooway] dooridonne ne shilootan uttanau mataa shiishshiyo asi anjjettidaagaa. Nuuni ne son, ne geeshsha Beeta Maqidasiyan de7iya lo77oban kumida.”—Mazamure 65:4.
Neeni Yihoowawu Oottana Danddayiyooban Ufaytta
11 Hegaadan, nuuni Yihoowayyo haggaaziyo wode nuuyyo imettida ay oosonne nuussi danddayettidaagaa keenaa minnidi oottikko keehi ufayttana danddayoos. Loytta sabbaka, qassi gubaaꞌiyankka minna ootta. (Oos. 18:5; Ibr. 10:24, 25) Minttettiya qofaa shiiquwan yootanawu loytta giigetta. Saaminttawu gidduwan shiiqiyo shiiquwan neeyyo imettiya tamaaretu kifileta xoqqu ootta xeella. Gubaaꞌiyan issi oosuwaa maaddana mala nena oychchikko, bessiya wodiyan oottiyoogan ammanettiyaagaa gida. He oosuwaa keehi koshshennabadan xeellada, hegaa oottiyoogan daro wodiyaa wurssana koshshenna gaada qoppoppa. Ne oosuwan keehi gooba gidanawu baaxeta. (Lee. 22:29) Neeni Yihoowayyo minna oottikko, kaseegaappe aaruwan aara dabbotananne keehi ufayttana. (Gal. 6:4) Qassi neeni demmanawu yeemottiyo aawatettaa harati demmiyo wode, etaara ufayttanawu metootakka.—Roo. 12:15; Gal. 5:26.
Ayyaanaaban Alꞌꞌobaa
w20.02 12, saaxiniyaa
Nu Aawaa Yihoowa Nuuni Keehi Siiqoos
Yihooway Tana Wudidi Xeellii?
‘Biilooniyan qoodettiya asay saꞌan deꞌees; yaatin Yihooway tana wudidi xeellanay aybissee?’ gaada nena oychcha eray? Hagaadan oychchida loꞌꞌo asati daro. Kawuwaa Daawiti, “Abeet GODAU, neeni ayyo qoppiyoogee asi aibee? Neeni saaphoyiyoogee asa na7i aibee?” yaagiis. (Maz. 144:3) Daawiti Yihooway A loytti eriyoogaa ammanettiis. (1 Odi. 17:16-18) Yihooway ba Qaalaa baggaaranne ba dirijjitiyaa baggaara neeni A siiqiyo siiquwaa I wudidi xeelliyoogaa neeyyo qonccissees. Neeni he tumaa ammanettanaadan maaddana danddayiya Xoossaa Qaalan deꞌiya issi issibaa qoppa:
• Neeni yelettanaappe kasekka, Yihooway nena beꞌiis.—Maz. 139:16.
• Yihooway ne wozanan deꞌiyaabaanne neeni qoppiyoobaa erees.—1 Odi. 28:9.
• Nuuni ubbay huuphiyan huuphiyan woossiyo woosaa Yihooway siyees.—Maz. 65:2.
• Neeni oottiyoobay Yihoowa ufayssees woy azzanttees.—Lee. 27:11.
• Yihooway nena baakko ehiis.—Yoh. 6:44.
• Neeni hayqqikko, Yihooway nena loytti eriyo gishshawu I nena denttana danddayees. Haꞌꞌi neessi deꞌiyaagaa mala oorattaa bollaanne guuggiyaa I neeyyo immana. Ne hassayiyoobaynne ne oonatettay haꞌꞌiigaa mala gidana.—Yoh. 11:21-26, 39-44; Oos. 24:15.
USUPPUNE 27–LAAPPUNE 5
XOOSSAA QAALAN DEꞌIYA ALꞌꞌOBAA | 1 HANIDABAA ODIYA 20-22
“Oottiyooban Muruta Gidanaadan Yelagata Maaddite”
‘Ha Yohota Ammanettida Asatuyyo Hadaraa Imma’
8 Koyro Hanidabaa Odiya 22:5 nabbaba. Daawiti hegaa mala gita oosuwaa kaallidi polissanawu Solomoni danddayenna giidi qoppana danddayees. Ee, beeta maqidasee keehi ‘erettidaagaa’ gidana; Solomoni qassi “lammachchanne yelaga na7a.” Gidoppe attin, Solomoni bawu imettida oosuwaa polanaadan Yihooway a maaddanaagaa Daawiti eriis. Yaatiyo gishshawu, keehi daro miishshaa giigissiyoogan, Daawiti i ba huuphen maaddana danddayiyoobaa qoppiis.
‘Ha Yohota Ammanettida Asatuyyo Hadaraa Imma’
7 Daawiti beeta maqidasee keexettiyoogan ba sunttay xeesettennan attees gi hirggidi, maaddennan aggibeenna. Ee, guyyeppe beeta maqidasee Daawitaagaa gidennan, Solomona beeta maqidasiyaa geetettiis. Daawiti wozanappe koyidobaa oottibeenna gishshawu azzanana danddayikkonne, oosuwaa kumetta wozanaappe maaddiis. Oosanchata citan citan maara giigissiis, qassi birataa, nahaasiyaa, biraa, worqqaanne, zigaa shiishshiis. Hegaa bollikka, Solomona, “Ha77ikka ta na7au, GODAI nenaara gido. GODAI kase nebaa haasayidoogaadan, GODAA ne Xoossaa Beeta Maqidasiyaa keexxanaagaa nena polisso” yaagidi minttettiis.—1 Odi. 22:11, 14-16.
Yelidaageetoo, Intte Naꞌi Xammaqettanawu Diccanaadan Maaddeetii?
14 Ayyaanaaban heemmiya gubaaꞌe cimati ayyaanaabaa halchchuwaabaa loꞌꞌobaa yootiyoogan yelidaageeti oottiyoobaa bolli gujjidi yaa minttoosona. Aqinye gidada 70ppe daro laytti haggaazida issi michchiyaa Ishaa CHarles Tez Raasilaara haasayidobaa goꞌꞌaa hassayawusu; he wode A usuppun laytta naꞌa. A, “I 15 daqiiqawu taani ayyaanaaban halchchiyoobaa tana haasayissiis” yaagaasu. Minttettiya qaalay daro wodiyawu goꞌꞌana danddayees. (Lee. 25:11) Cimati SHiiquwaa Addaraashaa keexuwankka naatussi eta abbiyaadan oosuwaa immidi, eta yelidaageetuura ootissana danddayoosona.
15 Gubaaꞌiyan deꞌiyaageeti naatussi qoppiyoogaa bessiyoogan maaddana danddayoosona. Naati ayyaanaaban dicciyoogaa akeekiyoogee yaatiyo issi oge. Issi yelagay loytti qoppidi zaaridee, woy qassi saaminttawu gidduwan shiiqiyo shiiquwan kifiliyaa shiishshidee? Issi yelagay ammanettennaadan paacciyaabaa xoonidee, woykko timirtte keettan merettida injjetiya hanotan markkattidee? Hegaa mala wodiyan sohuwaara wozanappe galatite. Qassi shiiquwaappe kasetidi woy shiiqoy wurin, issi yelagawu qoppiyoogaa bessiyaabaa haasayanawu halchchiyoogeekka loꞌꞌo. Hegeetinne hegaa mala harabati naati etikka ‘shiiqida cora asaa’ yame gidiyoogaa akeekanaadan maaddana danddayoosona.—Maz. 35:18.
Ayyaanaaban Alꞌꞌobaa
w05 10/1 11 ¶6
Koyro Hanidabaa Odiya Maxaafan Deꞌiya Kulkka Qofata
21:13-15. Ba asaa gakkiya metoy Yihoowa qofissiyo gishshawu, he boshaa teqqanaadan I issi kiitanchchaa kiittiis. “GODAA maarotai keehi gita.”