Kiristtaanetu Deꞌuwanne Haggaazuwa SHiiquwa Xannaꞌiyo Xuufiyan Odettida Xuufeta
© 2023 Watch Tower Bible and Tract Society of Pennsylvania
MASQQALA 4-10
XOOSSAA QAALAN DEꞌIYA ALꞌꞌOBAA | ASTTIRO 1-2
“Asttiridan Ashkke Gidite”
Paacee Gakkishin Ashkke Gidana Danddayaasa
11 Asi mela nashshiyoogee woy bessiyaagaappe aattidi sabbiyoogeekka nu ashkketettaa paaccana danddayees. Hanotay garamissiya ogiyan laamettido wode Asttira hanido loꞌꞌobaa qoppa. A keehi loꞌꞌawusu, qassi issi layttawu keehi alꞌꞌobaa tiyettaydda gamꞌꞌaasu. A galla galla peeꞌiyoy Parsse Kawotettaa ubbaappe shiiqida, kawuwan nashettanawu annaacettiya yelaga maccaasatuura. SHin a ubbatoo harata bonchadanne bana naagada deꞌaasu. Kawoy o kawiyo oottidi doori simminkka a ashkke gidiyoogaa aggabeykku.—Asttiro 2:9, 12, 15, 17.
Xoossaa Asawu Exataasu
15 Asttira kawuwaakko geliyo kayay gakkin, a ba puulaa loyttana danddayiyaaba gaada qoppiyo ubbabaa ekkanaadan odettiis. SHin a ashkke gidiyo gishshawu, Hegaayi yootidobaappe harabaa oychabeykku. (Ast. 2:15) Puula xallay kawuwaa ufayssennaagaa, qassi he kawo keettan deꞌiya daro asay ashkke gidennaagaanne ba huuphiyaa kawushshennaagaa a eraasu. I qofay likkee?
Paacee Gakkishin Ashkke Gidana Danddayaasa
12 Ashkketettay nuuni ubbatoo kiphataaninne bonchissiya hanotan maayanaadaaninne alleeqettanaadan maaddees. Nuuni ayyiyoogan woy asay bessenna ogiyan nuna xeellanaadan oottiyoogan gidennan, ‘ashkkenne woppu giida ayyaanaa’ bessiyoogan asaa wozanaa omooddanaagaa eroos. (1 PHeexiroosa 3:3, 4 nabbaba; Erm 9:23, 24) Nu wozanan deꞌiya hada amoy nuuni oottiyooban wurssettan qonccees. Leemisuwawu, dumma maatay nuuyyo deꞌiyoogaa, nuuni xuurabaa eriyoogaa woy maatay deꞌiyo ishanttuura nuuyyo dumma dabbotay deꞌiyoogaa bessiyaabaa yootana danddayoos. Woy qassi haratikka oottidoban woy yootido qofan nu xallay xeesettanaadan oottiya hanotan issi issibaa qonccissana danddayoos. Hegankka Yesuusi keehi loꞌꞌo leemiso. I yootido darobay Ibraawetto Geeshsha Maxaafan deꞌiya qofa woy hegaara gayttidaba. Siyiyaageeti i yootiyoobay a eraa woy aadhida eratettaa bessiyaaba gidennan, Yihoowappe yiidaba gidiyoogaa eranaadan i ashkketettan hegaadan haasayiis.—Yoh. 8:28.
Ayyaanaaban Alꞌꞌobaa
Eray?
Eranchchati Mardduka (Wolayttattuwan Marddikiyoosa) giya sunttay deꞌiyo Parssetu xuufiyaa demmidosona. Marddikiyoosi miishshaara gayttidaban Suusan alaafe gididi oottennan aggenna. He xuufee beettido wode he heeran deꞌiya, taarikiyaa eranchchay Arter Unginadi, ‘Geeshsha Maxaafan gidennan hara sohuwan, Marddikiyoosa giya sunttay xaafettido koyro’ xuufee hegaa gidiyoogaa yootiis.
Unginada iripporttee bessiyoogaadan, eranchchati hara daro shaꞌu Parsse xuufeta birshshidosona. Perssepaalisa katamay laalettidaagaa matan beettida, eta bolli xaafettidabay deꞌiyo urqqaappe merettida miishshati hegeetuppe amaridaageeta. Hegeeti katamaa dirssaa matan, alꞌꞌobadan goꞌettiyoobatu giddoppe beettidosona. Eta bolli xaafettidabay deꞌiyo urqqaappe merettida he miishshati, Arxxekssiisi koyroy kawotido wode deꞌiyaabata. Eti Eelaama qaalan xaafettidosona, qassi Asttiri maxaafan deꞌiya daro sunttati hegankka deꞌoosona.
Arxxekssiisi koyroy kawotido wode, Suusan kawo keettan kawuwaa xaafe gididi oottida issi bitanee urqqaappe merettida miishshatun xaafettida daro Parssepaalise xuufetun Mardduka giyo sunttay deꞌiyoogaa qonccissiis. Marddikiyoosi issi doonaappe hara doonawu birshshiya asa gidiyoogaa urqqaappe merettida issi miishshaa bolli xaafettidabay qonccissees. Hegee Marddikiyoosa xeelliyaagan Geeshsha Maxaafay yootiyoobaara issi mala. I Kawuwaa Arxxekssiisawu (Arxxekssiisa koyruwaa) oosanchcha gididi oottanaadan sunttettiis; qassi I baa giishin naaꞌꞌu doonaa haasayees. Marddikiyoosi darotoo Suusan deꞌiya kawo keettaa geliyo penggiyan uttees. (Ast. 2:19, 21; 3:3) Hegee kawo keettaa oosanchchati oottiyoosan deꞌiya gita pengge.
Urqqaappe merettida miishshan xaafettida Marddukanne Geeshsha Maxaafan odettida Marddikiyoosa issi mala oottiyaabay deꞌiyoogee keehi maalaalees. Eti issi mala wodiyaaninne issi mala sohuwan deꞌidosona, qassi issi mala maatan issi mala oosuwaa oottidosona. Ha ubbabay Marddukinne Marddikiyoosi issi ura gidiyoogaa qonccissiyaaba milatees.
MASQQALA 11-17
XOOSSAA QAALAN DEꞌIYA ALꞌꞌOBAA | ASTTIRO 3-5
“Harati Banttawu Danddayettida Ubbaa Oottanaadan Maaddite”
it-2 431 ¶7
Marddikiyoosa
Hamaanayyo Goynnennan Ixxiis. Hegaappe guyyiyan, Kawoy Arxxekssiisi, Agaaga zare gidida Hamaana kiike mocona oottidi sunttido gishshawu, kawo keettaa penggen oottiya asa ubbay gulbbatidi awu goynnanaadan azaziis. SHin, Marddikiyoosi Ayhuda asa gidiyo gishshawu, awu goynnennaagaa minttidi yootiis. (Ast 3:1-4) Hegaa gishshawu, Marddikiyoosi goynnennan ixxido gaasoy Xoossaa Yihoowaara dabbotido dabbotaa gishshaassa gidiyoogee qoncce; ayssi giikko, I bana Xoossawu sheedhdhida Ayhuda asa. Israaꞌeelati sunttettida issi urawu ziggiyogee he uri asaa haariyagaa gidiyogaa ammanidi ekkiyogaa bessiyaba; shin Marddikiyoosi Hamaanassi ziggiyogee hegaappe dummatiyaba gidiyogaa akeekiis. (2Sam 14:4; 18:28; 1Kaw 1:16) Marddikiyoosi Hamaanawu goynnennan ixxido loꞌꞌo gaasoy deꞌees. Hamaani Amaaleeqa asa gidennan waayi aggana; qassi Yihooway “yeletaappe yeletaa gakkanaashinkka” Amaaleeqatuura olettanaagaa yootiis. (Kes 17:16.) Marddikiyoosi oottidobay polotikaara gayttidaba gidennan, I Xoossaassi ammanettiyogaa bessiyaba.
it-2 431 ¶9
Marddikiyoosa
Israaꞌeelata Ashshanawu Yihooway A Goꞌettiis. He biittan deꞌiya Ayhudati ubbay xayanaadan awaajjoy kiyido iita wodiyan, Asttira kawotettaa bonchchuwa demmidoogee Ayhudata ashshanaassa gidiyogaa Marddikiyoosi ammanettiis. Ayhudata maaddanaadan kawuwa woossana mala Asttirissi gita aawatettaa I immiis. Hegee shemppo miyaba gidikkonne, Asttira hegaadan oottanawu maayettaasu.—Ast 4:7–5:2.
Xoossaa Asawu Exataasu
22 Asttira he kiitaa siyada keehi unꞌꞌettennan aggukku. I ammanoy paacettana hanees. A marddikiyoosassi zaarada kiittidobay a keehi yayyidoogaa bessees. A kawuwaa higgiyaabaa ayyo yootaasu. Kawoy xeesennan akko biyoogee hayqo. SHin kawoy ba worqqa xamꞌꞌaa akko zaari bessiyo asa xallay attees. Qassi kawoy xeesin ixxis giida Asxxiini bolli gakkidabaa qoppiyo wode, Asttira attanaagaa qoppana danddayukku. Asttira 30 gallassa gidoosappe kawuwaakko gelanawu xeegetta erennaagaa Marddikiyoosassi yootaasu. Kawoy hegaa keena wodiyawu o xeesibeennaagee, Asttira ba qofaa coo laammiya he kawoy o siiqiyoogaa aggidaakkonne qoppanaadan oottennan aggenna.—Ast. 4:9-11.
23 Marddikiyoosi Asttiri ammanuwaa minttiyaabaa yootanaadan kiitaa zaaridi kiittiis. A coꞌꞌu giyaaba gidikko, atotettay Ayhudatussi harasaappe yaanaagaa mintti yootiis. SHin yedetay wolqqaamiyo wode akka attana danddayukku. Ba asay xayanaadan aatti immennanne ba gelido qaalaa polennan aggenna Yihoowan Marddikiyoosi wozanappe ammanttiyoogaa bessiis. (Yaas. 23:14) Marddikiyoosi Asttiro, “Neeni kawiyo gidada yiidoogee hagaa mala wodiyaassakkonne ooni erii?” yaagidi oychiis. (Ast. 4:12-14) Marddikiyoosi nuuni ubbay kaallana bessiyo leemiso. I kumetta wozanan ba Xoossaa Yihoowa ammanettiis. Nuuni shin ammanettiyoo?—Lee. 3:5, 6.
Ayyaanaaban Alꞌꞌobaa
Laꞌatettan Goynnanawu Baaxetiyoogaa
14 Beni wode deꞌida Asttiriigaadaaninne Marddikiyoosaagaadan, ha wodiyan Yihoowa asay i azazido ogiyan ayyo laꞌatettan goynnanawu baaxetees. (Ast. 4:13-16) Neenikka he baaxiyaa baaxetana danddayay? Ee. Ha wodiyan higgiyaara gayttidaagan naaqettiya ishanttussinne michonttussi ubbatoo woossana danddayaasa. Hegaa mala woosay metoynne yedetay gakkiyo ishanttanne michontta keehi maaddana danddayees. (Yaaqooba 5:16 nabbaba.) Yihooway he woosaa siyii? Nuuni pirdda keettan shatimmidobay i tumuppe siyiyoogaa qonccissees!—Ibr. 13:18, 19.
MASQQALA 18-24
XOOSSAA QAALAN DEꞌIYA ALꞌꞌOBAA | ASTTIRO 6-8
“Hiillan Haasayiyogan Loꞌꞌo Leemiso”
A Erancha, Xalanne Ba Xallaa Siiqenna Maccaasa
15 Asttira ba koyidobaa kawuwawu odanawu issi gallassaa danddayan naagidoogee, Hamaana iitatettay qoncciyaa kiyanaadan oottiis. He galla kawuwaa xiskkuwaa diggiday Xoossaa Yihoowa gidanddeeshsha? (Lee. 21:1) Xoossaa Qaalay nuuni danddayan ‘naagishshanaadan’ minttettees! (Mikiyaasa 7:7 nabbaba.) Nuuni Xoossaa danddayan naagishshiyaaba gidikko, nu metuwaa qaaranawu nuuni halchiyo aybippenne aadhiyaabaa i oottiyoogaa akeekoos.
Xalatettan Yoota aggaasu
16 Asttira bana qofissidabaa kawuwaayyo yootennan hegaappe daro takkana koyabeykku; naaꞌꞌantto gibiran a kawuwaayyo hegaa yootana. SHin waata yootanee? A koyiyoobay aybakko yootanaadan kawoy zaarettidikka oychido gishshawu, yootanawu hanotay iyyo injjetiis. (Ast. 7:2) Haꞌꞌi Asttira ‘haasayana wodee’ gakkiis.
A Erancha, Xalanne Ba Xallaa Siiqenna Maccaasa
17 Asttira, “Kawuwau, neeni tanan ufaittidabaa gidikko, qassi ta oishaakka polanau neeni dosidabaa gidikko, ta woosainne ta oishai taaninne ta asai haiqqennan attanaassa” yaagada kawuwaayyo yootaasu; a hegaa yootanaappe kase ba Xoossaakko ba wozanan woossennan aggukku. (Ast. 7:3) Kawoy aybanne kuuyikko, a hegaa maayanaagaa yootidoogaa hassaya. Ba azinaa kawushshiyaabaa eraydda oottida, kase machee Asxxiinippe Asttira keehi dumma! (Ast. 1:10-12) Qassi Asttira kawoy Hamaanan ammanettidoy eeyyido gishshataassa gabeykku. SHin Asttira kawoy i shemppuwaa ashshanaadan woossaasu.
A Erancha, Xalanne Ba Xallaa Siiqenna Maccaasa
18 Asttiri oyshay kawuwaa keehi ufayssido gishshawu, issi issibaa i loytti erana koyiis. Kawiyo qohiyaabaa oottanawu xalidaagee oonee? Asttira hagaadan gaasu: “Taaninne ta asai issoinne attennan wuri haiqqanau baizettida. Nuuni baizettidoogee macca aillenne attuma aille gididi de7anaassa gidiyaakko, taani co77u gaana; aissi giikko, hegaa mala metoi kawuwaa waissanau bessiyaabaa gidenna.” (Ast. 7:4) Asttira bana qofissidabaa qoncciyan yootidaba gidikkokka, hegee aylletettawu bayzettiyoogaa gidiyaakko, a coꞌꞌu gaanaagaakka yootidoogaa akeeka. Eta wori xayssiyoogee kawuwaakka keehi qohiyaaba gidiyo gishshawu, a coꞌꞌu gaana danddayukku.
19 Hayyottidi harata ammanttiya ogiyan yootiyoogaa xeelliyaagan Asttirippe darobaa tamaaroos. Nuuni siiqiyo urawu woy suntta gidida urawu issi metuwaabaa yootiyo wode, danddayancha, bonchiyaageetanne tuma gididabaa haasayiyaageeta gidana koshshees.—Lee. 16:21, 23.
Ayyaanaaban Alꞌꞌobaa
w06 3/1 11 ¶1
Asttiri Maxaafan Deꞌiya Kulkka Qofata
7:4—Ayhudata muleera xayssiyogee ‘kawuwa’ waati qohii? Ayhudati aylletettawu bayzzettana haniyogaa Asttira hiillan kawuwawu yootiyogan, Ayhudata xayssiyogee kawuwa keehi qohiyogaa qonccissaasu. Hamaani kawo keetta gelissanawu qaalaa gelido 10,000 xaqara biray, I Ayhudata aylletettawu bayzziyakko gelissana danddayiyo biraappe keehi guuxxees. Hamaani qoppidobay polettidaba gidiyakko, kawiya Asttirakka hayqqanawu deꞌawusu; qassi hegee kawuwa keehi qohees.
MASQQALA 25–XIQIMITA 1
XOOSSAA QAALAN DEꞌIYA ALꞌꞌOBAA | ASTTIRO 9-10
“I Ba Asaa Maaddanawu Ba Maataa Goꞌettiis”
it-2 432 ¶2
Marddikiyoosa
Marddikiyoosi haꞌi Hamaana sohuwan kiike mocona gididi kawotettaa xuufetu bolli maatafaa wottiyo Kawuwa migiduwa ekkiis. Asttira kawoy iyyo immido Hamaana aquwa bolli Marddikiyoosa sunttaasu. Yaatin Marddakiyosi Kawoy immido maataa goꞌettidi Ayhudati banttana qohuwappe ashshanawu maaddiya awaajjuwa kessiis. Hegee Ayhudatussi atotettaanne ufayssaa pooꞌoy pooꞌiis giyogaa. Parsse haaruwa giddon deꞌiya daroti Ayudatuura zuppetidosona, qassi he higgee oosuwan peꞌiyo Adaare 13ntta gallassay gakkin Ayhudati giigettidosona. Marddikiyoosassi gita maatay deꞌiyo gishshawu kawotettaa sunttati eta bagga gididosona. Suusan hara issi gallassaa gujjidi olaa olettidosona. Ayhudati Hamaana tammu naata gujjin Parsse haaruwan deꞌiya 75,000ppe dariya bantta morkketa woridosona. (Ast. 8:1–9:18) Asttira maacin, Marddikiyoosi Adaare 13ttanne 14tta gallassati “Puriima gallassata” geetettidi layttan layttan bonchchettanaadan azaziis. He gallassati ufayttiyo, shoobettiyo, issoy issuwawunne hiyyeesatuyyo imotata immiyo gallassa. Ayhudati hegaa maayettidosona, qassi eta naatinne etaara walahettiya asay ubbay he baalaa bonchchanaadan oottidosona. Marddikiyoosi he kawotettan naaꞌꞌantta asa gididi Xoossaa asan keehi bonchchettiis, qassi ubbatookka eta sarotettawu maaddiyabaa oottiis.—Ast. 9:19-22, 27-32; 10:2, 3.
it-2 716 ¶5
Puriima Baalaa
Halchchuwa. Qofaa immiya issi issi asay giyogaadan, ha wodiyan bonchchettiya Ayhudatu Puriima Baalay ammanobaa gidennan alamiyabaakko baqqees, qassi asay aliyappe aadhdhiyabaa giigissidi bonchchees, shin beni ha baalay doomettido wode bonchchettiyo halchchoy hegaa gidenna. Marddikiyoosinne Asttira naaꞌꞌaykka tumu Xoossaa Yihoowa ashkkara, qassi he baalay A bonchchanawu eqqiis. He wode Ayhudata ashshiday Xoossaa Yihoowa gaanawu danddayettees, gaasoykka he allaallee denddidoy Marddikiyoosi Yihoowa xalaalawu ammanettidi goynnido gishshataassa. Hamaani geella Yihooway dummayidi qanggidonne xayanaadan maacido Amaaleeqa zare gidennan aggenna. Marddikiyoosi Xoossaa higgiya bonchchiyo gishshawu Hamaanassi goynnennan ixxiis. (Ast 3:2, 5; Kes 17:14-16) Qassikka, Marddikiyoosi Asttirissi haasayidobay I Ayhudata ashshanawu ubbaappe xoqqiya wolqqaa koyidoogaa bessees; (Ast 4:14) hegaa bollikka Asttira kawoy deꞌiyosaa gelada gibiraa shoobiyan I beettanaadan woossanaappe kase xoomidoogee A Yihoowa maaduwa koyidoogaa bessees.—Ast 4:16.
Wolqqaa Goꞌettiyoogan ‘Xoossaa Milata’
12 Kiristtaane gubaaꞌiyaa kaalettiyaageeta Yihooway immiis. (Ibraawe 13:17) Ha kaalettiyaageeti Xoossay banttawu immido maataa dorssatussi koshshiyaabaa kunttanawunne ayyaanaaban eti diccanaadan maaddanawu goꞌettana bessees. Cimatuyyo imettida maatay eti bantta mala Kiristtaaneta huqqunnanaadan oottii? Mule oottenna! Cimati gubaaꞌiyan banttawu deꞌiya maataa bessiyaagaadan xeellananne banttana ziqqi oottana koshshees. (1 PHeexiroosa 5:2, 3) Geeshsha Maxaafay cimata hagaadan gees: “Xoossay ba Naꞌaa suuttan wozido Xoossaa gubaaꞌiyaa heemmite.” (Oosuwaa 20:28, NW) Hagee wudiyaa giddon deꞌiya ubbaa kehatettan oyqqanaadan oottiyaaba.
13 Nuuni hegaa kaallidi deꞌiya leemisuwan qonccissana danddayoos. Issi mata laggee alꞌꞌobaa neeni naaganaadan oychchees. Neeni naaganaadan ne laggee immiyoobay I daro miishshan shammidoba gidiyoogaa eraasa. Neeni naagettada hegee moorettennaadan akeekan oyqqiyoogee qoncce. Hegaadan, A giddon deꞌiyaageeti dorssan leemisettido, tumuppe alꞌꞌo gidida gubaaꞌiyaa naaganaadan Xoossay cimatuyyo aawatettaa immiis. (Yohaannisa 21:16, 17) Yihooway dorssata keehi siiqiyo gishshawu, ba mexi issi Naꞌaa Yesuus Kiristtoosa alꞌꞌo suuttan eta woziis. Yihooway ba dorssatuyyo aybippenne aadhdhiya waagaa qanxxiis. Ashkke gidida cimati hegaa akeekidi Yihoowa dorssata kehatettan oyqqoosona.
Ayyaanaaban Alꞌꞌobaa
w06 3/1 11 ¶4
Asttiri Maxaafan Deꞌiya Kulkka Qofata
9:10, 15, 16—Omoodidobaa ekkanaadan awaajjoy paqqadiyaba gidikkokka, Ayhudati ekkennan ixxidoy aybissee? Eti ekkennan ixxiyogan, eta halchchoy qohuwappe banttana ashshiyogaappe attin duretiyogaa gidennaagaa loytti qonccissidosona.
XIQIMITA 2-8
XOOSSAA QAALAN DEꞌIYA ALꞌꞌOBAA | IYYOOBA 1-3
“Wozanappe Yihoowa Siiqiyogaa Aggoppite”
Ammanuwaaninne Azazettiyoogan Nohe, Daaneelanne Iyyooba Leemisuwaa Kaalla
16 Iyyooba gakkida paaceta. Iyyooba deꞌoy phalqqetta hanotati kumidobaa xannaꞌiyoba. Paacee gakkanaappe kase “arshsho baggaara de7iya asa ubbaappe i aadhdhida dure asa.” (Iyy. 1:3) I keehi dure, keehi erettidanne bonchchettida asa. (Iyy. 29:7-16) SHin he ubbabay deꞌikkonne, Iyyoobi bana xoqqu xoqqu oottibeenna woy Xoossay baassi koshshennabadan xeellibeenna. Yihooway A “ta ashkkaraa” yaagidi, gujjidikka, ‘I boree baynnanne suure asa. I GODAASSI yayyiya, iitabaappekka haakkida asa’ yaagiis.—Iyy. 1:8.
17 Keehi qantta wodiyan Iyyooba deꞌoy daroppe laamettiis. I keehi manqqiisinne hidootaa qanxxiis. Hegawu gaasoy ba goꞌꞌaassi giidi Xoossawu goynnees giidi Iyyooba sunttaa moorida Seexaanaa gidiyoogaa eroos. (Iyyooba 1:9, 10 nabbaba.) Yihooway he iita mootuwaa coo aggiigibeenna. SHin I Iyyoobi ba goꞌꞌaassa gidennan, suure wozanaappe goynniyoogaa bessanaadan oottiis.
Intte Suuretettaa Naagite!
10 Seexaanay nuna ubbaakka hegaadan mootees. I nena waati mootii? I neeni Xoossaa Yihoowa wozanappe siiqakka, ne huuphiyaa ashshanawu assi oottiyoogaa aggana, qassi neeni suure gidada deꞌakka giyoogaa malabaa yootiis. (Iyy. 2:4, 5; Ajj. 12:10) Hagan neeyyo aybi siyettii? Hegee nena keehi qohennee? Gidoppe attin, ane hagaa qoppa: Yihooway neeyyo maalaalissiya maataa immiyoogan nenan ammanettees. Yihooway ne suuretettaa Seexaanay paaccanaadan eeno gees. Yihooway neeni ne suuretettaa naagada deꞌana danddayiyoogaa ammanettees, qassi Seexaanay worddo gidiyoogaa ne bessanaadan nena maaddees. Hegaa oottanaadan nena maaddanawu I qaalaa geliis. (Ibr. 13:6) Ubbaa Haariyaagawu ammanettiyoogee keehi gita maata! Suuretettay keehi koshshiyaaba gidiyoy aybissakko akeekadii? Seexaanaa wordduwaa qonccissanawu, nu Aawaa geeshsha sunttawunne A haaruwawu exatanawu suuretettay nuna maaddees. Nuuni suuretettaa naagidi deꞌanawu ay oottana danddayiyoo?
Ayyaanaaban Alꞌꞌobaa
Yesuusi Haasayido Wurssetta Qaalatuppe Ay Tamaarana Danddayiyoo?
9 Yesuusi woygidee? Yesuusi hayqqanaappe guuttaa kasetidi hagaadan giis: “Ta Xoossau, ta Xoossau, tana aissi aggadii?” (Maa. 27:46) Yesuusi ayssi hegaadan giidaakko Geeshsha Maxaafay qonccissenna. SHin he qaalatuppe nuuni tamaariyoobaa qoppa. Yesuusi yaagiyoogan, Mazamure 22:1n deꞌiya hiraagaa polidoogee nuuni tamaariyo issiba. Hegaa bollikka, Yihooway ba Naꞌaa yuushuwaa ‘diridi naagibeennaagaa’ he qaalati bessoosona. (Iyy. 1:10) Yesuusi I hayqqana gakkanaashin morkketi A ammanuwaa paaccanaadan ba Aaway eeno giidoogaa akeekiis. Ay asinne Yesuusaagaa keena paacettibeenna. Hegaa bollikka, I hayqqanaadan oottiya aybanne oottibeennaagaa he qaalati qonccissidosona.
XIQIMITA 9-15
XOOSSAA QAALAN DEꞌIYA ALꞌꞌOBAA | IYYOOBA 4-5
“Worddo Oduwappe Naagettite”
it-1 713 ¶11
Elifaaza
2. Iyyooba heezzu laggetuppe issuwa. (Iyy 2:11) Temaana biittaa asa gidida ha bitanee, Eesawassi bayra naꞌaa zare gidennan waayi aggana; yaanikko I Abrahaama dabbo; qassi Iyyoobassikka dabbo giyogaa. Elifaazinne A zareti bantta aadhdhida eratettan otorettidosona. (Erm 49:7) Ha heezzu ‘minttettiya’ asatuppe issuwa gidida Elifaazi keehi koshshiyanne maaddiya asadan bana qonccissidoy geella I banaara deꞌiyageetuppe bayratiyo gishshataassa gidana danddayees. Heezzutookka haasayaa koyro doommiday A; qassi A haasayay haratuugaappe adussa.
w05 9/15 26 ¶2
Iita Qofaa Eqettite!
Elifaazi meeze gidennabaa beꞌido wodiya hassayidi hagaadan giis: “Issibai [issi ayyaanay] ta som77uwaa pittiiddi, ta sinttaara kanttiis; kanttin dagamaappe denddidaagan ta bollan de7iya beelaalai eqqiis. I ta sinttan eqqiis; shin i aibakko taani shaakkada eranau danddayabeikke. Hegaappe guyyiyan, co77u giidasaappe hagaadan yaagiya cenggurssaa siyaas.” (Iyyooba 4:15, 16) Elifaazi hegaadan qoppanaadan oottida ayyaanay aybee? Hegaappe kaallidi I haasayidobay he ayyaanay Xoossaa geeshsha kiitanchchaa gidennaagaa bessees. (Iyyooba 4:17, 18) Hegee issi iita ayyaana meretaa. Hegaa gidennaakko, Yihooway Elifaazanne A naaꞌꞌu laggeta wordduwa haasayideta giidi seerenna. (Iyyooba 42:7) Ee, daydanttay Elifaaza kaalettiis. I haasayidobay Xoossaa qofa gidenna.
w10 2/15 19 ¶5-6
Balettiya Seexaanaa Oduwa Eqettite
Seexaanay, Iyyooba minttettanawu yiida A heezzu laggetuppe issuwa, Elifaaza goꞌettidi, asay Xoossawu ammanettidi deꞌana danddayenna laafa mereta yaagiis. Elifaazi asaabaa Iyyoobawu hagaadan qonccissiis, “urqqaappe merettidaageetun, ‘eta de7uwaa baasoi baanaa gididoogeetun, bil77aappekka eesuwan haiqqiyaageetun ai keena daro mooroi beettanddeeshsha! Maallado paxa de7iya asi omarssi gakkanaashin, ooninne hassayennan de7ishin haiqqees.”—Iyyooba 4:19, 20.
Geeshsha Maxaafaykka hara sohuwan nuuni sohuwara meqqiya “urqqaappe merettida miishsha” mala gidiyogaa yootees. (2 Qor. 4:7) Nuuni nagaraanne polotettaa pacaa laattido gishshawu daafuranchcha. (Roo. 5:12) Hegaa gishshawu, nurkka Seexaanaa qohuwa eqettana danddayokko. SHin, nuuni Kiristtaane gidiyo gishshawu, nuussi maadoy deꞌees. Nuuni daafuranchcha gidikkokka, Xoossaa sinttan alꞌꞌo. (Isi. 43:4) Hegaa bollikka, Yihooway bana woossiyageetussi geeshsha ayyaanaa immees. (Luq 11:13) Yihoowa ayyaanay Seexaanay nu bolli gattiyo ayba metonne genccanaadan nuna maaddiya ‘ubbaappe aadhdhiya wolqqaa’ nuussi immana danddayees. (2 Qor. 4:7; Pil. 4:13) Nuuni “ammanuwan minnidi” Dabloosa eqettikko, Xoossay nu minni eqqanaadan maaddana. (1 PHe. 5:8-10) Yaatiyo gishshawu, nuuni Seexaanaa Dabloosa yayyana koshshenna.
Worddo Oduwappe Nena Naaga
● Issi oduwawu kaniyanne gomppaa yigga
Geeshsha Maxaafay yootiyobaa: “Ubbabaakka paaccite.”—1 Tasalonqqe 5:21.
Issi odoy daro asay eriyoba woy oduwan odettidaba gidikkokka hegaa ammananaappe woy hara asawu kiittanaappe kase, hegee tuma gidiyogaa shaakka era. Waatada?
He oduwawu kanee ammanttiyabakko yigga. Miidiya ooso keettatinne hara dirijjiteti bantta zalꞌꞌiya woy polotika halchchuwa gishshawu issi taarikiya eti koyiyogaadan yootana danddayosona. Issi miidiyan ne siyiyo woy beꞌiyo oduwa hara miidiyan odettiyagaara geeddarssa. Issi issitoo, laggeti erennan bala oduwa messeejjiyan woy sooshal miidiyan haratussi kiittana danddayosona. Hegaa gishshawu, issi oduwassi kaniya loytta erennan hegaa ammanoppa.
Oduwawu gomppay wodee aadhdhibennabanne tumuba gidiyogaa shaakka era. Odettiyabay tumakko shaakkanawu, gallassata, ayfiyan beettiyabatanne naqaashata loytta akeeka. Ubba qassi issi muttumurettidabaa wayssennabaadan yootiyaba woy he odoy giigidoy asaa denttettanaassa gidikko keehi naagetta.
Ayyaanaaban Alꞌꞌobaa
Ammanettidi Deꞌitenne Deꞌuwa Wottan Xoonite
Nuuni kumetta saꞌan deꞌiya tumu goynuwa dirijjitiya shaaho gidiyogee ammanettidi deꞌanaadan nuna keehi maaddees. Kumetta saꞌan deꞌiya wozanappe siiqettiya ishanttu maabaraara issippetettan deꞌiyogee ayba gita anjjoo! (1 PHeexiroosa 2:17) Qassi nuunikka nu ishantti ammanettidi deꞌanaadan maaddana danddayoos.
Boree baynna bitanee Iyyoobi oottido maaddiyabaa beꞌa. Haray atto minttettays giya worddo Elifaazikka, “Ne qaalai xubettidaageeta kaafidi essiis; daafurida gulbbatatakka minttiis” giidi ammaniis. (Iyyooba 4:4) Hegaara gayttidaagan nuuni ay oottiiddi deꞌiyo? Ayyaanaaban nu ishanttinne michchontti Yihoowa haggaazuwan genccanaadan maaddiyo aawatettay nu ubbaassi deꞌees. Etaara gayttiyo wode, “Daafurida kushetanne arggaacida gulbbataa minttettite” giya qofaa oosuwan peeshshanawu baaxetana danddayoos. (Isiyaasa 35:3) Yaatiyo gishshawu, ishanttuuranne michchonttuura gayttiyo wode ubban, etappe issuwa woy naaꞌꞌaa minttettanawu halchcha. (Ibraawe 10:24, 25) Nuuni wozanappe galatiyogeenne nashshiyogee eti ubbatoo Yihoowa sabbanawu minnidi oottanaadan, qassi ammanettidi deꞌiyogan deꞌuwa wottan xoonanaadan tumuppe eta maaddees.
XIQIMITA 16-22
XOOSSAA QAALAN DEꞌIYA ALꞌꞌOBAA | IYYOOBA 6-7
“Deꞌoy Keehi Deexxiyo Wode”
Iyyooba Maxaafan Deꞌiya Kulkka Qofata
7:1; 14:14—‘Aylletettaa oosuwa’ giyogee woygiyogee? Iyyoobi keehi unꞌꞌettido gishshawu, ba deꞌuwa dosennan wolqqan oottiyo aylletettaa oosodan xeelliis. (Iyyooba 10:17) Issi uri hayqqidi denddana gakkanawu Siꞌooliyan woy duufuwan takkiyo wodee he uri dosidi takkiyo wode gidenna gishshawu, Iyyoobi hegaa dosennan wolqqan oottiyo aylletettaa oosuwara geeddarssiis.
‘Hidootaa Qanxxidaageeta Yihooway Ashshees’
ISSI ISSITOO, nu layttay ay keena qanttakkonne qassi ay keena ‘metuwan kumidaakko’ qoppana danddayoos. (Iyy. 14:1) Hegee issi issitoo nuuni hidootaa qanxxanaadan oottees. Beni deꞌida Yihoowa ashkkaratuppe daroti hidootaa qanxxidosona. Amaridaageeti hayqqanawukka koyidosona. (1 Kaw. 19:2-4; Iyy. 3:1-3, 11; 7:15, 16) SHin Yihooway ubbatoo eta minttetiisinne maaddiis. Eta taarikee xaafettidoy nuna minttettanassanne tamaarissanassa.—Roo. 15:4.
g 1/12 16-17
Deꞌanawu Koyenna Wode
Neessi ne hanotay keehi deexxidaba milatikko, hegaa malabay gakkiyoy ne xalla gidennaagaanne ha wodiyan ubba asay dumma dumma metuwa gencciiddi deꞌiyogaa hassaya. Geeshsha Maxaafay “Mereta ubbai issippe . . . , maccaasa leessoi oiqqin ooliyoogaadan, sahuwan ooliyoogaa” yootees. (Roome 8:22) Ne metoy qantta wodiyan giigennabaa milatikkokka, darotoo hanotati wodiyappe wodiyan giigi giigi boosona. Yaatin hegee gakkanaashin, nena aybi maaddana danddayii?
Kaymanne ammanettida laggiyawu neessi siyettiyabaa yoota. Geeshsha Maxaafay hagaadan gees: ‘Tumu laggee mule wodekka siiqees; qassi metuwa wode maaddanaassi yelettida isha.’ (Leemiso 17:17, NW) Geeshsha Maxaafan boree baynna asa geetettidi qonccida Iyyoobi metoy A gakkido wode bawu siyettidabaa qoncciyan haratussi yootiis. I “ta de7uwaa karais” giido wode, bawu siyettidabaa hagaadan qonccissiis: “Hegaa gishshau, taani mootettanaappe attin, co77u giikke; taani mishettada haasayais.” (Iyyooba 10:1) Neessi siyettiyabaa haratussi yootiyogee, neeni daro unꞌꞌettennaadaaninne nena gakkiya metuwa xeelliyo ogiya laammanaadan maaddana danddayees.
Neeyyo siyettiya ubbabaa woosan Xoossawu yoota. Issooti issooti woosay nuuni woppu gaanaadan oottiyaba xalla giidi qoppoosona; shin Geeshsha Maxaafay hegaappe dummabaa yootees. Mazamure 65:2y Xoossaa Yihooway ‘woosaa siyiyaagaa’ gees; qassi 1 PHeexiroosa 5:7y, ‘I intteyyo qoppees’ yaagees. Geeshsha Maxaafay Xoossan ammanettiyogee keehi koshshiyaba gidiyogaa darotoo yootees. Leemisuwawu:
“Ne polo wozanan GODAA ammanetta; ne akeekan zemppoppa. Neeni oottiyo ooso ubban a sinttaya; i nena likke ogiyaa kaalettana.”—LEEMISO 3:5, 6.
“[Yihooway] baayyo yayyiyaageetu ubbaayyo amuwaa kunttees. Qassi i eta waasuwaa siyidi, eta ashshees.”—MAZAMURE 145:19.
“Xoossai koyiyoogaadan, ainne nuuni a woossikko, i siyiyoogaa nuuni eriyo gishshau, a sinttan yayyokko.”—1 YOHAANNISA 5:14.
“[Yihooway] iitatuppe haakkees; shin xillotu woosaa siyees.”—LEEMISO 15:29.
Nena gakkiya metuwa Xoossawu yootikko, I nena maaddana. Geeshsha Maxaafay, “Xoossan ubba wode ammanettite . . . intte metuwaa ayyo yootite” giidi nuna minttettiyo loꞌꞌo gaasoy deꞌees.—Mazamure 62:8.
Ayyaanaaban Alꞌꞌobaa
Ishanttanne Michchontta Oyqqiyo Ogiyan Yihoowa Milata
10 Nuuni nu ishanttubaanne michchonttubaa akeekanawu baaxetiyoogan Yihoowa milatana danddayoos. Ne ishanttanne michchontta loytta era. SHiiquwaappe kasenne shiiquwaappe simmin etaara haasaya, etaara issippe haggaaza, qassi danddayettiyaaba gidikko, qumaa eta shoobba. Neeni hegaadan oottiyo wode, maalaalettana danddayaasa. Leemisuwawu, pashkki gaada haasayenna issi michchiyaa dungguuxa gidiyoogaa, daro miishshay deꞌiyo ishay miishsha siiqennaagaanne keha gidiyoogaa, woy shiiqoy doommiichchin ba naatuura gakkiya issi michchiyaa son eqettishin gencciyoogaa neeni akeekana danddayaasa. (Iyy. 6:29) Nuuni hara asa ‘yohon coo gelana’ koshshennaagee qoncce. (1 Xim. 5:13) SHin, nu ishanttubaanne michchonttubaa, qassi eti deꞌuwan beꞌido amaridabaa eriyoogee loꞌꞌo. Hegee nuuni etabaa loytti akeekana mala maaddana danddayees.
XIQIMITA 23-29
XOOSSAA QAALAN DEꞌIYA ALꞌꞌOBAA | IYYOOBA 8-10
“Xoossaa Aggenna Siiqoy Seexaanaa Wordduwappe Nuna Naagees”
Xoossaa Ufayssana Danddayiyoo?
Iyyooba bolli daro metoy gakkiis; shin hegee a bolli gakkana bessennaba milatiyaaba. Hegaappe denddidaagan, i Xoossaa ammanin aggin Xoossawu aybinne siyettenna giidi balabaa qoppiyoogaa doommiis. (Iyyooba 9:20-22) Iyyoobi bana keehi xillo asadan xeellido gishshawu, hara asay i bana Xoossaappe aattidi xillo giidabadan qoppiis.—Iyyooba 32:1, 2; 35:1, 2.
Aggenna Yihoowa Siiqoy Nena Waati Goꞌꞌii?
14 Aggenna Xoossaa siiqoy ayyaanaaban naagees. Daawiti Yihoowa hagaadan woossiis: “Neeni taayyo qosettiyo soho; neeni tana metuwaappe naagana. Atotettaa yettaa yexxiyaageeta ta yuushuwan wottadasa. . . . GODAN ammanettiyaageeta aggenna siiqoi dooddana.” (Maz. 32:7, 10) Beni wode, katamaa yuushuwan deꞌiya gimbbeti asaa morkketuppe naagoosona. Gimbbiyaadan, aggenna Yihoowa siiqoy aara nu dabbotido dabbotaa shugissana danddayiya aybippenne nuna naagees. Hegaa bollikka, aggenna Yihoowa siiqoy nuuni akko shiiqanaadan oottees.—Erm. 31:3.
Ayyaanaaban Alꞌꞌobaa
w10 10/15 6-7 ¶19-20
‘Yihoowa Qofaa Eriyay Oonee?’
19 ‘Yihoowa qofaa’ xeelliyaagan nuuni ay tamaaridoo? Yihoowa qofaa akeekanaadan Geeshsha Maxaafay maaddana mala nuuni paqqadana koshshees. Nu eraa pacaadan Yihoowa xeellidi, nuuni kessiyo maaraadaaninne nu qofaadan a qofaa akeekana koshshenna. Iyyoobi, “Taani ayyo zaaruwaa immana gaanau, Xoossai ta mala asa gidenna. Gididaakko nuuni naa77ai daanna sintti aadhdhana” yaagiis. (Iyy. 9:32) Yihoowa qofaa nuuni guuttaa akeekiyo wode, Iyyoobaagaadan maalaalettidi, “Hageeti ubbai Xoossai oottido oosotuppe amaridaageeta; nuuni siyoogee saasuketta xalaala. Yaatin, a wolqqaa gitatettaa akeekanau danddayiyai oonee?” yaagoos.—Iyy. 26:14.
20 Nuuni Geeshsha Maxaafaa nabbabiyo wode akeekanau metiya issi qofaa demmikko, ubba qassi hegee Yihoowa qofaara gayttidaba gidikko, ay oottana koshshii? He qofaa xeelliyaagan pilggi simmidikka, qoncce zaaruwaa demmana xayikko, Yihoowan ammanettiyoogaa xeelliyaagan nuuni paacettiyobadan hegaa xeellana danddayoos. Issi issitoo issi qofay nuuni Yihoowa eeshshatun ammaniyoogaa bessanaadan injjiyaa medhiyoogaa hassayite. I oottiyo ubbabaa nuuni wurssi akeekennaagaa nu huuphiyaa kawushshidi ammani ekkiyaageeta gidoos. (Era. 11:5) Yaatiyo gishshau, kiitettida PHauloosi kaallidi giidobaa maayoos: “Xoossaa duretettai ai keena daroo? A hayyoinne a eratettai ai keena xoqqee? A pirddaa yootanai oonee? I ba oottiyoogaa i aissi oottiyaakko, oonee akeekiyai? Hegaa Xoossaa maxaafai, ‘Godaa wozanaa woikko qofaa eriyai oonee? A zoranau danddayiyai oonee? Woikko ba kushiyaa zaarana mala, au aibakko immidai de7ii?’ yaagees. Aissi giikko, ubbabaa i medhdhiis; qassi ubbabaikka aaninne ayyoonne de7ees; Xoossau merinau bonchchoi gido. Amin77i.”—Roo. 11:33-36.
XIQIMITA 30–HIDAARE 5
XOOSSAA QAALAN DEꞌIYA ALꞌꞌOBAA | IYYOOBA 11-12
“Aadhdhi Eratettaa Demmiyonne Appe Goꞌettiyo Heezzu Ogeta”
w09 4/15 6 ¶17
Iyyoobi Yihoowa Sunttaa Bonchiis
17 Iyyoobi ba suuretetta equwaa naagidi deꞌanau maaddiday aybee? Metoy gakkanaappe kase Yihoowaara deꞌiya dabbotaa i minttidoogee qoncce. Seexaanay Yihoowaara eqettiyoogaa Iyyoobi erees gaanau nuuyyo naqaashi deꞌennaba gidikkokka, Iyyoobi ammanettidi deꞌanau qofaa qachiis. I: “Haiqqana gakkanaassikka taani tana suure giyoogaa [“ta suuretetta equwaa naagada deꞌiyoogaa,” NW] aggikke” yaagiis. (Iyyooba 27:5) Iyyoobi ha mino dabbotaa medhidoy ayba ogiyaanee? Ayyo haaho dabbo gidida, Abrahaameera, Yisaaqaaranne Yaaqoobaara gayttidaagan Xoossay oottidobaa siyidi i hegaa xoqqu oottidi xeellidoogau siree baawa. Qassi meretaabaa qoppiyoogan Iyyoobi Yihoowa eeshshaappe daruwaa akeekana danddayees.—Iyyooba 12:7-9, 13, 16 nabbaba.
Yihooway Ubbatoo Nenaara Deꞌiyo Gishshawu, Awudenne Nerkka Gidakka
10 Ammanettida Kiristtaanetuura laggeta. Gubaaꞌiyan deꞌiya, etappe neeni tamaarana danddayiyoogeetuura laggeta. Eti neeppe bayratiyaageeta woy kaalotiyaageeta woy wogan dummatiyaageeta gidana danddayoosona. Geeshsha Maxaafay “aadhdhida eratettai cimida asatu matan” deꞌiyoogaa yootees. (Iyy. 12:12) Cimidaageeti gubaaꞌiyan deꞌiya yelagatuppekka darobaa tamaarana danddayoosona. Daawiti Yonaataanappe keehi kaalotikkonne, hegee eti issoy issuwawu mata lagge gidennaadan diggibeenna. (1 Sam. 18:1) Daawitinne Yonaataani metiyaabati deꞌishinkka Yihoowawu haggaazanawu issoy issuwaa maaddidosona. (1 Sam. 23:16-18) Ha wodiyan eta son I xallay Yihoowa Markka gidido Ayriino giyo michchiyaa hagaadan gaasu: “Gubaaꞌiyan deꞌiyaageeti ayyaanaaban nu soo asa mala woy nu ishanttunne michchonttu mala gidana danddayoosona. Eti nuuni koyiyo so asa gidanaadan Yihooway eta goꞌettana danddayees.”
11 Neeni dungguuxa gidikko, oorattatuura laggetiyoogee metiyaaba gidana danddayees. Harati O eqettishinkka tumaa siyida Raatino giyo michchiyaa hagaadan gaasu: “Gubaaꞌiyan deꞌiya ta ishanttunne michchonttu maadoy taayyo koshshidoogaa taani akeekana koshshiis.” Neessi siyettiyaabaa hara uraassi yootiyoogee deexxiyaaba gidana danddayees; shin neeni yootikko, he uri neeyyo mata lagge gidana danddayees. Ne laggeti nena minttettanawu koyoosona, shin eti waatana danddayiyaakko eranaadan neeni etawu yootana koshshees.
12 Hara Kiristtaanetuura issippe sabbakiyoogee laggeta demmana danddayiyo keehi koshshiya ogetuppe issuwaa. Ibay qommoora odettido Kaarela hagaadan gaasu: “Michchonttuura issippe haggaaziyoogaaninne Yihoowa haggaazuwan harabaa issippe oottiyoogan loꞌꞌo gidida daro laggeta demmaas. Ha laggetu baggaara Yihooway tana daro layttawu maaddiis.” Ammanettida Kiristtaanetuura laggetiyoogee nuuyyo ubbatoo loꞌꞌo. Neeni hidootaa qanxxiyo wode, leemisuwawu, boorasiyo wode nena minttettanawu Yihooway hegaa mala laggeta goꞌettees.—Lee. 17:17.
it-2 1190 ¶2
Aadhdhida Eratettaa
Xoossaa Aadhdhida Eratettaa. Aadhdhida eratettay ‘A xalaalay aadhdhida eranchcha’ geetettida Yihoowassi deꞌees. (Roo 16:27; Ajj 7:12) Eraa giyogee issi hanotaara meezetiyogaa giyogaa; shin Yihooway ubbabaa medhdhidaagaanne “merinaappe merinaa gakkanaayyookka” (Maz 90:1, 2) deꞌiyagaa gidiyo gishshawu, saloy saꞌay aybippe merettidaakko, eta giddon deꞌiyabaa, qassi aara gayttidaagan hanida ubbabaa I wurssidi erees. Asay pilgganawunne oorattabaa medhdhanawu etan ammanettiyonne eti baynnaakko aynne oottanawu danddayenna meretaa higgeti, simmi simmi haniyabatinne maarati ubbay I medhdhidobata. (Iyy 38:34-38; Maz 104:24; Lee 3:19; Erm 10:12, 13) Yihooway kessido kandduwa maarati, woppu giidi deꞌanawu, iita kehaa shaakkanawunne ufayssiya deꞌuwa deꞌanawu keehi koshshiyabata gidiyogee qoncce. (Zaa 32:4-6) Yihooway erennabi aybinne baawa. (Isi 40:13, 14) Issi issitoo, A geeshsha maaraara maayettenna hanotati guutta wodiyawu iiti iiti baanaadan I paqqadidaba gidikkokka, sinttappe hananabay A kushiyan deꞌiyo gishshawu, I ba sheniyanne ba haasayidobaa ‘poliyogee’ attennaba.—Isi 55:8-11; 46:9-11.
Ayyaanaaban Alꞌꞌobaa
w08 8/1 11 ¶5
Yelagatuura Haasayiyogaa
▪ ‘Ta naꞌai gaanawu koyidobaa loytta akeekanawu baaxetiyanaa?’ Iyyooba 12:11 hagaadan gees: “Inxxarssai qumaa shaakki eriyoogaadan, haittai haasayaa shaakkidi erenneeyye?” Ne naꞌay woy ne naꞌiya haasayiyobaa ‘shaakkada eranawu’ awudeppenne aaruwan baaxetana koshshees. Yelagati darotoo gaanawu koyidobaa qoncciyan haasayokkona. Leemisuwawu, geella ne naꞌay woy ne naꞌiya hagaadan gaana danddayoosona; “Neeni ubbatoo tana guutta naꞌadan xeellaasa!” woy “Ta giyobaa neeni mule siyakka!” “Ubbatoo” woy “mule” giya qaalaa denttidi etaara palamettiyogaappe eti gaanawu koyidobay aybakko akeekanawu malite. Leemisuwawu, “ne ubbatoo tana guutta naꞌadan xeellaasa” giyogee “ne tana ammanettennabadan tawu siyettees” giyogaa gidana danddayees; qassi “neeni mule ta haasayiyobaa siyakka” giyogee “tawu siyettiyabaa neeyyo yootana koyays” giyogaa gidana danddayees. Eti gaanawu koyidobay aybakko loytta akeekanawu baaxeta.