Kiristtaanetu Deꞌuwaanne Haggaazuwaa SHiiquwaa Xannaꞌiyo Xuufiyan Odettida Xuufeta
LAAPPUNE 6-12
XOOSSAA QAALAN DEꞌIYA ALꞌꞌOBAA | 1 HANIDABAA ODIYA 23–26
“Beeta Maqidasiyaa Goynoy Loytti Darajjayettiis”
it-2 241
Leewata
Leewatu oosoy Daawita wode keehi darajjayettiis; I eta aawatiyaageeta, halaqata, pirdda daannata, penggiyaa naagiyaageetanne buquraa naagiyaageeta oottidi sunttiis. Qassi beeta maqidasiyan, dabaabatun, qumaa miyo kifiletun, yarshshiyo sohuwan, geeyanaadan oottiyo oosuwan, mazzaniyoogan, wara wadhdhiyoogaaninne dumma dumma naaguwaa oosuwaa oottiyoogan qeeseta maaddanaadan darota sunttiis. SHaahettidi kayan kayan oottiya qeesetuugaadan, yettaa miishshaa kaaꞌiyoogan gooba gidida Leewati 24 citan darajjayettidosona. Oosuwaa kayay saamaa yeggiyoogan gakkees. Penggiyaa naagiyaageetikka naagiyo penggiya eranawu saamay yegettees.—1Odi 23; 25; 26; 2Odi 35:3-5, 10.
it-2 686
Qeesiyaa
Beeta maqidasiyaa oosuwawu qeeseti dumma dumma halaqatun darajjayettidosona. Amarida oosuwaassi asaa maddabanawu saamay yegettees. Laatamanne oyddu citan deꞌiya issi issi yaray issi saaminttawu oottees, kayay eta layttan naaꞌꞌutoo gakkees. Beeta maqidasiyaa anjjissiyo wode oottidoogaadan, baala gallassati gakkiyo wode asay shaꞌan qoodettiya yarshshuwaa yarshshiyo gishshawu ubba qeeseti oottiyaaba milatees. (1Odi 24:1-18, 31; 2Odi 5:11; 29:31-35; 30:23-25; 35:10-19ra gatta xeella.) Issi qeesee hara qeesetussi immettida oosuwan kelttiyaa gelennan hara wodetun oottana danddayees. Ayhuda asttamaaretu wogan qonccidaagaadan, Yesuusi ha saꞌan deꞌiyo wode qeesetu qooday keehi darido gishshawu, issi saaminttan oottiyo oosoy dumma dumma keettaa asawu shaahettiis; eta qoodaadan issi issi keettaa asay issi gallassawu woy daro gallassawu oottees.
it-2 451-452
Muuziqaa
Yihoowa beeta maqidasiyaa giigissiyoogaara gayttidaagan, yeettaa yexxanaadan Daawiti 4,000 Leewata giigissiis. (1Odi 23:4, 5) Etappe, 288 Yihoowawu mazamuriyaa yexxiyoogan ‘daro eray deꞌiyo asatanne yettan loohidaageeta.’ (1Odi 25:7) Hegee ubbay muuziqaa miishshaa kaaꞌiyoogan gooba gidida Asaafa, Hemaananne Yidutuuna (Etaanakka geetettennan waayi aggana) aawatettaa giddon deꞌees. Ha asati Leewa heezzu attuma naatu Gershshoona, Qahaatanne Maraara yara gidiyo gishshawu, beeta maqidasiyan yexxiyo yettaa Leewa yara gidida heezzu halaqatu so asay darajjayees. (1Odi 6:16, 31-33, 39-44; 25:1-6) Ha heezzu asatu attuma naati muleera 24, muuziqaa miishshaa kaaꞌiyoogan gooba gidida qommoora odettida 288 asatu giddon eti deꞌoosona. He naati ubbay yettaa yexxanaadan shaahettida citawu halaqa gidanaadan saaman doorettidosona. Daawiti azazin A naatuppenne hara Leewatuppe muuziqaa “erai de7iyo” hara 11 asati doorettidosona. Yettaa yexxiyoogan gooba gidida 288 ([1 + 11] × 24 = 288) Leewati, qeesetuugaadan, 24 citan shaahettidosona. Hegaa gishshawu, citan shaahettidaageetuppe attida 3,712ti ubbay ‘tamaare’ gidikko, 24n shaahettida citan issuwan issuwan 155ppe dariya asati deꞌoosona, hegaa giyoogee muuziqaa kaaꞌiyoogan gooba gidida issi uray dumma dumma xekkan tamaarissiyoonne loohissiyo 13 gidiya Leewati gakkoosona giyoogaa. (1Odi 25:1-31) Xurumbbaa punniyaageeti qeeseta gidiyo gishshawu, etikka muuziqaa miishshaa kaaꞌiya Leewatuura deꞌoosona.—2Odi 5:12; Qoo 10:8ra gatta xeella.
it-1 898
Penggiyaa Naagiyaagaa
Beeta Maqidasiyan. Kawuwaa Daawiti hayqqanaappe guuttaa kasetidi penggiyaa naagiyaageeta gujjin, Leewatanne beeta maqidasiyan oottiyaageeta loytti darajjayiis, eta qooday 4,000. Citan shaahettidaageeti laappuntta laappuntta gallassan laamettoosona. Yihoowa keettaa naagiyoonne likke wodiyan penggeti dooyttiyoogaanne gorddettiyoogaa kaalliyo aawatettay etawu imettiis. (1Odi 9:23-27; 23:1-6) Amaridaageetussi penggiya naagiyoogaa bolli, beeta maqidasiyan goꞌettanaadan asay ehiido miishshaara gayttida aawatettaykka imettiis. (2Kaw 12:9; 22:4) Guyyeppe, qeese ubbatu halaqay Yoodaahee Yoꞌaashi kawo gidanaadan tiyido wode, Kawiyaa Ataala yelaga Yoꞌaasha sohuwan kawotennaadan digganawu beeta maqidasiyaa penggeta naaganaadan dumma asata sunttiis. (2Kaw 11:4-8) Kawuwaa Yoꞌaashi eeqaa goynuwaa xayssido wode, Baꞌaalayyo goynnanawu giigissido miishshata ubbaa beeta maqidasiyaappe kessiyoogan penggiya naagiyaageeti maaddidosona. Yaatin he miishshati katamaappe gaxan xuugettidosona.—2Kaw 23:4.
Ayyaanaaban Alꞌꞌobaa
Tumu Goynoy Neeni Loytta Ufayttanaadan Maaddana
10 Nuuni nu ishanttuuranne michchonttuura mazaamuriyaa yexxiyo wode Yihoowawu goynnoos. (Maz. 28:7) Yexxiyoogaa Israaꞌeelati goynuwan keehi koshshiyaabadan xeellidosona. Kawuwaa Daawiti 288 Leewati beeta maqidasiyan yexxanaadan maddabiis. (1 Odi. 25:1, 6-8) Ha wodiyan, nuuni sabaa mazamureta yexxiyo wode Xoossaa siiqiyoogaa bessana danddayoos. Yaatanawu nuuni gooba yettanchcha gidana koshshenna. Hagaa qoppa: Haasayiyo wode, “nuuni ubbaikka daroban baleettees,” shin hegee nuuni gubaaꞌiyaaninne haggaazuwan haasayennaadan diggenna. (Yaaq. 3:2) Hegaadan, nuuni loytti yexxokko giidi qoppikkonne, yexxiyoogan Yihoowa sabbana danddayoos.
Kiristtaaneti Daraajjayettiyoy Aybissee?
▪ Tumu Kiristtaaneti issi oosuwaa oottanawu daraajayettoosona. (Maatiyoosa 24:14; 1 Ximootiyoosa 2:3, 4) Kawotettaa mishiraachchuwaa ubba asawu sabbakanaadan Yesuusi bana kaalliyaageeta azaziis; kumetta saꞌan issi dirijjitee deꞌana xayikko, ha oosuwaa oottana danddayettenna. Leemisuwawu, neeni issi uraa metootennan mizana danddayaasa, shin daro shaꞌu asaa, ubba miilooniyan qoodettiya asaa mizanawu loytti daraajayettidi issippetettan oottiya daro asay koshshees. Tumu Kiristtaaneti ha azazuwaa polanawu hashetidi, woy ‘issippetettan’ Xoossaayyo oottoosona. (Sofonaasa 3:9) Zariyan, qaalan, wogan dumma dumma gidada asaara gattiya oosoy daraajjayettidi issippetettan oottiya dirijjitee baynnaakko danddayettiyaabee? Zaaroy qoncce.
▪ Tumu Kiristtaaneti issoy issuwaa maaddanawunne minttettanawu daraajayettoosona. Deriyaa barkka kiyiya uri awu baggaara kiyanawu koyiyaakko kuuyana danddayees, qassi deriyaa darotoo kiyi erennaageeta I maaddana koshshenna. Gidoppe attin, daafabay A gakkikko, woy I metootikko, A maaddiya uri baynna gishshawu keehi qohettees. Haratuppe shaahettiyoogee eeyyatetta. (Leemiso 18:1) Kiristtaaneti Yesuusa azazuwaa polanawu issoy issuwaa maaddana bessees. (Maatiyoosa 28:19, 20) Ubbaykka he oosuwaa aggennan oottanaadaaninne hidootaa qanxxennaadan Kiristtaane gubaaꞌee keehi koshshiya kaaletuwaa, loohissuwaanne minttettuwaa Geeshsha Maxaafaappe immees. Kaaletuwaa demmanawunne goynnanawu daraajayettida Kiristtaane shiiqoti baynnaakko issi uri Yihoowa ogiyaa awuppe tamaarana danddayii?—Ibraawe 10:24, 25.
▪ Tumu Kiristtaaneti issippetettan Xoossawu haggaazanawu daraajayettoosona. Eti Yesuusa dorssa gidiyo gishshawu A qaalaa siyiyo wode, I kaalettiyo ‘issi wude’ gidoosona. (Yohaannisa 10:16) Eti dumma dumma woosa keettatuuninne citatun laalettidi deꞌokkona; woy tamaarissiyooban eti shaahettidaageeta gidokkona. Qassi eti ubbay “issi haasayaa” haasayoosona. (1 Qoronttoosa 1:10) Issippetettan deꞌanawu nuussi maaray koshshees, maaray deꞌanaadan qassi dirijjitee koshshees. Xoossaa anjjuwaa demmana danddayiyay issippetettan deꞌiya ishanttu maabaraa xalla.—Mazamure 133:1, 3.
Miilooniyan qoodettiya asay Xoossaa tumuppe siiqiyoogeenne Geeshsha Maxaafaa tumaa siiqiyoogee eti qommoora odettidabatanne Geeshsha Maxaafay yootiyo hara maarata kaalliya issi dirijjitiyaa yame gidanaadan oottiis. Kumetta saꞌan deꞌiya Yihoowa Markkati daraajayettidi issippetettan oottiyaageeta gidiyo gishshawu Xoossaa sheniyaa polanawu baaxetoosona. Eti Xoossay yootido ha qofan ammanettoosona: “Taani eta giddon de7ananne eta giddon hemetettana. Taani eta Xoossaa gidana; qassi etikka ta asata gidana.” (2 Qoronttoosa 6:16) Neeni Xoossaa Yihoowawu A dirijjitiyaara issippe goynnikko, ha maalaalissiya anjjota neenikka demmana daddayaasa.
LAAPPUNE 13-19
XOOSSAA QAALAN DEꞌIYA ALꞌꞌOBAA | 1 HANIDABAA ODIYA 27–29
“Aaway Ba Naꞌaa Zorido Siiqo Zoriyaa”
w05 2/15 19 ¶9
Nuuni Kiristtaane Gidiyoogaa Erissiya Malaata Mintti Naagiyoogaa
9 Geeshsha Maxaafaa tumaa intte huuphen shaakki erite. Nuuni Geeshsha Maxaafaa loytti erana xayikko, Yihoowa ashkkarata gidiyoogaa erissiya malaatay xayana danddayees. (Piliphphisiyuusa 1:9, 10) Ubba Kiristtaaneti yelagatikka cimatikka bantta ammaniyoobay Geeshsha Maxaafan deꞌiyoogaa bantta huuphen shaakki erana koshshees. PHawuloosi ba mala Kiristtaaneta hagaadan zoriis: “Ubbabaakka paaccite. Lo77obaa oiqqite.” (1 Tasalonqqe 5:21) Xoossawu yayyiya aawaynne aayyiyaa dichchido yelaga Kiristtaaneti eta yelidaageeti ammaniyaageeta gidido gishsha xallawu eti tumu Kiristtaane gidana danddayennaagaa akeekana koshshees. Solomona aaway Daawiti ‘ne aawaa Xoossaa era. Ne kumetta wozanan ayyo ootta’ yaagidi Solomona zoriis. (1 Hanidabaa Odiya 28:9) Yelaga Solomoni ba aaway Yihoowa ammaniyo ammanuwaa waati minttiyaakko beꞌiyoogaa xallay gidenna. I ba huuphen Yihoowa erana koshshiis, qassi I eriis. Xoossaa I hagaadan woossiis: “Taani ha asaa kaalettanau neeni taayyo aadhdhida eratettaanne akeekaa imma.”—2 Hanidabaa Odiya 1:10.
w12 4/15 16 ¶13
Kumetta Wozanan Yihoowawu Ubbatoo Haggaaza
13 Tamaariyoobay qoncce. Gubaaꞌe shiiqota shiiqiyoogaanne haggaaziyoogaa mala ufayssiyaabaa nuuni ubbatoo oottiyoogee loꞌꞌobaa. SHin kumetta wozanaappe Yihoowawu haggaazanawu hegaappe aadhdhiyaabaa oottana koshshees. (2 Odi. 25:1, 2, 27) Issi Kiristtaanee ba wozanan deꞌiya ‘guyye aggidobaa,’ hegeekka ha alamiyan deꞌiya issi issibaa ubbatoo siiqiyaaba gidikko, I Xoossaara dabbotido loꞌꞌo dabbotay moorettana danddayees. (Luq. 17:32) Nuuni ‘Xoossaa kawotettaassi bessiyaageeta’ gidanay ‘iitabaa ixxidi, loꞌꞌobaa minttidi oiqqiyaageeta’ gidiyo wode xallaana. (Roo. 12:9; Luq. 9:62) Yaatiyo gishshawu, Seexaanaa alamiyan deꞌiya keehi maaddiyaaba woy ufayssiyaaba milatana danddayiya aybikka nuuni ubbay Xoossaa Kawotettaara gayttidabaa wozanappe oottennaadan diggenna mala naagettana koshshees.—2 Qor. 11:14; Piliphphisiyuusa 3:13, 14 nabbaba.
‘Xala Gida, . . . Oosuwaa Ootta!’
20 Kawuwaa Daawiti beeta maqidasiyaa oosoy polettana gakkanaashin Yihooway Solomona yeggennaagaa awu yootiis. (1 Odi. 28:20) Solomoni ba aaway yootidobaa wozanan wottidi qoppidoogee, i yelaganne lammacha gidiyoogee oosuwawu xube gidanaadan oottibeenna. I Yihooway maaddin xalidi oottido gishshawu, he maalaalissiya beeta maqidasiyaa laappun layttanne baggan keexxi wurssiis.
21 Yihooway Solomona maaddidoogaadan, nuunikka xala gidanaadan, qassi so asaaranne gubaaꞌiyaara gayttidaagan oottiyo oosuwaa polanaadan maaddana danddayees. (Isi. 41:10, 13) Nuuni xalidi Yihoowawu goynniyo wode, haꞌꞌikka sinttappekka i nuna anjjanaagaa ammanettana danddayoos. Hegaa gishshawu, ‘Xala gida; oosuwaa ootta.’
Ayyaanaaban Alꞌꞌobaa
Laggetettay Moorettana Haniyo Wodiyan Lagge Gidiyoogaa
Daawitayyo meto wodiyan a miyyiyan eqqida hara laggetikka deꞌoosona. Hegeetuppe issoy Geeshsha Maxaafay “Daawita laggee” giyo Hushaaya. (2 Sam. 16:16; 1 Odi. 27:33) I kawuwaassi mata lagge gididi kawo keettan oottiya, qassi issi issitoo dumma gidida kiitaa poliya asa gidennan waayi aggana
Daawita naꞌay Abeseloomi ba aawaa bolli makkalidi kawotanawu koyido wode, daro Israaꞌeelati Abeseloomayyo exatidaba gidikkokka, Hushaayi hegaadan oottibeenna. Daawiti baqatido wode, Hushaayi akko biis. Daawiti ba naꞌaynne i ammanettiyo issoti issoti a kaddido gishshawu keehi azzaniis. Gidikkokka, Hushaayi he zoriyaa halissanawu bawu danddayettida ubbabaa oottiyoogan ba shemppuwaakka olidi ayyo ammanettidi deꞌiis. Hushaayi hegaadan oottidoy i kawo keettan oottiyo ba oosuwaa polana xallaassa gidenna. I ammanettiya lagge gidiyoogaa bessiis.—2 Sam. 15:13-17, 32-37; 16:15–17:16.
LAAPPUNE 20-26
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 1–4
“Kawuwaa Solomoni Eeyyabaa Kuuyiis”
it-1 174 ¶5
Olanchchata
Solomona haaruwaa wode Israaꞌeela olanchchatu taarikiyan hanida oorattabay xaafettiis. A haaroy amarida hanotan saro gidikkonne, I daro paratanne para gaareta shiishshiis. (PARA GAARIYAA giyaagaa xeella.) He paratuppe darota Gibxxeppe shammidi ehiissiis. I haariyo biittan ubban ha olaa miishshata wottanawu katamata keexxiis. (1Kaw 4:26; 9:19; 10:26, 29; 2Odi 1:14-17) Gidoppe attin, Solomoni oottido oorattabaa Yihooway mule anjjibeenna, qassi I hayqqin kawotettay shaahettin Israaꞌeela olanchchatu qooday guuxxiis. Isiyaasi guyyeppe hagaadan giis: “Maaduwaa koyanau duge Gibxxe wodhdhiyaageetussinne paran ammanettiyaageetussi aayye7ana! Cora gidiyo gishshau paraa gaaretun, daroppe mino gidiyo gishshau paraasatun ammanettiyaageetussi aayye7ana! Eti Israa7eela Geeshshaakko xeellokkona; woikko GODAAPPE maaduwaa koyokkona.”—Isi 31:1.
it-1 427
Para Gaariyaa
Israaꞌeelan Solomona wodiyaa gakkanaashin, olawu goꞌettiyo daro para gaareti deꞌokkona. Hegaadan hanidoy deree sarotettaa demmanawu para gaaretun ammanettennaadan kawoy paraa daruwaa shiishshana bessennaagaa Xoossay yootido gishshataassa. He higgee para gaariyaa goꞌettiyoogaa diggees; ayssi giikko, hegaa mala gaareta parati goochchiyo gishshataassa. (Zaa 17:16) Sameeli kawoti asaa toossana toohuwaa yootiyo wode, etawu hagaadan giis: “Intte attuma naata ekkidi, gaariyaasatanne paraasata kessana.” (1Sam 8:11) Abeseloominne Adoonee, kawotanawu koyido wode, naaꞌꞌaykka para gaaretanne parata bantta sinttan woxxiya ishatamu asaara giigissidosona. (2Sam 15:1; 1Kaw 1:5) Daawiti Xooba kawuwaa xoonido wode, xeetu para gaareta ashshiis.—2Sam 8:3, 4; 10:18.
Kuwaa Solomoni Israaꞌeela olanchchata giigissiyo wode, para gaaretu qooday 1,400 gidiis. (1Kaw 10:26, 29; 2Odi 1:14, 17) Para gaareta wottiyo soho gidiyoogan erettiya Yerusalaameeninne hara katamatun ha olaa miishshata naagiyo dumma sohoti deꞌoosona.—1Kaw 9:19, 22; 2Odi 8:6, 9; 9:25.
Ayyaanaaban Alꞌꞌobaa
w05 12/1 19 ¶6
Naaꞌꞌantto Hanidabaa Odiya Maxaafan Deꞌiya Kulkka Qofata
1:11, 12. Solomoni aadhdhida eratettaanne akeeka demmanawu wozanappe koyiyoogaa Yihooway A oyshaappe akeekiis. Nuuni Xoossaa woossiyo woosay nu wozanan deꞌiyaabaa loytti qonccissees. Nuuni woossiyoobaa loytti qoppiyoogee akeekanchcha gidiyoogaa bessees.
LAAPPUNE 27–HOSPPUNE 2
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 5–7
“Ta Wozanai Ubba Wode Ha Beeta Maqidasiyan De7ana”
w02 11/15 5 ¶1
Issippe SHiiqiyoogaa Aggoppite
Guyyeppe, Daawiti Yerusalaamen kawotido wode, Yihoowa bonchchissiya ubba wode deꞌiya beeta maqidasiyaa keexxanawu keehi amottiyoogaa yootiis. Gidoppe attin, Daawiti olanchcha asa gidiyo gishshawu, Yihooway awu hagaadan giis: “Ta sunttaayyo Beeta Maqidasiyaa keexxakka.” Beeta maqidasiyaa keexxanaadan Daawita naꞌaa Solomona I dooriis. (1 Hanidabaa Odiya 22:6-10) Solomoni beeta maqidasiyaa keexxiyoogaa laappun layttanne baggan wurssi simmidi 1026 K.K., anjjissiis. Yihooway ha keettan ufayttidoogaa hagaadan giidi qonccissiis: “Neeni keexxido Beeta Maqidasee merinau ta sunttai an xeesettana mala oottada taani geeshshaas; ta aifeenne ta wozanai ubba wode ha Beeta Maqidasiyan de7ana.” (1 Kawotu Maxaafaa 9:3) Israaꞌeelati ammanettidi deꞌido wode ubban, Yihooway he keettaa nashshees. SHin, eti likkebaa oottiyoogaa aggikko, I he keettaa nashshiyoogaa aggana, qassi “ha Beeta Maqidasee qolettidabai keelettido soho gidana.”—1 Kawotu Maxaafaa 9:4-9; 2 Hanidabaa Odiya 7:16, 19, 20.
it-2 1077-1078
Beeta Maqidasiyaa
Taarikiyaa. Kawoy Naabukadanaxoori kaalettin Baabiloone olanchchati 607 K.K., xayssana gakkanaashin beeta maqidasee takkiis. (2Kaw 25:9; 2Odi 36:19; Erm 52:13) Israaꞌeelati worddo goynuwaa goynnidoogaa gaasuwan, hara dereti Yihudaanne Yerusalaame qohanaadaaninne beeta maqidasiyaa buqurata bonqqanaadan Xoossay paqqadiis. Qassi asay beeta maqidasiyaa daro wodiyawu aggibayiis. Beeta maqidasee anjjettoosappe 33 gidiya layttay aadhdhi simmin, Solomona naꞌaa Robiꞌaama wode Gibxxe Kawoy SHiishaaqi beeta maqidasiyaa buqurata (993 K.K.) bonqqiis. (1Kaw 14:25, 26; 2Odi 12:9) Kawuwaa Asi (977-937 K.K.) Yihoowa keettaa xoqqu ootti xeelliis, shin Asi Yerusalaame katamaa naaganawu, Sooriyaa Kawuwaa Benihadaadi koyroogee Israaꞌeela kawuwaa Baaꞌishaara maacettido maachchaa kolana mala beeta maqidasiyaa buqurata minjjiyoosaappe worqqaanne biraa maganxxuwaa yeddiyoogan eeyyabaa oottiis.—1Kaw 15:18, 19; 2Odi 15:17, 18; 16:2, 3.
Ayyaanaaban Alꞌꞌobaa
I “Asaa Ubbaa Wozanaa” Erees
Solomoni woossido woosaappe minttettiyaabaa demmana danddayoos. Nu mala asay nu wozanan deꞌiyaabaa, hegeekka nu “un77ettiyoobaanne azzaniyoobaa” loytti akeekennan aggana danddayees. (Leemiso 14:10) SHin Yihooway nu wozanaa ereesinne nuussi loytti qoppees. Nu wozanan deꞌiya ubbabaa awu yootiyoogee nu toohoy kawuyyanaadan oottana danddayees. Geeshsha Maxaafay “I intteyyo qoppiyo gishshau, inttena hirggissiya ubbabaa a bolli olite” yaagees.—1 PHeexiroosa 5:7.
w93 2/1 31
Dumma Hanotaa Gaasuwan Nuuni Godaa Kahuwaa Bonchchana Danddayennaba Gidikko Waatana Koshshii?
Sahuwaa woy manddaridosan gayttiyaaba mala issi issitoo qoppennan gakkiyaabay issi Kiristtaanee woy Kiristtaaniyaa Godaa Kahuwaa baalaa bonchchanawu halchchidoogaa diggana danddayees. Hegaa mala hanotan waatana koshshii?
Godaa Kahuwaa bonchchiyo wode irshshoy baynna oyttaynne zoꞌo woynee yuuyees; qassi Xoossaa Geeshsha ayyaanan tiyettida saluwan deꞌanaadan doorettidaageeti hegaappe moosonanne uyoosona. (Maatiyoosa 26:26-29; Luqaasa 22:28-30) Layttan layttan hegaappe miyaanne uyiya uri ha laytti sahettidi son woy hosppitaaliyan zinꞌꞌidaba gidikko, he gubaaꞌiyaa cimatuppe issoy amarida oyttaa woy woyniyaa sahettiyaagaawu efiidi ha allaalliyaa xeelliyaagan Geeshsha Maxaafaa qofaa yooteesinne oyttaa maanaadan woy woyniyaa uyanaadan shiishshees. Tiyettida issi Kiristtaanee ba gubaaꞌiyaappe haahosaa biikko, he gallassi I deꞌiyo heeran deꞌiya gubaaꞌiyaa baana koshshees.
Yaatiyo gishshawu, Qoodaabaa 9:10, 11ninne 2 Hanidabaa Odiya 30:1-3, 15n odettidaagaa maaran tiyettida issi Kiristtaanee Godaa Kahuwaa 30u gallassaappe (issi aginaappe) guyyiyan bonchchana koshshiyoy keehi dumma hanotay gayttiyo wode xallana.
Gannate saꞌan merinaa deꞌuwaa hidootay deꞌiyo, Yesuusa ‘hara dorssati’ oyttaa maanaadaaninne woyniyaa uyanaadan azazettibookkona. (Yohaannisa 10:16) Eti oyttaa maana woy woyniyaa uyana xayikkonne, layttan layttan Godaa Kahuwaa bonchchiyoogee keehi koshshiyaaba. Hegaa gishshawu etappe issoy sahettidoogaa gaasuwan woy manddaridoogaa gaasuwan he omarssan gubaaꞌiyaa baana xayikko, haniya xiqiseta (Yesuusi ha baalaa essiyo wode hanidabaa yootiya taariketakka) buzo nabbabananne kumetta saꞌan bonchchettiya ha baalaa Yihooway anjjanaadan woossana danddayees. SHin, hagaa mala hanotan aginappe guyyiyan shiiqiyoogee woy Geeshsha Maxaafaappe dumma haasayaa haasayiyoogee koshshenna.
HOSPPUNE 10-16
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 8–9
“Aadhdhida Eratettaa Xoqqu Ootta Xeellaasu”
w99 11/1 20 ¶4
Kehatettay Dariyo Wode
Saaba kawiyaa Solomonaara gayttanawu wodiyaanne wolqqaa ekkiya keehi darobaa oottaasu. Saaba biittay deꞌidoy ha wodiyan Yemen Repablike giyo heeraana gidennan aggenna; hegaa gishshawu kawiyaa caanida daro gaameelatuura Yerusalaame gakkanawu 1,600 kilo meetiriyaappe dariyaagaa manddaraasu. Yesuusi, ‘A saꞌaa gaxaappe yiidoogaa’ yootiis. Saaba kawiyaa hagaa keeni daafuridoy aybissee? A yiido waanna gaasoy ‘Solomona aadhdhida eratettaa siyanaassa.’—Luqaasa 11:31.
w99 7/1 30 ¶4-5
Daro Woytuwaa Demissida Xomoosuwaa
Hanotay ayba gidikkonne, kawiyaa “sawuwaa, keehi daro worqqaanne al77o shuchchaa caanettida daro gaameelatu cugiyaara keehi daro ajaban Yerusalaame” gakkaasu. (1 Kawotu Maxaafaa 10:2a) ‘Keehi daro ajabaa’ giddon olaa miishshaa gixxidaageeti deꞌiyoogaa amaridaageeti yootoosona. Kawiyaa keehi bonchchettidaaro gidiyoogaanne daro miiloone doolaariyaa kessiya alꞌꞌobaa ekkada biyoogaa qoppiyo wode ajabay bessiyaaba.
SHin, kawiyaa “GODAA sunttan woretida” Solomonabaa siyidoogaa akeeka. Yaatiyo gishshawu hagee zalꞌꞌiyawu manddaridoba gidenna. A yiido waanna gaasoy Solomona aadhdhida eratettaa siyanaassa giyoogee qoncce; A Solomona Xoossaa Yihoowabaa eranawu koyennan waaya aggana. A Yihoowayyo goynnida Seema woy Kaama zare gidana danddayiyo gishshawu, ba mayzzatu ammanuwaabaa eranawu keehi koyennan aggukku.
w99 7/1 30-31
Daro Woytuwaa Demissida Xomoosuwaa
Saaba kawiyaa Solomona aadhdhida eratettaaninne A kawotettan deꞌiya duretettan keehi maalaalettido gishshawu, “i wozanai gagettiis.” (1 Kawotu 10:4, 5) Issoti issoti ha qofay kawiyaa “dagammada coꞌꞌu gaasu” giyoogaa yaagoosona. Ubba issi eranchchay A bana dogaasu giidi yootees! Hegee, kawiyaa beꞌidobaaninne siyidoban garamettidoogaa bessiyaaba milatees. Solomona ashkkarati kawuwaa aadhdhida eratettaa siyiyo gishshawu ufayttiyaageeta gidiyoogaa A yootaasu, qassi Solomona kawoyido gishshawu Yihoowa galataasu. Yaatada A kawuwawu alꞌꞌo imotaa immaasu, worqqa xallay ha wodiyaa waagan 40,000,000 Amarkkaa doolaare. Solomonikka kawiyaa “amottada a oichchidobaa ubbaa iyyo immiis.”—1 Kawotu 10:6-13.
it-2 990-991
Solomona
Kawiyaa beeta maqidasiyaa bonchchuwaanne Solomona keettaa, A maaddan shiiqiya qumaanne ushshaa, hegaa aattiyaageeti maayiyo maayuwaa, qassi beeta maqidasiyan xuuggiyo yarshshuwaa beꞌa simmin, “i wozanai gagettiis.” Yaatiyo gishshawu, A hagaadan gaasu: “Taayyo asai yootidoogee bagganne gakkenna; aadhdhida eratettankka duretettankka taani siyidoogaappe keehi darees.” Yaatada kawuwawu oottiya ashkkarati ufayttiyoogaa yootaasu. A yaatiyoogan, Israaꞌeela asaa siiqido gishshawu, suure pirddaanne xillotettaa oottana mala Solomona kawo ootti sunttida, Xoossaa Yihoowa galataasunne sabbaasu.—1Kaw 10:4-9; 2Odi 9:3-8.
Ayyaanaaban Alꞌꞌobaa
it-2 1097
Kawotaa Araataa
Israaꞌeelan kawotida kawotu araataa xeelliyaagan darobay odettidoy Solomonaagaa xalla. (1Kaw 10:18-20; 2Odi 9:17-19) Hegee Yerusalaamen deꞌiya Mooriyaa deriyan keexettida keettatuppe issuwan ‘kawotaa araatay deꞌiyoosan’ deꞌiyaaba milatees. (1Kaw 7:7) Hegee ‘danggarssaa zaaliyaappe medhdhidi muruta worqqan sheeshshido guyye baggaara kiikiyan muumi uttida, qassi qesiyaa zemppissiyo sohoti deꞌiyo gita kawotaa araataa.’ Kawotaa araataa medhdhanawu goꞌettiyo waanna miishshay danggarssaa zaaliyaa gidikkonne, beeta maqidasiyan hegaa mittaappe medhdhidi muruta worqqaa sheeshshiyaabaanne danggarssaa zaaliyan alleeqissiyaaba milatees. He kawotaa araataa beꞌiya uraassi hegee muleera danggarssaa zaaliyaappenne worqqaappe merettidaba milatees. Kawotaa araataa pude kiyanawu yedhdhiyo usuppun xekkata yooti simmidi taarikee hagaadan gees: “Qesiyaa zemppissiyo sohoti de7oosona; he naa77u sohotu lanqqiyankka . . . issi issi gaammo misilee de7ees. He araataa pude kiyiyo usuppun xekkatun ya baggaaranne ha baggaara issi issi gaammo misilee, muleera tammanne naa77u misileti de7oosona.” (2Odi 9:17-19) Haariyo maatay bessiyaaba gidiyoogaa gaammuwaa misilee qonccissees. (Doo 49:9, 10; Ajj 5:5) Tammanne naaꞌꞌu gaammoti 12 Israaꞌeela zareta qonccissoosona, hegee eti he araatan uttidaagawu haarettiyoogaanne exatiyoogaa bessiyaaba gidennan waayi aggana. Kawotaa araatay worqqaappe oottido gediyan yedhdhiyoobaara gaytti uttiis. Danggarssaa zaaliyaappenne worqqaappe giigida guyye baggay muumi uttido araataappe sinttaara keehi loꞌꞌiya gaammoti deꞌoosona; hegee biittaa bookki xannaꞌiyaageeti demmido, hawulttiyan giigissido, woy xuufiyan qonccida he wode deꞌiya ay araataappenne keehi aadhdhees. Hanidabaa odiyaagee hagaadan giis: “Hagaa mala kawotaa araatai hara kawotettan awaaninne oosettibeenna.”—2Odi 9:19.
HOSPPUNE 17-23
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 10-12
“Loꞌꞌo Zoriyaappe Goꞌettite”
Xoossan Nashettana Danddayees SHin
Robiꞌaamawu piriyan ohettidobadan siyettennan aggenna! I asay koyiyoobaa polikko, I, A soo asaynne A kawo keettan oottiyaageeti baalotiyo amaridabaa aggananne asaappe guuttabaa naagana koshshees. SHin I polana xayikko, asay makkalana danddayees. I waatin kehee? He ooratta kawoy kase Solomona zoriya cima asaa koyro zoriyaa bessiis. SHin, hegaappe simmin Robiꞌaami ba lagge gidiya yelagata zoriyaa bessiis. Robiꞌaami eta zoriyaa siyidi asaa naaqqanawu kuuyiis. I hagaadan giis: “Ta aawai intte qambbaraa deexettiis; shin taani hegaappekka aattada deexettana. Ta aawai inttena lissuwan wadhdhiis; shin taani inttena masimasuwaadan dukkiya lissuwan wadhdhana.”—2 Odi. 10:6-14.
“Aadhdhida Eranchchai Odiyoobaa Siya”
6 Robiꞌaama hanotaa qoppa. I Israaꞌeela kawo gidido wode, A asay A oychchanawu yiis. Eti A aaway Solomoni eta bolli caanido deexobaa I kawushshanaadan oychchidosona. Robiꞌaami loꞌꞌobaa oottiis. I asaayyo woygidi zarana koshshiyaakko Israaꞌeela cimata zoretaa bessiis. He cimati neeni asay oychchidobaa oottikko, eti neeyyo ubbatoo haarettana giidi kawuwaa zoridosona. (1 Kaw. 12:3-7) Robiꞌaami he zoriyan ufayttidaba milatenna, hegaa gishshawu banaara diccida yelagata zoretaa bessiis. He asatuyyo layttay 40 heera gidiyo gishshawu, eti deꞌuwan amaridabaa beꞌidaageeta gidennan waayi aggana. (2 Odi. 12:13) SHin he wode eti Robiꞌaama iitabaa zoridosona. I asaayyo toohuwaa yaa deexettanaadan eti zoridosona. (1 Kaw. 12:8-11) Robiꞌaamayyo naaꞌꞌu dumma dumma zoree imettiis. Hegaa gishshawu I Yihoowa woossananne awugaa zoriyaa kaallana koshshiyaakko oychchana danddayees. SHin I loꞌꞌo giidi qoppido zoriyaa kaallanawunne yelagati yootidobaa oottanawu dooriis. Hegaa gaasuwan Robiꞌaaminne Israaꞌeela asay keehi qohettiis. Issi issitoo nuussi imettiya zoree nuuni siyanawu koyiyoogaa mala gidennan aggana danddayees. SHin he zoree Xoossaa Qaalaappe imettikko, nuuni siyana koshshees.
it-2 768 ¶1
Robiꞌaama
Otorettidi keehi ayyiya Robiꞌaama qofay daro asaagaappe muleera dummatees. Daawita asawu ubbatoo exatiday Yihudaanne Biniyaama zare xalla gidikkonne, naaꞌꞌu kawotettan deꞌiya qeesetinne Leewati, qassi tammu zaretu asaappe dumma dumma sohuwan deꞌiyaageetikka exatidosona.—1Kaw 12:16, 17; 2Odi 10:16, 17; 11:13, 14, 16.
Ayyaanaaban Alꞌꞌobaa
Xoossan Nashettana Danddayees SHin
Olakka olettoppa giidoogee Robiꞌaama ay keena qofissidaakko qoppana danddayaasa! Asaa ‘masimasuwaa lissuwan garafana’ gi yashissidi sohuwaara he iita makkalan xoonettida kawuwaa asay waati xeellanee? (2 Hanidabaa Odiya 13:7ra gatta xeella.) Gidoppe attin, kawoynne A olanchchati Yihoowa “qaalaa siyidi simmidi soo biidosona.”
Nuuni hegaappe ay tamaariyoo? Xoossawu azazettiyoogee asan borissana danddayikkonne, ayyo azazettiyoogee eratetta. Xoossawu azazettiyoogee I nuna nashshanaadaaninne anjjanaadan oottees.—Zaa. 28:2.
Robiꞌaami ay demmidee? I Xoossawu azazettidi, mati eqqida kawotettaara olettanawu qoppidoogaa aggiis; yaatidi ba haaruwan deꞌiya Yihudaanne Biniyaama zaretu biittan katamata keexxiyoogaa doommiis. I daro katamata “keehippe minttiis.” (2 Odi. 11:5-12) Ubbaappe aaruwan, amarida wodiyawu I Yihoowa higgiyaa naagiis. Iyorbbaami haariyo tammu zaretu kawotettay eeqawu goynniyoogaa doommin, daroti tumu goynuwaa exa gididi, yaappe Yerusalaame biidi “Robiꞌaama maaddidosona.” (2 Odi. 11:16, 17) Yaatiyo gishshawu, Robiꞌaami azazettidoogee A kawotettaa minttiis.
be 69 4-5
Geeshsha Maxaafaa Intte Xannaꞌissiyoogeeti Zoriyaa Oychchiyo Wode Eta Loohissite
Geeshsha Maxaafaa xannaꞌiyaagee woy ne mala Kiristtaanee issi hanotan I waatana koshshiyaakko nena oychchikko woygada zaarana koshshii? Ne oottanabaa erennan aggakka. SHin ubba asawukka babaa ba huuphen kuuyiyo aawatettay dees. (Gal. 6:5) Kiitettida PHawuloosi I sabbakido asay “ammanidi azazettanaadan” minttettidoogaa yootiis. (Roo. 16:26) Hegee nuuni kaallana koshshiya loꞌꞌo leemiso. Issi uri bana Geeshsha Maxaafaa xannaꞌissiya uraa woy hara asa ufayssanawu issi issibaa kuuyiyaaba gidikko, asawu haaretteesippe attin, ammanuwan deꞌenna. (Gal. 1:10) Hegaa gishshawu, nena oychchida urawu sitta zaaruwaa ne yootiyoogee I koyiyooba gidennan aggana danddayees.
Yaatin, Geeshsha Maxaafay yootiyo maaraara maayettiya ogiyan waata zaarana danddayay? Geeshsha Maxaafay yootiyo he hanotawu haniya maaratanne Geeshsha Maxaafan odettida taariketa yootana danddayaasa. Issi issitoo qassi, he maaratanne taariketa demmanawu I ba huuphen waati pilgganaakko A bessana danddayaasa. He maratanne taariketa tobbana danddayeeta, shin hegaa I denttidobaara gattana koshshenna. I loꞌꞌobaa kuuyanawu maaddana danddayiyaabaa hegaappe akeekidaakkonne izaawa oychcha. I he maaratuppenne taariketuppe akeekidoogaadan ay oottin Yihooway ufayttanaakko qoppanaadan A minttetta. Yaatiyoogan, I ‘iitaa kehaa shaakkanawu ba akeekaa abbiyaa loohissanaadan’ neeni maaddaasa.—Ibr. 5:14.
HOSPPUNE 24-30
XOOSSAA QAALAN DEꞌIYA ALꞌꞌOBAA | 2 HANIDABAA ODIYA 13–16
“Yihoowan Ammanettite—Awude?”
Yelaga Attumaageetoo, Harati Inttenan Ammanettanaadan Waatana Danddayeetii?
12 Kawuwaa Asi yelagatettan deꞌiyo wode bana ziqqi oottiyaanne xala asa. Leemisuwawu, A aaway Abiiyi hayqqi simmin, Asi kawotido wode biittaappe eeqaa goynuwaa xayssiyoogaa doommiis. Qassi “Yihudaa asai GODAA bantta aawatu Xoossaa koyanaadaaninne a higgiyaanne a azazuwaa naaganaadan Asi azaziis.” (2 Odi. 14:1-7) Zeraaha giyo issi Toophphiyaa asi 1,000,000 wotaaddarata ekkidi Yihudaa olanawu yiido wode, Asi hagaadan giidi Yihooway maaddanaadan oychchiis: “Abeet GODAU, wolqqi bainna olanchchati wolqqaama olanchchata xoonanaadan maaddiyai neeppe attin, harai baawa! Abeet GODAU, nu Xoossau, nuuni nenan ammanettidi, . . . yiido gishshau, neeni nuna maadda.” Ha ufayssiya qaalati Asi Yihooway anne A asaa ashshana danddayiyoogaa mintti ammaniyoogaa bessoosona. Asi saluwan deꞌiya ba Aawan ammanettiis; qassi Yihooway “Toophphiyaa olanchchata shociis.”—2 Odi. 14:8-12.
Yelaga Attumaageetoo, Harati Inttenan Ammanettanaadan Waatana Danddayeetii?
13 Kawuwaa Asaara olettanawu 1,000,000 wotaaddarati yiidoogee keehi yashshiyaaba. SHin, I Yihoowan ammanettido gishshawu xooniis. Gidoppe attin, hara metoy gakkido wode Asi Yihoowan ammanettibeennaagee azzanttiyaaba. Israaꞌeela biittaa iita Kawoy Baaꞌishi A yashissido wode, Asi Sooriyaa kawuwaa maaduwaa oychchiis. I hegaadan kuuyidoogee iitabaa kaalettiis! Yihooway hananabaa yootiya Hanaana baggaara Asayyo hagaadan giis: “Neeni Sooriyaa kawuwan ammanettada, GODAN, ne Xoossan, ammanettabeenna gishshau, Sooriyaa kawuwaa olanchchati ne kushiyaappe kessi ekkidosona.” Hegaappe simmin, olay Asappe shaahettibeenna. (2 Odi. 16:7, 9; 1 Kaw. 15:32) Nuuni he taarikiyaappe tamaariyoobay aybee?
Yelaga Attumaageetoo, Harati Inttenan Ammanettanaadan Waatana Danddayeetii?
14 Inttena ziqqi oottidi deꞌite, qassi ubbatoo Yihoowan ammanettite. Intte xammaqettido wode, intteyyo mino ammanoy deꞌiyoogaanne Yihoowan ammanettiyoogaa bessideta. Qassi Yihooway intte A keettaa asa gididoogan keehi ufayttiis. Waannabay haꞌꞌi intte aggennan Yihoowan ammanettiyoogaa. Intte issi gitabaa kuuyiyo wode Yihoowan ammanettiyoogee metennaba milatana danddayees. SHin hara wode waatuuteetii? Intte aybin allaxxanaakko, ayba ooso oottanaakkonne intte deꞌuwawu ay halchchanaakko kuuyiyo wodekka, Yihoowan ammanettiyoogee keehi koshshiyaaba! Intte eratettan ammanettoppite. Geeshsha Maxaafay yootiyo maarati intte issibaa kuuyanaadan maaddana; qassi he kaaletuwaa oosuwan peeshshite. (Lee. 3:5, 6) Intte yaatiyo wode, Yihooway ufayttana; qassi gubaaꞌiyan deꞌiyaageeti inttena bonchchana.—Koyro Ximootiyoosa 4:12 nabbaba.
Ayyaanaaban Alꞌꞌobaa
Kumetta Wozanaappe Yihoowawu Ootta!
7 Nuuni ubbay nu kumetta wozanaappe Xoossawu ammanettiyaakkonne nu wozanaa qorana danddayoos. ‘Taani Yihoowa ufayssanawu, tumu goynuwawu exatanawunne Yihoowa asaa qohiyaabaappe naaganawu murttidanaa?’ gaada nena oycha. Asi he biittaa “kawuwaa aayyiyo” gidida Maaꞌiko i maataappe gooddanawu ay keena xalana koshshidaakko qoppa! Neeni iigaadan oottiya ura erennan aggana danddayaasa; shin neenikka Asadan mishettiyoogaa bessana danddayiyo issi issi ogee deꞌana danddayees. Leemisuwawu, ne soo asaappe issoy woy ne mata laggee nagaraa oottidi ba nagaraappe simmibeenna gishshawu bohettikko shin? Neeni he uraara gayttennan agganawu murttanee? Ne wozanay neeni ay oottanaadan denttettanee?