Kiristtaanetu Deꞌuwanne Haggaazuwa Shiiquwa Xannaꞌiyo Xuufiyan Odettida Xuufeta

© 2024 Watch Tower Bible and Tract Society of Pennsylvania

UDDUFUNE 6-12

XOOSSAA QAALAN DEꞌIYA ALꞌꞌOBAA MAZAMURE 36-37

“Iitaa Oottiyaageetu Gishshau Yiillotoppa”

w17.04 10 ¶4

Xoossaa Kawotettay Yiyo Wode Aybi Xayanee?

⁴ Iita asay ha wodiyan nuna waatidi qohii? Ha wodee ‘wayssiya wode’ gidanaagaa kaseti odi simmidi, kiitettida PHawuloosi, ‘Iita asatinne balettiyaageeti kaseppe iiti iiti baanaagaa’ yootiis. (2 Xim. 3:1-5, 13) He hiraagay polettishin beꞌabeykkii? Wolqqan gamiya asata, nu zariyaa coo ixxiyaageeta, danobaa oottiyaageeta gujjin, iita asati nuuppe darota qohidosona. Hegeetuppe amaridaageeti qoncciyan iitabaa oottiyaageeta; harati qassi coo geeshsha milatidi iita oosuwaa oottiyaageeta. Hegaa mala iita asati nuna qohanawu qoppennan aggana danddayoosona; shin eti oottiyoobay nunakka qohiyaaba. Eti oottiyo daganttiyaabaa eriyo wode, nu wozanay azzanees. Iitati naata, cima asatanne miyyee baynna harata gamiyoogee nuna daganttees. Iita asati asadan gidennan doꞌadaaninne dayddanttatudan hanoosona. (Yaaq. 3:15) SHin Yihoowa Qaalay mishiraachuwan hegaa mala iita oduwaa eqettees.

w22.06 10 ¶10

Atto Giyaageeta Yihooway Anjjees

¹⁰ Uluwan lancciyaa oyqqiyoogee qohees. Lanccee deexo tooho mala gidiyo gishshawu, nuuni uluwan lancciyaa oyqqiyoogaa aggidi sarotettan deꞌanaadan Yihooway koyees. (Efisoona 4:31, 32 nabbaba.) ‘Hanqquwaa agganaadaaninne yiilluwaappe teqettanaadan’ I nuna zorees. (Maz. 37:8) Nuuni he zoriyaa kaallikko hegee nuna maaddana. Nuuni issi uraa bolli uluwan lancciyaa oyqqiyo wode, hegee nuna asatettaaninne qofan qohana danddayees. (Lee. 14:30) Nuuni marzziyaa uyikko hegee hara uraa qohennaagaadan, nuuni he uraa bolli uluwan lancciyaa oyqqikko hegee A qohenna. SHin, nuuni haratuyyo atto giyo wode, nuuyyo imotaa immoos. (Lee. 11:17) Nuuni sarotettaa demmoosinne aggennan Yihoowawu haggaazoos.

w17.04 10-11 ¶5, 6

“Yihoowan Ufayttite”

⁵ Yihooway ay oottanee? Yihooway ha wodiyankka iitati laamettana danddayiyo ogiyaa dooyiis. (Isi. 55:7) Eti huuphiyan huuphiyan biron pirddaa ekkiichibookkona. Pirddettiday ha alamiyaa. Gidoppe attin, laamettennan ixxidi, iita waayiyaa wodee gakkanaashin ha alamiyaa exa gidiyaageeti shin? Yihooway iitata ha saꞌaappe merinawu xayssanawu qaalaa geliis. (Mazamure 37:10 nabbaba.) Iitati ha pirdday banttana bochennabadan qoppana danddayoosona. Daroti bantta oottidobaa genttiyoogaa tamaaridosona; qassi ha alamiyan eti darotoo pirddappenne bantta oosuwaa daafaappe attiyaabaa milatoosona. (Iyy. 21:7, 9) Gidikkonne, Geeshsha Maxaafay hagaadan gees: “Xoossai asaa hemetaa xeellees; a tanggo ubbaakka wochchees. Iitaa oottiyaageeta Xoossaappe genttanau danddayiya sakkana xumi baawa.” (Iyy. 34:21, 22) Xoossaa Yihoowappe qosettana danddayettenna. A cimmana danddayiya asi baawa; laggetiyaabi baynna Xoossaa ayfee issibaa beꞌennaadan genttana danddayiya xuma shaari baawa. Yaatiyo gishshawu, Armmageedoonappe simmin, nuuni iitati kase deꞌiyoosan eta koyana danddayoos; shin demmokko. Eti merinawu xayana!—Maz. 37:12-15.

⁶ Iita asatu sohuwan ooni deꞌanee? Yihooway ha ufayssiyaabaa oottana giis: “Ashkketi biittaa laattana; eti sarotettaaninne duretettaani ufaittidi daana.” He mazamuree guuttaa takkidi, “Xilloti biittaa laattananne yan merinau de7ana” yaagees. (Maz. 37:11, 29) ‘Ashkketinne’ “xilloti” oonee? Ashkketi Yihoowa timirttiyaanne kaaletuwaa banttana kawushshidi ekkiyaageeta; xilloti Yihoowa sinttan suure gididabaa oottiyoogaa dosiyaageeta. Ha alamiyan iitati xillo asaappe keehi daroosona. SHin mati yaana ooratta alamiyan ashkketinne xilloti asaappe dariya bagga woy guuttata gidennan, he wode deꞌana asati eta xalaala. He asay kumido saꞌay tumukka gannate gidana!

Ayyaanaaban Alꞌꞌobaa

it-2 445

Xoqqa, Deriya

Woppu giyogaa; qaaxxennaagaa, woy xoqqatettaa. Deree woppu giidanne qaaxxennabadan qoncciis. (Isi. 54:10; Imb. 3:6; Maz. 46:2​ra gatta xeella.) Yaatiyo gishshawu, mazamuraawee Yihoowa xillotettay ‘xoqqa deretu mala’ giido wode, (Maz 36:6) Yihoowa xillotettay qaaxxennaagaa gidiyogaa qonccissennan waayi aggana. Woy, dereti xoqqa gidiyo gishshawu, Xoossaa xillotettay asaagaappe keehi adhdhiyogakka qonccissennan aggenna. (Isi 55:8, 9​ra gatta xeella.) Xoossaa hanqquwa burccukkoy laappunttoy gukki simmin hanidabaa xeelliyagan, Ajjuutaa 16:20y “dereekka beettibeenna” yaagees. Hegee xoqqa deretu mala wolqqaamabatikka Xoossaa hanqquwappe kessi ekkanawu danddayennaagaa bessees.—Erm 4:23-26​ra gatta xeella.

Haasayaa (5 daq.)

Mazamure 37:4 Birshshettay Aybee?

Mazamure 37:4—“GODAN Ufaitta”

“Yihoowan ufaytta; I neeyyo ne wozanaa amuwaa immana.”—Mazamure 37:4, Ooratta Alamiya Birshshettaa.

“Godan ufaytta, qassi I neeyyo ne wozanaa amuwa immana.”—Mazamure 37:4, Inglish Isttandard Vershine.

Mazamure 37:4 Birshshettaa

Mazamuraawee Xoossawu goynniyageeti Aara mino dabbotaa medhdhiyogan ufayttanaadan minttettiis. Aara hegaa mala mino dabbotettaa medhdhiyageeti Yihoowaya etawu bessiya koshshaa kunttanaagaa ammanettana danddayoosona.

‘Yihoowan ufaytta.’ Ha guussay “Yihoowan keehi ufaytta,” “Godawu haggaaziyogan ufaytta,” woy “Goday neeyyo immana giido hidootan ufaytta” geetettanakka danddayees. Qanttan, nuuni tumu Xoossawu goynniyogan “gita ufayssaa” demmana geetettana danddayees. (Mazamure 37:4) Hegaadan giyoy aybissee?

Yihoowawu goynniyageeti hanotata I Geeshsha Maxaafan qonccissidoogaadan xeelliyo gishshataassa. Eti Xoossaa eriyogaa xalla gidennan ayyo azazettiyogee aadhdhida eratetta gidiyogaakka eroosona. Hegaappe denddidaagan, etawu loꞌꞌo kahay deꞌees; qassi eti daro balaa oottiyogaappenne iitabaa kuuyiyogaappe naagettidosona. (Leemiso 3:5, 6) Leemisuwawu, yaaretiya woy ammanettenna asatuyyo injjetidaba milatiyo wode eti yiillotidi woy qanaatidi bantta saruwa xayssokkona. (Mazamure 37:1, 7-9) Xoossay matan naaqo ubbaa xayssanaagaanne loꞌꞌo eeshshay deꞌiyo ammanettida asata woytanaagaa Xoossaa asay eriyo gishshawu ufayttees. (Mazamure 37:34) Saluwan deꞌiya eta Aaway eta nashshiyogaa eriyo gishshawukka keehi ufayttoosona.—Mazamure 5:12; Leemiso 27:11.

“I neeyyo ne wozanaa amuwaa immana.” Ha qofay “I ne woosaa zaarana” woy “neeni keehi koyiyobaa I neeyyo immana” geetettidikka birshshettana danddayees. Yihooway nuuni oychchiyo ubbabaa immees giyogaa gidenna. Issi keha aawaagaadan, Yihooway ba naatussi keehi loꞌꞌobi aybakko erees. Hegaa bollikka, nuuni oychchiyobaynne nu deꞌoy, I kessido maaraaranne A sheniyara maayettana koshshees. (Leemiso 28:9; Yaaqooba 4:3; 1 Yohaannisa 5:14) Nuuni hegaadan oottikko, ‘woosaa siyiyagee’ nu woosaa siyanaagaa ammanettidi A woossana danddayoos.—Mazamure 65:2; Maatiyoosa 21:22.

Mazamure 37:4 yuushuwan deꞌiya qofaa

Mazamure 37 xaafiday beni Israaꞌeela Kawuwa Daawita. I he mazamuriya machchallaa kasiya kaaluwan xaafiis.b

Daawita daro naaqoy gakkiis. Kawuwa Saaꞌoolinne A woranawu koyiya harati A shankkatidosona. (2 Sameela 22:1) Shin, Daawiti ba Xoossan ubbatookka wozanappe ammanettiis. Yihooway sinttappe iitata qaxxayanaagaa Daawiti erees. (Mazamure 37:10, 11) Aaca “maataadan” etawu injjetidaba milatikkokka sinttappe eti xayanaagee attenna.—Mazamure 37:2, 20, 35, 36.

Mazamure 37y Xoossay kessido maarawu azazettiyageeti demmanabaanne azazettennaageetu bolli gakkanabaa geeddarssidi qonccissees. (Mazamure 37:16, 17, 21, 22, 27, 28) Yaatiyo gishshawu, ha mazamuree nuuni aadhdhida eratettaa demmanaadaaninne Xoossay nashshiyo asa gidanaadan nuna maaddees.

Mazamure maxaafaa erissiya ha qantta biiduwa beꞌa.

Xannaꞌanawu giigida Ooratta Alamiya Geeshsha Maxaafaa Birshshettan Mazamure 37 nabbaba. Ha nabbabanawu metenna Geeshsha Maxaafan, cenggurssan duuqettidabay, qonccissiya qofay, geeddarssiyo qofay, misileti biidotinne karttati deꞌoosona.

UDDUFUNE 13-19

XOOSSAA QAALAN DEꞌIYA ALꞌꞌOBAA MAZAMURE 38-39

Bessiyagaappe Aaruwan Zilꞌꞌettiyogaa Aggiyogaa

w20.11 27 ¶12-13

“Sitti Gaada Sinttau Xeella”

¹² Koyro Yohaannisa 3:19, 20 nabbaba. Mooridobawu nuuni ubbay issi issitoo zilꞌꞌettoos. Leemisuwawu, issoti issoti tumaa eranaappe kase oottidoban zilꞌꞌettoosona. Harati qassi xammaqetti simmidi oottido mooruwawu zilꞌꞌettoosona. Hegee wottin deꞌiyaba. (Roo. 3:23) Nuuni suure gididabaa oottanawu koyiyoogee qoncce. SHin, “nuuni ubbaikka daroban baleettees.” (Yaaq. 3:2; Roo. 7:21-23) Zilꞌꞌettiyoogee ufayssiyaaba gidana xayikkonne, hegee nuna maaddana danddayees. Aybissi? Zilꞌꞌettiyoogee nuuni nu balaa suurissanaadaaninne zaarettidi he balaa oottennan agganawu murttanaadan nuna denttettana danddayiyo gishshataassa.—Ibr. 12:12, 13.

¹³ SHin nuuni nu nagaraappe simmin, Yihooway nuussi atto giikkokka nuuni mooridobawu zilꞌꞌettana danddayoos. Hegaadan zilꞌꞌettiyoogee qohees. (Maz. 31:10; 38:3, 4) Waatidi? Kase oottido nagaraa gaasuwan zilꞌꞌettiyoogaa aggabeenna issi michchee hanotaa beꞌa. A, “Taani deꞌuwaa demmennan aggana danddayiyo gishshawu, minnada Yihoowawu haggaaziyoogee aynne maaddennabadan tawu siyettees” yaagaasu. Nuuppe darotussi iigaadan siyettana danddayees. Hegaa gishshawu, nuuni mooridobawu ubbatoo bessiyaagaappe aaruwan zilꞌꞌettennaadan naagettana koshshees. Aybissi? Yihooway nuna atto giikkonne, nuuni awu haggaaziyoogaa aggikko Seexaanay ufayttana danddayiyo gishshataassa!—2 Qoronttoosa 2:5-7, 11ra gatta xeella.

w02 11/15 20 ¶1-2

Yihoowa Sinttan Nu Deꞌuwa Waatidi Loꞌꞌo Hanotan Goꞌettana Danddayiyo?

Nu deꞌoy qanttanne philqqi giidi xayiyaba mala. Mazamuraawee Daawiti asaa deꞌoy qantta gidiyogaa qoppidi hagaadan woossiis: “Abeet [Yihoowawu], ta de7uwaa wurssettaanne taayyo de7anau attida gallassaa tana bessa. Qassi ta de7oi ciranau ai keenaa eesotiyaakko, tana erissa. Neeni ta laittaa qii takkaaro kessadasa. Ta baree ne sinttan bainnabaa mala.” Daawita qofissidabay I ba deꞌo ubban Xoossaa ufayssiya ogiyan haasayiyogaanne oottiyogaa. I Xoossan ammanettiyo gishshawu, “ta hidootay nena” yaagiis. (Mazamure 39:4, 5, 7, NW) Yihooway A woosaa siyiis. Daawiti oottido ubbabaa akeekidi hegan A anjjiis.

Ubba galla daqiiqan daqiiqan darobaa oottishin deꞌoy sohuwara aadhdhana danddayees. Nuuni nu deꞌuwan oottana koshshiyo darobay deꞌees, shin hegawu gidiya wodee baynna gishshawu zilꞌꞌettana danddayoos. Daawitaagaadan nunakka qofissiyabay Xoossaa ufayssiyagaadan deꞌiyogee? Yihooway nuna beꞌiyogeenne nu oottiyo ubbabaa qoriyogee qoncce. Xoossaa yayyiya Iyyoobi 3,600 layttaappe kase, Yihooway A hemeta ubbaa beꞌiyogaanne A tanggo ubbaa qoodiyogaa akeekiis. Iyyoobi, “i tana oichchiyo wode, taani woiga zaaranee?” giidi oychchiis. (Iyy 31:4-6, 14) Nuuni ayyaanaabaa kaseyiyogan, A higgeta azazettiyogaaninne, nu wodiya hayyuwan goꞌettiyogan Yihoowa sinttan nu deꞌuwa loꞌꞌo hanotan goꞌettana danddayoos. Ane he allaalleta loyttidi pilggoos.

w21.10 15 ¶4

Yihoowaara Dabbotaa Zaarettada Mintta

Ubbatoo Yihoowa haasayissa. Neeni kase oottidobaa gaasuwan ubbatoo nena mooranchchadan xeelliyoogee A woossanawu metootanaadan oottanaagaa ne Aaway erees. (Roo. 8:26) Gidikkonne, Yihoowaara dabbotanawu keehi koyiyoogaa yootiyoogan A ‘ubba wode woossa.’ (Roo. 12:12) Andire kasebaa hassayidi hagaadan giis: “Taani tana keehi mooranchchadan xeellaysinne yeellatays. SHin taani woossa simmiyo wode ubban, tawu loꞌꞌobay siyettees. Taani kaseegaappe aaruwan woppu gays.” Neeni woyga woossanaakko erennaba gidikko, ba nagaraappe simmida Kawuwaa Daawiti woossido Mazamure 51nne 65n deꞌiya woosaa beꞌa.

Ayyaanaaban Alꞌꞌobaa

w22.09 13 ¶16

Ammanettiya Asa Gidiyoogaa Bessa

¹⁶ Harati nunan ammanettanaadan koyikko, nuuni nu huuphiyaa naagiyoogee keehi koshshiyaaba. He eeshshay nuuni xuura gididabaa yootanaadan paacettiyo wode coꞌꞌu gaanaadan maaddees. (Leemiso 10:19 nabbaba.) Nuuni sooshal miidiyaa goꞌettiyo wode nu huuphiyaa naagiyoogee metiyaaba gidana danddayees. Nuuni naagettana xayikko, xuura gididabaa akeekennan daro asawu yootana danddayoos. Nuuni xuura gididabaa issitoo elektronike miishshaa goꞌettidi yeddiichchikko, hegaa harati waati goꞌettiyaakko naagana woy hegee daro qohuwaa gattennaadan teqqana danddayokko. Qassi nu huuphiyaa naagiyoogee eqettiyaageeti nu ishanttanne michchontta qohiyaabaa yootanaadan nuna cimmiyo wode coꞌꞌu gaanaadan maaddees. Nu oosoy teqettido woy muleera digettido biittatun polisee nuna qoriyo wode hegaa malabay hanana danddayees. Nu “doonaa barana” giya maaraa hagaaninne hara hanotatun oosuwan peeshshana danddayoos. (Maz. 39:1) Nuuni nu soo asaa, laggeta, ishanttanne michchontta woy hara oonanne gidin, asa ubbawu ammanettiyaageeta gidana koshshees. Qassi nuuni ammanettiyaageeta gidanawu nu huuphiyaa naagana koshshees.

UDDUFUNE 20-26

XOOSSAA QAALAN DEꞌIYA ALꞌꞌOBAA MAZAMURE 40-41

Harata Maaddana Koshshiyoy Aybissee?

w18.08 22 ¶16-18

Kehatettan Immiya Asay Ufayttees

¹⁶ Wozanappe kehatettan immiya asi kushiyaa zaaranaadan giidi immenna. Yesuusi, “Neeni qumaa katissiyo wode, hiyyeesata, quunata, wobbeta, qooqeta xeesa. Eti ne kushiyaa zaaranau danddayenna gishshau, neeni anjjettana” yaagidi tamaarissido wode hegaa qoppiis. (Luq. 14:13, 14) Geeshsha Maxaafay, “Keha asi . . . anjjettana” yaagees. Hagaadankka gees: “Hiyyeesaayyo qoppiya asi anjjettidaagaa.” (Lee. 22:9; Maz. 41:1) Harata maaddiyoogee ufayssiyo gishshawu nuuni immana koshshees.

¹⁷ Yesuusi, “Ekkiyaagaappe immiyaagee anjjettidaagaa” giidoogaa PHawuloosi yootidoogee aquwawu koshshiyaabaa immiyoogaa xalla gidennan, minttettoy, kaaletoynne maadoy koshshiyoogeetussi hegaadan oottiyoogaarakka gayttidaba. (Oos. 20:31-35) Nuuni nu wodiyaa, wolqqaanne nu siiquwaa kehatettan immiyoogee keehi koshshiyaaba gidiyoogaa PHawuloosi yootidobaaninne oottidoban nuna tamaarissiis.

¹⁸ Immiyoogee asay ufayttanaadan oottiyoogaa deretettaabaa saynisiyaa xannaꞌiyaageetikka akeekidosona. Issi xuufee yootiyoogaadan, “asay haratussi loꞌꞌobaa ootti simmidi keehi ufayttidoogaa odees.” Harata maaddiyo wode, nuuni deꞌiyoogee keehi goꞌꞌiyaabadan nuuyyo siyettiyoogaa xannaꞌiyaageeti yootoosona. Yaatiyo gishshawu, asay kaseegaappe aaruwan ufayttanawunne payya gidanawu ba dosan oottanaadan issi issi eranchchati yootoosona. Hegee maalaaliyaaba gidenna; ayssi giikko, immiyoogee ufayssiyoogaa nuna siiqiya Medhdhidaagee, Yihooway ubbatoo yootees.—2 Xim. 3:16, 17.

w15 12/15 24 ¶7

Yihooway Nena Maaddana

⁷ Gidoppe attin, nuuni sahettikko, Xoossay beni wode baayyo tumuppe goynniyaageetussi oottidoogaadan minttettanaadan, eratettaa immanaadaaninne maaddanaadan akko xeellana danddayoos. Kawuwaa Daawiti, “Hiyyeesaayyo qoppiya asi anjjettidaagaa; metuwaa gallassi GODAI a ashshees. GODAI a naagidi, paxa wottees” yaagiis. (Maz. 41:1, 2) Daawita wode hiyyeesaassi qoppida uri merinawu deꞌibeennaagaa eroos. Hegaa gishshawu, Daawiti hegaadan qoppiya uri maalaalissiya hanotan merinawu paxa deꞌana gibeennaagee qoncce. Asawu qoppiya ammanettida ura Xoossay maaddanaagaa i geeshsha ayyaanaa kaaletuwan hegaadan yootiis gaana danddayoos. Xoossay waatidi maaddanee? Daawiti, “GODAI a harggiyaa hiittan de7ishinkka maaddees; i sahettinkka, a pattees” yaagiis. (Maz. 41:3) Ee, hiyyeesaayyo qoppiya uri Xoossay anne i ammanettidi oottiyoobaa akeekiyoogaa ammanettana danddayees. Qassi Xoossay gazddanaadan ootti medhido a bollay i paxanaadan maaddana danddayees.

w17.09 12 ¶17

Qarettiyoogan Yihoowa Milata

¹⁷ Qarettiyoogee nuuyyo loꞌꞌo gidikkonne, nuuni qarettiyo waanna gaasoy Yihoowa milatanawunne a bonchissanawu koyiyo gishshataassa. I siiquwawunne qaretawu Pultto. (Lee. 14:31) I nuuyyo wottiyoobi baynna leemiso. Qarettiyoogan Xoossaa milatanawu nuussi danddayettiya ubbabaa oottiyaageeta gidoos. Yaatikko, ishanttuuranne michonttuura keehi siiqettana; qassi hara asaarakka saruwan deꞌana.—Gal. 6:10; 1 Yoh. 4:16.

Ayyaanaaban Alꞌꞌobaa

it-2 16

Yihoowa

Kumetta Geeshsha Maxaafaa qofay Yihoowa haaroy suure gidiyogan xeelaa wottees; qassi hegee Xoossaa Yihoowa waanna halchchoy A sunttay geeyiyogaa gidiyogaa loytti qonccissees. Yaatanawu Xoossaa sunttay bore ubbaappe geeyana koshshees. Shin hegaappekka aaruwan, saluwaninne saꞌan deꞌiya qoppiya mereta ubbay he sunttaa bonchchana bessees. Hegee, Yihooway ubbaa haariyo maataa akeekiyogaanne bonchchiyogaa, ba dosan Xoossaa sheniya poliyogaanne A siiqiyo gishshawu ufayssan awu haggaaziyogaa giyogaa. Daawiti Mazamure 40:5-10n Yihoowakko woossidobay hegaa mala qofaanne Yihoowa sunttay tumuppe geeyiyogaabaa loyttidi yootees. (Kiitettida Phawuloosi ha mazamuriyappe amarida shaahoy Kiristtoos Yesuusa bolli polettidoogaa Ibraawe 10:5-10n waati qonccissidaakko akeeka.)

UDDUFUNE 27–TAMME 2

XOOSSAA QAALAN DEꞌIYA ALꞌꞌOBAA MAZAMURE 42-44

Yihooway Tamaarissiyobaa Oosuwan Peeshshite

w06 6/1 9 ¶4

Mazamure Maxaafaa Shaahotuppe Naaꞌꞌanttoogan Deꞌiya Kulkka Qofaa

42:4, 5, 11; 43:3-5. Nu wolqqaappe bolla gididabaa gaasuwan Kiristtaane galchchaappe guutta wodiyawu shaahettikko, kase nu ishanttuuranne michchenttuura aattido ufayssiya wodiya qoppiyogee nuna minttettana danddayees. Hegee koyro heeran nuuni moozottanaadan oottana danddayees; shin hegee Yihooway nuussi baqati attiyonne woppaa demmiyo soho gidiyogaa nuna hassayissana.

w12 1/15 15 ¶2

Neeni Xannaꞌiyo Wodiya Kaseegaappe Aaruwan Ufayssiyagaanne Maaddiyagaa Oottiyogaa

¹ WOOSAA: Nu oottana bessiya koyrobay woosaa. (Maz. 42:8) Hegaadan giyoy aybissee? Xoossaa Qaalaa xannaꞌiyogaa nu goynuwa shaaho oottidi xeellana koshshees. Hegaa gishshawu, nu wozanaanne nu qofaa xinaatiyawu giigissana malanne ba ayyaanaa nuussi immana mala Yihoowa woossana koshshees. (Luqaasa 11:13) Adussa wodiyawu missoonaawe gidada haggaazida Barbbaara hagaadan gaasu: “Taani Geeshsha Maxaafaa nabbabanaappe woy xannaꞌanaappe kase ubbatookka woossays. Hegaappe simmin, Yihooway tanaara deꞌiyabadaaninne ta oottiyoban I ufayttiyabadan tawu siyettees.” Xannaꞌiyogaa doommanaappe kase woossiyogee nu sintti shiiqida gidi palahiya ayyaanaabaa qumaa akeekanawu nu wozanaanne qofaa giigissanawu maaddees.

w16.09 5 ¶11-12

‘Ne Kusheti Arggaacoppona’

¹¹ Gubaaꞌe shiiqotun, gita shiiqotuuninne tiꞌokiraase timirtte keettatun Xoossaappe tamaariyoogeekka nuuni minnanaadan maaddees. He loohissoy nuuyyo suure qofay deꞌanaadan, nuuni ayyaanaabaa halchanaadaaninne Kiristtaanetuppe koyettiya darobaa oottanaadan nuna maaddana danddayees. (Maz. 119:32) Neeni hegaa mala timirttiyaappe minotettaa demmanawu keehi koyay?

¹² Yihooway Israaꞌeelati Amaaleeqatanne Toophiyaa asata xoonanaadan maaddiis; qassi Nahimeenne aara deꞌiyaageeti zaarettidi keexxiyo oosuwaa polanaadan wolqqaa immiis. Yedetaynne hirggissiyaabay deꞌishin, qassi asay siyanawu koyennan ixxishinkka, nuuni mishiraachuwaa sabbakiyo oosuwaa oottanawu genccanaadan, Xoossay hegaadan nuuyyo minotettaa immees. (1 PHe. 5:10) Yihooway nu metuwaa maalaalissiya ogiyan xayssenna. Nuuni nu gishshaa oottana bessees. Xoossaa Qaalaa galla galla nabbabiyoogee, saaminttaa shiiquwawu giigettidi shiiqiyoogee, buzo xinaatiyaaninne so asaa goynuwan ayyaanaabaa qumaa miyoogeenne ubbatoo woossiyoogan Yihoowan ammanettiyoogee hegaa oottiyoogaa bessiyaaba. Yihooway minttettanawu giigissidoban nuuni goꞌettennaadan aybinne nuna digganaadan oottanawu mule bessenna. Hegaara gayttida aybiininne ne kushee arggaacidoogaa akeekikko, Xoossay nena maaddanaadan oycha. Yaatada a ayyaanay neeni ‘eeno gaanaadaaninne oottanaadan’ neeyyo waati wolqqaa immiyaakko akeeka. (Pili. 2:13) SHin neeni haratu kushiyaa minttanawu ay oottana danddayay?

Ayyaanaaban Alꞌꞌobaa

it-1 1242

Worakanaa

Geeshsha Maxaafan worakanay leemiso hanotan daro sohuwan odettiis. Iyyoobi bana gakkida unꞌꞌissiyabaa zilaassan qonccissiiddi “worakanatuyyo isha” gidaas yaagiis. (Iyy 30:29) Mazamuraawee Xoossaa asay kawushsha ogiyan xoonettido hanotaa, olaa dembban hayqqida asaa maanawu shiiqiya worakanatu hanotaara gattidi qonccissennan aggenna (Mazamure 68:23​ra gatta xeella) I, “Neeni nuna mentterettada [worakanatu] giddon yeggadasa” giidi yeekkiis. (Maz 44:19) Baabilooneti 607 K.K. Yerusalaame katamaa dooddido wode, koshay denddido gishshawu Israaꞌeeleti bantta naata meqetti baynna hanotan oyqqidosona. Hegaa gishshawu, A “asai” bantta naata meqetti baynnan oyqqido hanotaa worakanati bantta marata loytti oyqqiyo hanotaara Ermmaasi geeddarssidooge bessiyaba.—Zil. 4:3, 10.

Haasayaa (5 daq.)

lmd gujo qofaa A, qofaa 4

Ubba asay payyatettan deꞌana.—Isi. 33:24; 35:5, 6.

TAMME 3-9

XOOSSAA QAALAN DEꞌIYA ALꞌꞌOBAA

MAZAMURE 45-47

Kawuwa Bullachchawu Yexxiyo Mazamuriya

w14 2/15 9-10 ¶8-9

Dorssaa Bullachan Ufayttite!

⁸ Mazamure 45:13, 14a nabbaba. Bullashettiyaara kawo bullachau ‘keehippe loꞌꞌa’ giigettidoogee odettiis. Ajjuutaa 21:2y, bullashettiyaara ooratta Yerusalaame katama geetettidoogaanne ‘ba azinaayyo gixxa giiga uttidoogaa’ yootees. He katameeyyo ‘Xoossaa bonchoy’ deꞌees; yaatiyo gishshau, i pooꞌoy “yasphphiidiyaa giyo al77o shuchchaa mala; [a] birilledan phoolausu.” (Ajj. 21:10, 11) Ooratta Yerusalaame meraa loꞌꞌotettaa Ajjuutaa maxaafay loyttidi qonccissees. (Ajj. 21:18-21) Mazamuraawee bullashettiyaara ‘keehi loꞌꞌiyoogaa’ yootidoogee bessiyaaba! Woni kawuwaa bullachay bullashettiyoy saluwaana gidennee!

⁹ Bullashettiyaaro akko ehiido, bullachiyaagee Mase Kawuwaa. I o “qaalaaninne haattan meecci geeshshidi” giigissiiddi takkiis. A ‘geeshshanne boree baynnaaro.’ (Efi. 5:26, 27) Bullashettiyaarakka bullachaayyo bessiyaagaadan maayana koshshiyo gishshau, loyttada maayaasu! “I bullachchaa maayoikka worqqa qacinan dadettiis. Ba alleeqo maayuwaa maayada, kawuwaakko moisettausu.” Dorssaa bullachau iyyo “maayanau liinuwaa giyo kiriyan dadettida phooliya bootta maayoi imettiis. . . . Liinuwaa giyo kiriyan dadettida maayoi geeshshatu xillo oosuwaa.”—Ajj. 19:8.

w22.05 17 ¶10-12

Ajjuutaa Maxaafay Ne Sinttanaa Deꞌuwaabaa Yootiyoobay Aybee?

¹⁰Ha gita qohoy gakkiyo wode Yihooway waatanee? I hagaadan giis: “Ta hanqqoi suullana.” (Hiz. 38:18, 21-23) Ajjuutaa shemppo 19y kaallidi hananabaa yootees. Yihooway Ba asaa naaganawunne eta morkketa xayssanawu Ba Naꞌaa kiittees. ‘Saluwaa olanchchata’ gidida ammanettida kiitanchchatinne 144,000ti Yesuusaara issippe Maagooga Googaara olettana. (Ajj. 17:14; 19:11-15) Ha olay ay kaalettanee? Yihoowa morkke gidida ubba asaynne citati muleera xayana!—Ajjuutaa 19:19-21 nabbaba.

¹¹ Xoossaa morkketi muleera xayiyo wode saꞌan paxa attida ammanettidaageeti ay keena ufayttanaakko qoppa! He wodee keehi ufayssiya wode gidana! Gita Baabiloona xayiyo wode, saluwan deꞌiyaageeti keehi ufayttikkonne, hegaappe aaruwan ufayttanaadan oottiya harabay deꞌees. (Ajj. 19:1-3) Ajjuutaa maxaafay ‘Dorssaa bullachchay’ keehi ufayssiyaaba gidiyoogaa yootees.—Ajj. 19:6-9.

¹² He bullachchay awudee? Armmageedoona olaappe guutta kasetidi 144,000ti ubbay saluwaa baana. SHin, hegee Dorssaa bullachchaa wode gidenna. (Ajjuutaa 21:1, 2 nabbaba.) Dorssaa bullachchay Armmageedoona olaappe guyyiyan Xoossaa morkketi ubbay xayi simmin gidana.—Maz. 45:3, 4, 13-17.

it-2 1169

Olaa

He olay wuri simmin, saꞌay shaꞌu layttawu sarotettaa demmana. Mazamuree hegaa hagaadan qonccissees, “[Yihooway] sa7aa gaxaa gakkanaassi de7iya olaa teqqees; wonddafiyaa menttees; tooraa kinchchees; gonddalliyaakka taman xuuggees.” Hagee koyro polettidoy, eta morkketu ola miishshaa xayssidi Xoossay Israaꞌeela biittawu sarotettaa immido wodiyana. Kiristtoosi olaa aassiyaageeta Armmageedoonan xayssana; hegaappe simmin kumetta saꞌay sarotettaa alana. (Maz 46:8-10) Merinaa deꞌuwa demmana koyiya asati “bantta bisuwaa marasha, bantta tooraakka baaca kessanau qoxxana,” qassi “eti mulekka olaa timirttiyaa tamaarokkona.” “Ubbaappe Wolqqaama [Yihooway] hagaa haasayiis.”—Isi 2:4; Mik 4:3, 4.

Ayyaanaaban Alꞌꞌobaa

w17.04 11-12 ¶9

Xoossaa Kawotettay Yiyo Wode Aybi Xayanee?

⁹ Ammanettenna dirijjitetu sohuwan eqqanay aybee? Armmageedoonappe simmin saꞌan dirijjitee deꞌanee? Geeshsha Maxaafay hagaadan gees: “Nuuni Xoossai immana giido ooratta saluwaanne ooratta sa7aa xilloi de7anasaa naagoos.” (2 PHe. 3:13) Ha ceeggida saloynne saꞌay, woy qassi ammanettenna kawotettatinne saꞌan etawu haarettiya asay xayana. Eta sohuwan aybi eqqanee? “Ooratta saluwaanne ooratta sa7aa” giya qofay ooratta kawotettaynne saꞌan he kawotettawu haarettiya ooratta asay deꞌanaagaa bessees. Yesuus Kiristtoosi haariyo Kawotettay ubbabaa maara oottiya, Xoossaa Yihoowa eeshshaa bali baynnan qonccissana. (1 Qor. 14:33) Yaatiyo gishshawu, ‘ooratta saꞌay’ maara darajjayettidaagaa gidana. Dumma dummaban aawatettay imettiyo loꞌꞌo asati deꞌana. (Maz. 45:16) Kiristtoosinne aara haariya 144,000ti eta kaalettana. Ammanettenna dirijjitetu ubbaa sohuwan mule xayennanne issippetettay deꞌiyo issi dirijjitee eqqana wodiyaa qoppa!

Haasayaa (5 daq.)

Mazamure 46:10 Birshshettay Aybee?

Mazamure 46:10—“Co77u Giite; Taani Xoossaa Gidiyoogaa Erite”

“Coꞌꞌu giidi uttite; qassi taani Xoossa gidiyogaa erite. Taani asaa giddon xoqqu xoqqu gaana; saꞌaa bollankka xoqqu xoqqu gaana.”—Mazamure 46:10, Ooratta Alamiya Birshshettaa.

“Coꞌꞌu giite; taani Xoossa gidiyogaa erite. Taani asaa giddon xoqqu xoqqu gaana. Qassi biittaa bollankka xoqqu xoqqu gaana.”—Mazamure 46:10, King Jems Vershin.

Mazamure 46:10 Birshshettaa

Xoossay ubba asay awu goynnanaadaaninne kumetta saꞌaa haariyo maatay awu deꞌiyogaa ammanettanaadan koyees. Merinaa deꞌuwa demmana koyiya ubbay A wolqqawunne maatawu zaway baynnaagaa ammanana koshshees—Ajjuutaa 4:11.

“Coꞌꞌu giidi uttite; qassi taani Xoossa gidiyogaa erite.” Issi issi Geeshsha Maxaafaa birshshettatun ha xiqisiyawu koyro shaahoy “coꞌꞌu giidi uttite” geetettidi birshshettiis. Hegaadan birshshettidoogee, he qofay woosa keettan coꞌꞌu giidi uttanaadan azaziyaba giidi daro asay balan qoppanaadan oottiis. Gidoppe attin, “coꞌꞌu giidi uttite; qassi taani Xoossa gidiyogaa erite” geetettidi birshshettida Ibraawetto qofay asa ubbay A eqettiyogaa agganaadaaninne goynoy bessiyoy A xalaala gidiyogaa ammananaadan Xoossaa Yihooway minttidi yootidoogaa bessees.

Mazamure 2nkka hegaa mala qofay deꞌees. Hegan, A eqettiyageeta Xoossay qaxxayanaagaa yootees. Hara baggaara qassi, ayyo maatay deꞌiyogaa ammanettiyageeti, Xoossay eta kaalettanaadan, minttettanaadaaninne aadhdhida eratettaa immanaadan A woossoosona. “Akko baqati attiya ubbati,” ubba wayssiya wodiyankka ufayttoosonanne woppu goosona.—Mazamure 2:9-12.

“Taani asaa giddon xoqqu xoqqu gaana; saꞌaa bollankka xoqqu xoqqu gaana.” Beni wode, Xoossaa Yihooway ba asaa ashshanawu ba wolqqaa goꞌettido wode xoqqu xoqqu giis. (Kessaabaa 15:1-3) Sinttappe qassi saꞌan deꞌiya ubba asay awu haarettiyonne A xalaalawu goynniyo wode, hegaappekka aaruwan I xoqqu xoqqu gaana.—Mazamure 86:9, 10; Isiyaasa 2:11.

Mazamure 46:10 Yuushuwan Deꞌiya Qofaa

Issi maxaafay Mazamure 46 ‘Xoossay ba asaa naaganawu goꞌettiyo gita wolqqaa sabbiya mazamuriya’ yaagiis. Xoossaa asay, Mazamure 46 yexxiyo wode, Yihoowayc banttana naaganawunne maaddanawu danddayiyogaa qonccissoosona. (Mazamure 46:1, 2) Hegan deꞌiya qaalati Yihooway ubbatookka etaara deꞌiyogaa eta hassayissoosona.—Mazamure 46:7, 11.

Xoossaa Yihoowawu deꞌiya ashshiyo wolqqaa mintti ammananawu he mazamuriyan deꞌiya minttettiya qaalata wotti denttidi qoppanaadan mazamuraawee eta shoobbiis. (Mazamure 46:8) Qassi, Xoossay olaa xayssanawu danddayiyogaa yootees. (Mazamure 46:9) Beni wode, Yihooway ba asaa eta morkketuppe ashshiyogan olaa xayssiis gaana danddayettees. Shin, Xoossay mata wodiyan saꞌa ubbaappe olaa xayssiyogan hegaappe aarobaa oottanaagaa Geeshsha Maxaafay yootees.—Isiyaasa 2:4.

Yihooway baassi goynniyageeta ha wodiyankka maaddii? Ee, maaddees. Kiitettida Phawuloosi maaduwa demmanawu An ammanettanaadan Kiristtaaneta minttettiis. (Ibraawe 13:6) Mazamure 46n deꞌiya qofati Xoossay nuna ashshanawu wolqqay deꞌiyogaa ammanettanaadan maaddoosona. Xoossaa ‘nuuni naagetti attiyo sohodan’ xeellana mala nuna minttettoosona— Mazamure 46:1.

Mazamure maxaafaa erissiya ha qantta biiduwa beꞌa.

Mazamure 46, qonccissiya tohossa qofaaranne geeddarsso qofaara issippe nabbaba.

Ootti-besuwa. ijwyp 59

Attumay Attumaara Maccay Maccaara Zinꞌꞌiyogaa Xeelliyagan Ne Qofay Aybee?

YELAGATI OYCHCHIYO OYSHAA

Attumay Attumaara Maccay Maccaara Zinꞌꞌiyoogee Balee?

“Taani gitatiyo wode tana keehi wayssidabaappe issoy ta mala attumaageeta siiqiyoogaa. Hegee dogettanaba gaada qoppaas, shin haꞌꞌikka tana keehi wayssees.”—Devida, 23.

Devidi Xoossaa ufayssanawu koyiya Kiristtaane. I ba mala attumaageeta siiqiiddi Xoossaakka ufayssana danddayii? Attumay attumaara, qassi maccay maccaara inddan gayttiyoogaa Xoossay waati xeellii?

Geeshsha Maxaafay woygii?

Hegaa giyoogee . . . ?

Gidoppe attin, . . . gidiyaakko shin?

Geeshsha Maxaafay woygii?

Attumay attumaara, qassi maccay maccaara inddan gayttiyoogaara gayttidaagan asaa xeelay wogaappe wogaaninne wodiyaappe wodiyan dumma dumma. SHin Kiristtaaneti asaa qofaa kaallokkona woy ‘timirtte carkko ubban yaanne haanne sugettokkona.’ (Efisoona 4:14) Gidoppe attin, eti attumay attumaara, qassi maccay maccaara inddan gayttiyoogaa (qassi hara ayba eeshshakka) Geeshsha Maxaafay yootiyo maaraadan xeelloosona.

Attumay attumaara, qassi maccay maccaara inddan gayttiyoogaa xeelliyaagan Geeshsha Maxaafay yootiyo maaray qoncce. Xoossaa Qaalay hagaadan gees:

“Maccaasaara zin77iyoogaadan attuma asaara zin77oppa.”—Wogaabaa 18:22.

“Xoossai eta wozanai amottiyo . . . borssobaa amottana mala, eta yeggi bayiis; harai atto eta maccaasai banttau bessiyaabaa aggidi, bessennabaa hanidosona.”—Roome 1:24, 26.

“Baloppite. SHaaramuxana qaaqqatiyaageeti woi eeqassi goinniyaageeti woi shaaramuxiyaageeti woi attumaasa gidiiddi, attumaasaara shaaramuxiyaageeti, woi kaisoti woi miishshaa amottiyaageeti woi mattottiyaageeti woi cayiyaageeti woi bonqqiyaageeti Xoossaa kawotettaa laattokkona.”—1 Qoronttoosa 6:9, 10.

Attumay attumaara, qassi maccay maccaara gidin woy hara uraarakka gidin, inddan gayttanawu qaaqqatiyaageetakka gujjin, Xoossay wottido maaray asa ubbaassa. Nagaranchcha asay ubbay issi issitoo iitabaa oottanawu koyikkonne, nuuni ubbay Xoossaa ufayssanawu he amuwaa eqettana bessees.—Qolasiyaasa 3:5.

Hegaa giyoogee . . . ?

Hegaa giyoogee mattuman masatettiya uraara inddan gayttiyaageeta ixxanaadan Geeshsha Maxaafay tamaarissii?

CHii. mattuman masatettiya uraara gidin dummatiya uraarakka inddan gayttiya oonanne ixxanaadan Geeshsha Maxaafay tamaarissenna. Geeshsha Maxaafay asaa deꞌuwaa maaray ay mala gidinkka, nuuni “asa ubbaara saro [deꞌanaadan]” zorees. (Ibraawe 12:14) Hegaa gishshawu mattuman masatettiya uraara inddan gayttiyaageeta addettiyoogee, ixxiyoogee woy hara ayba hanotankka qohiyoogee bala.

Hegaa giyoogee mattuman masetettiyaageeti aqo oyqqiyoogaa diggenna higgiyaa Kiristtaaneti eqettana koshshees giyoogee?

Issi attumaageenne issi maccaara aqo oyqqanaadan Xoossay maaraa wottidoogaa Geeshsha Maxaafay qonccissees. (Maatiyoosa 19:4-6) SHin kawotettati aqo deꞌuwawu kessiyo higgiyaa kuuyiyoy Xoossaa Qaalaadan gidennan, asaa qofaadaana. Kiristtaaneti polotikaaban oossinne exatennaadan Geeshsha Maxaafay yootees. (Yohaannisa 18:36) Hegaa gishshawu, mattuman masatettiyaageeti aqo oyqqiyoogaa woy eta eeshsha xeelliyaagan kawotettay kessiyo higgiyaa eti erissokkona woy qassi eqettokkona.

Gidoppe attin, . . . gidiyaakko shin?

Gidoppe attin, issi uri mattaman masatettiya uraara inddan gayttiya asa gidikko shin? He uri laamettana danddayii?

Ee danddayees. Koyro xeetu layttan amaridaageeti yaatidosona! Geeshsha Maxaafay mattuman masatettiya uraara inddan gayttiyaageeti Xoossaa Kawotettaa laattennaagaa yooti simmidi, “Intteppekka issi issi asai [kase] hegeetu mala” yaagees.—1 Qoronttoosa 6:11.

Hegaa giyoogee mattuman masatettiya uraara inddan gayttiyoogaa aggidaageeti kaseegaadan hananawu aynne qoppokkona giyoogee? Akkay. Geeshsha Maxaafay, “Xoossai . . . baayyo de7iya eratetta ubbaa immanau, ubba wode ooraxissiyo ooratta meretaa” maayite yaagees. (Qolasiyaasa 3:10) Ubbatoo laamettana koshshees.

Gidoppe attin, Xoossay wottido maaraa kaallanawu koyiya uri mattuman masatettiyaageetuura inddan gayttanawu qaaqqattikko shin?

Harabaa qaaqqatiya uraagaadan, hegaa malabaa qaaqqatiya urikka hegaa wotti dentti qoppennan agganawu woy polanawu kuuyana danddayees. Waatidi? Geeshsha Maxaafay, “Xoossaa Ayyaanai inttena kaalettiyaabaa gidikko, intte asatettaa amuwaa mulekka polekketa” yaagees.—Galaatiyaa 5:16.

Xiqisee issi uri asatettaa amo amottenna geennaagaa akeekite. SHin Geeshsha Maxaafaa xannaꞌiyoogaanne woossiyoogaa I loytti meezetikko, he amuwaa eqettiyo wolqqaa demmana danddayees.

Doomettan abaa denttido Devidi ba Kiristtaane aawawunne aayeessi ba wozanaabaa yootidi hegee tuma gidiyoogaa akeekiis. I hagaadan giis: “Deexo toohoy ta hashiyaappe wodhdhidabadan tawu siyettiis; qassi taani etawu sohuwaara yootidaba gidiyaakko panttatettaa layttan keehi ufayttanaagaa shin.”

Wurssettan, nuuni Yihooway kessido maaraadan deꞌikko keehi ufayttoos. He maaray ‘likkenne wozanaa ufayssiyaagaa’ gidiyoogaanne, qassi ‘A naagiyoogan nuuni daro goꞌettiyoogaa’ ammanoos.—Mazamure 19:8, 11.

TAMME 10-16

XOOSSAA QAALAN DEꞌIYA ALꞌꞌOBAA MAZAMURE 48-50

Yelidaageetoo—Intte Soo Asay Yihoowa Dirijjitiyan Ammanettanaadan Maaddite

w22.03 22 ¶11

Tumu Goynoy Neeni Loytta Ufayttanaadan Maaddana

¹¹ Nuuni Yihoowa Qaalaa xannaꞌiyo wodenne nu naata abaa tamaarissiyo wode awu goynnoos. Sambbatan, Israaꞌeelati ooso oottokkona, qassi eti Yihoowaara dabbotido dabbotaa minttanawu he gallassaa goꞌettidosona. (Kes. 31:16, 17) Eta giddon deꞌiya ammanettidaageeti Yihoowabaanne A loꞌꞌotettaabaa bantta naata tamaarissidosona. Ha wodiyankka, nuuni Xoossaa Qaalaa nabbabanawunne xannaꞌanawu wodiyaa bazzana koshshees. Hegee nuuni Yihoowawu goynniyo goynuwaa shaahonne nuuni akko kaseppe aaruwan shiiqanaadan nuna maaddees. (Maz. 73:28) Qassi nu so asay issippe xannaꞌiyoogee nu naati saluwan deꞌiya nu siiqo Aawaara dabbotaa minttanaadan maaddana danddayees.—Mazamure 48:13 nabbaba.

w12 8/1 19 ¶5

Kawotettaa Dere Asadan Deꞌite!

⁵ Taarikiyaa xannaꞌa. Issi kawotettaa dere asa gidanau koyiya uri he kawotettaa taarikiyaa xeelliyaagan geella issi issibaa erana koshshennan aggenna. Hegaadankka, Xoossaa Kawotettaa dere asa gidanau koyiyaageeti Xoossaa Kawotettaabaa eranau banttau danddayettida ubbabaa oottana koshshees. Beni Israaꞌeelen Xoossau oottida, Qoraaha naatu leemisuwaa qoppa. Yerusalaameenne yan deꞌiya goynniyo sohoy, qassi he katamaa taarikiyaa yootiyoogee eta keehippe ufayssees. Eti ufayttanaadan oottida waannabay, keexxanau goꞌettido shuchaanne he shuchaa issippe oyttidabaa gidennan, he katamaynne goynniyo sohoy kalꞌꞌatiyoobaa. Yerusalaamee tumu goynuwaa humꞌꞌo gidiyo gishshau, “gita kawuwaa,” Yihoowa ‘katama.’ Asay Yihoowa Higgiyaa tamaariyoy yaana. Yerusalaame Kawoy haariyoogeeti Yihooway aggenna siiquwan siiqido asata. (Mazamure 48:1, 2, 9, 12, 13 nabbaba.) Ha wodiyan saꞌan Xoossay darajjayido asay deꞌees. Qoraaha naatuugaadan, nuuni Xoossaa asaa taarikiyaa ufayttidi xannaꞌananne haratuyyo yootana koshshees. Neeni Xoossaa dirijjitiyaabaanne Yihooway ba asaa kaafiyo ogiyaabaa loytta eriyo wode, Xoossaa Kawotettay neeyyo kaseegaappe aaruwan qoncci beettana. Neeni Xoossaa Kawotettaa mishiraachuwaa sabbakanau keehi amottana.—Erm. 9:24; Luq. 4:43.

Ayyaanaaban Alꞌꞌobaa

it-2 805

Duretettaa

Israaꞌeelati dure gidiyo gishshawu miiyogaaninne uyiyogan ufayttana danddayoosona; (1Kaw 4:20; Era 5:18, 19) qassi duretettay koshaa gaasuwan gakkiya metuwappe eta ashshiis. (Lee 10:15; Era 7:12) Shin, Israaꞌeelati minni oottidi demmido duretettan ufayttiyogee Yihoowa halchchuwara maayettiyaba gidikkonne, (Lee 6:6-11; 20:13; 24:33, 34​ra gatta xeella) eti duretettawu pultto gidida Yihoowa dogidi bantta duretettan ammanettiyogaa doommido gishshawu naagettanaadan I yootiis. (Zaa 8:7-17; Maz 49:6-9; Lee 11:4; 18:10, 11; Erm 9:23, 24) Duretettay guutta wodiyassa gidiyogaa eti akeekana mala etawu odettiis; (Lee 23:4, 5), duretettay asi ba shemppuwa ashshanawu Xoossawu qanxxana danddayiyo wozo gidenna; (Maz 49:6, 7), qassi asi hayqqiyo wode duretetti aynne maaddenna. (Maz 49:16, 17; Era 5:15) Duretettaa bessiyagaappe aaruwan xeellikko balibakkana, qassi Yihooway ufayttennabaa oottana danddayiyogee etawu odettiis. (Lee 28:20; Erm 5:26-28; 17:9-11​ra gatta xeella.) Bantta ‘duretettan Yihoowa bonchchanaadankka’ etawu minttettoy imettiis.—Lee 3:9.

TAMME 17-23

XOOSSAA QAALAN DEꞌIYA ALꞌꞌOBAA MAZAMURE 51-53

Gita Balaa Oottennaadan Waatana Danddayiyoo?

w19.01 15 ¶4-5

Ne Wozanaa Waata Mintta Naagana Danddayay?

⁴ Leemiso 4:23n “wozanaa” geetettida qaalay asi beꞌana danddayenna aybanne qonccissiyaaba. (Mazamure 51:6 nabbaba.) Qassi “wozanay” nu qofaa, nuussi siyettiyaabaa, nuna denttettiyaabaanne nu koyiyoobaa qonccissees. Hegee bolla baggaara beettiyaaba gidennan, nu garssa asatettaa bessiyaaba.

⁵ Nu garssa asatettay keehi koshshiyaaba gidiyoogaa nu bollaa payyatettay waatidi bessiyaakko akeeka. Koyruwan, nu bollay payya gididi deꞌanaadan nuuni bollawu maaddiya qumaa maananne ubbatoo bollaa minttiyaabaa oottana bessees. Hegaadankka, ayyaanaaban payya gididi deꞌanawu, ayyaanaaban nuna maaddiya qumaa maananne Yihoowa ammaniyoogaa ubbatoo bessana koshshees. Nuuni tamaaridobaa oosuwan peeshshiyoogaaninne nu ammanuwaabaa haratuyyo yootiyoogan Yihoowa ammaniyoogaa bessoos. (Roo. 10:8-10; Yaaq. 2:26) Naaꞌꞌanttuwan, nu garssa asatettay sahettikkokka bolla baggaara beettiyaaba xallan nuuni payya giidi qoppana danddayoos. Hegaadankka, nuuni ayyaanaabaa oosuwaa ubbatoo oottiyoogaa gaasuwan nu ammanoy mino giidi qoppana danddayoos; shin iita amoy nu giddon diccana danddayees. (1 Qor. 10:12; Yaaq. 1:14, 15) Seexaanay nuuni aagaadan qoppanaadan oottiyoogan nu qofaa moorana koyiyoogaa nuuni hassayana koshshees. I hegaadan waati oottana danddayii? Qassi nuuni nuna waati naagana danddayiyoo?

w15 6/15 14 ¶5-6

Geeshsha Gididi Deꞌana Danddayoos

⁵ Nuuni Yihoowan wozanappe ammanettiyoogaa bessiyo issi ogee iita qofaa eqettanawu woossiyoogaa. Nuuni woosan Yihoowakko shiiqiyo wode, i nuukko shiiqees. I nuussi ba geeshsha ayyaana kehatettan immees; hegee nuuni iitabaa qoppiyoogaa aggidi, geeshsha gididi deꞌanaadan maaddees. Hegaa gishshawu, nuuni Xoossaa ufayssanawu wozanappe qoppiyoogaa ayyo yootiyaageeta gidoos. (Maz. 19:14) Nuuni nagaran gelanaadan oottana danddayiya ‘iita’ qofay, hegeekka bessenna amoy woy koshshay nu wozanan deꞌiyaakkonne nuuni erana mala i nuna qoranaadan nu huuphiyaa kawushshidi a oychiyoo? (Maz. 139:23, 24) Nuna paacee gakkiyo wode, suure gididi deꞌanawu maaddana mala muletoo a mintti woossiyoo?—Maa. 6:13.

⁶ Nu diccido hanotay woy nu kase eeshshay Yihooway ixxiyoobaa dosanaadan oottana danddayees. Gidikkonne, i nuuni issi issibaa laammanaadan maaddin ubbatoo a ufayssiya ogiyan assi haggaazana danddayoos. Kawuwaa Daawiti hegaa akeekiis. Daawiti Berssaabiira wodiraa laammi simmidi, “Geeshsha wozanaa ta giddon medhdha; ammanettiya ayyaanaa ta giddon ooraxissa” yaagidi Yihoowa woossiis. (Maz. 51:10-12) Nuuni nagarancha gidiyo gishshawu, iita eeshshaa keehi dosana danddayoos; shin Yihooway baayyo nuuni eeno giidi azazettanaadan maaddana danddayees. Iitabaa amoy wolqqaamidi nu geeshsha qofaa moorana hanikkonne, Yihooway nuuni a higgiyaa azazettidi deꞌiyoogan goꞌettanaadan nu hemetaa suurissana danddayees. I nuna qohiya aybinne haarennaadan oottana danddayees.—Maz. 119:133.

Ayyaanaaban Alꞌꞌobaa

it-1 644

Doyqa

Eedooma biittaa asa gidida Doyqi Kawuwa Saaꞌoola mehiya heemmiyageetuyyo halaqa. (1Sam 21:7; 22:9) Doyqi Ayhuda haymaanootiyawu laamettida asa. Doyqi geeshsha gidenna gishshawu, woy gogaa harggiyo gishshawu geella ba gelido qaalaa polanawu Yihoowa sinttan Nooban naagiiddi, Kahinetu Halaqaa Abimeleki Daawitawu kattaanne Gooliyada bisuwa immishin beꞌennan aggenna. Guyyeppe Saaꞌooli ba ashkkarata shiishshidi eti A bolli maqettidoogaa yootido wode, Doyqi Nooban beꞌidobaa yootiis. Yaatin Saaꞌooli Nooban deꞌiya kahinetu halaqaanne hara kahineta shiishshidi Abimeleka oychchiis; yaatidi oosanchchati kahineta woranaadan azaziis. Eti ixxis gin, Doyqi Saaꞌoola azazuwa maaran aynne mammottennan 85 kahineta ubbaa woriis. He iitabaa ootti simmidi, Doyqi Nooban deꞌiya, naata, cima asaanne mehiya shaakkennan ubbaa suppu oottiis.—1Sam 22:6-20.

Mazamure 52 huuphessan deꞌiya qofay yootiyogaadan Daawiti Doyqabaa hagaadan giis: “Nenoo, worddobaa haniyaagoo, neeni harata xaissanau maqettaasa. Ne inxxarssai qara magilaalaa mala. Neeni lo77uwaappe iitaa siiqaasa; qassi tumaa haasayiyoogaappe wordduwaa haasayiyoogaa dosaasa. Nenoo, worddanchchau, neeni bochchiya qaalaa ubbaa siiqaasa.”—Maz 52:2-4.

TAMME 24-30

XOOSSAA QAALAN DEꞌIYA ALꞌꞌOBAA MAZAMURE 54-56

Xoossay Inttenaara Deꞌees

w06 8/1 22 ¶10-11

Akeekanchcha Gidite—Xoossawu Yayyite!

¹⁰ Issi wode, Daawiti baqatidi Pilisxxeeme katamaa Gaate kawuwa Akiishakko biis; hegee Gooliyadi yelettido katamaa. (1 Sameela 21:10-15) Kawuwa oosanchchati Daawiti bantta biittaa asawu morkke giidi mootidosona. Shemppo maana danddayiya he hanotan Daawiti ay oottidee? Ba wozanaabaa woosan Yihoowassi yootiis. (Mazamure 56:1-4, 11-13) Daawiti gooyiyaba milatidi kessi ekkidaba gidikkonne, I oottido baaxiya anjjidi A ashshidaagee Yihoowa gidiyogaa eriis. Daawiti kumetta wozanaappe Yihoowan ammanettidoogeenne xalatettan oottidobay I tumuppe Xoossawu yayyiya asa gidiyogaa bessees.—Mazamure 34:4-6, 9-11.

¹¹ Daawitaagaadan nuunikka nuna gakkiya metuwa genccanaadan Yihooway nuna maaddanawu gelido qaalan ammanettiyogan Xoossaa yayyiyogaa bessana danddayoos. Daawiti hagaadan giis: “Ne ogiyaa hadaraa [Yihoowawu] imma. An ammanetta; i neessi oottana.” (Mazamure 37:5) Hegaa giyogee nu metuwa Yihoowa bolli olidi nuuni aybanne oottennan coꞌꞌu giidi uttoos giyogaa gidenna. Daawiti Xoossay maaddanaadan woossidi aynne oottennan coꞌꞌu giidi uttibeenna. I Yihooway immido wolqqaanne eraa goꞌettidi bana gakkida metuwappe attiis. Gidikkonne asa wolqqa xalaalay ubbabaa giigissana danddayennaagaa Daawiti eriis. Nuunikka hegaadan oottana bessees. Nu danddayiyo ubbabaa oottidi attidabaa Yihoowa bolli olana koshshees. Nuuni Yihoowan ammanettiyogaappe harabaa aybanne oottana danddayenna wodeti deꞌiyogee qoncce. Hegaa mala hanotan nuuni Xoossawu yayyiyageeta gidana bessees. Daawiti wozanappe haasayidobay nunakka minttettees; I hagaadan giis: “GODAI baayyo yayyiyaageetau ba xuuraa shaakkiyaagaa.”—Mazamure 25:14.

cl 243-244 ¶9

‘Xoossaa Siiquwaappe Nuna Aybinne SHaakkana’ Danddayenna

⁹ Nu genccaakka Yihooway nashshees. (Maatiyoosa 24:13) Seexaanay neeni Yihoowawu zokkuwaa zaaranaadan koyiyoogaa hassaya. Neeni ubba galla Yihoowawu ammanettada deꞌiyoogan Seexaanay boriyoobaa I zaaranaadan maaddaasa. (Leemiso 27:11) Gencciyoogee issi issitoo wayssiyaaba gidana danddayees. Sahoy, miishshaa metoy, unꞌꞌettiyoogeenne hara metoti nuuni galla galla waayettanaadan oottana danddayoosona. Koyiyoobay polettennan gamꞌꞌiyoogee hidootaa qanxxanaadan oottana danddayees. (Leemiso 13:12) He metoti ubbay gakkishin gencciyoogaa Yihooway keehi nashshees. Kawuwaa Daawiti ba afuttaa Yihooway ogoruwan dagayanaadan oychchidoy hegaassa; I ammanettidi hagaadankka giis: “Eti ne mazggafan de7okkonaa?” (Mazamure 56:8) Nuuni Yihoowayyo ammanettidi deꞌiyo wode afuxxiyo afuttaanne gencciyo meto ubbaa I nashshiyoogeenne hassayiyoogee qoncce. Hegeetakka I nashshees.

w22.06 18 ¶16-17

Yayyiyoogaa Agganaadan Siiqoy Nuna Waati Maaddii?

¹⁶ Nuuni nu deꞌuwaa xoqqu ootti xeelliyoogaa Seexaanay erees. Hegaa gishshawu, I nuuni paxa deꞌanawu Yihoowaara dabbotido dabbotaakka aggana giidi yootees. (Iyy. 2:4, 5) Seexaanay keehi baliis! SHin, Seexaanawu ‘hayquwaa kaalettiyo wolqqay deꞌiyo’ gishshawu, I Yihoowa nu agganaadan oottanawu nuuni hayquwaa yayyiyoogaa goꞌettanawu malees. (Ibr. 2:14, 15, NW) Nuuni nu ammanuwaa aggana xayikko, Seexaanay koyiyoobaa oottiya asati nuna woranawu issi issitoo yashissoosona. Haroode qassi, Seexaanay nu ammanuwaa shugissanawu nuuni hayqqanaadan oottana danddayiya harggiyaa goꞌettana danddayees. Dottoreti woy ammanenna so asay nuuni Xoossaa higgiyaa kanttidi suuttaa goꞌettanaadan wolqqanttana danddayoosona. Woykko Geeshsha Maxaafay yootiyo maaraara maayettenna akkamuwaa akkamettanaadan nuna ammanttanawu issi uri malana danddayees.

¹⁷ Nuuni hayqqanawu koyokko; shin hayqqikkokka, Yihooway nuna siiqiyoogaa aggennaagaa eroos. (Roome 8:37-39 nabbaba.) Yihoowa dabboti hayqqikkokka, eti paxa deꞌiyaabadan I eta hassayees. (Luq. 20:37, 38) I eta hayquwaappe denttanawu laamotees. (Iyy. 14:15) Nuuni “merinaa de7uwaa” demmanaadan Yihooway alꞌꞌo waagaa qanxxiis. (Yoh. 3:16) Yihooway nuna keehi siiqiyoogaanne nuussi qoppiyoogaa eroos. Yaatiyo gishshawu, nuuni sahettiyo wode woy hayquwaa yayyiyo wode, Yihoowa aggiyoogaappe I immiyo minttettuwan, aadhdhida eratettaaninne wolqqan ammanettoos. Vaaleranne I azinay hegaadan oottidosona.—Maz. 41:3.

Ayyaanaaban Alꞌꞌobaa

it-1 857-858

Kasetidi Eriyogaa Woy Kasetidi Kuuyiyogaa

Ammanettibeenna Asqqorootu Yihuday oottidobay Xoossay erissidobay polettanaadan oottiis; qassi hegee Yihoowaynne A Naꞌay issibaa kasetidi eriyogaa bessees. (Maz 41:9; 55:12, 13; 109:8; Oos 1:16-20) Gidoppe attin, Yihuday hegaadan oottanaadan Xoossay kasetidi kuuyiis gaanawu danddayettenna. Yesuusa mata laggetuppe issoy A kaddanaagaa hiraagati kasetidi yootidosona, shin A mata laggetuppe awugee kaddanaakko odettibeenna. Hegaa bollikka, Geeshsha Maxaafaa maaratinne Yihuday oottidobaa Xoossay kasetidi kuuyiis giya qofay maayettokkona. Xoossaa maaraa xeelliyagan Phawuloosi hagaadan giis: “O bollaaninne eesotada ne kushiyaa wottoppa. Haratu nagaran geloppa. Nena, geeshshatettan naaga.” (1Xim 5:22; 3:6​ra gatta xeella.) Kiitettida 12ta akeekan suure dooriyogee Yesuusa keehi qofissido gishshawu, I dooranaappe kase kuuyanabaa eranawu qamma kumettaa ba aawaakko woossiiddi aqiis. (Luq 6:12-16) Yihuday kaddidaagaa gidanaadan Xoossay kasetidi kuuyidaba gidiyakko, hegee Xoossaa kaaletoynne A haaroy issi mala gidennaagaa bessana danddayees; qassi hegee Yihuday oottido nagaraa Ikka hashetanaadan oottana danddayees.

Hegaa gishshawu, Yihuday Yesuusi kiittidoogaa gididi doorettido wode, A wozanan I Yesuusa kaddanaagaa bessiya iita eeshshay mulekka baawa. I ‘marzziyan asa wayssiya camo mittay mokkidi’ bana tunissanaadan eeno giis; hegaa gishshawu, I Xoossaa kaaletuwa gidennan Dabloosa kaletuwa kaalliis; yaatiyogan I kaysonne kaddidaagaa gidiis. (Ibr 12:14, 15; Yoh 13:2; Oos 1:24, 25; Yaaq 1:14, 15; YIHUDAA Paydo 4, xeella.) Hegaa mala iita eeshshata Yihuuday bessiyoga doommido wode, asaa wozanaabaa erana danddayiya Yesuusi I bana aattidi immanaagaa kasetidi yootiis.—Yoh 13:10, 11

Haasayaa (5 daq.)

Kiristtoosa Siiqiyogee Nuuni Xalanaadan Oottees

w23.01 29-30 ¶12-14

¹² Yesuusi hayqqanaappe kase qammi erissiyo ashkkaratussi hagaadan giis: “Sa7an intte waayettana. SHin minnite; taani sa7aa xoonaas.” (Yohaannisa 16:32, 33 nabbaba.) Yesuusi ba morkketi yashissido wode xalanaadaaninne hayqqana gakkanaashin ammanettidi deꞌanaadan maaddidabay aybee? I Yihoowan ammanettiis. Yesuusi bana kaalliyaageetakka hegaa mala paacee gakkanaagaa eridi, Yihooway eta naaganaadan oychchiis. (Yoh. 17:11) Hegee nuuni xala gidanaadan maaddiyoy aybissee? Yihooway nu morkketu ubbaappe mino gidiyo gishshataassa. (1 Yoh. 4:4) Yihooway ubbabaa beꞌees. Nuuni Yihoowan ammanettikko, yashshaa xoonidi xala gidanaadan I maaddanaagaa ammanettoos.

¹³ Armmaatiyaasa Yooseefa leemisuwaa qoppite. Ayhudatu giddon I keehi bonchchettida asa. I Ayhuda xoqqa pirdda keettan, Sanhedirina yame. Gidikkonne, Yesuusi saꞌan haggaaziyo wode Yooseefi xala gidenna. I “Aihudatuyyo yayyido gishshau, asi erennan Yesuusa kaalliyaagaa” gidiyoogaa Yohaannisi yootiis. (Yoh. 19:38) Yooseefi Kawotettaa mishiraachuwaa siyanawu koyikkonne, I Yesuusa ammaniyoogaa harati eranaadan koyibeenna. I Yesuusi erissiyo ashkkara gidiyoogaa harati erikko, eti bana bonchchiyoogaa aggana giidi yayyennan waayi aggana. Gaasoy aybakka gidin, Yesuusi hayqqi simmin “Yooseefi xalidi PHilaaxoosakko biidi, Yesuusa anhaa ekkanau” oychchidoogaa Geeshsha Maxaafay yootees. (Mar. 15:42, 43) Haꞌꞌi Yooseefi Yesuusi erissiyo ashkkara gidiyoogaa haratuppe genttanawu malibeenna.

¹⁴ Yooseefaagaadan neeni asawu yayya eray? Timirtte keettan woy ooso sohuwan neeni Yihoowa Markka gidiyoogaa haratuyyo yootanawu issi issitoo yayyay? Harati nebaa woyganaakko ga hirggada aassiyaagaa gidanawu woy xammaqettanawu mammottay? Hegaa mala qofay neeni loꞌꞌobaa oottiyoogaa digganaadan oottoppa. Wozanappe Yihoowa woossa. Neeni A sheniyaa oottanawu xalatettaa immanaadan A oychcha. Neeni Yihooway ne woosaa zaariyoogaa beꞌiyo wode, kaseppe aaruwan xalanne mino gidana.—Isi. 41:10, 13.

[Tohossa qofata]