Kiristtaanetu Deꞌuwanne Haggaazuwa Shiiquwa Xannaꞌiyo Xuufiyan Odettida Xuufeta
© 2024 Watch Tower Bible and Tract Society of Pennsylvania
ISIINE 1-7
XOOSSAA QAALAN DEꞌIYA ALꞌꞌOBAA MAZAMURE 57-59
Yihooway Ba Asaa Eqettiyageeta Hidootaa Qanxxissees
bt 220-221 ¶14-15
‘Saꞌaa Gaxaa Gakkanaashin’
14 A morkketi A woranaappe kase Isxxifaanoosi xalatettan markkattiis. (Oosuwaa 6:5; 7:54-60) He wode, “gita yedetai” denddin Yesuusi kiittidoogeetuppe attin, Yesuusa kaalliya hara ubbati Yihudaanne Samaariyan laalettidosona. Shin hegee mishiraachchuwa yootiyogaa diggibeenna. Piliphphoosi Samaariya biidi “Kiristtoosabaa asaassi yootiis,” qassi hegee loꞌꞌo ayfiya demissiis. (Oosuwaa 8:1-8, 14, 15, 25) Hegaa bollikka, Oosuwaa 11:19, 20y hagaadan gees: “Isxxifaanoosa bolli gakkida waayiyaa geedon laalettida ammaniyaageeti qaalaa Aihudatu xalaalaappe attin, haraassi issuwaassinne odennan, Pinqqe, Qophphiroosanne Anxxookiyaa gakkanaashin yuuyidosona. Shin Qophphiroosappenne Qareenappe yiida issi issi ammaniya asati Anxxookiyaa biidi, Godaa Yesuusa wonggeliyaa mishiraachchuwaa yootiiddi, Giriike asaassikka yootidosona.” He wode, yedetay Kawotettaa mishiraachchoy aakkanaadan oottiis.
15 Ha wodiyankka kase Sooviyeete Kawotettan hegaara issi malabay haniis. Ubba qassi, 1950 heeran, shaꞌan qoodettiya Yihoowa Markkata Saybeeriya efiidi qachchidosona. Eta dumma dumma kambbiyan qachchido gishshawu, mishiraachchoy darosaa gakkiis. Hegaa keena daro Yihoowa markkati bantta koshshan 10,000 kilo meetiriya biidi sabbakana giyakko, hegawu gidiya miishshaa mule demmana danddayokkona. Shin, kawotettay ba miishshan eta he biittaa gaxaa yeddiis. Issi ishay giidoogaadan, “kawotettaa sunttati bantta huuphen Saybeeriyan deꞌiya shaꞌan qoodettiya wozanaa suure asati tumaa eranaadan oottidosona.”
Ayyaanaaban Alꞌꞌobaa
“Qaaxxennan Minnidi Eqqite”
16 Ne wozanaa mintta. Kawuwaa Daawiti, “Abeet Xoossau, ta wozanai minnidi de7ees” yaagidi yexxido wode Yihoowa siiqiyoogaa mule aggennaagaa yootiis. (Maz. 57:7) Nuussikka Yihoowan mintti ammanettiya mino wozanay deꞌana danddayees. (Mazamure 112:7 nabbaba.) Qommoora abay odettido Booba hegee waati maaddidaakko beꞌa. Geella suuttay koshshikko goꞌettanawu giigissi wottanaagaa I erido wode suuttaa immanaadan oottiya ay hanotaykka deꞌikko, takkennan hosppitaaliyaa aggidi baanaagaa sohuwaara yootiis. Guyyeppe Boobi hagaadan giis: “Taani aynne mammottabeykkenne hirggabeykke.”
17 Boobi suuttaa mule goꞌettennaagaa hosppitaaliyaa gelanaappe adussa wodiyaappe kase kuuyido gishshawu minni eqqiis. Koyruwan, I Yihoowa ufayssanawu keehi koyiis. Naaꞌꞌanttuwan, deꞌuwaanne suuttaa geeshshatettaa xeelliyaagan Geeshsha Maxaafaynne Geeshsha Maxaafaa qofay deꞌiyo nu xuufeti yootiyoobaa loytti xannaꞌiis. Heezzanttuwan, Yihoowa kaaletuwaa kaalliyoogee merinawu goꞌꞌiyoogaa ammaniis. Nuna gakkana danddayiya paacee ayba gidikkonne nuussikka mino wozanay deꞌana danddayees.
ISIINE 8-14
XOOSSAA QAALAN DEꞌIYA ALꞌꞌOBAA MAZAMURE 60-62
Yihooway Nuna Naagees; Qassi Nuussi Saruwanne Woppaa Immees
it-2 1118 ¶7
Gimbbiya
Leemisuwan Goꞌettidoogaa. “Neeni [Yihooway] taayyo qatonne taani ta morkketuppe naagettiyo mino miixaa” giidi Daawiti yexxidoogaadan, Yihoowan ammanettiyageetinne awu azazettiyageeti daro naaguwa demmoosona. (Maz 61:3) A sunttaa birshshettaa eriyageetinne an ammanettidi he sunttawu exatiyageeti mule yayyokkona; gaasoykka “[Yihoowa] sunttai mino gimbbe mala; xillo asi yaa woxxidi saro attana.”—Lee 18:10ra gatta xeella; 1Sam 17:45-47.
it-2 1084 ¶8
Dunkkaaniya
‘Dunkkaanee’ darotoo leemiso hanotan qoncciis. Dunkkaanee issi uri shemppiyonne qohiyabaappe naagetti attiyo soho. (Doo 18:1) Imattaa mokkiyo wogaa maaran, issi uri ba dunkkaaniyan mokkido imattati naaguwanne bonchchuwa demmanaagaa ammanettana danddayoosona. Hegaa gishshawu, Ajjuutaa 7:15y NW, keehi daro asaa bolli Xoossay “ba dunkkaaniya miccanaagaa” yootiyogee eti naaguwanne sarotettaa demmanaagaa qonccissees. (Maz 61:3, 4) Leemiso hanotan Xoossaa machchodan qonccida, Xiyoona, ba naatussi koshshiyabaa giigissana bessiyogaa Isiyaasi yootiis. “Ne dunkkaaniyaa sohuwaa aassa” geetettidi issi odettiis. (Isi 54:2) Yaaniyo gishshawu, A ba naati naagetti attiyo sohuwa aassawusu.
w02 4/15 16 ¶14
Xoossaa Higgeti Nuna Maaddoosona
14 Xoossaa higgee mule laamettennaagee minttettiyaba. Nuuni deꞌiyo ha wayssiya wodetun Yihooway merinaappe merinawu deꞌiya mino zaalla. (Mazamure 90:2) I babaa hagaadan giis: “Taani [Yihooway] laamettikke.” (Milkkiyaasa 3:6) Ubbatoo laamettiya asa qofaappe dumma hanotan, Geeshsha Maxaafan xaafettida Xoossaa maarati ubbaykka ammanttiyageeta. (Yaaqooba 1:17) Leemisuwawu, asaa kahaa xannaꞌiya eranchchati naata seerennan dichchiyogaa daro layttawu minttettiiddi takkidosona, shin guyyeppe amaridaageeti bantta qofaa laammidi bantta zoree bala gidiyogaa ammanidosona. Hegaa xeelliyagan ha alamee kessiyo maaratinne kaaletoti carkkoy yaanne haanne qaattiyobatu mala. Shin, Yihoowa Qaalay mulekka laamettenna. Naata siiquwan waati dichchanaakko xeetan qoodettiya layttawu Geeshsha Maxaafay zoriis. Kiitettida Phawuloosi hagaadan giis: “Aawatoo, intte intte naata Godaa seeraaninne zoriyan dichchiteppe attin, eta hanqqetissoppite.” (Efisoona 6:4) Yihooway kessido maaratun ammanettiyogee tumukka bessiyaba; eti laamettokkona!
Ayyaanaaban Alꞌꞌobaa
w06 6/1 11 ¶6
Mazamure Maxaafaa Shaahotuppe Naaꞌꞌanttoogan Deꞌiya Kulkka Qofaa
62:11. Xoossay issibaa oottanawu hara uraa wolqqay awu koshshenna. I wolqqa ubbawu pultto. ‘Wolqqay Xoossaagaa.’
Haasayaa 5 daqiiqaa
Cuccumaa: Neessi Kaaletoy Imettiyo Wode Yihoowan Ammanetta
7 Yihooway ubbatoo suurebaa oottiyoogaa nuuni wozanappe ammanettoos. SHin I sunttido asatun ammanettiyoogee nuussi metiyaaba gidana danddayees. ‘Yihoowa dirijjitiyan aawatettay deꞌiyoogeeti tumuppe Yihoowa kaaletuwaadan oottiyoonaayye, bantta sheniyaadan oottiyoonaa?’ giidi nuuni qoppana danddayoos. Beni wode deꞌida amaridaageeti hegaadan qoppennan waayi aggana. Mentto 3n odettida taariketa qoppa. Sambbataa higgiyaa bonchchibeenna bitaniyaa dabboy, ‘Muusee bitanee hayqqanaadan pirddanaappe kase tumuppe zoriyaa Yihoowa oychchidee?’ giidi qoppennan aggenna. Daawiti Hiitiyaa Ooriyoona machcheera wodiraa laammiis; Ooriyoona laggee Daawiti kawo gidiyo ba maataa goꞌettidi qixaatiyaappe attiis giidi qoppennan waayi aggana. Nuuni Yihooway ammanettiyo, I saꞌan sunttidoogeetun ammanettana xayikko, Yihoowan ammanettoos gaana danddayennaagee tuma.
8 Yihooway ‘ammanettida wozannaama ashkkaraa’ baggaara ba dirijjitiyawu saꞌaa baggaa ha wodiyan kaalettees. (Maa. 24:45) Koyro xeetu layttan bolla gididi heemmiyaagaadan, ha ashkkaray kumetta saꞌan deꞌiya Xoossaa asaa xomooseesinne gubaaꞌe cimatussi kaaletuwaa immees. (Oosuwaa 16:4, 5 nabbaba.) Qassi cimati he kaaletoy gubaaꞌetun polettanaadan oottoosona. Nuuni dirijjiteenne cimati immiyo kaaletuwaa kaalliyoogan, Yihooway ubbatoo suurebaa oottiyoogaa ammanettiyoogaa bessoos.
9 Cimati kuuyidobaa maayettanawu nuuni issi issitoo metootana danddayoos. Leemisuwawu, mata layttappe ha simmin, daro gubaaꞌeti issippe walahettidosona; hegee amarida gubaaꞌeti hara woradawu laamettanaadan oottiis. Issi issi hanotatun, SHiiquwaa Addaraashati ekkiyoogaa keena asay shiiqanaadan aassiyaageeti hara gubaaꞌiyaa baana mala cimati oychchoosona. Eti nuuni hara gubaaꞌiyaa baanaadan nuna oychchikko, laggetanne so asaa aggidi biyoogee nuuyyo deexxiyaaba gidana danddayees. Cimati aassiya issuwaa issuwaa awa maddabanaakko Yihooway eta kaalettii? Kaalettenna. Qassi hegee nuussi imettiya kaaletuwaa kaalliyoogee nuna metanaadan oottana danddayees. Gidikkonne, cimati hegaa malabaa kuuyiyo wode Yihooway etan ammanettees; nuunikka etan ammanettana koshshees.
10 Cimati kuuyiyoobay nuuni koyiyooba gidenna wodekka, eti kuuyidobaa nuuni maayettana koshshiyoy aybissee? Nuuni maayettiyoogee Xoossaa asaa giddon issippetettay xayennaadan maaddiyo gishshataassa. (Efi. 4:2, 3) Cimati kuuyidobaa ubbaykka banttana ziqqi oottidi azazettiyo wode gubaaꞌeti minnoosona. (Ibraawe 13:17 nabbaba.) Ubbaappe aaruwan, nuussi koshshiyaabaa kunttanaadan Yihooway sunttidoogeetun ammanettidi hashettiyoogan nuuni Yihoowan ammanettiyoogaa bessoos.—Oos. 20:28, NW.
ISIINE 15-21
XOOSSAA QAALAN DEꞌIYA ALꞌꞌOBAA MAZAMURE 63-65
‘Aggenna Ne Siiqoy Deꞌuwappe Keehi Alꞌꞌo’
w01 10/15 15-16 ¶17-18
Xoossaa Siiquwappe Nuna Shaakkanay Oonee?
17 Xoossaa siiqoy inttessi ay keena koshshiyabee? “Aggenna ne siiqoi de7uwaappe lo77iyo gishshau, ta inxxarssai nena bonchchana. Ta de7uwaa laittan taani nena galatana; ta kushiyaa miccada, taani nena woossana” giidi xaafida Daawitaagaadan inttiyo siyettii? (Mazamure 63:3, 4) Xoossaa siiqoynne aara dabbotido dabbotay ha alamiya deꞌoy nuuyyo immana danddayiyo aybippenne aadhdhiyogee qoncce. Leemisuwawu, Xoossaara mata dabbotaa medhdhin beettiya woppaynne ufayssay dureyana danddayiya oosuwa demmiyogaappe aadhdhees. (Luqaasa 12:15) Issi issi Kiristtaaneta Yihoowa kaddiyogaappenne hayqqiyogaappe issuwa dooranaadan oottiya paacee gakkiis. Hegee Naaꞌꞌantto Alamiya Olaa wode Naazeti asaa gurddiyo kambbiyan deꞌiya Yihoowa Markkatuppe darota gakkiis. Qoodan keehi guuttatuppe attin, nu ishantti, koshshikko hayqqanawu eeno giidi, Xoossaa siiquwan deꞌanawu dooridosona. Ammanettidi A siiquwan deꞌiyageeti Xoossay etawu merinaa deꞌuwa immanaagaa ammanettana danddayoosona; hegee qassi alamee nuussi immana danddayennaba. (Marqqoosa 8:34-36) Shin merinaa deꞌuwappekka dariyabay deꞌees.
18 Yihooway baynnan merinawu deꞌiyogee danddayettennaba gidikkonne, nuna Medhdhidaagee baynnan keehi adussa wodiyawu deꞌiyogee ay milatanaakko ane qoppite. Nu deꞌoy hadanne halchchoy baynnaagaa gidana. Ha wurssetta gallassatun Yihooway ba asawu ufayssiya oosuwa immiis. Yaaniyo gishshawu, Halchchiyogan Ooppenne Aadhdhiya Yihooway nuussi merinaa deꞌuwa immiyo wode, ufayssiyanne maaddiya darobata tamaaranaagaanne oottanaagaa ammanettana danddayoos. (Eranchchaa 3:11) Sinttappe shaꞌu layttaa haaruwa wodekka ‘Xoossaa duretettaa, A hayyuwanne A eratettaa’ muleera pilggidi eri wurssana danddayokko.—Roome 11:33.
“Ubbaban Galatite”
4Ubbaappe aaruwan Xoossaa galatiyoogee bessiyaaba. Ayyaanaabaaninne asatettaaban koshshiyaabawu I immidonne ubbatoo immiyo darobaa neeni issi issitoo qoppiyoogee qoncce. (Zaa. 8:17, 18; Oos. 14:17) SHin Xoossaa kehatettaa xallaa qoppiyoogaappe, Xoossay neessinne ne siiqiyoogeetussi immido daro anjjota wotta dentta qoppanawu wodiyaa bazziyoogee loꞌꞌo. Medhdhidaagaa kehatettaa neeni yuushsha qoppiyoogee A wozanappe galatanaadan oottana; qassi I nena ay keena siiqiyaakkonne nashshiyaakko neeni akeekanaadan maaddana.—1 Yoh. 4:9.
Ayyaanaabaa Ubbatoo Wotta Denttada Qoppa
7 Nabbabanawu daro baaxetana koshshenna; shin wotti dentti qoppanawu he qoppiyooban sheekkana koshshees. Nagarancha asay sohuwaara keehi koshshennabaa woy wayssennabaa qoppiyoy hegaassa. Hegaa gishshawu, neeni unꞌꞌettennan woppu giidonne ne qofay shaahettanaadan oottiyaabi darenna saatiyan wotta dentta qoppiyoogee loꞌꞌo. Mazamuraawee ba hiixan qammi xiskkuwaappe beegottiyo wodee wotti dentti qoppanawu injjetiya wode gidiyoogaa akeekiis. (Maz. 63:6) Qoppiyooban bali baynna Yesuusi woppu giida sohoy wotti dentti qoppanawunne woossanawu maaddiyoogaa akeekiis.—Luq. 6:12.
w09 7/15 16 ¶6
Siiquwan Tamaarissiyoogan Yesuusa Leemisuwaa Kaallite
6 Nuuni siiqiyoobaa yootiyoogan ufayttoos. Nuuni dosiyoobaa yootiyo wode, keehippe ufayttidoogaa asay akeekana danddayees. Ubba qassi nuuni siiqiyo uraabaa yootiyo wode hegee qoncciyan beettees. Nuuni he uraabaa eriyoobaa darotoo haratussi yootanau amottoos. Nuuni a sabboos, bonchoosinne ayyo exatoos. Nuuni hegaadan oottiyoy nuugaadan harati he uraanne a eeshshata dosanaadan koyiyo gishshataassa.
Ayyaanaaban Alꞌꞌobaa
w07 11/15 15 ¶6
Harata Minttetteetii?
6 Issi keettaa keexxiyogaappe qoliyogee wayssennaba. Ha leemisoy nu haasayiyo haasayawukka hanees. Nuuni nagaranchcha gidiyo gishshawu ubbaykka baloosinne mooroos. Kawuwa Solomoni hagaadan giis: “Xillobaa xalaalaa oottiiddi, nagara oottennan de7iya asi ha sa7aa bollan baawa.” (Eranchchaa 7:20) Hara asaa balaa akeekiyogeenne he uraa boridi hidootaa qanxxissiyogee wayssennaba. (Mazamure 64:2-4) Hara baggaara qassi, ubbatoo minttettiyabaa haasayiyogee baaxe koyiyaba.
Ootti-besuwa 4 daqiiqaa
Cuccumaa: Yihoowa Markkati Kase “Siyanawu Koyikke” Giida Ura Zaarettidi Haasayissiyoy Aybissee?
ijwfq 51
Yihoowa Markkati Kase “Siyanawu Koyikke” Giida Ura Zaarettidi Haasayissiyoy Aybissee?
Yihoowa Markkati Xoossaanne bantta shooruwa siiqiyo gishshawu, kase “siyanawu koyikke,” giidaageeta gujjin ubba asawu Geeshsha Maxaafaa kiitaa yootanawu koyoosona. (Maatiyosa 22:37-39) Nuuni Xoossaa siiqiyogee A Naꞌawu azazettidi mishiraachchuwa ‘minnidi yootanaadan’ nuna denttettees. (Oosuwaa 10:42; 1 Yohaannisa 5:3) Yaatanawu, beni Xoossay erissidobaa yootiyageetuugaadan nuunikka zaari zaaridi asawu Xoossaa kiitaa yootoos. (Ermmaasa 25:4) Nuuni nu shoorota siiqiyo gishshawu, shemppuwa ashshiya ‘Xoossaa Kawotettaa mishiraachchuwa’ kase siyanawu koyennaageeta gujjin ubba asawu yootanawu baaxetoos.—Maatiyosa 24:14.
Kase siyanawu koyenna asaa soo zaarettidi biyo wode siyanawu koyiya asa darotoo demmoos. Heezzu gaasota beꞌa:
● Asay deꞌiyosaa laammees.
● He son deꞌiya harati siyanawu koyoosona.
● Asaa hanotay laamettees. Alamiya hanotay woy izaawa gakkida issibay he uri kaseegaappe aaruwan ‘ayyaanaabaa saamettidi’ Geeshsha Maxaafaa kiitaa siyanawu koyanaadan oottees. (Maatiyosa 5:3) Haray atto, eqettiyageetikka Phawuloosaagaadan bantta qofaa laammana danddayoosona.—1 Ximootiyoosa 1:13.
Shin nuuni yootiyobaa siyanaadan oonanne wolqqanttokko. (1 PHeexiroosa 3:15) Goynuwara gayttidaagan ubba asaykka bawu bawu kuuyana bessiyogaa nuuni ammanoos.—Zaarettido Wogaa 30:19, 20.
ISIINE 22-28
XOOSSAA QAALAN DEꞌIYA ALꞌꞌOBAA MAZAMURE 66-68
Yihooway Hachchi Hachchi Nu Toohuwa Tookkees
Yihooway Nu Woosaa Waati Zaarii?
15 Nuuni darotoo nu woosawu maalaalissiya hanotan zaaruwaa demmennan aggana danddayoos. Nu woosaa zaaroy saluwan deꞌiya nu Aawawu nuuni ammanettidi deꞌanawu koshshiyaaba. Yaatiyo gishshawu, Yihooway ne woosaa waati zaaridaakko loytta akeeka. Yooko giyo issi michchiyaa Yihooway I woosaa zaaribeennabadan qoppaasu; shin guyyeppe A Yihoowa woossidobaa xaafa oyqqiyoogaa doommaasu. Amarida wodiyaappe simmin, A ba xaafidobaa xeelliyo wode, A dogidobata gujjin, I woosaappe daruwaa Yihooway zaaridoogaa akeekaasu. Yihooway nu woosaa waati zaariyaakko issi issitoo nuuni loytti qoppana koshshees.—Maz. 66:19, 20.
Bantta Naata Banttarkka Dichchiya Yelidaageetussi Qarettite
6Israaꞌeelati goynuwawu shiiqiyo wode yexxiyo geeshsha mazamureta Yihooway ba ayyaanan xaafissiis. He wode Israaꞌeelan deꞌiya amꞌꞌetinne aawu baynna naati Yihooway eta ‘naagiyagaanne’ etawu ‘aawa’ gidiyogaa qonccissiya ayyaanay kaalettin xaafettida he qaalata yexxiyo wode eti ay keena minettidaakko qoppa. (Mazamure 68:5; 146:9) Nuunikka bantta naata banttarkka dichchiyageetussi eta daro layttawu minttettiya qaalata haasayana danddayoos. Uruuto giyo ba naata barkka dichchiya aayyiya naata dichchiyogan meezee deꞌiyo issi aaway 20 layttaappe kase haasayidobaa haꞌꞌikka loytta hassayawusu. I hagaadan giis: “Ne naaꞌꞌu attuma naata loytta dichchaydda deꞌaasa. Minna.” Uruuta hagaadan gaasu: “I hegaadan giidoogee tana keehi minttettiis.” Tumukka, “shonggaara deꞌiya haasayay loꞌꞌo xale,” qassi hegee bantta naata banttarkka dichchiyageeta nu qoppiyogaappe aaruwan minttettana danddayees. (Leemiso 15:4, Konttempperari Inggilish Vershin) Inttekka ba naata barkka dichchiya ura wozanappe galatanaadan oottiya issibaa qoppana danddayeetii?
Aawu Baynna Naatussi Aawa
“XOOSSAI ba de7iyo geeshsha sohuwan, aawi bainna naatussi aawa.” (Mazamure 68:5) Xoossaa Yihooway maaddiyabi baynnaageetussi koshshiyabaa kunttiyogaa xeelliyagan, he keehi minttettiya qaalati ufayssiyabaa tamaarissoosona. Yelidaageeti hayqqido naatussi Yihooway qoppiyogaa I Israaꞌeelatussi immido Higgeekka qonccissees. Geeshsha Maxaafan ‘aawu baynna naatubay’ koyro qonccidoy Kessaabaa 22:22-24na.
Neeyyo Injjetanaadan Yihooway Maaddees
17 Mazamure 40:5 nabbaba. Deriyaa huuphiyaa kiyiya issi uraa halchchoy deriyaa xeeraa gakkiyoogaa. I deriyaa kiyiiddi eqqi ekkidi loꞌꞌiyaabata beꞌiyoogan ufayttanaadan oottiya darobati ogiyan deꞌoosona. Hegaadankka, metuwaa genccanaadan Yihooway nena waati maaddidaakko takki gaada qoppanawu wodiyaa bazza. Omarssi omarssi nena hagaadan oychcha: ‘Hachchi Yihooway tana ayba ogiyan maaddidee? Metoy deꞌishinkka genccanaadan Yihooway tana waati maaddidee?’ Yihooway nena maaddanawu oottidobatuppe baa giishin issibaa neeni yootana danddayiyaakkonne akeeka.
Ayyaanaaban Alꞌꞌobaa
Metuwaa Pagalanawu Maaddiyaabaa
Hagaappe kase ibaa denttido Delfiinokka boorasee hegaadan baaxeyiis. Ibay ubbay xayi simmin A, “Issippe ufayttidi deꞌiya asaappe dumma tarkka deꞌiyaabadan qoppaas. Taani keehi boorasaas” yaagaasu. O maaddida issi xiqisee Mazamure 68:6n deꞌiya, “Xoossai barkka de7iyaageetussi keettaa asaa [woykko keettaa] immees” yaagiyaagaa. A hagaadan gaasu: “He xiqisee deꞌiyo keettaabaa yootennaagaa haꞌꞌi eraas. Xoossay tumu laggetanne Yihoowa siiqiya haratuura siiqettiyoonne woppu giidi deꞌiyo ayyaanaabaa keettaa nuuyyo immiyoogaa akeekaas. SHin Yihoowaara dabbotaa minttennan haratuura dabbotaa minttana danddayennaagaakka akeekaas. Mazamure 37:4y hegawu tana maaddiis. Xiqisee, ‘GODAN ufaitta; i neeyyo ne wozanaa amuwaa immana’ yaagees.”
ISIINE 29–NAASE 4
XOOSSAA QAALAN DEꞌIYA ALꞌꞌOBAA MAZAMURE 69
Yesuusa Deꞌuwan Polettidabata Mazamure 69y Kasetidi Woygi Yootidee?
Masiyaa Naagidosona
17 Masiyaa asay coo ixxana. (Maz. 69:4) Yesuusi, “Tana ixxiyaagee ta Aawaakka ixxees. Ooninne oottibeenna oosuwaa eta giddon taani oottabeennabaa gidiyaakko, etau nagara gidennan attana; shin ha77i eti taani oottido oosuwaa be7idi, tanakka ta Aawaakka ixxidosona. SHin eta higgiyan, ‘Tana coo ixxidosona’ geetettidi xaafettidaagee polettana mala, hagee haniis” giidoogaa kiitettida Yohaannisi xaafiis. (Yoh. 15:24, 25) Ha sohuwan “Higgiyaa” geetettidabay he wode deꞌiya Geeshsha Maxaafaa. (Yoh. 10:34; 12:34) Wonggeliyan xaafettidabay asay Yesuusa ixxidoogaa, ubba Ayhuda haymaanootiyaa kaalettiyaageeti a keehi ixxidoogaa qonccissees. Hegaa bollikka, Kiristtoosi, “Sa7ai inttena ixxanau danddayenna; shin taani sa7aa oosoi iita gidiyoogaa markkattiyo gishshau, tana ixxees” yaagiis.—Yoh. 7:7.
Tumu Goynuwau Mishettiyaagaa Gida
7 Yesuusi ay keena mishettiyaakko a deꞌuwan gakkida issibay loyttidi qonccissees. Hegee hanidoy 30 M.Ln, Paasikaa Baalaa wodiyan, i haggaazuwaa doommido heeraana. Yesuusinne i erissiyo ashkkarati Yerusalaame biidi, beetamaqidasiyan “miizzaa, dorssaanne haraphphiyaa baizziya asaa” demmidosona; “qassi harati bantta oidiyan uttidi, miishshaa laammiyaageeta” demmidosona. Yesuusi ay oottidee, qassi hegee erissiyo ashkkaratuyyo aybi siyettanaadan oottidee?—Yohaannisa 2:13-17 nabbaba.
8 Yesuusi he wode giidobaynne oottidobay Daawiti, “Taani ne keettau mishettiyo mishoi tana tamadan xuuggees” yaagidi yexxido hiraagaa erissiyo ashkkarati hassayanaadan oottiis. (Maz. 69:9) Aybissi? Hegee Yesuusi oottidobay metoynne qohoy a bolli gakkanaadan oottiyaaba gidiyo gishshataassa. Beetamaqidasiyan maatay deꞌiyoogeeti, giishin qeeseti, higgiyaa tamaarissiyaageetinne harati woriyaa demmiyo he bessenna zalꞌꞌiyaa zalꞌꞌissoosona. Yesuusi eta halchuwaa qoncciyaa kessiyoogaaninne guutta wodiyau teqqiyoogan, he wode haymaanootiyaa kaalettiyaageetuura eqettiis. Erissiyo ashkkarati he hanotaa akeekidoogaadan, i ‘Xoossaa keettau’ woy tumu goynuwau mishettiyo mishoy qoncciis. SHin, mishettiyoogaa giyoogee woygiyoogee? Hegee eesotiyoogaappe dummatii?
g95 10/22 31 ¶4
Wozanay Meqqido Asi Hayqqana Danddayii?
“Cashshai ta wozanaa paxennaadan menttiis” geetettidi hiraagay odettido gishshawu, Yesuus Kiristtoosi hayqqidoy A wozanay meqqido gishshataassa giidi issoti issoti yootoosona. (Mazamure 69:20) He qaalata sittan akeekana koshshii? Hegaadan gidana danddayees. Ayssi giikko, Yesuusi hayqqanaappe kase deꞌiya saatetun asatettan waayettiyogaa xalla gidennan qofankka keehippe unꞌꞌettiis. (Maatiyosa 27:46; Luqaasa 22:44; Ibraawe 5:7) Hegaa bollikka, wozanay meqqiis geetettidoogee Yesuusi hayqqi simmin sohuwara tooran A caddin “suuttainne haattai” goggidoogaa qonccissana danddayees. Wozanay woy gita suuttaa xaphoy qohettikko, suuttay wozanay deꞌiyo heeran gukkana danddayees. Hegee A caddido sohuwara ‘suuttaanne haattaa’ milatiyabay gogganaadan oottana danddayees.— Yohaannisa 19:34.
it-2 650
Cammiya Qumaa
Masee “cammiya qumaa” maanaadan awu imettanaagee hiraagan odettiis. (Maz 69:21) Yesuusi kaqettanaappe kase, geella eti awu waayee siyettennaadan oottees giidi ciyyiya walakkido woyne eessaa I uyanaadan immin ganxxi xeellidi uyennan ixxido wode hegee polettiis. Maatiyosa 27:34y he hiraagaa poluwabaa yootiiddi kiho·leʹ (ciyyiya) giyo Giriiketto qaalaa goꞌettiis, Mazamure 69:21n Giriiketto Septujenttiyankka he qaalay deꞌees. Shin, Marqqoosa Wonggelee ixaanaa walakkidoogaa yootees. (Mr 15:23) Hegaappe denddidaagan “cammiya qumay” woy ‘ciyyee “ixaanaa” geetettidikka odettiis. Woy qassi he jallissiya ushshay, ciyyeekka ixaanaykka deꞌiyogaa gidana danddayees.
Ayyaanaaban Alꞌꞌobaa
w99 1/15 18 ¶11
Ammanettida Kushiya Pude Denttidi Woossite
11 Daro asati bantta koyiyoba xallawu woossoosona; shin nuuni nu Xoossaa Yihoowa siiqiyaba gidikko buzonne asaa sinttan woossiyo wode A galatananne sabbana koshshees. Phawuloosi “Xoossaa intte woossiyo woosa ubban a keehi galatiiddi, inttena koshshiyaabaa ubbau woossiteppe attin, issibaukka hirggoppite. Qassi asa eratettaa ubbaappe aadhdhiya Xoossaa sarotettai intte wozanaanne intte qofaa Godaa Yesuus Kiristtoosa baggaara naagana” giidi xaafiis. (Piliphphisiyuusa 4:6, 7) Ee, nuuni minttidi woossiyogaanne oychchiyogaa xalla gidennan, ayyaanaabaaninne asatettaaban Yihooway nuussi immido anjjuwa gishshawu A galatana koshshees. (Leemiso 10:22) Mazamuraawee: “Xoossaassi neeni immiyo yarshshoi galata gido; Ubbaappe Xoqqiya Xoossaassi ne shiiquwaa gatta” giidi yexxiis. (Mazamure 50:14) Qassi Daawiti yexxido woosa mala yettatun ha ufayssiya qaalati deꞌoosona: “Taani Xoossaa sunttaa yettan galatana; galataa imuwan a gitayana.” (Mazamure 69:30) Nuunikka asaa sinttaaninne buzo woossiyo wode hegaadan oottana koshshees.
NAASE 5-11
XOOSSAA QAALAN DEꞌIYA ALꞌꞌOBAA MAZAMURE 70-72
Xoossaa Wolqqaabaa “Yiya Yeleta Ubbaassi” Yootite
w99 9/1 18 ¶17
Yelagatoo—Intte Akeekaa Abbiya Loohissite!
17 Yelagati Seexaanaa piriyappe attanawu gita xalatettan banttappe koyettiyabaa ubbatoo minnidi oottana koshshees. Issi issitoo, intte laggetuura xalla gidennan kumetta alamiyarakka intte maayettennabadan inttiyo siyettana danddayees. Mazamuraawee Daawiti hagaadan giidi woossiis: “Abeet Ubbaa Haariya GODAU, neeni taani ufaissan naagiyoogaanne ta yelagatettaa wodiyaappe doommada, taani ammanettiyoogaa gidadasa. Abeet Xoossau, neeni ta yelagatettaappe doommada tana tamaarissadasa. Ha77i gakkanaassi taani ne garamissiya oosuwaabaa yootais.” (Mazamure 71:5, 17) Daawiti xalatettan erettida asa. Shin I xalatettaa bessiyogaa doommidoy awudee? Yelagatettan doommiis. I Gooliyada woridi erettida asa gidanaappe kasekka, Daawiti gaammuwanne beeriya woridi ba aawaa dorssata ashshiyogan gita xalatettaa bessiis. (1 Sameela 17:34-37) Gidoppe attin, Daawiti “ta yelagatettaa wodiyaappe doommada, taani ammanettiyoogaa gidadasa” giidi I xalatettan oottido ubbabawu Yihoowa galatiis. Daawiti Yihoowan ammanettidoogee, I bana gakkida meto ubbaa xoonanaadan maaddiis. Neenikka Yihoowan ammanettikko ‘ha saꞌaa xooniyo’ xalatettaanne minotettaa I neessi immana.—1 Yohaannisa 5:4.
g04 10/8 23 ¶3
Cimidaageeta Nuuni Waati Maaddana Koshshii?
Mazamuraawee hagaadan woossiis: “Taani cimido wodiyan tana oloppa; ta wolqqai ixxido wodiyan tana aggoppa.” (Mazamure 71:9) Geella eti banttana aybanne maaddenna asadan xeelliyo wodekka, Xoossay bawu ammanettida ashkkarata ‘olibayenna.’ Mazamuraawee Yihooway bana olibayidobadan qoppibeenna; yaatiyogaappe I cimi cimi biyo wodekka, an ammanettana koshshiyogaa akeekiis. Hegaadan ammanettiyageeta eta deꞌo laytta ubban maaddiyogan Yihoowaykka etawu ammanettees. (Mazamure 18:25) Darotoo hegaa mala maaduwa nu ishanttuppenne michchonttuppe demmoos.
Metiya Gallassati Yeennan Deꞌishin Yihoowau Haggaaziyoogaa
4Intte intte deꞌuwan darobaa beꞌida gastta asa gidikko, ‘Taassi haꞌꞌi wolqqaynne minotettay deꞌishin ta deꞌuwan ay oottana danddayiyaanaa?’ yaagidi intte huuphiyaa oychana danddayeeta. Intte intte deꞌuwan darobaa beꞌida Kiristtaane gidiyo gishshau, issi issibaa oottanau inttessi haratuugaappe injjetees. Intte Yihoowappe tamaaridobaa yelagatussi yootana danddayeeta. Xoossau intte haggaaziyo wode hanidabaa yootiyoogan harata minttettana danddayeeta. Kawuwaa Daawiti yaatiyo qaadaa demmanau woossiis. I hagaadan giis: “Abeet Xoossau, neeni ta yelagatettaappe doommada tana tamaarissadasa. . . . Abeet Xoossau, ne wolqqaanne ne minotettaa yiya yeleta ubbaassi yootana gakkanaassi, taani cimada puulummikkokka tana aggoppa.”—Maz. 71:17, 18.
5Intte daro layttan demmido aadhida eratettaa haratussi waatidi yootana danddayeetii? Xoossau haggaaziya yelagata minttettanau intte soo shoobbidi etaara wodiyaa aattana danddayeetii? Eti inttenaara haggaazanaadan shoobbidi Yihoowayyo haggaaziyoogan intte ufayttiyoogaa eti akeekanaadan oottana danddayeetii? Beni wode deꞌida Eelihu, “Cimati haasayona; bantta daro laittan demmido aadhdhida eratettaa tamaarissona” yaagiis. (Iyy. 32:7) Kiitettida PHauloosi gastta Kiristtaane maccaasati haasayiyoobaaninne oottiyooban harata minttettanaadan zoriis. I, “Cima maccaasai . . . lo77obaa tamaarissiyaagaa gidanau bessees” yaagiis.—Tii. 2:3.
Ayyaanaaban Alꞌꞌobaa
it-1 768
Efiraaxiisa
Israaꞌeelatussi Imettida Biittaa Zawaa. Xoossay Abrahaamaara haasayido wode, “Gibxxe SHaafaappe doommidi Efiraaxiisa giyo gita shaafaa gakkanaassi” deꞌiya biittaa A zerettawu immanawu maaciis. (Doo 15:18) Xoossay hegaa Israaꞌeelaa asawukka zaarettidi yootiis. (Kes 23:31; Zaa 1:7, 8; 11:24; Yaa 1:4) Koyro Hanidabaa Odiya 5:9y Daawiti haaranaappe kase amarida Roobeela zareti “Efiraaxiisa SHaafaa gakkanaashin tanggaccida bazzuwan” deꞌidoogaa yootees. Shin, “Gala7aadeppe arshsho baggaara” Efiraaxiisa shaafaa gakkanawu 800 kilo meetiriya keenaa haakkees. (1Odi 5:10) Yaatiyo gishshawu, Roobeela zareti Galaꞌaadeppe arshsho baggaara Sooriya Bazzuwa gakkanawu bantta zawaa aassennan aggokkona; qassi he bazzoy Efiraaxiisa shaafaa doonaa gakkees. Yaaniyo gishshawu, Yihooway gelido qaalay Daawitanne Solomona haaruwa wode kumetta hanotan polettidaba milatees; he wode Israaꞌeelatu biittaa zaway Zoba giyo Armeene kawotettaa gujjidi Efiraaxiisa shaafaa doonaa gakkidoogee qoncce; qassi hegee huuphessa baggaara Sooriya pinniyo sohuwa.—2Sam 8:3; 1Kaw 4:21; 1Odi 18:3-8; 2Odi 9:26.
Haasayaa 5 daqiiqaa
Cuccumaa: Yihoowa Markkati Bantta Ammaniyobatuppe Amaridaageeta Laammidoy Aybissee?
ijwfq 49
Nu ammaniyobawu denddoy Geeshsha Maxaafaa; yaatiyo gishshawu Geeshsha Maxaafay tamaarissiyobaa xeelliyagan oorattabaa akeekiyo wode, nu ammaniyobaa laammoos.a
Hegaadan laammiyogee Leemiso 4:18n deꞌiya “xillotu ogee gallassai seetana gakkanaashin, gujji gujji poo7iya maallado xalqqiyaa mala” giya Geeshsha Maxaafaa maaraara maayettees. Awa ayfiya pooꞌoy gujji gujji biyo wode heeran deꞌiyabay qoncci beettiyogaadan, Xoossay Geeshsha Maxaafan deꞌiya tumaa ba keerido wodiyan ba asawu gujji gujji qonccissees. (1 Pheexiroosa 1:10-12) Geeshsha Maxaafan kasetidi odettidaagaadan, ‘wurssettaa wodiyan’ Xoossay hegaa eesoyiis.—Daaneela 12:4.
Nuuni akeekidobaa hegaadan laammidoogan maalaalettana woy hanqqettana koshshenna. Beni wode Xoossaa ashkkaratikka eti balan qoppidobaa akeekidi bantta xeelaa laammido wodeti deꞌoosona.
● Muusee Israaꞌeelata laꞌa kessanawu Xoossay keerido wodiyappe 40 layttaa kasetidi qoppiis.—Oosuwa 7:23-25, 30, 35.
● Masiya hayquwanne dendduwa xeelliyagan kasetidi odettida hiraagaa kiitettidaageeti akeekibeenna wodee deꞌees.—Isiyaasa 53:8-12; Maatiyosa 16:21-23.
● Beni Kiristtaanetuppe amaridaageeti ‘Yihoowa gallassaabaa’ balan qoppido wodee deꞌees.—2 Tasalonqqe 2:1, 2.
Xoossay eti bala qofaa giigissanaadan maaddiis; qassi nunakka hegaadan ubbatoo maaddanaadan woossoos.—Yaaqooba 1:5.
[Tohossa qofaa]
a Geeshsha Maxaafaabaa akeekidi nuuni laammidobata genttanawu koyokko. Hegeeta duuqqidi wottoosinne nu xuufetun kessoos. Leemisuwawu, wachtawur onlayn laybreeriyan Amaarattuwan “Nuuni Kase Akeekidoban Laamettidabaa” giya huuphe yohuwa xeella.
NAASE 12-18
XOOSSAA QAALAN DEꞌIYA ALꞌꞌOBAA MAZAMURE 73-74
Xoossawu Haggaazennaageeta Qanaatiyogaa Nu Doommikko Waatana Danddayiyoo?
‘Hidootaa Qanxxidaageeta Yihooway Ashshees’
14 Mazamure 73 xafidaagee Leewa zare. Hegaa gishshawu, Yihoowawu goynniyo sohuwan haggaaziyo gita maatay awu deꞌees. Gidikkonne, I ba deꞌuwan hidootaa qanxxido wodee deꞌees. Aybissi? I iitabaa oottana koyido gishshataassa gidennan, eti aagaappe loꞌꞌo deꞌuwaa deꞌiyaaba ayyo milatido gishshawu iita asata qanaatiis. (Maz. 73:2-9, 11-14) Eti dure, ishalo deꞌuwaa deꞌiyaageetanne aynne unꞌꞌettennaageeta milatoosona. Leewa zaree hegaa beꞌido wode keehi hidootaa qanxxidi hagaadan giis: “Taani ta wozanaa geeshsha oottidoogeenne taani ta xillotettaa bessanau ta kushiyaa meecettidoogee tumuppe mela.” Hegee I Yihoowawu goynniyoogaa agganaadan oottana danddayiyoogee tuma.
‘Hidootaa Qanxxidaageeta Yihooway Ashshees’
15 Mazamure 73:16-19, 22-25 nabbaba. He Leewa zaree “Xoossaa geeshsha sohuwaa [geliis].” I haratuura Yihoowayyo goynniyo Xoossaa keettan, woppu gaana, loꞌꞌobaa qoppananne ba hanotaa xeelliyaagan woossana danddayees. Hegaappe denddidaagan, ba qofay bala gidiyoogaanne hegee wurssettan Yihoowaappe bana duuttana danddayiyoogaa akeekiis. Qassi iitati “hallixxiya sohuwan” deꞌiyoogaanne ‘issoy attennan mule wuranaagaa’ I akeekiis. Leewa zaree qanaatiyoogaanne hidootaa qanxxiyoogaa agganawu Yihooway qoppiyoogaadan qoppana koshshiis. I hegaadan oottido wode zaarettidi unꞌꞌettibeenna; qassi ufayttiis. I, “Taani [Yihoowappe] attin sa7an harabaa aibanne amottikke” yaagiis.
16 Nu tamaariyoobaa. Nuuni ishalo deꞌuwaa deꞌiyaaba milatiya iita asaa mule qanaatana koshshenna. Eta ufayssay takkennan xayiyaagaa; qassi etikka merinawu xayana. (Era. 8:12, 13) Nuuni eta qanaatikko, hidootaa qanxxana; qassi Yihoowaara dabbotido nu dabbotay duuxxana. Hegaa gishshawu, neeyyo Leewa zariyaagaadan siyettiyoogaa doommikko, I oottidoogaadan ootta. Xoossay siiquwan zoriyoobaa siya; qassi Yihoowa sheniyaa oottiyaageetuura laggeta. Neeni Yihoowa aybippenne aaruwan siiqiyo wode tumu ufayssaa demmana. Qassi ‘tumu deꞌuwawu’ efiyaa ogiyaappe kiyennan deꞌana.—1 Xim. 6:19.
Ammanuwan Muuse Leemisuwaa Kaalla
5 Neeni ‘nagaran guutta wodiyau ufayttiyoogaa’ waana eqettana danddayay? Nagaran ufayttiyoogee guutta wodiyaassa gidiyoogaa dogoppa. “Ha sa7ainne ha sa7an asi amottiyo ubbabai” aadhiyaaba gidiyoogaa ammanuwan akeeka. (1 Yoh. 2:15-17) Ba nagaraappe simmenna asay sinttappe waananaakko qoppa. Eti “hallixxiya sohuwan” deꞌoosona, qassi ‘akeekennan xayana.’ (Maz. 73:18, 19) Nagaraa oottanau paacettiyo wode, ‘Taani sinttappe waananau koyiyaanaa?’ gaada nena oycha.
Aybinne Neeni Bonchettennaadan Diggana Mala Oottoppa
3 Mazamuraawee Yihooway ba ushacha kushiyaa oyqqidi bana tumu bonchuwau efaanaagaa ammanettiyoogaa yootiis. (Mazamure 73:23, 24 nabbaba.) Yihooway hegaa oottiyoy ayba ogiyaanee? Yihooway bantta huuphiyaa kawushshidi bau haggaaziyaageeta daro ogiyan bonchees. Ba sheniyaa eranaadan oottiyoogan eta anjjees. (1 Qor. 2:7) I ba qaalaa siyiyaanne bau azazettiya asati banaara dabbotanaadan oottiyoogan eta bonchees.—Yaaq. 4:8.
4 Yihooway nuuni asau mishiraachuwaa yootanaadan oottiyoogankka nuna bonchees. (2 Qor. 4:1, 7) Nuuni mishiraachuwaa yootiyoogan Yihoowa sabbiyo wode, appe bonchuwaa demmoos; qassi harata maaddoos. Yihooway, “Tana bonchchiyaageeta taani bonchchana” yaagiis. (1 Sam. 2:30) Hegaa mala asati Yihoowa sinttan loꞌꞌo sunttay deꞌiyoogeeta gidiyoogan bonchettoosona; qassi Xoossau haggaaziya haratikka eta kehaban denttana danddayoosona.—Lee. 11:16; 22:1.
5 ‘GODAN ufayssaa wottidi, a ogiyaa naagiyaageeti’ sinttappe demmanabay aybee? Geeshsha Maxaafay eti demmanabaa hagaadan gees: “Neeni biittaa laattana mala, i [Yihooway] nena gitayana. Iita asati xoqollettidi xayishin, neeni be7ana.” (Maz. 37:34) Eti merinau deꞌiyo zawi baynna bonchuwaa demmanau hidootoosona.—Maz. 37:29.
Ayyaanaaban Alꞌꞌobaa
w06 7/15 11 1
Mazamure Maxaafaa Shaahotuppe Heezzanttoogan Deꞌiya Kulkka Qofaa
74:13, 14—“Lewaataana” huuphiya Yihooway qoxxidoy awudee? ‘Gibxxe kawuwa Paarooni,’ ‘Nayle Shaafaa giddon zinꞌꞌida, keehi gitanne yashshiya doꞌaa’ geetettiis. (Hizqqeela 29:3) Lewaataana giyogee mino gidida Paaroona asata qonccissennan aggenna. (Mazamure 74:14) Lewaataana huuphee qoxettidoogee Yihooway Israaꞌeelata Gibxxe aylletettaappe laꞌa kessido wode Paaroonanne A wotaaddarata xayssidoogaa bessiyaba gidennan aggenna.
Haasayaa 5 daqiiqaa
Cuccumaa: Haymaanooteti Ubbay Loꞌꞌoo?
ijwbq 89
Haymaanooteti Ubbay Issi Malee? Eti Ubbay Xoossaakko Gattiyoonaa?
Geeshsha Maxaafay yootiyoobaa
CHii, haymaanooteti ubbay issi mala gidokkona. Geeshsha Maxaafay Xoossaa ufayssenna daro haymaanooteti deꞌiyoogaa bessees. He haymaanooteti naaꞌꞌawu shaahettoosona.
1: Eeqa xoossatussi goynniyoogaa
Eeqa xoossatussi goynniyoogee “hada,” ‘pattennabanne maaddennaba’ gidiyoogaa Geeshsha Maxaafay yootees. (Ermmaasa 10:3-5; 16:19, 20) Xoossaa Yihooway beni Israaꞌeela deriyaa hagaadan giidi azaziis: “Taappe attin, hara xoossassi goinnoppa.” (Kessaabaa 20:3, 23; 23:24) Israaꞌeelati hara xoossatussi goynnido wode, Yihoowa “hanqqoi eta bollan eexxi kiyiis.”—Qoodaabaa 25:3; Wogaabaa 20:2; Daannata 2:13, 14.
Xoossay haꞌꞌikka ‘xoossata giyo’ eeqatussi goynniyoogaa hegaadan xeellees. (1 Qoronttoosa 8:5, 6; Galaatiyaa 4:8) I baayyo goynnanawu koyiyaageeti worddo haymaanootiyaa kaalliyaageetuura zuppetennaadan, “eta giddoppe kiyite; etappe shaahettite” giidi azaziis. (2 Qoronttoosa 6:14-17) Haymaanooteti ubbay issi mala gidiyaabanne eti ubbay Xoossaakko gattiyaaba gidikko, Xoossay ayssi hegaadan azazanee?
2: Tumu Xoossay koyenna ogiyan awu goynniyoogaa
Israaꞌeelati issi issitoo, eeqa goynuwaa ammanuwaadaaninne meeziyaadan Xoossawu goynnidosona; shin eti hegaadan tumu goynuwaa worddo goynuwaara walakkidoogaa Yihooway shenetiis. (Kessaabaa 32:8; Zaarettido Wogaa 12:2-4) Yesuusi saꞌan deꞌiyo wode, haymaanootiyaa kaalettiyaageeti Xoossawu goynnido ogee bala gidiyoogaa minttidi yootiis. Eti Xoossawu goynniyaaba milatikkonne, cimmiyaageeta gidiyoogaa bessidosona; eti ‘pirddaa, maarotettaanne xillotettaa mala, higgiyan deꞌiya keehi koshshiyaageeta aggi bayidosona.’—Maatiyoosa 23:23.
Hegaadankka, ha wodiyan tumaa kaalliya haymaanoote xallay Xoossaakko gattees. He tumay Geeshsha Maxaafan deꞌees. (Yohaannisa 4:24; 17:17; 2 Ximootiyoosa 3:16, 17) Geeshsha Maxaafaara maayettennabaa tamaarissiya haymaanooteti asay Xoossaappe haakkanaadan oottoosona. Sillaasiyaa, shemppoy hayqqenna, qassi merinawu qaxxayettiyoogaa giyoogeetu mala, asay Geeshsha Maxaafan deꞌees giidi qoppiyo daro timirtteti eeqaa goynuwaappe yiidosona. Hegaa malabaa tamaarissiya goynoy “mela” woy maaddennaagaa; ayssi giikko, Xoossay koyiyoobaa haymaanoote wogan laammiis.—Marqqoosa 7:7, 8.
Haymaanootetu cimuwaa Xoossay shenetees. (Tiitu 1:16) Asay Xoossaakko shiiqanaadan maaddanawu issi haymaanootee, woga xallaa kaalliyoogaa aggidi asay bantta deꞌuwan laamettanaadan oottana bessees. Leemisuwawu, Geeshsha Maxaafay hagaadan gees: “Ba inxxarssaa naagennan bana cimmiiddi, bau Xoossaa ammaniyoobaa milatiyo urai de7ikko, a ammanoi mela. Xoossaa Aawaa sinttan pokkoi bainna geeshsha ammanoi hagaa; hegee augee giikko, aaya aawi bainna naatanne waayettiya am77eta maaddanaagaanne sa7aa nagaraa qitaappe ba huuphiyaa naaganaagaa.”—Yaaqooba 1:26, 27.
NAASE 19-25
XOOSSAA QAALAN DEꞌIYA ALꞌꞌOBAA MAZAMURE 75-77
Otorettoppite—Aybissi?
Xillotunne Iitatu Dummatettaa Akeeka
4 Daroti banttananne miishshaa siiqiyaageeta gidanaagaa yooti simmidi, PHawuloosi asati ceeqettiyaageeta, ayyiyaageetanne otoruwan sugettiyaageeta gidanaagaakka yootiis; ha eeshshati asay bawu deꞌiya eraa, qottaa, duretettaa woy aannisaa gaasuwan haratuppe aadhdhiyaabadan darotoo qoppiyoogaa bessiyaaba. Hegaa mala eeshshay deꞌiyo asati nashettanawunne sabettanawu keehi koyoosona. Issi eranchchay hegaa mala asa xeelliyaagan, “A wozanaa giddon I A sinttan goynniyo guutta yarshsho sohoy deꞌees” yaagiis. Likkiyaappe aattidi otorettiyoogee sheneyiyaaba gidiyo gishshawu, otorettiya uraykka harati otorettiyo wode dosennaagaa issoti issoti yootoosona.
5 Otoroy Yihoowa sheneyiyaaba gidiyoogee qoncce. I “karidi xeelliya aifiyaa” ixxees. (Lee. 6:16, 17) Otoroy issi uri Xoossaakko shiiqennaadan diggees. (Maz. 10:4) Hegee Dabloosa eeshsha. (1 Xim. 3:6) SHin, Yihoowayyo ammanettida ashkkaratuppe amaridaageetikka otorettidoogee azzanttiyaaba. Yihudaa kawoy Ooziyaani daro layttawu ammanettiis. “SHin Ooziyaani minnido wode otorettiis; otoroi A kunddettau kaalettiis. Ooziyaani GODAA ba Xoossaa naaqqiis; I ixaanaa cuwayiyo saaxiniyan ixaanaa cuwayanau GODAA Beeta Maqidasiyaa geliis” yaagidi Geeshshaa Maxaafay yootees. Guyyeppe, Kawuwaa Hizqqiyaasikka guutta wode xallawu gidikkonne, otorettiis.—2 Odi. 26:16; 32:25, 26.
Yesuusi Oottido Maalaalissiyaabatuppe Ay Tamaariyoo?
11 Yesuusi haattaa woyne eessawu laammido maalaalissiyaabaappe nuuni ay tamaariyoo? Nuna ziqqi oottana koshshiyoogaa tamaaroos. Yesuusi maalaalissiyaabaa oottido gishshawu ceeqettibeenna; I oottido aybiininne mule ceeqetti erenna. SHin I darotoo bana ziqqi oottidi ba Aawaa bonchchiisinne sabbiis. (Yoh. 5:19, 30; 8:28) Nuuni ubba wode nuna ziqqi oottidi Yesuusa leemisuwaa kaallikko, nu oottidoban ceeqettokko. Nuuni Yihoowa haggaazuwan oottiyoobay aybanne gidin, nunan gidennan, awu oottanaadan nuussi maataa immida nu Xoossan ceeqettiyaageeta gidoos. (Erm. 9:23, 24) Nuuni A bonchchiyoogee bessiyaaba. Nuuni Yihoowa maadoy baynnan loꞌꞌobaa aybanne mule oottana danddayokko.—1 Qor. 1:26-31.
12 Yesuusaagaadan nuna ziqqi oottana danddayiyo hara ogiyaa beꞌa. Ha hanotaa qoppa: Issi cimay gubaaꞌiyawu oottiyaagaa gidida issi yelagay koyro haasayiyo dere haasayaa giigettanaadan maaddiyoogan daro wodiyaa wurssiis. He cimay A maaddido gishshawu, he yelaga ishay gubaaꞌiyaa minttettiya loꞌꞌo haasayaa haasayiis. SHiiquwaappe simmin, issi uri he cimaakko yiidi, “Yelaga ishay keehi loꞌꞌo haasayaa haasayiis” yaagiis. He cimay ‘Ee, taani A maaddiyoogan daro wodiyaa wurssaas’ gaana koshshiiyye, I bana ziqqi oottidi, ‘Ee, I keehi loꞌꞌo haasayaa haasayiis’ gaana koshshii? Nuuni nuna ziqqi oottikko, haratussi oottido loꞌꞌobaa gishshawu bonchchuwaa ekkana koshshenna. Nuuni oottiyoobaa Yihooway beꞌiyoogaanne nashshiyoogaa eriyo gishshawu ufayttoos. (Maatiyoosa 6:2-4ra gatta xeella; Ibr. 13:16) Nuuni Yesuusaagaadan nuna ziqqi oottiyo wode Yihooway ufayttanaagee qoncce.—1 PHe. 5:6.
Ayyaanaaban Alꞌꞌobaa
w06 7/15 11 ¶3
Mazamure Maxaafaa Shaahotuppe Heezzanttuwaninne Oyddanttuwan Deꞌiya Kulkka Qofata
76:10—“Asaa hanqqoi” Yihooway galatettanaadan waati oottana danddayii? Nuuni Xoossaa ashkkarata gidiyogaa gaasuwan asay nu bolli hanqqettanaadan I paqqadikko, hegee loꞌꞌobaa demissana danddayees. Nuna gakkiya ay metoynne amarida ogiyan nuna loohissana danddayees. Nuna lohissana dandddayiyagaappe aaro metoy nu bolli gakkanaadan Yihooway paqqadenna. (1 Pheexiroosa 5:10) ‘Asaa hanqqoy bessiyagaappe aadhdhennaadan Xoossay teqqees.’ Hayqqanaadan oottiya metoy nuna gakkikko shin? Hegeekka Yihoowa galatissana danddayees; ayssi giikko, nuuni ammanettidi gencciyogaa beꞌiyageeti Yihoowa sabbana danddayoosona.
NAASE 26–MASQQALA 1
XOOSSAA QAALAN DEꞌIYA ALꞌꞌOBAA MAZAMURE 78
Ammanettibeenna Israaꞌeelatu Mala Gidennaadan Naagettite
w96 12/1 29-30
“Beni Wodiya Hassayite”—Aybissi?
Israaꞌeelati darotoo dogiyogan nagaraa oottidogee azzanttiyaba. Hegee ay kaalettidee? “Eti zaari zaaridi, Xoossaa paaccidosona; Israa7eela Geeshshaa hanqqetissidosona. Eti a wolqqaabaa dogidosona; i eta morkketuppe wozido gallassaa . . . hassayibookkona.” (Mazamure 78:41, 42) Eti Yihoowa azazota zaari zaaridi dogidoogee, eti ixettanaadan oottiis.—Maatiyosa 21:42, 43.
Mazamuraawee hagaadan giidoogee hegaa loytti qonccissees: “GODAU, ne oosota taani qoppana. Ee; neeni beni wode oottido maalaalissiyaabata ubbaa taani hassayana. Neeni oottidobaa ubbaa taani zaara zaarada qoppana; ne wolqqaama oosota ubbaa taani yererana.” (Mazamure 77:11, 12) Nuuni kase ammanettidi haggaazidoogaanne Yihooway siiquwan nuussi oottidobata yuushshi qoppiyoogee nuna denttettees; minttetteesinne nashshanaadan oottees. Qassi, ‘beni wodiya hassayiyogee’ nuuni azzallennaadan, nuuppe koyettiyabaa oottanaadaaninne ammanettidi genccanaadan nuna maaddana danddayees.
w06 7/15 17 ¶16
‘Zuuzummoppite’
16 Zuuzummiyogee nuuni nu meto xallaa qoppanaadan oottiyogaa xalla gidennan, Yihoowa Markka gidiyo gishshawu nu demmido anjjota qoppennaadankka teqqees. Zuuzummiyogaa agganawu, nuuni ubbatoo he anjjota qoppana koshshees. Leemisuwawu, nu ubbawukka Yihoowa buzo sunttan xeesettiyo maalaalissiya maatay deꞌees. (Isiyaasa 43:10) Nuuni aara mino dabbotettaa medhdhana danddayoos; qassi ay saatiyankka ‘woosaa siyiyagaakko’ woossana danddayoos. (Mazamure 65:2; Yaaqooba 4:8) Ubbabaa haarana bessiyay oonee giya oyshaa zaaruwa nuuni akeekido gishshawunne Xoossawu ammanettidi deꞌiyogee nu maata gidiyogaa hassayiyo gishshawu nu deꞌoy giiga gidiis. (Leemiso 27:11) Xoossaa Kawotettaa mishiraachchuwa ubbatoo yootana danddayoos. (Maatiyosa 24:14) Yesuus Kiristtoosa wozuwa yarshshuwan nu ammaniyo gishshawu geeshsha kahay nuussi deꞌees. (Yohaannisa 3:16) Nuuni gencciyobay ayba gidikkonne ha anjjotun ufayttana danddayoos.
Yihooway Ufayttanawu Woy Azzananawu Danddayii?
3 Mazamuraawee hagaadan giis: “Eti bazzon a bolli woqqutoo makkalidonaa!” (Paydo 40) Kaalliya paydoy hagaadan gees: “Eti zaari zaaridi, Xoossaa paaccidosona.” (Paydo 41) Hegaa xaafidaagee eta makkalaabaa qonccissiis. Eti Gibxxeppe laꞌa kiyidi daro takkennan bazzuwan deꞌiiddi ha iita eeshshaa bessiyogaa doommidosona. Asay Xoossay etawu koshshiyabaa kunttanawu awu wolqqaynne koshshay deꞌiyakko siriyogan A bolli zuuzummiyogaa doommiis. (Qoodaabaa 14:1-4) Geeshsha Maxaafaa birshshiyageetussi giigida issi xuufee hagaadan gees, “a bolli woqqutoo makkalidonaa” giya qofay, “leemiso hanotan ‘eti Xoossaa bolli bantta wozanaa shuchcha oottidosona’ woy ‘eti Xoossawu “Chii” giidosona’” geetettidi birshshettana danddayees. Gidikkonne, eti bantta nagaraappe simmidoogaa bessiyo wode Yihooway etawu qarettidi atto gees. Shin eti bantta kase oosuwakko simmidi A bolli zaari zaari makkalidosona.—Mazamure 78:10-19, 38.
4 Ubbatoo sohuwara laamettiya makkalanchcha gidida ba asaa hanotan Yihoowawu aybi siyettidee? Paydo 40y hagaadan gees: “Mela bazzon woqqutoo lanccissidonaa!” Ha qofaa hara birshshettay hagaadan gees, “I azzananaadan oottidosona.” Geeshsha Maxaafaa birshshiyo oosuwa maaddanawu giigida issi xuufee hagaadan giis: “Ha qofaa birshshettay, azazettennanne makkalanchcha naꞌaagaadan, Ibraawetu hanotaykka issi uri azzananaadan oottees.” Azazettenna naꞌay A yelidaageeti keehi azzananaadan oottiyogaadan, makkalanchcha gidida Israaꞌeelatikka “Israa7eela Geeshshaa hanqqetissidosona.”—Paydo 41.
Ayyaanaaban Alꞌꞌobaa
w06 7/15 11 ¶4
Mazamure Maxaafaa Shaahotuppe Heezzanttuwaninne Oyddanttuwan Deꞌiya Kulkka Qofaa
78:24, 25—Mannay ‘saluwa kattaanne kiitanchchatu oyttaa’ geetettidoy aybissee? Hegaa giyogee mannay kiitanchchati miyo quma giyogaa gidenna. Mannay “saluwaa qumaa” geetettidoy, hegee saluwappe yiido gishshataassa. (Mazamure 105:40) “Kiitanchchatu oyttaa” geetettidoy, kiitanchchatinne hegaa giigissida Xoossaay saluwan deꞌiyo gishshataassa gidennan aggenna. (Mazamure 11:4) Yihooway Israaꞌeelatussi mannaa immanawu kiitanchchata goꞌettennankka aggenna.