Kiristtaanetu Deꞌuwanne Haggaazuwa Shiiquwa Xannaꞌiyo Xuufiyan Odettida Xuufeta
© 2023 Watch Tower Bible and Tract Society of Pennsylvania
HIDAARE 6-12
XOOSSAA QAALAN DEꞌIYA ALꞌꞌOBAA | IYYOOBA 13-14
“Issi Asi Haiqqikko, Simmidi Paxanee?”
w99 10/15 3 ¶1-3
Asay Adussa Wodiya Deꞌanawu Oottiyo Baaxiya
HAGEE 3,500ppe kase xaafettidaba gidikkonne, asa deꞌoy qantta gidiyogaa qonccissiya ha qofan daro asay maayettees. Asay deꞌuwan ufayttidi alennan ceeggiyogeenne hayqqiyogee ubba wode asawu kirqqi giyaba. Hegaappe denddidaagan, deꞌuwa adussees giidi qoppiyo hiillata asay daro wodiyawu goꞌettiiddi takkiis.
Iyyooba wode deꞌida Gibxxe asati bantta yelagatettaa wodiyawu simmanawu giidi mehiya kaattaa miidosona; shin hegee mela baaxe. Daro layttaappe kase doommidi deꞌida keemisttire eranchchati baaxetido waanna gaasoy deꞌuwa adussana danddayiya xaliya koyiyogaa. Eti asi medhdhido worqqay merinawu deꞌanaadan oottees; qassi worqqa sayniyan miyogee deꞌuwa adussees giidi qoppoosona. Beni wode deꞌida Chayna Tayoysteti, wotti dentti qoppiyogaa, shemppiyogaa meezetiyogaanne, bollawu maaddiya qumaa miyogaa mala hiillati nu bollaa keemikaaliya laammanawunne merinawu deꞌanawu maaddoosona giidi qoppoosona.
Isppeenen deꞌida Juwan Ponk De Liyon giyo eranchchay yelagatettaassi kaniya demmanawu keehi koyiyogan erettees. Qassi 18ntta xeetu layttan deꞌida issi dottoree Hermipes Radayvaves geetettiya ba maxaafan, ofinttan geelaꞌoti xuntta kifiliyan takkanaadan oottidi eta shemppuwa xaaramusetun shiishshiyakko hegee bariya adussanawu maaddanaagaa yootiis. He hiillatuppe issoykka maaddibeenna.
Qanxxido Mittay Aacana Danddayii?
LIBAANOOSAN deꞌiya wolqqaama zigaara geeddarssiyo wode, wogaray keehi garamiyaaba gidennan aggana danddayees. Shin wogaraa mittay boniyan hayqqennaagee garamissiyaaba. Issi issi wogaray 1,000 laytta deꞌidabadan qofettees. Wogaraa mittaa anuwaa qanxxikkokka, xaphoy warccaccidi aaho sohuwaa gakkiyo gishshawu aacana danddayees. Xaphoy hayqqana xayikko, wogaray aacees.
Iyyoobi hayqqikkokka simmidi denddanaagaa ammanees. (Iyy. 14:13-15) Iyyoobi hayquwaappe Xoossay bana denttanaagaa ammaniyoogaa leemisuwan yootanawu goꞌettido mittay wogaraa gidennan waayi aggana. Iyyoobi, “Mittaassikka hidootai de7ees; mittai qanxxikko aacees” yaagiis. Away suullido kosha wodiyan iray bukkiyo wode, melida wogaraa durumay xaphuwaappe mokkidi ‘puutiyaadan ooratta licuwaa kessidi’ aacees.—Iyy. 14:7-9.
‘Neeni Medhdhido Tanakka Beꞌanawu Laamotaasa’
Yihooway siiqiya Xoossa gidiyogaa Iyyoobi haasayidobatuppe akeekoos: Iyyoobaara dabbotidoogaadan Yihooway banttana molanaadan A kushiyan eeno giya asatuura I mino dabbotaa medhdhees. (Isiyaasa 64:8) Awu ammanettidi goynniyageeta Yihooway xoqqu ootti xeellees. Hayqqida awu ammanettida A ashkkarata I ‘laamotees.’ Issi eranchchay, hagan gelida Ibraawetto qaalay “keehi laamotiyogaa qonccissanawu goꞌettiyo qaalatuppe issuwa gidiyogee aynne sirissenna” yaagiis. Yihooway ashkkarata hassayiyogaa xalla gidennan, eta zaaretti deꞌuwan wottanawukka laamotees.
Ayyaanaaban Alꞌꞌobaa
it-1 191
Bidinttaa
Bidinttay keehi laafabaa woy pattennabaa qonccissanawu maaddees; leemisuwawu, Abrahaami bana Yihoowa sinttan, “Taani biittanne bidintta” yaagidi qonccissiis. (Doo 18:27; Isi 44:20; Iyy 30:19ra gatta xeella.) Qassi minttettiyaba milatiya worddo asati yootidobaa Iyyoobi ‘bidinttan’ leemissiis.—Iyy 13:12.
HIDAARE 13-19
XOOSSAA QAALAN DEꞌIYA ALꞌꞌOBAA | IYYOOBA 15-17
“Harata Minttettiyo Wode Elifaazadan Hanoppite”
w05 9/15 26 ¶4-5
Bala Qofaa Eqetta!
Elifaazi heezzutoo haasayidoban Xoossay ba ashkkarati darobaa oottanaadan koyiyo gishshawu eti oottiyoban ufayttenna giis. Elifaazi Iyyoobawu, “Xoossai ba ashkkaratun ammanettenna; ba kiitanchchatunkka mooruwaa demmees” giidi yotiis. (Iyy 4:18) Qassi guyyeppe Elifaazi hagaadan giis: “Be7a, Xoossai ba kiitanchchatunkka ammanettenna; harai atto salotikka a sinttan geeshsha gidokkona.” (Iyy 15:15) Qassi I, “Neeni xillo gidikko, hegee Ubbaa Danddayiya Xoossaa ufaissii? giidi oychchiis. (Iyy 22:3) Bilddaadikka “Xoossaa sinttan aginaikka wagagga poo7o gidenna; a sinttan xoolinttetikka geeshsha gidokkona” giidi A qofan maayettiyogaa bessiis.—Iyy 25:5.
Nuunikka hegaa mala qofaappe naagettana koshshees. Naagettana xayikko, Xoossay nuuppe keehi darobaa koyees giidi qoppiyogaa doommana danddayoos. Hegee qassi nuuni Yihoowaara dabbotido keehi alꞌꞌo dabbotaa moorees. Qassi, hegaa mala qofay nunan deꞌikko, nuussi koshshiya seeray imettiyo wode siyanaagee metana danddayees. Nuussi imettiya seeraa ashkketettan ekkiyogaa aggidi, nu wozanay ‘Yihoowa bolli yiillotiyogaa’ doommananne A bolli lancciya oyqqana danddayees. (Leemiso 19:3) Qassi hegee ayyaanaaban nuna keehi qohees!
Yesuusadan Ashkkenne Qarettiyaagaa Gida
16 Qarettiyoogaa bessiya haasayaa. Nuuni haratussi qarettiyoogee ‘yayyiyaageeta [“unꞌꞌettidaageeta,” NW] minttettanaadan’ denttettees. (1 Tas. 5:14) Hegaa mala asata minttettanawu woygana danddayiyoo? Etawu wozanappe qoppiyoogaa yootana danddayoos. Eti bantta loꞌꞌo eeshshaanne gooba gidido issi issibaa akeekanaadan maaddanawu wozanappe galatana danddayoos. Yihooway eta ba Naꞌaakko ehiidoogaa eta hassayissana danddayoos; hegaa gishshawu, eti a sinttan alꞌꞌo. (Yoh. 6:44) “Wozanai me77idoogeetussi” woy ‘bantta ayyaanan liiqida’ ba ashkkaratussi Yihooway keehi qoppiyoogaa etassi yootana danddayoos. (Maz. 34:18) Nuuni qarettidi haasayiyoobay minttettoy koshshiyoogeeta pattana danddayees.—Lee. 16:24.
Ayyaanaaban Alꞌꞌobaa
Iyyooba Maxaafan Deꞌiya Kulkka Qofata
7:9, 10; 10:21; 16:22—Ha xiqiseti Iyyoobi dendduwan ammanennaagaa bessiyonaa? Ha xiqisetun deꞌiya qofay Iyyooba mata wodiyan gakkanabaa qonccissees. Yaatin I woygana koyidee? I hayqqikko he wode deꞌiya asaappe ooninne A beꞌana danddayennaagaa yootanawu koyennan aggenna. He wode deꞌiya asatu qofaadaana gidikko, I ba soo mulekka simmenna; woy Xoossay keerido wodee gakkanaashin ooninne A hassayenna. Iyyoobi ba wolqqan ooninne Siꞌooliyappe kiyana danddayenna gaanawu koyennan waayi aggana. Iyyoobi sinttappe denddanawu hidootiyogaa Iyyooba 14:13-15n deꞌiya qofay qonccissees.
HIDAARE 20-26
XOOSSAA QAALAN DEꞌIYA ALꞌꞌOBAA | IYYOOBA 18-19
“Inttenaara Yihoowawu Goynniyageeta Oli Aggoppite”
Yesuusi Afuxxidoogaappe Nuuni Ay Tamaariyoo?
9 Kayyottiyaageeta maaddana danddayaasa. Yesuusi Marttiiranne Mayraamiira yeekkiyoogaa xalla gidennan, eti yootiyoobaa siyiisinne eta minttettiis. Kayyottiyaageetussi nuuni hegaadan oottana danddayoos. Awusttiraaliyan deꞌiya Daana giyo cimay hagaadan giis: “Ta machchiyaa hayqqa simmin tawu maadoy koshshiis. Daro ishanttinne eta machchoti taani yootiyoobaa ubbatoo siyoosona. Eti taani ta azzanuwaa yootanaadan oottidosona, qassi taani yeekkiyo wode eti pokkotibookkona. Taani ta kaamiyaa meeccana, suuqiyaappe shammiyoobaa shammananne qumaa kattana danddayenna wodetun, hegaa mala oosota oottiyoogankka eti tana maaddidosona. Qassi eti tanaara darotoo woossidosona. Eti tumu lagge gidiyoogaanne ‘metuwaa wode maaddanaassi yelettida’ ishantta gidiyoogaa bessidosona.”—Lee. 17:17.
Nuuni Siiqiyo Uri Yihoowawu Haggaaziyoogaa Aggiyo Wode
16 Ammanettida so asaa ubbatoo maadda. Awudeegaappenne aaruwan haꞌꞌi etawu ne siiqoynne minttettoy koshshees. (Ibr. 10:24, 25) Bohettida uraa so asaakka bohettidabadan qoppidi gubaaꞌiyan deꞌiya amaridaageeti eta haasayissennaagaa issi issitoo eti akeekidosona. Nuuni etawu hegaadan siyettanaadan koyokko! Yelidaageeti Yihoowawu haggaaziyoogaa aggido yelagata nuuni galatananne minttettana koshshees. Azinay bohettidonne so asaa aggidi biido Mariya hagaadan gaasu: “Amarida laggeti ta soo yiidi qumaa kattidosonanne ta naata xannaꞌissiyoogan maaddidosona. Eti tanaara azzanidosonanne yeekkidosona. Asay tabaa worddobaa haasayiyo wode eti tawu exatidosona. Eti tana keehi minttettidosona!”—Roo. 12:13, 15.
w90 9/1 22 ¶20
Loꞌꞌobaa Oottanawu Amottay?
20 Gubaaꞌiya cimay woy gubaaꞌiyawu oottiyagee ba dosan ba maataa aggidaba gidikkokka, maataa aggiyogee unꞌꞌettanaadan oottiyogaa cimati akeekana koshshees. Bohettibeennaba gidikko, he ishay unꞌꞌettiyogaa cimati akeekidi siiquwan ayyaanaaban A minttettana koshshees. (1 Tasalonqqe 5:14) Gubaaꞌiyan I koshshiya asa gidiyogaa akeekanaadan eti A maaddana koshshees. Ubba awu zoree koshshiyaba gidikkokka, ashkkenne galatiya uri zaarettidi gubaaꞌiyan haggaaziyo gujo maataa demmanawu adussa wodee koshshennan aggana danddayees.
Ayyaanaaban Alꞌꞌobaa
w94 10/1 32
Keha Qaalawu Deꞌiya Wolqqaa
Iyyoobawu mintettoy koshshido wodiyan Elifaazinne minttettanawu aara yiida harati keha qaalaa haasayibookkona. Iyyooba metoy gakkidoy I moorido issi xuurabay deꞌiyo gishshataassa giidi yootidosona. (Iyy 4:8) Ze Interpireters Baybilee hagaadan gees: “Iyyoobawu koshshiyabay asay awu qarettiyogaa. Shin A gakkidabay I mule qoppibennaba, qassi A wozanay meqqanaadaaninne I yeellatanaadan oottiyabaa.” Yaaniyo gishshawu, Elifaazinne minttettanawu aara yiida harati yootido pordolla qaalaa siyidi Iyyoobi, “Intte tana aude gakkanaassi mudduuteetii? Aude gakkanaassi intte qaalan tana gaaccuuteetii?” giidi yeekkiis.—Iyy 19:2.
Nu mala Kirisstaaneti nuuni haasayiyo qaareti baynna qaalan keehi unꞌꞌettidi yeekkanaadan oottanawu mule koyokko. (Zaarettido Wogaa 24:15ra geeddarissa) Geeshsha Maxaafay hagaadan giidi zorees: “Neeni haasayidoogee nena wottees woikko worees; hegaa gishshau, neeni ne haasayaa gaasuwan yiyaabaa ekkanau de7aasa.”—Leemiso 18:21.
10 Asttamaareti bantta tamaaretussi qoppana koshshees. Eti mata wode gubaaꞌiyaa ishantta woy michchontta gidana danddayoosona. (1 Tasalonqqe 2:7, 8 nabbaba.) Alamiyan deꞌiya laggeta aggidi Yihoowawu haggaazanawu koshshiya ubbaban laamettiyoogee eta metana danddayees. Gubaaꞌiyaappe loꞌꞌo laggeta koyiyoogan nuuni eta maaddana koshshees. Geeshsha Maxaafa xannaꞌissiyo wode xalla gidennan, hara wodetunkka aara wodiyaa aattiyoogan ne xinaatiyawu lagge gida. Xannaꞌiyo gallassan gidennan, hara gallassan ne awu silkkiyaa dawaliyoogee, kiitaa yeddiyoogee woy baada oychchiyoogee xinaatiyawu neeni qoppiyoogaa bessees.
11 Hagaadan giyo leemiso haasayay deꞌees: “Issi naꞌi diccanawu issi heeran deꞌiya asa ubbaa maadoy koshshees.” Nuuni: “Erissiyo ashkkara oottanawu gubaaꞌiyaa maadoy koshshees” gaana danddayoos. Hegaa gishshawu, gooba asttamaareti tamaareti gubaaꞌiyan deꞌiya haratuura laggetanaadan maaddoosona; he laggeti xinaateti kaseegaappe aaruwan Yihoowakko shiiqanaadan maaddana danddayoosona. Xinaateti Xoossaa asaara dabbota minttiyo wode, ayyaanaabaaninne koshshiya haraban maaduwaa etappe demmana danddayoosona. Xinaateti ubbay eti gubaaꞌiyaa yame gididabadan, qassi ayyaanaaban nu so asaa gididabadan etawu siyettanaadan nuuni koyoos. Ishanttinne michchontti bessiyo siiqoy xinaateta ubbaa denttettanaadan koyoos. Hegee Yihoowaara dabbotanawu maaddenna asatuura deꞌiya laggetetta agganawu metootennaadan oottana. (Lee. 13:20) Kase laggeti A ixxiyo wode, Yihoowa dirijjitiyaappe loꞌꞌo laggeta I demmana danddayiyoogaa erana.—Mar. 10:29, 30; 1 PHe. 4:4.
HIDAARE 27–TISAASE 3
XOOSSAA QAALAN DEꞌIYA ALꞌꞌOBAA | IYYOOBA 20-21
“Xillotetta Giyoy Duretetta Gidenna”
w07 8/1 29 ¶12
Neeni ‘Xoossaa Matan Duree?’
12 Yesuusi Xoossaa matan dure gidiyogaa issi uri bawu aquwa shiishshiyogaara woy bana dureyiyogaara geeddarssiis. Yaatiyo gishshawu, nu deꞌuwan nuuni sinttayana koshshiyaabay aquwa dagayiyogaa woy nu duretettan ufayttiyogaa gidana bessennaagaa Yesuusi yootiis. Yaatiyogaappe, nuuni nuuyyo deꞌiyabata goꞌettidi Yihoowaara dabbotido nu dabbotaa minttana bessees. Hegaadan oottiyogee Xoossaa sinttan nuna dure kessana. Aybissi? Yaatiyogee nuuni appe daro anjjota demmanaadan oottiyo gishshataassa. Geeshsha Maxaafay, “GODAA anjjoi dure kessees; i he duretettan meto walakkenna” yaagees.—Leemiso 10:22.
Ayyaanaaban Alꞌꞌobaa
w95 1/1 9 ¶19
Seexaanaanne A Oosota Xooniyogaa
19 Elifaazanne Xoofaara baggaara Seexaanay bessido ‘iita aymuwa’ Xoossaa ashkkara gidida Iyyoobi eqettana koshshiyogaa akeekidoogee garamissiyaba. (Iyy 4:13-18; 20:2, 3) Iyyoobi ba qofan unꞌꞌettidonne ‘dagammido’ gishshawu ‘qoppennan haasayiis;’ hegaappe denddidaagan I daro azzaniis. (Iyy 6:2-4; 30:15, 16) Iyyoobi yotiyobaa Eelihu loytti ezggiis; qassi Yihooway aadhdhida eratettan oottiyo ubbabaa I akeekanaadan wozanappe maaddiis. Hegaadan ha wodiyankka, akeekanchcha cimati unꞌꞌettida asatu metuwa yaa gujjiyogaappe etawu qoppiyogaa bessoosona. Elihuugaadan unꞌꞌettidaageeti haasayiyobaa danddayan ezggoosona; qassi zayttedan haniya Xoossaa Qaalaa goꞌettidi eta minttettoosona. (Iyy 33:1-3, 7; Yaaq 5:13-15) Yaatiyo gishshawu, bana gakkida metuwappe denddidaagan unꞌꞌettida uri woy Iyyoobaagaadan aymuwaninne ajjuutan metootida asi Geeshsha Maxaafan deꞌiya minttettiyabaa gubaaꞌiyappe demmana danddayees.—Iyy 7:14; Yaaq 4:7.
g 5/09 12-13
Geeshsha Maxaafay Woygii?
Neeni Dure Gidanaadan Xoossay Koyii?
“Xoossay tawu gallassay kiyanaadan oottiis! Taani wolqqaama dure gidana hanays!”
“Saluwan de‵iyageeti ubbay taani dure gidanaadan koyiyo gishshawu duretanawu keehi amottays.”
“Dure gidanaadan Xoossay nuussi wolqqaa immees.”
“Taani duretidoy [Geeshsha Maxaafaa] gaasuwana.”
Ha asati yootidobay haymaanootiya kaalliya daro asay duretettaa Xoossaa anjjodan xeelliyogaa qonccissees. Issi uri Xoossaa sinttan lo‵‵oba oottikko, ha wodiyan Xoossay A dureyana qassi sinttappekka A anjjana giidi he haymaanoteti tamaarissoosona. Hegaa mala timirttee keehi aakkiis; qassi hegaabaa yootiya maxaafata daro asay shammees. Shin dure gidanaadan minttettiya hegaa mala timirttee Geeshsha Maxaafaara maayettii?
Geeshsha Maxaafay ‘ufayttiya Xoossaa’ giidi yootiyo nuna Medhdhidaagee nuuni ufayssiyanne injje de‵uwa de‵anaadan koyiyogee qoncce. (1 Ximootiyoosa 1:11; Mazamure 1:1-3) Hegaa bollikka, I bana ufayssiyageeta anjjees. (Leemiso 10:22) Shin ha wodiyan, Xoossay nuna anjjees giyogee miishshan nuna dureyees giyogee? Xoossaa halchchuwa maaran ha‵‵i nu deꞌiyo wodiya loytti akeekikko he oyshaa zaaroy qoncce gidees.
Hagee Duretiyo Wodee?
Beni wode, Xoossaa Yihooway ba ashkkaratuppe issota issota dureyidoogawu Iyyoobinne Kawuwa Solomoni loꞌꞌo leemiso. (1 Kawota 10:23; Iyyooba 42:12) Gidoppe attin, Xammaqiya Yohaannisanne Yesuus Kiristtoosa gujjin Xoossawu yayyiya hara daroti sima deꞌuwa deꞌidosona. (Marqqoosa 1:6; Luqaasa 9:58) Hegaappe ay tamaariyoo? Geeshsha Maxaafay yootiyogaadan, Xoossay ba ashkkaratussi halchchidobaara maayettiyabaa he wodiyan etawu oottees. (Eranchchaa 3:1) He maaray ha wodiyan nuussi ayba ogiyan oottii?
Geeshsha Maxaafaa hiraagay qonccissiyogaadan, nuuni ‘wodiya wurssettan’ woy ‘wurssetta gallassan’ deꞌoos. Ha wodiyan olay, harggee, koshay, biittaa qaattaynne, asaa issippetettaa xayoy awudeegaappenne aaruwan daranaagee kasetidi odettiis; 1914ppe haa simmin he hanotati kase hani erennaagaa keenaa, asaa tuggayiiddi deꞌoosona. (Maatiyoosa 24:3; 2 Ximootiyoosa 3:1-5; Luqaasa 21:10, 11; Ajjuutaa 6:3-8) Qanttan, ha alamee muukettiiddi deꞌiya markkabiya mala! Ha hanotatuura gatti xeelliyo wode, Xoossay ha wodiyan ba ashkkarata miishshan dureyidi anjjees giidi qoppiyogee bessiyabeeyye, woy nuuni nu deꞌuwan kaseyanaadan Xoossay koyiyo harabati deꞌiyonaa?
Yesuus Kiristtoosi nu de‵iyo wodiya Nohe wodiyara geeddarissiis. Yesuusi hagaadan giis: “Aissi giikko, bashshiya haattaa yuussaappe kase wode, Nohee markkabiyan gelido gallassai gakkanaashin, asai meesinne uyees; qassi, attumaasai machcheesinne maccaasai azinaa gelees. Bashsha haattai yiidi, eta ubbaa efaana gakkanaashin, eti akeekibookkona; taani, Asa Na7ai, yiyo wode, hegaa mala gidana.” (Maatiyoosa 24:37-39) Yesuusi nuuni deꞌiyo wodiya Looxe wodiyarakka geeddarissiis. Sadoomaninne Gamooran deꞌiya Looxe shooroti ‘moosona, uyoosona, shammoosona, bayzzoosona, kattaa zeroosonanne, keettaakka keexxoosona.’ Yesuusi gujjidikka hagaadan giis: “SHin Looxee Sadoomappe kiyido gallassi, Xoossai saluwaappe tamaanne eexxiya shuchchaa bukissidi, ubba asaa wurssiis. Asa Na7ai qoncciyan beettiyo gallassi hegaadan hanana.”—Luqaasa 17:28-30.
Miyogan, uyiyogan, shammiyogan, bayzziyogan, kattaa zeriyogan, keettaakka keexxiyogan bali baynnaagee qoncce. Balabay, wodee keehi eesoyiyogaa dogidi he allaalletu xallan xeelaa wottiyogaa. Hegaa gishshawu, nena hagaadan oychcha: ‘Xoossay nu qofay shaahettanaadan oottiyabaa immidi nuna anjjiyaba gidikko, I nuna maaddiyabaa oottiis gaana danddayettii?’ Mulekka danddayettenna. Yaatikko, ubba I nuna qohiyabaa oottiis gaana danddayettees. Siiqo gidida Xoossay hegaadan oottenna!—1 Ximootiyoosa 6:17; 1 Yohaannisa 4:8.
TISAASE 4-10
XOOSSAA QAALAN DEꞌIYA ALꞌꞌOBAA | IYYOOBA 22-24
“Asi Xoossaa Go77anau Danddayii?”
w05 9/15 27 ¶1-3
Bala Qofaa Eqettiyogaa!
Xoossay asaappe darobaa naagees giya qofay, asay Xoossaassi aybanne goꞌꞌenna giya qofaara issi mala. Elifaazi ba heezzantto haasayan hagaadan oychchiis: “Asi Xoossaa go77anau danddayii? Harai atto aadhdhida eranchcha gidiyaakkokka, i bana go77anaappe attin, Xoossaa go77enna.” (Iyy 22:2) Elifaazi asay Xoossawu aynne goꞌꞌenna gaana koyiis. Hegaadankka, Belddaadi, “Yaatin, asi Xoossaa sinttan waani xillo gidanau danddayii? Maccaasappe yelettida asi waani . . . geeshsha gidanau danddayii?” giidi palamettiis. (Iyy 25:4) He haasaya maaran, hayqqiya asa gidida Iyyoobi Xoossaa sinttan bawu suuretettay deꞌana giidi waati qoppana danddayii?
Ha wodiyan issi issi asati banttabaa iitabaa qoppiyogan unꞌꞌettoosona. Hegaadan oottiyabatuppe amaridaageeti, eti diccido hanotaa, deꞌuwan gakkiya metuwanne eta zariya woy qommuwa gaasuwan gakkiya ixuwa gidana danddayees. Shin Seexaanaynne A daydanttati issi uraa hidootaa qanxxissiyogan ufayttoosona. Issi uri ta ay oottikkokka Ubbaa Danddayiya Xoossaa ufayssana danddayikke giidi qoppanaadan eti oottikko, he uri hidootaa qanxxanaagee qoncce. Guyyeppe hegaa mala uri Xoossaappe haakkana, ubba awu goynniyogaa agganakka danddayees.—Ibr 2:1; 3:12.
Ceegatettaynne harggee nu abbee laafanaadan oottana danddayees. Nuuni yelaga, payyanne mino gidido wodeegaara geeddarssiyode, Kawotettaa Mishiraachchuwa yootiyogan haꞌꞌi nu oottiyobay keehi guutta milatana danddayees. Gidoppe attin, nuuni Xoossawu oottiyobay laafa giidi nu qoppanaadan Seexaanaynne A daydanttati koyiyogaa eriyogee keehi koshshiyaba! Hegaa mala qofaa nuuni eqettana koshshees.
w95 2/15 27 ¶6
Metuwa Waati Genccana Danddayiyakko Qonccissiya Timirttiya
Iyyooba heezzu laggeti Xoossaa aadhdhida eratettaa aggidi bantta qofaa yootiyogan A hidootaa qanxxissidosona. Elifaazi “Xoossai ba ashkkaratun ammanettenna” giidi yootiyogan, Iyyoobi xillo gidin aggin hegee Xoossawu aybanne gidenna giis. (Iyy 4:18; 22:2, 3) Hegaappe aaruwan hidootaa qanxxissiya woy worddo gidida haasayi deꞌana giidi qoppiyogee waayissiyaba! Eti hegaadan toochchido gishshawu Yihooway Elifaazanne A laggeta seeridoogee aynne malaalissenna. Yihooway, “Intte tabaa likke haasayibeekketa” giis. (Iyy 42:7) Shin keehi qohiyabay eti hegaappe simmidi haasayidobaa.
Yihoowa Wozanaa Ufayssiya Yelagata
10 Geeshsha Maxaafay yootiyogaadan, Iyyooba xalla gidennan, nena gujjin, Xoossawu ammanettidi haggaaziya asa ubbaa Seexanay mootiis. Seexaanay hagaadan giis: “Asi [Iyyooba xalla gidennan ay asinne] ba shemppuwaa gishshau, bau de7iyaabaa ubbaa immana.” (Iyyooba 2:4) He allaallee nenakka xeelliyogaa akeekadii? Leemiso 27:11 qonccissiyogaadan, Yihooway bana cayiya Seexaanawu zaaruwa immana mala neeni oottana danddayiyobay deꞌiyogaa yootiis. Ane qoppa; Ubbaa Danddayiya Xoossay hanno gakkanawu Seexaanay denttido mooto ubbaappe aadhdhiya ha allaalliya xeelliyagan neenikka issibaa oottanaadan shoobbiis. Hegee neeyyo keehi gita maata! Yihooway neeppe koyiyobaa polana danddayay? Iyyoobi poliis. (Iyyooba 2:9, 10) Yesuusanne daro yelagata gujjin Xoossawu ammanettidi oottiya hara daro asatikka polidosona. (Piliphphisiyuusa 2:8; Ajjuutaa 6:9) Neenikka polana danddayaasa. He allaalliya xeelliyagan oossinne exatennan aggana danddayettees gaada qoppoppa. Neeni deꞌiyo deꞌuwan cayiya Seexaanawu woy Yihoowawu exatiyogaa bessaasa. Yaatin neeni ooyyo exatuutee?
Yihooway Neessi Qoppees!
11 Neeni dooriyobay Yihoowa qofissii? Yihooway Seexaanawu aliya zaaruwa immanawu hanno gakkanawu ammenettidi haggaazida asatuugee gidennee? Siiqoy denttettin Yihoowawu haggaaziya asi baawa giidi Daabiloosi mootido mootoy worddo gidiyogee qoncce. Gidikkonne, Yihooway buzo xekkan neessi qoppiyo gishshawu, ubbabaa haariyo maataara gayttida mootuwan, neeni awu exatanaadan koyees. Yesuusi hagaadan giis: “Saluwan de7iya intte Aawai ha guuttatuppe issoi bayyanaagaakka koyenna.”—Maatiyoosa 18:14.
12 Neeni dooriyobay Yihoowa qofissiyogee qoncce. Hegaappekka aaruwan, neeni dooriyobay A maaddana woy qohana danddayees. Asay oottiyo loꞌꞌobay woy iitabay Yihoowa ufayssana woy azzanttana danddayiyogaa Geeshsha Maxaafay yootees. Leemisuwawu, Israaꞌeelati zaari zaaridi makkalido wode Yihoowa “hanqqetissidosona.” (Mazamure 78:40, 41) Nohe wode bashshaappe kase, ‘asaa iitatettay daridoogaa’ Yihooway beꞌidi “ba wozanan keehippe seelettiis.” (Doomettaabaa 6:5, 6) Hegee woygiyogaakko qoppa. Neeni iitabaa oottanawu doorikko, nena Medhdhidaagee azzananaadan oottaasa. Hegee Xoossay shugo woy elle hanqqettees giyogaa gidenna. Shin I nena siiqeesinne neessi qoppees. Hara baggaara qassi, neeni suurebaa oottiyo wode Yihoowa wozanay ufayttees. I ufayttiyoy Seexanaa motuwawu zaaruwa immana danddayiyo gishsha xalla gidennan, nenakka woytana danddayiyo gishshataassa. I hegaadan oottanawu koyees. (Ibraawe 11:6) Xoossaa Yihooway ayba siiqiya Aawee!
Ayyaanaaban Alꞌꞌobaa
Nena Medhdhidaagaa Bonchchanawu Ayyaanaabaa Halchchota Kessa
Yihooway saluwanne saꞌaa medhdhiyogaa waati polidaakko akeeka. “Qammiisinne wonttiis” giya qaalati Yihooway meretata medhdhanawu kaalli kaalli deꞌiya wodeta goꞌettanawu kuuyidoogaa bossoosona. (Doomettaabaa 1:5, 8, 13, 19, 23, 31) Yihooway bazzido issi issi gallassan koyro I oottanawu halchchido qonccebay deꞌees. Qassi Xoossay medhdhanawu halchchidobata loyttidi poliis. (Ajjuutaa 4:11) Iyyoobi Yihoowabaa hagaadan giis: “Ba koyidobaa i oottennaadan a teqqana asi baawa.” (Iyyooba 23:13) Yihooway ‘ba medhdhido ubbabaa’ xeellidi hegee ‘daro loꞌꞌo gididoogaa’ yootido wode ayba ufayttideeshsha!—Doomettaabaa 1:31.
Nuunikka kessiyo halchchota polanawu wozanappe koyana bessees. Hegaa mala koshshay nuussi deꞌanaadan aybi maaddanee? Saꞌay giigichchibeennanne mela gidido wodekka Yihooway wurssetta ayfiya qoppidi ayyo bonchchuwanne sabaa demissana loꞌiyaba gidanaagaa akeekiis. Hegaadankka, nu halchchuwa poliyogee demissiyo goꞌꞌaanne wurssetta ayfiya wotti dentti qoppiyogee nuussi halchchuwa poliyo koshshay deꞌanaadan maaddana danddayees. Ayyo layttay 19 gidido Tooni oottidobay hegaa bessees. I Arggo Awurooppan deꞌiya Yihoowa Markkatu macara biiruwa koyro xomoosido wode bawu siyettidabaa mule dogibeenna. He wodeppe doommidi “Hagaa mala sohuwan deꞌiyakkonne oottiyakko deꞌoy ay mala gidaneeshsha?” giya oyshay ubbatoo A guuggiyan simerettees. Tooni hegaa qoppiyogaanne hegawu gakkanawu baaxetiyogaa mule aggibeenna. Daro layttappe guyiyan, macara biiruwan haggazanawu I oychchidoogee paqqadettin Tooni waani ufayttideeshsha!
17 Yesuusi I yootiyoobaa issoti issoti siyanawu koyana xayikkonne aggennan sabbakiis. Aybissi? Asay tumaa siyana koshshiyoogaa I erees; qassi I bawu danddayettida ubban daro asaa maaddanawu koyiis. Issi issi asay koyro heeran siyana xayikkonne guyyeppe siyanaagaa I erees. Eta son hanidabaa qoppa. Yesuusi heezzu layttanne baggaa haggaazido wode, A ishanttuppe ooninne I erissiyo ashkkara gidibeenna. (Yoh. 7:5) SHin, I hayquwaappe denddi simmin, eti Kiristtaane gididosona.—Oos. 1:14.
18 Yihoowa ashkkara gidanay oonakko nuuni erokko. Issoti issoti tumaa tamaaranawu haratuugaappe daro wodiyaa ekkana danddayoosona. Ubba qassi nuuni yootiyoobaa siyanawu koyennaageeti nu loꞌꞌo eeshshaanne nuuni aggennan sabbakiyoogaa akeekoosona; qassi eti wurssettan ‘Xoossaa bonchchana’ danddayoosona.—1 PHe. 2:12.
19 Nuuni sabbakiyaabanne tamaarissiyaaba gidikkonne, dichchiyay Xoossaa gidiyoogaa hassayana bessees. (1 Qoronttoosa 3:6, 7 nabbaba.) Nu biittan Toophphiyan haggaaziya Getahuna giyo ishay hagaadan giis: “Laatamaappe dariya layttawu, ta deꞌiyo heeran Yihoowa Markki ta xalaala. SHin haꞌꞌi ta deꞌiyo heeran 14 aassiyaageeti deꞌoosona. Ta keettaayiyoonne ta heezzu naata gujjin, tammanne heezzati xammaqettidosona. SHiiquwaa shiiqiya asay amakaayiyan 32.” Wozanaa suure gidida asati Yihoowayyo goynniyaageeta gidanaadan maaddanawu aggennan sabbakiiddi danddayan naagidoogan Getahuni ufayttees!—Yoh. 6:44.
20 Yihooway ubba asaa xoqqu oottidi xeellees. Ha alamee xayanaappe kase qommo ubbaappe asaa shiishshiyo oosuwaa ba Naꞌaara oottanaadan nuussi maataa immiis. (Hag. 2:7) Sabbakiyo oosoy shemppo ashshiyo oosuwan leemisettana danddayees. Maadiniya bookkidi kessiyo sohoy woddin kiyiyoosay xayido asaa kessanawu biya citan deꞌiyaageetuura nuuni leemisettana danddayoos. Bookkiyaageetuppe paxa deꞌiyaageeti amaridaageetu xalla gidikkonne, shemppuwaa ashshiyaageeti oottiyo oosoy xoqqu ootti xeelliyo ooso. Nuuni haggaaziyo haggaazoykka hegaa mala. Seexaanaa alamiyaappe paxa ay keena asay attanaakko nuuni erokko. SHin etappe amaridaageeta maaddanaadan Yihooway nuna goꞌettana danddayees. Boliviyan deꞌiya Andresa giyo ishay hagaadan giis, “Issi ura maaddanawu daroti issippe oottido gishshawu, I tumaa tamaaridi xammaqettiyoogaa erays.” Nuunikka haggaazuwaa xeelliyaagan hegaadan ubbatoo loꞌꞌobaa qoppiyaageeta gidoos. Nuuni yaatikko, Yihooway nuna anjjana; qassi sabbakiyo oosuwan nuuni loytti ufayttana.
TISAASE 11-17
XOOSSAA QAALAN DEꞌIYA ALꞌꞌOBAA | IYYOOBA 25-27
“Suuretettay Polo Gidiyogaa Oychchenna”
it-1 1210 ¶4
Suuretettaa
Iyyooba. Yooseefa hayquwappe biidi Muuse wodiya gakkanawu deꞌiya wodiyan deꞌennan aggenna giidi qoppiyo Iyyoobi, “boree bainnanne suure asa; Xoossaassi yayyidi, iitabaappekka haakkida asa” geetettiis. (Iyyooba 1:1.) Asaa naati ammanettidi deꞌiyogee Seexaanay Yihoowa bolli denttido mootuwa macara gidiyogaa, Seexaanay saluwa shilootan kiitanchchatuura shiiqido wode Xoossay A Iyyoobabaa oychchido oyshaappe akeekanawu danddayettees. Seexaanay Iyyoobi Yihoowawu goynniyo goynuwabaa wordduwa yootiis, I Iyyoobi tumuppe Xoossawu aqidi gidennan ba goꞌꞌawu goynnees giis. Yaatiyogan Iyyoobi Xoossawu ammanettidi deꞌiyo duussaa bolli siree aqanaadan oottiis. Iyyoobawu deꞌiya daro aquwanne naata xayssanaadan Seexaanaassi paqqadettiyaba gidikkokka, Iyyoobi ammanettennaadan oottanawu danddayibeenna. (Iyyooba 1:6–2:3) Yaatin Seexaanay, Iyyoobi uuze asa gidiyo gishshawu aqoynne naati xayiyaba gidikkokka I payya deꞌiyo gishshawu genccees giis. (Iyyooba 2:4, 5) Hegaappe simmin, Iyyoobi bollaa mirggiya iita masunttan shocettiis, A machchiya A toochchaasu, qassi Yihoowa maaraanne halchchuwa akeekenna A laggeti A boridosonanne cayidosona, (Iyyooba 2:6-13; 22:1, 5-11) shin Iyyoobi Xoossawu ammanettidi deꞌiyogaa aggibeenna. “Haiqqana gakkanaassikka taani tana suure giyoogaa aggikke. Ta xillotettaa mintta oiqqanaappe attin, xillotettaa aggikke; taani de7ido laitta ubban ta wozanai kahai tana walassenna.” (Iyyooba 27:5, 6) I ba suuretettaa naagidi deꞌiyogan, Xoossaa morkkee worddanchcha gidiyogaa qonccissiis.
Intte Suuretettaa Naagite!
3 Xoossaa ashkkarati suuretettaa waatidi bessiyoonaa? Nuuni aggennan Yihoowa wozanappe siiqiyoogaappe denddidaagan, muletoo A ufayssiyaabaa oottiyoogaana. Geeshsha Maxaafay suuretettaa giya qaalaa waati goꞌettiyaakko ane pilggoos. Geeshsha Maxaafan “suuretettaa” geetettidi birshshettida Ibraysxxe qaalay kumetta woy polo giyoogaa. Leemisuwawu, Israaꞌeelati Yihoowassi mehiyaa yarshshoosona; qassi Higgee he mehee tilla bollaara deꞌiyaagaa gidana bessiyoogaa yootees. (Wog. 22:21,22) Xoossaa asay ha Higgiyaa naagennan aggidi wobbiyaa, qooqiyaa, tulliyaanne hargganchcha mehiyaa yarshshana koshshenna. Qassi Yihoowassi tilla bollaara deꞌiya woy payya mehiyaa yarshshiyoogee keehi koshshiyaaba. (Mil. 1:6-9) Yihooway tilla bollaara deꞌiyaagaa woy payyaa koyiyoy aybissakko nuuni akeekana danddayoos. Nuuni ataakilttiyaa, maxaafaa, woy hara miishshaa shammiyo wode, moorettidabaa woy paccidabi deꞌiyoobaa shammanawu koyokko. Kumettaa woy payyaa shammanawu koyoos. Yihooway nuuni A kumetta wozanaappe siiqanaadaaninne ayyo polo ammanettanaadan koyees. Hegee kumetta woy polo gidana bessees.
4 Suure gididi deꞌanawu nuuni wottiyoobi baynnaageeta gidana bessees giidi qoppana koshshii? Nuuni darobaa mooroos giidi qoppana danddayoos. Suure gididi deꞌanawu nuuni wottiyoobi baynnaageeta gidana koshshees giidi qoppana bessenna naaꞌꞌu gaasota ane pilggoos. Koyroy, Yihooway nu mooruwaa tishshi ootti xeellenna. A Qaalay hagaadan gees: “Abeet GODAU, neeni nu nagaraa mazggafan xaafidaakko, abeet Godau, woni ooni pirddaappe attanau danddayii?” (Maz. 130:3) I nuuni nagaranchcha gidiyoogaa eriyo gishshawu kehatettan nuuyyo atto gees. (Maz. 86:5) Naaꞌꞌanttoy, Yihooway nu wolqqaa pacaa eriyo gishshawu nuuni danddayennabaa oottanaadan koyenna. (Mazamure 103:12-14 nabbaba.) Nuuni Yihoowa sinttan kumetta gidana danddayiyoy ayba ogiyaanee?
5 Yihoowa ashkkarati suure gidana mala siiqoy keehi koshshees. Nuuni Xoossaa, saluwan deꞌiya nu Aawaa siiqiyo siiqoynne assi ammanettiyoogee kumetta gidana bessees. Nuna paacee gakkiyo wodekka nu siiqoy ubbatoo hegaa mala gidikko, nuuni suure gididi deꞌoos. (1 Odi. 28:9; Maa. 22:37) Doomettan beꞌido heezzu Yihoowa Markkati oottidobaa zaarettidi pilggoos. Eti hegaadan oottidoy aybissee? Yelaga naꞌiyaa tamaare keettan haratuura ufayttiyoogaa ixxay, woy yelaga ishay sooppe soo biyo wode yayyana koyii, woy qassi ba soo asawu koshshiyaabaa kunttanawu minni oottiya bitanee ba oosuwaappe yedetettanawu koyii? CHii. Gidikkokka, Yihooway kessido geeshsha maaraa tishshi ootti akeekidi xeelliyoogee saluwan deꞌiya bantta Aawaa ufayssiyoogaa eti eroosona. Eti A siiqiyo gishshawu issibaa kuuyanaappe kase ubbatoo abaa qoppoosona. Yaatiyoogan eti suure gididi deꞌiyoogaa bessoosona.
Ayyaanaaban Alꞌꞌobaa
Xoossaa Maxaafay Yootiyoogaadan Darajjayettiis
3 Xoossay darajjayiyoogan laggetiyaabi baynnaagaa gidiyoogaa merettidabay qonccissees. Yihooway “ba aadhdhida eratettan sa7aa medhdhiis; ba akeekankka salota” minttidoogaa Geeshsha Maxaafay yootees. (Lee. 3:19) ‘Xoossay oottido oosotuppe amaridaagaa’ xallaa nuuni eroos; qassi ‘nuuni siyidoogee saasuketta xalaala.’ (Iyy. 26:14) SHin nuuni pilaanetetubaa, xoolinttetubaanne galakisetubaa eriyo guuttabay he saluwaa meretati maalaalissiya ogiyan darajjayettidoogaa ammananaadan denttettees. (Maz. 8:3, 4) Saluwan maaran mankkan yuuyiya miilooniyan qoodettiya xoolintteti galakisetun deꞌoosona. Pilaaneeteti tirafike higgiyaa naagiyaabadan awa ayfiyaa yuushuwan bantta ogiyaappe kiyennan yuuyoosona. Saluwan deꞌiyaabay keehi maalaalissiya ogiyan giigidoogee nuuni salotanne saꞌaa ‘aadhida eran medhida’ Yihoowa sabbana, awu ammanettananne goynnana bessiyoogaa akeekanaadan maaddees.—Maz. 136:1, 5-9.
TISAASE 18-24
XOOSSAA QAALAN DEꞌIYA ALꞌꞌOBAA | IYYOOBA 28-29
“Neessi Iyyoobaagaa Mala Loꞌꞌo Sunttay Deꞌii?”
w02 5/15 22 ¶19
Maadoy Koshshiyogeetussi Siiquwan Kehatettaa Bessa
19 Nuuni tobbido Geeshsha Maxaafaa taariketi, banttawu koshshiyabaa kunttanawu danddayennaageeta maaddanawu siiquwan kehatettaa bessana koshshiyogaa qonccissoosona. Abrahaama zaree xayenna mala Baatu7eela maadoy awu koshshiis. Yaaqooba anhaa Kanaane efiidi mooganawu Yooseefa maadoy koshshiis. Qassi Naaꞌooma laattiya naꞌa demmanawu Uruuti maadoy koshshiis. Abrahaami, Yaaqoobinne Naaꞌooma haratu maadoy baynnan banttarkka banttawu koshshidabata demmana danddayokkona. Hegaadankka ha wodiyan, maadoy koshshiyogeetussi siiquwan kehatettaa bessana koshshees. (Leemiso 19:17) Nuuni, ‘maaduwaassi waassiya hiyyeesatanne aaway aayyiyaa xayin, maaddiyaabi baynnaageetanne’ ‘hayqqana haniya’ asa ashshida Iyyooba leemisuwa kaallana koshshees. Hegaa bollikka, Iyyoobi amꞌꞌeti ‘ufayssan’ poocammanaadan oottiis; qassi ‘qooqetuyyo ayfe wobbetuyyo toho gidiis.’—Iyyooba 29:12-15.
it-1 655 ¶10
Maayuwa
Maayoy leemiso hanotan qonccissiyoba yootiya hara daro xuufeti deꞌoosona. Yuuniformmee woy issi dirijjitiya oosanchchati woykko issibaa kaafiyageeti maayiyo maayoy eta oonatettaa qonccissees; hegaadan, Geeshsha Maxaafankka maayoy leemiso hanotan asa oonatettaa qonccissiyogee odettiis. Qassi, Yesuusi leemisuwan bullachchaa maayuwabaa yootidoogaadan, issi urawu deꞌiya equwanne A oosuwa he uray maayiyo maayoy qonccissees. (Maa 22:11, 12) Ajjuutaa 16:14, 15n qonccidaagaadan, issi uri ayyaanaaban xiskkidi, I tumu Xoossawu ammanettidi goynniyagaa gidiyogaa bessiya malaataa xayssennaadan naagettana bessiyogaa Godaa Yesuus Kiristtoosi minttidi yootiis. Hegee ‘Ubbaappe Wolqqaama Xoossaa gita gallassay’ keehi matiyo wode keehi wayissiyaba gidana danddayees.
Sunttawu Ayba Birshshettay Deꞌii?
Nuuni yelettiyo wode nuussi imettiya sunttaa dooriyay nuna gidokko. Shin, nuussi loꞌꞌo sunttay deꞌanaadan oottiyay nunappe attin harata gidokkona. (Leemiso 20:11) Nena hagaadan oychchana danddayaasa: ‘Yesuusi woy I kiittidoogeeti injjiya demmiyakko tawu ayba sunttaa dooranee? Ta oonatettaa woy ta eeshshaa qonccissiyagee ay mala sunttee?’
Nuuni ha oyshata loytti qoppana koshshees. Aybissi? “Lo77o sunttai daro duretettaappe aadhdhees,” giidi eranchcha Kawoy Solomoni xaafido gishshataassa. (Leemiso 22:1) Nuuni deꞌiyo heeran nuussi loꞌꞌo sunttay woy hayttay deꞌikko nuussi daro duretettay deꞌees gaana danddayettees. Hegaappekka aaruwan keehi koshshiyabay, Xoossaa sinttan nuuyyo loꞌꞌo sunttay deꞌikko, hegee nuussi merinaa duretettaa demissees. Waatidi? Xoossay bana yayyiyageetu sunttaa ‘hassayissiya maxaafan’ xaafanawunne etawu merinaa deꞌuwa immanawu qaalaa geliis.—Milkkiyaasa 3:16; Ajjuutaa 3:5; 20:12-15.
Ayyaanaaban Alꞌꞌobaa
g00 7/8 11 ¶3
Noocu Giyogee Daro Goꞌꞌaa Demissees!
Noocu giyogee tumuppe maaddii? Issi uri noocu giyo wode neeni ufayttido wodiya hassayikkii? Woykko issi uri noocu geennaagee neeni unꞌꞌettanaadan woy he uri nena koyennabadan ne qoppanaadan ootti erii? Ee, noocu giyogee keehi maaddees. Noocu giyogee he uraakka haratakka goꞌꞌees. Iyyoobi ba morkketa xeelliyagan hagaadan giidoogaa Geeshsha Maxaafay yootees: ‘Taani noocu gin eti ammananawu metootidosona; taani ta somꞌꞌuwa pashkkissidoogee eta minttettiis.’ (Iyyooba 29:24, NW) Iyyoobi ba ‘somuꞌꞌuwa pashkkissidogee’ I ufayttidoogaa malaatana danddayees.
TISAASE 25-31
XOOSSAA QAALAN DEꞌIYA ALꞌꞌOBAA | IYYOOBA 30-31
“Iyyoobi Kandduwa Geeshshatettaa Waati Naagidee?”
Pattennabaa Xeellenna Mala Intte Ayfiyaa Teqqite!
8 Ayfiyan xeellidi qaaqqatiyoobaynne ashuwaa amoy tumu Kiristtaanetakka qohana danddayees. Hegaa gishshau, nuuni xeellidi amottiyoobaara gayttidaagan nu huuphiyaa seeranaadan Xoossaa Qaalay minttettees. (1 Qor. 9:25, 27; 1 Yohaannisa 2:15-17 nabbaba.) Xillo asa gidida Iyyoobi xeelliyoogeenne amottiyoogee keehippe gayttidaba gidiyoogaa akeekiis. “Maccaasa xeellada amottennaadan, taani ta aifiyaara maachchaa maacettaas” yaagiis. (Iyy. 31:1) Iyyoobi maccaasaa bessenna ogiyan kushiyan bochiyoogaappe haakkiyoogaa xalla gidennan, hegaa malabaa qoppanaukka koyibeenna. Yesuusi: “Maccaaro xeellidi amottiya ubbai, ba wozana giddon he wode iira shaaramuxiis” giido wode, kandduwaara gayttidaban qofay geeshsha gidana bessiyoogaa qonccissiis.—Maa. 5:28.
w08 9/1 11 ¶4
‘Wurssettan Gakkanabaa’ Yuushsha Qoppa
Issi ogiyara baanaappe kase ‘ha ogee tana awa efii?’ gaada nena oychcha. ‘Wurssettan gakkanabaa’ neeni takki gaada qoppiyogee iitabaappe nena naagana danddayees. Xoossaa higgetussi azazettennaageeta, Eedisee, mattumaa gaytettan aadhdhiya hara harggeti oyqqana, qoppennan shahaarana, shahaaraa kesissana, eta so asaa deꞌoy laalettananne eta kahay qumꞌꞌana danddayees. Pokkobaa oottiyageeta wurssettan gakkanabaa kiitettida Phawuloosi qunxxissidi yootiis. Eti “Xoossaa kawotettaa laattokkona.”—1 Qoronttoosa 6:9, 10.
Yelagatoo—Xoossaa Qaalaa Kaaletuwaa Kaallite
15 Xoossau ammanettidaageeta gidiyoogaara gayttidaagan intte keehi paacettiyoy hara asaara deꞌiyo wodeeyye woy intterkka deꞌiyo wodee? Intte timirtte keettan woy ooso sohuwan deꞌiyo wode, ayyaanaaban qohettennaadan naagettennan aggekketa. Ayyaanaaban daafan gelissana danddayiyaabau intte akeekancha. Intte kandduwan keehippe qohettana danddayiyoy kaseegaadan naagettenna, allaxxiyo wodiyaana.
16 Intte intterkka deꞌiyo wodekka Yihoowau azazettanau koyana bessiyoy aybissee? Hagaa hassayite: Intte Yihooway seelettanaadan woy a wozanay ufayttanaadan oottana danddayeeta. (Doo. 6:5, 6; Lee. 27:11) Yihooway, “intteyyo qoppiyo gishshau,” intte oottiyoobay a ufayssees woy azzanttees. (1 Phe. 5:7) I yootiyoobaa siyidi, intte goꞌettanaadan koyees. (Isi. 48:17, 18) Beni Israaꞌeelen Yihoowa ashkkaratuppe issoti issoti Yihoowa zoriyaa ixxidoogee a azzanttiis. (Maz. 78:40, 41) Hegaappe dumma ogiyan, Yihooway hananabaa yootiya Daaneela wozanappe siiqido gishshau, issi kiitanchay a ‘Xoossay keehi siiqidoogoo’ yaagidi xeesiis. (Dane. 10:11) Aybissi? Daaneeli asaa sintta xallan gidennan, barkka deꞌiyo wodekka Yihoowau ammanettidi deꞌiis.—Daaneela 6:10 nabbaba.
Ayyaanaaban Alꞌꞌobaa
w05 11/15 11 ¶3
Siiqiyogaa Bessiya Ogiyan Ezgga
Iyyoobi haasayido tammaa gidiya haasayata A laggeti siyidaba gidikkonne, I “Taani haasayiyoogaa siyiyaabi de7eerenneeshsha” giidi haasayidoy Aybissee? (Iyyooba 31:35) Eti A minttettiya ogiyan ezggibeenna gishshataassa. Eti Iyyoobawu qarettibookkonanne awu siyettiyabaa akeekanawu koyibookkona. Eti wozanappe ezggiyageeti oottiyobaa oottibookkona. Shin kiitettida Pheexiroosi hagaadan giidi zoriis: “Ubbai issi qofan de7ite. Issoi issuwau qarettidi, ishanttudan siiqettite; qassi issoi issuwau kehiyaageetanne intte huuphiyaa kaushshiyaageeta gidite.” (1 Pheexiroosa 3:8) Issoy issuwawu qoppiyogaa waati bessana danddayiyoo? Issi ogee haratuyyo qarettiyogaanne etawu siyettiyabaa akeekanawu baaxetiyogaa. Etawu qarettiyogaa bessanawu hagaadan gaana danddayoos: “taassa keehi azzanttees” woy “harati nebaa bala ogiyan akeekidonaashsha?” Hara ogee qassi, he uri yootidobaa akeekidoogaa bessiya ogiyan nu wozanaappe awu yootana danddayoos. Siiqiyogaa bessiya ogiyan ezggiyogaa giyogee issi uri yootiyobaa ezggiyogaa xalla gidennan, awu siyettiyabaakka akeekiyogaa giyogaa.