Kiristtaanetu Deꞌuwanne Haggaazuwa Shiiquwa Xannaꞌiyo Xuufiyan Odettida Xuufeta
© 2024 Watch Tower Bible and Tract Society of Pennsylvania
MASQQALA 2-8
XOOSSAA QAALAN DEꞌIYA ALꞌꞌOBAA | MAZAMURE 79-81
Yihoowa Bonchcho Sunttaa Siiqiyogaa Bessite
Wozoy Nu Aaway Immido “Kumetta Woito”
5 Nuuni Yihoowa sunttaa siiqiyoogaa waati bessana danddayiyoo? Nu deꞌuwan bessana danddayoos. Yihooway nuuni geeshsha gidanaadan koyees. (1 PHeexiroosa 1:15, 16 nabbaba.) Hegee Yihoowa xallawu goynnoosinne nu kumetta wozanaappe ayyo azazettoos giyoogaa. Yedetay nuna gakkiyo wodekka gidin, i kessido geeshsha maaraanne higgiyaa naagidi deꞌanawu nuuyyo danddayettida ubbabaa oottoos. Xillobaa oottiyoogan nu pooꞌoy pooꞌanaadan oottoos; hegee Yihoowa sunttaa bonchissees. (Maa. 5:14-16) Yihoowa higgee loꞌꞌo gidiyoogaanne Seexaanaa mootoy worddo gidiyoogaa geeshsha deꞌo deꞌiyoogan bessoos. Nuuni nagarancha gidiyo gishshawu baliyo wode, wozanappe nu nagaraappe simmoos; qassi Yihoowa bonchissennabaa oottiyoogaa aggoos.—Maz. 79:9.
ijwbv 3 ¶4-5
Roome 10:13—‘Godaa Sunttaa Xeesiyogaa’
Geeshsha Maxaafan ‘Yihoowa sunttaa xeesiyogaa’ giyogee Xoossaa sunttaa coo eriyogaappenne awu goynniyo wode he sunttaa xeesiyogaappe aarobaa qonccissees. (Mazamure 116:12-14) Hegee Xoossan ammanettiyogaanne maaduwa demmanawu akko woossiyogaa gujjees.—Mazamure 20:7; 99:6.
Yesuus Kiristtoosawu Xoossaa sunttay aybippenne aadhdhiyaba. I woosaa koyro tamaarissido wode hagaadan giis: “Saluwan deꞌiya nu Aawawu, asa ubbay ne sunttaa geeshsha oottidi xeello” woy ne sunttaa geeshsha. (Maatiyosa 6:9) Nuuni merinaa deꞌuwa demmanawu Yihoowa erana, awu azazettananne A siiqana koshshiyogaakka Yesuusi qonccissiis.—Yohaannisa 17:3, 6, 26.
Ayyaanaaban Alꞌꞌobaa
it-2 111
Yooseefa
Yooseefa Sunttawu Imettida Bonchchuwa. Yaaqooba naatu giddon Yooseefawu imettida gita bonchchuwappe denddidaagan, kumetta Israaꞌeelaa yarati ubbay, (Maz 80:1) woykko huuphessa kawotettan deꞌiyageeti issi issitoo A sunttan xeesettidoogee bessiyaba. (Maz 78:67; Amo 5:6, 15; 6:6) Yooseefa sunttay Geeshsha Maxaafaa hiraagawukka leemisodan odettiis. Hizqqeeli beꞌido ajjuutan, Yooseefa zaretussi naaꞌꞌu kushe laatay imettiis. (Hiz 47:13) Qassi ‘Yihooway Hegan Deꞌees’ giyo katamaa penggetuppe issoy Yooseefa sunttan xeesettiis. (Hiz 48:32, 35) Yihoowa asay bantta biitti simmidi issi dere gidido wode, Yooseefi issi bagga Israaꞌeela yarawu halaqa, qassi Yihuday hankko baggawu halaqa geetettiis. (Hiz 37:15-26) Abddiyyu beꞌido hiraagay, ‘Yooseefa zareti’ ‘Eesawa zareta’ xayssiyogan hashetana danddayiyogaa bessees. (Abd 18) Qassi Zakkaariyasi, Yihooway “Yooseefa asaa” ashshanaagaa yootiis. (Zak 10:6) Ayyaana Israaꞌeela zaretun Efireema zariya gidennan Yooseefa zaree qoodettiis.—Ajj 7:8.
Ajjuutaa 7:8n deꞌiya zaretu qoodan Yooseefa sunttay gelidoogee, Yaaqoobi hayqqana haniiddi yootido hiraagay ayyaana Israaꞌeelatu bolli polettiyogaa bessiyaba. Yaatiyo gishshawu, Yaaqooba Xoossaa Wolqqaamay Yihooway, ba shemppuwa “dorssatu” gishshawu attidi immiya loꞌꞌo henttanchaa Yesuus Kirsttoosa immidoogee bessiyaba. (Yoh 10:11-16) Yesuus Kiristtoosi ayyaana Israaꞌeelatu shaaho gidiya Xoossaa garuwa baasuwawu waanna shuchchaakka gidiis. (Efi 2:20-22; 1Phe 2:4-6) Qassi ha Henttanchchaynne godaa xaphuwa minttiya waanna Shuchchay Ubbaa Danddayiya Xoossaara issippe deꞌees.—Yoh 1:1-3; Oos 7:56; Ibr 10:12; Doo 49:24, 25ra gatta xeella.
MASQQALA 9-15
XOOSSAA QAALAN DEꞌIYA ALꞌꞌOBAA | MAZAMURE 82-84
Inttessi Deꞌiya Aawatettaa Nashshite
wp16.6 8 ¶2-3
Saluwa Kafotuppe Tamaariyobaa
Yerusalaame heeran deꞌiya asay, keettaa kaaraa matan bantta keettaa keexxiya siine kafota loytti erees. Hegeetuppe amaridaageeti Solomoni keexxido Xoossaa garuwankka bantta keettaa keexxidosona. Xoossaa garoy he siine kafotussi layttan layttan bantta marata hirggi baynnan dichchiyo loꞌꞌo soho gidennan aggenna.
Mazamure 84 xaafidanne usuppun aginaappe issi saaminttawu Xoossaa garuwan haggaaziya Qoraaha naatuppe issoy, siine kafoti Xoossa garuwa heeran keexxido keettata beꞌiis. He kafotuugaadan ubbatoo Yihoowa keettan deꞌanawu amottidi I hagaadan giis: “Abeet Ubbaappe Wolqqaama GODAU, neeni de7iyoosai aiba lo77ii! Taani GODAA Beeta Maqidasiyaa laamotais; . . . Abeet Ubbaappe Wolqqaama GODAU, ta kawuwau, ta Xoossau, neeyyo yarshshiyo sohuwaa matan siine kafiyaa baayyo de7iyoosaa demmaasu. Haraphphiyaakka baayyo phuuphulliyo keettaa yan keexxaasu!” (Mazamure 84:1-3) Nuunikka, nu naatuura ubbatoo galchchaa shiiquwa shiiqiyogan hegaadan laamotiyogaanne nashshiyogaa bessiyoo?—Mazamure 26:8, 12.
w08 7/15 30 ¶3-4
Intte Oottana Danddayiyoba Halchchiyogan Ufayttite
Cimatettay woy harggee, nuuni Yihoowawu loytti haggaazennaadan teqqana danddayees. Intte yelidaageeta gidikko, intte wodiyappenne wolqqaappe dariya baggaa intte naata dichchiyogan wurssiyo gishshawu, buzo xinaatiyappe woy galchchaa shiiquwappe loytti goꞌettiiddi deꞌennabadan qoppana danddayeeta. Shin, intte oottana danddayennabatun xeelaa wottiyogee intte oottana danddayiyobata akeekennaadan oottiiddi deꞌiishsha?
Shaꞌan qoodettiya layttaappe kase, issi Leewa bitanee demmana danddayennabaa amottiis. Layttaappe naaꞌꞌu saaminttawu Xoossaa garuwan haggaaziyo maatay awu deꞌees. Shin, I yarshshiyosaa matan ubbatoo daanawu keehi amottiyogaa yootiis. (Maz. 84:1-3) Yaatin he ammanettida bitanee bawu deꞌiya maatan ufayttanaadan aybi maaddidee? Xoossaa garuwan mexi issi gallassaa deꞌiyogeekka gita maata gidiyogaa I akeekiis. (Maz. 84:4, 5, 10) Hegaadankka, nu oottana danddayennabatun zilꞌꞌettiyogaappe nu oottana danddayiyobata shaakki eridi hegaa nashshana koshshees.
Yihooway Ne Xoossay Nena Xoqqu Oottidi Xeellees!
12 Neeni harggiyo wode, nena gakkiyaabaa Yihooway eriyoogaa ammanetta. Nena aybi gakkiiddi deꞌiyaakko neeni maara akeekanaadan I maaddana mala woossa. Yaatada Yihooway neeyyo yootiyo minttettiyaabaa Geeshsha Maxaafaappe koya. Yihooway ba ashkkarata keehi xoqqu oottidi xeelliyoogaa bessiya paydota pilgga. Neeni yaatiyo wode, Yihooway ammanettidi baayyo oottiya ubbawu keha gidiyoogaa akeekana.—Maz. 84:11.
Ayyaanaaban Alꞌꞌobaa
it-1 816
Aawu Baynna Naata
Aawu hayqqidonne miyyee baynnaageeta asay dogi aggana danddayiyo gishshawu, Yihooway Israaꞌeelati geeshsha gidanawu ‘aawu baynna naata’ maaddana koshshiyogaa yootiis. Eti ayyaanaaban mino gidiyo wode, aawu baynna naatussi koshshiyaba kunttoosona. Israaꞌeelan suure pirdday xayiyo wode, aawu baynna naati naaqettoosona; qassi hegee deree ayyaanaaban shuggidoogaa bessiyaba. (Maz. 82:3; 94:6; Isi. 1:17, 23; Erm. 7:5-7; 22:3; Hiz. 22:7; Zak. 7:9-11; Mil. 3:5) Aawu baynna naata huqqunniyageeta Yihooway qanggiis. (Zaa. 27:19; Isi. 10:1, 2) Hegaa malata Ashshiyagee (Lee 23:10, 11), Maaddiyageenne (Maz 10:14) eta Aaway Yihoowa. (Maz 68:5) I eta gishshawu pirddees (Zaa 10:17, 18), etawu qarettees (Hoo 14:3), etawu woppaa immees (Maz 146:9), qassi I eta deꞌuwan wottees.—Erm 49:11.
Tumu Kiristtaaneta shaakki erissiya malaatatuppe issoy, azinay woy yelidaageeti hayqqin kayyottidaageetussi qoppiyogaa. Yesuusa kaalliya Yaaqoobi Kiristtaanetussi hagaadan xaafiis: “Xoossaa Aawaa sinttan pokkoi bainna geeshsha ammanoi hagaa; hegee augee giikko, aaya aawi bainna naatanne waayettiya am77eta maaddanaagaanne sa7aa nagaraa qitaappe ba huuphiyaa naaganaagaa.”—Yaaq 1:27.
MASQQALA 16-22
XOOSSAA QAALAN DEꞌIYA ALꞌꞌOBAA | MAZAMURE 85-87
Nuuni Genccanaadan Woosay Maaddees
w12 5/15 25 ¶10
Yihoowa Bonchuwaa Qonccissay?
10 Nuuni Xoossaa bonchuwaa qonccissanaadan koshshiya harabay ‘ubba wode woossiyoogaa.’ (Roo. 12:12) Yihoowa ufayssiya ogiyan nuuni ayyo oottanaadan maaddana mala woossana danddayoos, qassi woossana koshshees. Yihooway geeshsha ayyaanaa immanaadan, ammanuwaa gujjanaadan, paaciyaa xoonanau minttanaadaaninne “tumatettaa qaalaa suuretettan” yootanau maaddanaadan woossana koshshees. (2 Xim. 2:15; Maa. 6:13; Luq. 11:13; 17:5) Issi naꞌay ba aawan ammanettiyoogaadan, nuuni saluwan deꞌiya nu Aawaa, Yihoowan ammanettana koshshees. Nuuni ayyo loyttidi oottanau maaddanaadan woossikko, i maaddanaagaa ammanettana danddayoos. Nu woosay a salettees giidi mule qoppana bessenna. Hegaappe dumma hanotan, woosan a sabbiyaageeta, galatiyaageeta, ubbatoo, ubba qassi paacee gakkiyo wode a kaaletuwaa koyiyaageetanne a geeshsha sunttaa bonchissiya ogiyan ayyo oottanau maaddanaadan oychiyaageeta gidoos.—Maz. 86:12; Yaaq. 1:5-7.
Yihooway Nu Woosaa Waati Zaarii
17 Mazamure 86:6, 7 nabbaba. Mazamuraawee Daawiti Yihooway ba woosaa siyidi zaarana danddayiyoogaa ammanettiis. Neenikka aagaadan ammanettana danddayaasa. Ha huuphe yohuwan nuuni beꞌido taariketi, genccanawu nuussi koshshiya aadhdhida eratettaanne wolqqaa Yihooway immana danddayiyoogaa bessoosona. I nuna maaddanawu nu ishanttanne michchontta woy ha wodiyan awu goynnennaageetakka goꞌettana danddayees.
18 Yihooway ubbatoo nuuni qoppidoogaadan nu woosaa zaarana xayikkonne, I hegaa zaaranaagaa eroos. I nuussi koshshiyaabaa koshshiya wodiyan immees. Simmi yaakko, ha wodiyan Yihooway neessi koshshiyaabaa kunttanaagaanne yaana ooratta alamiyan ‘paxa deꞌiyaageetu ubbaa amuwaa alanaagaa’ ammanettada ubbatoo woossa.—Maz. 145:16.
Ayyaanaaban Alꞌꞌobaa
“Taani Ne Sunttaayyo Yayyana Mala, Taayyo Issi Wozanaa Imma”
17 Nu wozanay shaahettiyoogee loꞌꞌo gidenna. Issi ispportte citan deꞌiiddi issoy issuwaara maayettennaageeta ane qoppa. Issoti issoti bantta xallay bonchchettanaadan koyoosona, amaridaageeti higgiyaa kaallidi kaaꞌanawu koyokkona, qassi harati loohissiyaagaa karoosona. Hegaa mala citay xoonennan aggana danddayees. SHin, issippetettay deꞌiyo citay xoonana danddayiyoogee qoncce. Neeni Yihoowayyo haggaaziyoogan ne qofaa, ne koshshaanne neeyyo siyettiyaabaa issuwaa oottikko, ne wozanaykka he xooniya citaa mala gidana danddayees. Seexaanay ne wozanay shaahettanaadan koyiyoogaa hassaya. I neeni oottanaadan Yihooway koyiyoogaa ne eriyoobay ne iita amuwaara ne wozanan gaaddetanaadan koyees. SHin, neeni Yihoowayyo haggaazanawu ne wozanay kumetta gidana bessees. (Maa. 22:36-38) Seexaanay ne wozanaa shaakkanaadan oottoppa!
18 Daawiti “taani ne sunttaayyo yayyana mala, taayyo issi wozanaa imma” giidoogaadan, neenikka hegaadan Yihoowa woossa. Ha woosaa ne deꞌuwan oosuwan peeshshanawu danddayettida ubbabaa ootta. Guuttabaappe gitabaa gakkanaashin galla galla neeni kuuyiyoobay Yihoowa gita sunttaa bonchchiyoogaa bessiyaaba gidanaadan murtta. Yaatiyoogan, neeni Yihoowa Markka gidiyoogaadan, he sunttaabaa wotta dentta qoppana. (Lee. 27:11) Qassi hananabaa yootiya Mikiyaasaagaadan nuuni ubbay, “GODAA nu Xoossaa sunttan meri merinau hemettana” gaana danddayoos.—Mik. 4:5.
MASQQALA 23-29
XOOSSAA QAALAN DEꞌIYA ALꞌꞌOBAA | MAZAMURE 88-89
Yihoowa Haaroy Ubbaappe Loꞌꞌo
Yihooway Ubbabaa Haariyo Maatawu Exata!
5 Ubbabaa haariyo maatay Yihoowaagaa giyo hara gaasoykka deꞌees. I ba maataa goꞌettiyoy suure ogiyaana. I babaa hagaadan giis: “[Taani] aggenna siiquwaa, suure pirddaanne xillotettaa sa7aa bollan oottiya GODAA, . . . taani hageetan ufaittais.” (Erm. 9:24) I suure pirddaa pirddanawu nagarancha asi kessido higgiyaa kaallenna. Suurebay aybakko maaraa kessiyay a; i bali baynna suure pirddaa pirddiyo gishshawu asaassi higgiyaa immees. “Xillotettainne suure pirddai [a] kawotaa araataassi baaso” gidiyo gishshawu, a higgee, a maaraynne a pirdday ubbay suure gidiyoogaa ammanettana danddayoos. (Maz. 89:14; 119:128) Seexaanay Yihooway suure haarenna giidi mootees. SHin i ba huuphe ha alamiyan suure pirdday deꞌanaadan oottana danddayenna.
Yihooway Ubbabaa Haariyo Maatawu Exata!
10 Yihoowa haaroy huqqunniyaagaa gidenna. A haaroy laꞌa kesseesinne ufayssees. (2 Qor. 3:17) Daawiti hegaa xeelliyaagan hagaadan giis: “Bonchchoinne anggai a yuushuwan de7ees; minotettainne ufaissai a Beeta Maqidasiyan de7ees.” (1 Odi. 16:7, 27) Hegaadankka, mazamuraawee Etaani hagaadan giis: “Abeet GODAU, nena sabbi eriyaageetinne ne som77uwaa poo7uwan heemettiyaageeti anjjettidaageeta. Ne sunttan gallassa ubban ufaittoosona; ne xillotettaa gishshau, eti nena xoqqu xoqqu oottoosona.”—Maz. 89:15, 16.
11 Yihoowa loꞌꞌotettaabaa darotoo wotti dentti qoppiyoogee a haaroy ay haaroppenne aadhiyoogaa kaseegaappe aaruwan ammananaadan maaddana danddayees. Hegee, nuunikka mazamuraawiyaagaadan, “Harasan sha7u gallassaa de7anaappe Xoossaa keettan issi gallassaa de7iyoogee lo77o” gaanaadan oottees. (Maz. 84:10) Hegaappe aaruwan ufayssiyaabay baawa! Yihooway nuna Medhidaagaa gidiyo gishshawu, nuuni tumu ufayssaa demmanawu waatana koshshiyaakko erees; qassi i nuussi koshshiyaabaa darissidi immees. I nuuni oottanaadan koyiyoobay ubbay nuna goꞌꞌiyaabanne keehi ufayssiyaaba; ubba i giyoobaa oottanawu giidi issi issibaa aggi bayikkokka keehi ufayttoos.—Isiyaasa 48:17 nabbaba.
Xoossaa Kawotettaa Minttada Ammana
14 Yihooway beni Israaꞌeela Kawuwaa Daawitayyo qaalaa geliis; hegee Daawitaara maacettido maachaa geetettees. (2 Sameela 7:12, 16 nabbaba.) Masee Daawita zariyaappe yelettanaagaa Yihooway qaalaa geliis. (Luq. 1:30-33) Yaatiyoogan, Yihooway Masee o zariyaappe yelettanaakko kaseegaappe aaruwan erissiis. Yihooway Daawita zare gidida he urawu Mase Kawotettaa Kawo gidiyo ‘maatay deꞌiyoogaa’ yootiis. (Hiz. 21:25-27) Yesuusa baggaara Daawita “kawotettai merinaayyo minni eqqidi daana.” Tumakka, Daawita “zerettai merinaassi daana; a kawotaa araataikka . . . awaadan gam77ana.” (Maz. 89:34-37) Ee, Mase Kawotettay bessiyaagaadan haarana; qassi he haaruwaappe demmiyo goꞌꞌay merinawu deꞌana!
Ayyaanaaban Alꞌꞌobaa
“Ammanettiyay Ne Xalaalaa”
4 Ibraawettuwan Xaafettida Geeshsha Maxaafan “ammanettiyoogaa” giya qaalay issibaa mintti siiqiyoogaanne ayyo halchchidobay polettana gakkanaashin appe shaahettennan kehiyoogaa qonccissees. Ammanettiya uri siiqees. Aginay qammi ubbatoo kiyiyo gishshawu, mazamuraawee aginaa “saluwan ammanettiya markka” giidoogee bessiyaaba. (Mazamure 89:37) Hagaappe akeekiyoogaadan aginay mule laamettenna. Gidikkonne, aginay asaagaadan ammanettana danddayenna. Aybissi? Issi uri ammanettiyoogee I siiqiyoogaa bessiyo gishshataassa; deꞌuwan deꞌennabati siiqana danddayokkona.
5 Geeshsha Maxaafan ammanettiyoogaa geetettida qaalay siiquwaa bessiyaaba. Issi uri harawu ammanettiyoogee eti naaꞌꞌay dabbo gidiyoogaa bessiyaaba. Hegaadan ammanettiyoogee laamettenna. Hegee carkkoy carkkin qaaxxiya abbaa beetaa mala gidenna. SHin, ammanettiyoogee woy aggenna siiqoy keehi metiyaabaa xoonanawu gencciyoogaanne minniyoogaa bessiyaaba.
Haasayaa (5 daq)
Geeshsha Maxaafay Yootiyobay Aybee?
ijwbq 181
Geeshsha Maxaafay Aybee?
Geeshsha Maxaafay doommiyoy Ubbabaa Danddayiya Xoossay saluwaanne saꞌaa medhdhidoogaa qanttan qonccissiyoogaana. Xoossay asay A eranaadan ba sunttay Yihoowa gidiyoogaa Geeshsha Maxaafan xaafissiis.—Mazamure 83:18, NW.
Geeshsha Maxaafay Xoossaa sunttay moorettidoogaanne hegaa I zaarettidi giigissanaagaa qonccissees.
Geeshsha Maxaafay Xoossay asawunne saꞌawu halchchidobaa yootees. Asay tuggatanaadan oottidabaa sinttappe Xoossay waati xayssanaakkokka yootees.
Geeshsha Maxaafay galla galla deꞌuwan maaddiya zoriya oyqqiis. Hegeetuppe amaridaageeti:
Haratuura deꞌiya loꞌꞌo gaytotettaa. “Hara asi intteyyo oottanau koyiyo ubbabaa inttekka asau oottite.”—Maatiyoosa 7:12.
Hegee woygiyoogee? Harati nuna oyqqanaadan koyiyo ogiyan nuuni harata oyqqana koshshees.
Unꞌꞌissiyaabaa gencciyoogaa. “Wonttobau hirggoppite; aissi giikko, wonttoi bau hirggana.”—Maatiyoosa 6:34.
Hegee woygiyoogee? Sinttappe hananabawu keehippe hirggiyoogaappe, galla galla hanotaabaa qoppiyoogee loꞌꞌo.
Aqo deꞌuwan ufayttiyoogaa. “Intte huuphiyan huuphiyan intte maccaasaa intte huuphedan siiqanau bessees; maccaasa ubbaikka bantta azinaa azinaa bonchchanau bessees.”—Efisoona 5:33.
Hegee woygiyoogee? Ufayssiya aqo deꞌuwawu siiqoynne issoy issuwaa bonchchiyoogee keehi koshshiyaaba.
MASQQALA 30–XIQIMITA 6
XOOSSAA QAALAN DEꞌIYA ALꞌꞌOBAA | MAZAMURE 90-91
Intte Baree Aduqqanaadan, Yihoowan Ammanettite
Bariyaa Adussanawu Koyiyoogaa
Ceeggennaadan oottiya cora akkamoy deꞌiyoogaa daro saynttistteti yootikkonne, asay kaseegaappe daro layttaa deꞌana danddayibeenna. Asaa baree 19tta xeetu layttaappe doommidi gujji gujji biidoogee tuma. SHin hegawu waanna gaasoy geeshshatettaa naagiyoogaa, asappe asa oyqqiya harggiyaa teqqanawu xaliyaa goꞌettiyoogaanne marppiyan cadettiyoogaa. Asaa baree aduqqiyoogee woy qaammiyoogee wottin deꞌiyaaba gidiyoogaa issi issi saynttistteti ammanoosona.
Geeshsha Maxaafaa xaafidaageetuppe issuwaa gidida Muusee 3,500 layttappe kase, hagaadan giis: “Nu de7uwaa laittai laappun tamma; woi minnikko, hosppun tamma; hegeekka metonne tugga. Nu laittai eesuwan aadhdhees; nuunikka eesuwan kichchoos.” (Mazamure 90:10) Asay nu bariyaa adussanawu baaxetikkonne, asaa layttay Muusee qonccissidoogaa mala.
Hara baggaara qassi, issi issi doꞌati xeetan qoodettiya layttaa, qassi zigaa mala amarida mittati shaꞌan qoodettiya layttaa deꞌana danddayoosona. Nu deꞌo layttaa hegeetuuranne paxa deꞌiya harabatuura nuuni geeddarssiyo wode, ‘Deꞌo giyoogee 70 woy 80 laytta xalla deꞌiyoogaa giyoogee?’ giidi oychchoos.
wp19.1 5, saaxiniya
Xoossaa Sunttay Oonee?
Xoossaa sunttay Yihoowa. Hegee Xoossay ba halchchuwaa poliyaagaa gidiyoogaa shaakki erissiya dumma sunttaa
Xoossaa Medhdhiday Oonee?
Hegee daroti qoppiyo oysha. Neenikka hegaadan qoppennan aggakka. He oyshaa hagaadankka oychchana danddayoos: Saloynne saꞌay, qassi A giddon deꞌiya ubbabay merettidaba gidikko, Xoossaa medhdhiday oonee?
Saynisiyaa eranchchati saluwawunne saꞌawu doomettay deꞌiyoogaa ammanoosona. He qofaara maayiya ogiyan, Geeshsha Maxaafan deꞌiya koyro paydoy, “Xoossai salotanne sa7aa koiro medhdhiis” yaagees.—Doomettaabaa 1:1.
Xoolinttetinne pilaaneeteti coo beettibookkona. Issibay deꞌanaadan hegaa medhdhiya uri deꞌana koshshees. Medhdhida uri baynnaakko, nuna gujjin nu yuushuwan deꞌiya ubbabay deꞌana danddayenna. Issibi doommanaadan oottiyaabi deꞌennan, wurssettan ayfee beettennaagee qoncce. Hegaa gishshawu, medhdhida uri deꞌana bessees. I wolqqaama ayyaana; qassi A sunttay Yihoowa.—Yohaannisa 4:24.
Geeshsha Maxaafay Xoossaabaa hagaadan gees: “Dereti merettanaappe kase, woikko neeni sa7aa oottanaappe kase, merinaappe merinaa gakkanaayyookka neeni Xoossaa.” (Mazamure 90:2) Yaatiyo gishshawu, Xoossay ubbatookka deꞌees. Qassi salotanne saꞌaa I “koiro” medhdhiis.—Ajjuutaa 4:11.
Yayyiyoogaa Agganaadan Siiqoy Nuna Waati Maaddii?
16 Nuuni nu deꞌuwaa xoqqu ootti xeelliyoogaa Seexaanay erees. Hegaa gishshawu, I nuuni paxa deꞌanawu Yihoowaara dabbotido dabbotaakka aggana giidi yootees. (Iyy. 2:4, 5) Seexaanay keehi baliis! SHin, Seexaanawu ‘hayquwaa kaalettiyo wolqqay deꞌiyo’ gishshawu, I Yihoowa nu agganaadan oottanawu nuuni hayquwaa yayyiyoogaa goꞌettanawu malees. (Ibr. 2:14, 15, NW) Nuuni nu ammanuwaa aggana xayikko, Seexaanay koyiyoobaa oottiya asati nuna woranawu issi issitoo yashissoosona. Haroode qassi, Seexaanay nu ammanuwaa shugissanawu nuuni hayqqanaadan oottana danddayiya harggiyaa goꞌettana danddayees. Dottoreti woy ammanenna so asay nuuni Xoossaa higgiyaa kanttidi suuttaa goꞌettanaadan wolqqanttana danddayoosona. Woykko Geeshsha Maxaafay yootiyo maaraara maayettenna akkamuwaa akkamettanaadan nuna ammanttanawu issi uri malana danddayees.
17 Nuuni hayqqanawu koyokko; shin hayqqikkokka, Yihooway nuna siiqiyoogaa aggennaagaa eroos. (Roome 8:37-39 nabbaba.) Yihoowa dabboti hayqqikkokka, eti paxa deꞌiyaabadan I eta hassayees. (Luq. 20:37, 38) I eta hayquwaappe denttanawu laamotees. (Iyy. 14:15) Nuuni “merinaa de7uwaa” demmanaadan Yihooway alꞌꞌo waagaa qanxxiis. (Yoh. 3:16) Yihooway nuna keehi siiqiyoogaanne nuussi qoppiyoogaa eroos. Yaatiyo gishshawu, nuuni sahettiyo wode woy hayquwaa yayyiyo wode, Yihoowa aggiyoogaappe I immiyo minttettuwan, aadhdhida eratettaaninne wolqqan ammanettoos. Vaaleranne I azinay hegaadan oottidosona.—Maz. 41:3.
Ayyaanaaban Alꞌꞌobaa
Nena Naagiya Kiitanchchay Deꞌii?
Issi issi asa naagiya kiitanchchay deꞌees giidi Geeshsha Maxaafay tamaarissenna. Yesuusi issi wode, “ha guuttatuppe [Kiristtoosa kaalliyageetuppe], issuwanne karoppite; ayssi giikko, eta kiitanchchati saluwan deꞌiya ta Aawaara ubbatoo deꞌiyogaa taani intteyyo yootays” giidoogee tuma. (Maatiyosa 18:10) Shin Yesuusi hegaadan giidoy, kiitanchchati A kaalliyageeta buzo xekkan wudidi xeelliyogaa yootanaassappe attin, issi issi asa naagiya A buzo kiitanchchay deꞌees gaanaassa gidenna. Yaatiyo gishshawu, tumu Kiristtaaneti kiitanchchati eta naagiyabadan qoppidi eeyyatettan woy shenehoo giidi bantta deꞌuwa daafan yeggiyabaa oottokkona.
Hegaa giyogee kiitanchchati asaa maaddokkona giyogee? Chii. (Mazamure 91:11) Issoti issoti Xoossay kiitanchchatu baggaara banttana naageesinne kaalettees giidi mintti ammanoosona. Ha maxeetiyan doometta huuphe yohuwan abay odettido Keenezi hegaadan qoppiyageetuppe issuwa. Hegee muleera tuma gaanawu metikkonne, I likke gidana danddayees. Yihoowa Markkati mishiraachchuwa yootiyo wode, darotoo kiitanchchatu maaduwa bessiya naqaashata akeekoosona. Shin, kiitanchchati ayfiyan beettenna gishshawu, Xoossay asaa maaddanawu eta ay keenaa goꞌettiyakko wurssi erokko. Gidoppe attin, Ubbaa Danddayiya Xoossay nuna maaddanawu oottiyobaa gishshawu A galatiyogee bala gidenna.—Qolasiyaasa 3:15; Yaaqooba 1:17, 18.
Haasayaa (5 daq)
Saꞌan Merinawu Deꞌana Danddayaasa
lmd gujo qofaa A, qofaa 5
Saꞌan merinawu deꞌana danddayaasa.—Maz. 37:29; Maa. 5:5.
XIQIMITA 7-13
XOOSSAA QAALAN DEꞌIYA ALꞌꞌOBAA | MAZAMURE 92-95
Yihoowawu Haggaaziyogee Aybippenne Aadhdhiya Deꞌo Oge!
Yelagatoo, Ayyaanaabaa Halchcheetii?
5 Nuuni ayyaanaabaa halchchuwaa halchchiyo waanna gaasoy Yihoowa siiquwaa gishshawunne I nuuyyo oottidobaa gishshawu A keehi galatiyoogaa bessanaassa. Mazamurawee hagaadan giis: “GODAA galatiyoogee lo77o. . . . Aissi giikko, neeni ne wolqqaama oosuwan tana ufaissido gishshau, ne kushiyaa oosuwaa gishshau, taani ufaissau yexxais.” (Maz. 92:1, 4) Yihooway neessi immido ubbabaa qoppa: Ne deꞌuwaa, Yihoowanne abaa tumaa eridoogaa, Geeshsha Maxaafaa, gubaaꞌiyaanne sinttanaabaa xeelliyaagan hidootan naagiyoobaa. Ayyaanaabaa kaseyiyoogee ha ubbabaa gishshawu Xoossaa galatiyoogaa bessiyo oge, qassi hegee neeni akko shiiqanaadan oottees.
Ne Qofaa Laamissiyay Oonee?
8 Yihooway loꞌꞌo aawaadan, ba naati keehi ufayssiya deꞌo deꞌanaadan koyees. (Isi. 48:17, 18) Hegaa gishshawu, I kandduwaabaaninne haratuura gattiyaaban kaallana bessiya maaraa immees. Hegaa malaban nuuni aagaadan qoppanaadaaninne I nashshiyoobaa nashshanaadan nuna shoobbees. Hegee nuna laꞌatetta diggiyaaba gidennan, nu qofaa ooraxissees, xoqqisseesinne aassees. (Maz. 92:5; Lee. 2:1-5; Isi. 55:9) Nuuni hegaadan oottiyo wode, nu dosiyoobaanne loꞌꞌobaa doorana danddayoos; qassi hegee nuuni ufayttanaadan oottana. (Maz. 1:2, 3) Tumukka, Yihoowaagaadan qoppiyoogee goꞌꞌees!
Yihooway Ne Xoossay Nena Xoqqu Oottidi Xeellees!
18 Nuuni cimiyo wodekka Yihoowawu oottana danddayiyo oosoy deꞌiyoogaa ammanettana danddayoos. (Maz. 92:12-15) Nuuni oottiyoobay pattennaba nuussi milatiyo wodekka, Yihoowa haggaazuwan oottiyo aybakka I xoqqu ootti xeelliyoogaa Yesuusi tamaarissiis. (Luq. 21:2-4) Hegaa gishshawu, neeni oottana danddayiyooban xeelaa wotta. Leemisuwawu, Yihoowabaa yootana, ne ishanttussi woossana, qassi ammanettidi deꞌanaadan harata minttettana danddayaasa. Yihooway neeni aara issippe oottanaadan koyiyoy, neeni oottiyoobaa danddayiyo gishshataassa gidennan, neeni eeno gaada ayyo azazettiyo gishshataassa.—1 Qor. 3:5-9.
Ayyaanaaban Alꞌꞌobaa
‘Xoossaa Aadhdhida Eratettay Keehi Ciimma!’
18 Kiitettida PHawuloosi Yihoowa aadhdhida eratettay keehi dummatiyoogaa waati qonccissidaakko akeeka: “Abeet, Xoossaa duretettay, aadhdhida eratettaynne eray keehi ciimma! A pirddaynne I oottidobay nu akeekaappe keehi darees!” (Roome 11:33, NW) PHawuloosi xiqisiyaa doomettan, “Abeet” giya qaalaa goꞌettiyoogan Yihoowa aadhdhida eratettaa keehi nashshiyoogaa bessiis. “Ciimma” geetettida Giriiketto qaalay “xahaa” giyo qaalaarakka gayttidaba. Yaatiyo gishshawu, PHawuloosi yootidobay Yihoowa aadhdhida eratettaa loytti qonccissees. Nuuni Yihoowa aadhdhida eratettan wotti denttidi qoppiyo wode, zawi baynna, wurssettay erettenna ollaa xeelliyoogaa keena keehi ciimmanne ubba nuuni akeekanawu danddayenna keehi aaho milatana danddayees. Hegaa nuuni loytti qonccissiyoogee atto shin aybanne yootana danddayokko. (Mazamure 92:5) Hegee nuuni nuna ziqqi oottanaadan denttettennee?
XIQIMITA 14-20
XOOSSAA QAALAN DEꞌIYA ALꞌꞌOBAA | MAZAMURE 96-99
‘Mishiraachchuwa Yootite’!
Mishiraachoy Aybee?
KAWOTETTAA mishiraachoy aybakko qonccissiyoogan, qassi he kawotettay sinttappe saꞌaa xillotettan ayssiya haaro gidiyoogaa asau yootiyoogan, Kiristtaaneti ‘kawotettaa mishiraachuwaa’ sabbakana koshshees. Gidikkonne, ‘mishiraachuwaa’ giya qaalaa Geeshsha Maxaafay hara ogiyankka goꞌettees. Leemisuwau, “Ashshiyo mishiraachchuwaa” (Maz. 96:2); “Xoossaa wonggeliyaa mishiraachchuwaa” (Roo. 15:16); qassi “Yesuus Kiristtoosa wonggeliyaa mishiraachchuwaa” yaagiyaagee dees.—Mar. 1:1.
Qanttan, mishiraachoy Yesuusi tamaarissidonne i erissiyo ashkkarati xaafido tumaa ubbaa gujjees. Yesuusi saluwaa baanaappe kase bana kaalliyaageetussi hagaadan giis: “Intte biidi, asa ubbaa tana kaalliyaageeta oottite; Aawaa sunttan, Na7aa sunttaaninne Geeshsha Ayyaanaa sunttan eta xammaqite. Taani inttena azazidobaa ubbaa eti naagana mala, eta tamaarissite.” (Maa. 28:19, 20) Yaatiyo gishshau, tumu Kiristtaanetu oosoy haratuyyo Kawotettaabaa yootiyoogaa xalla gidenna; eti asaa erissiyo ashkkara oottanaukka baaxetana koshshees.
Pirddaa Gallassi Aybi Hananee?
Ushacha baggan deꞌiya misiliyan qonccidaagaadan, daro asay Pirddaa Gallassan biilooniyan qoodettiya asaa shemppoy kase oottidobau bessiya pirddaa ekkanau, giishin amaridaageeti saluwan deꞌiyo woytuwaa ekkanau, harati qassi siꞌooliyan barchetanau Xoossaa araataa sinttan eqqoosona giidi qoppees. SHin, Pirddaa Gallassan oottanau halchettidabay asaa naaquwaappe ashshiyoogaa gidiyoogaa Geeshsha Maxaafay yootees. (Maz. 96:13) Yesuusi asaa naatussi zaarettidi suure pirddaa ehiya Daanna gidanaadan Xoossay sunttiis.—Isiyaasa 11:1-5; Oosuwaa 17:31 nabbaba.
w12 9/15 12 ¶18-19
SHaꞌu Layttaaninne Hegaappe Guyyiyan Demmana Sarotettaa
18 Asaa naati seexaanay balettin Yihooway haariyo maataa bolli makkalido wode he issippetettay moorettiis. Gidoppe attin, Mase Kawotettay 1914ppe doommidi, zaarettidi he sarotettaynne issippetettay deꞌanaadan oottiiddi deꞌees. (Efi. 1:9, 10) SHaꞌu Layttaa Haaruwaa wode, haꞌꞌi ‘beettennaba’ gidida maalaaliyaabati polettana. Hegaappe simmin, “wurssettai” yaana; hegee Kiristtoosa SHaꞌu Layttaa Haaruwaa wurssetta gidana. Hegaappe simmin aybi hananee? Yesuusau “maata ubbai saluwaaninne sa7an” imettidaba gidikkokka, i Yihoowa maataa bau ekkanau koyenna. I ba huuphiyaa kawushshidi, “Xoossaassi ba Aawaassi kawotettaa [immana].” I baayyo deꞌiya dumma maataa ‘Xoossaa bonchuwau’ goꞌettana.—Maa. 28:18; Pili. 2:9-11.
19 He wode, ha saꞌan Xoossaa Kawotettaayyo haarettiyaageeti polo asa gidana. Eti Yesuusa leemisuwaa kaallana; qassi bantta huuphiyaa kawushshidi bantta dosan Yihoowa maatau haarettana. Eti wurssetta paaciyaa aadhiyoogan hegaadan oottana koyiyoogaa bessoosona. (Ajj. 20:7-10) Hegaappe simmin, makkalida ubbay, giishin asaa naatinne ayyaana meretati merinau xayana. Hegee keehippe ufayssiya wode gidana! Yihoowa keettaa asay ubbay “ubbaassi ubbabaa hanana” Yihoowa ufayssan sabbana.—Mazamure 99:1-3 nabbaba.
Ayyaanaaban Alꞌꞌobaa
it-2 994
Yettaa
“Ooratta yettaa” giya qofay Mazamure maxaafaa xallaana gidennan Isiyaasinne kiitettida Yohaannisi xaafido maxaafatunkka deꞌees. (Maz 33:3; 40:3; 96:1; 98:1; 144:9; 149:1; Isi 42:10; Ajj 5:9; 14:3) Darotoo, “ooratta yettaa” giyagaa yuushuwan deꞌiya qofaa pilggiyo wode, Yihooway ubbabaa haariyo ba maataa goꞌettidi oottiyo oorattabaa gishshawu A sabbanawu he yettay yexettiyogaa qonccissees. Mazamure 96:10y ufayssan yootiyogaadan, ‘Yihooway kawotiis!’ Yihooway ba kawotettaa aassanawu oottido oorattabati, qassi hegaa gaasuwan saluwaninne saꞌan hanidabati ha ‘ooratta yettawu’ kulkka qofa.—Maz 96:11-13; 98:9; Isi 42:10, 13.
XIQIMITA 21-27
XOOSSAA QAALAN DEꞌIYA ALꞌꞌOBAA | MAZAMURE 100-102
Yihoowa Aggenna Siiquwa Nashshite
Xammaqettanawu Waana Giigettana Danddayay?
18 Neeni Yihoowa siiqiyoogee, neessi deꞌiya aybippenne aadhdhiya ufayssiya eeshsha. (Leemiso 3:3-6 nabbaba.) Neeni Xoossaa mintta siiqiyoogee nena gakkiya metuwaa genccanaadan maaddees. Yihooway ba ashkkaratussi aggenna siiquwaa bessiyoogaa Geeshsha Maxaafay darotoo yootees. Aggenna siiquwaa giyoogee, Yihooway ba ashkkarata mule aggenna woy eta siiqiyoogaa aggenna giyoogaa. (Maz. 100:5) Neeni Xoossaa leemisuwan merettadasa. (Doo. 1:26) Neeni aggenna siiquwaa waata bessana danddayay?
19 Ubba wode Yihoowa galata. (1 Tas. 5:18) Galla galla nena hagaadan oychcha: ‘Yihooway tana siiqiyoogaa waati bessidee?’ Yaatada Yihooway neessi oottidobaa dummaya qonccissada woosan A galata. Kiitettida PHawuloosi Yihoowaabaa akeekidoogaadan, Yihooway nena siiqiyo gishshawu, neessi loꞌꞌobaa oottiyoogaa akeeka. (Galaatiyaa 2:20 nabbaba.) Nena hagaadan oychcha: ‘Taanikka A siiqiyoogaa bessanawu koyiyaanaa?’ Yihoowa siiqiyoogee neeni paaciyaa eqettanaadaaninne metuwaa genccanaadan maaddana. He siiqoy neeni ne Aawaa ubba galla siiqiyoogaa bessiyo, ayyaanaabaa meezeta ubbatoo oottanaadan maaddana.
“Naagettitenne Beegottite”
10 Nuuni naagettana koshshiya amaridabati lambbeechchiyoogaa, likkiyaappe aattidi uyiyoogaa, likkiyaappe aattidi miyoogaa, harata qohiyaabaa haasayiyoogaa, allaxxanawu makkalabaa beꞌiyoogaa, pornograafiyaanne hegaa malabata. (Maz. 101:3) Nu morkkee Dabloosi nuuni Yihoowaara dabbotido dabbotaa ubbatoo mooranawu koyees. (1 PHe. 5:8) Nuuni naagettana xayikko qanaatiyoogee, ammanettennan aggiyoogee, yaaretiyoogee, ixxiyoogee, otorettiyoogeenne uluwan lancciyaa oyqqiyoogee nu wozanan diccanaadan Seexaanay oottana danddayees. (Gal. 5:19-21) Koyro heeran, hegeeti qohokkona gaada qoppana danddayaasa. SHin hegeeta xayssanawu nuuni nuussi danddayettida ubbabaa sohuwaara oottana xayikko, hegeeti marzze mala gidida sharafaadan elle diccananne nuna keehi qohana danddayoosona.—Yaaq. 1:14, 15.
w11 7/15 16 ¶7-8
Yihooway Yootiyo Qoncce Akeekissuwaa Kaalleetii?
7 Wordduwaa tamaarissiyaageetuppe haakkiyoogee ay ay gujjii? Eta nu soo shoobbokko woy sarotokko. Eti giigissiyo xuufiyaa nabbabokko; eti televizhiiniyan shiishshiyo prograamiyaa xeellokko woy eti Interneettiyan xaafiyoobaa nabbabokko, qassi hegaa xeelliyaagan qofaa immokko. Hegaa mala mino tangguwaa ekkana bessiyoy aybissee? Siiquwaappe denddidaagaana. Nuuni ‘tumaa Xoossaa’ siiqiyo gishshau, a tumaa Qaalaara eqettiya, geella timirttiyan ufayttokko. (Maz. 31:5; Yoh. 17:17) Yihoowa sunttaanne he sunttaa birshshettaa, saꞌaa xeelliyaagan Xoossaa halchuwaa, hayqqidaageeti deꞌiyo hanotaa, qassi dendduwaa hidootaa gujjin ufayssiya tumaa a baggaara tamaarido, Yihoowa dirijjitiyaakka siiqoos. Hageetanne hara alꞌꞌo tumaa koyro erido wode intteyyo siyettidabaa hassayana danddayeetii? Yaatin, toochiyaageeti, ha tumaa inttena erissida dirijjitiyaappe intte haakkanaadan oottana mala aybissi paqqadeetii?—Yoh. 6:66-69.
8 Wordduwaa tamaarissiyaageeti ay giikkokka, nuuni eta kaallokko! Balettiyaanne hidootaa qanxxanaadan oottiya haatti baynna mela olla mala gididaageetukko aybissi biyoo? Hegaappe, Yihoowayyonne a dirijjitiyau ammanettidaageeta gididi deꞌanau murttidaageeta gidoos; a dirijjitee nuuni saamuwaa alanaadan Xoossaa Qaalaappe xillonne minttettiya tumaa haattaa adussa wodiyau ushshidaagaa.—Isi. 55:1-3; Maa. 24:45-47.
Ayyaanaaban Alꞌꞌobaa
w14 15/03 16 ¶ 20
Ubbatoo Loꞌꞌobaa Waata Qoppana Danddayay?
20 Gidoppe attin, mazamuraawee ba deꞌo layttan Yihoowa galatiis. (Mazamure 102:19-21 nabbaba.) Mazamure 102y ammanuwan deꞌiyaageetikka tuggatidi, harabaa qoppanau metootana danddayiyoogaa bessees. Mazamuraawee bau metoy daridabadan qoppidi, i “keettaa huuphiyan barkka uttida kafo mala” gidiyoogaa yootiis. (Maz. 102:7) Neenikka hegaadan qoppiyaaba gidikko, mazamuraawiyaagaadan ne metuwaa Yihoowau yoota. Neeni tuggatiyo wode woossiyo woosay ufayssennabaa qoppiyoogaa agganaadan nena maaddana danddayees. Yihooway ‘hiyyeesatu woosaa siyanaagaanne eta watiwatuwaa karennaagaa’ yootiis. (Maz. 102:17) Hegan ammanetta.
Ootti-besuwa (4 daq)
Geeshsha Maxaafay Laamettidee?
ijwbq 129
Geeshsha Maxaafay Laamettidee?
Akkay. Kushiyan xaafido beni xuufeta pilggidobay bessiyoogaadan, Geeshsha Maxaafay moorettiya miishshatun daro shaꞌutoo zaari zaaridi duuqettidaba gidikkokka an deꞌiya qofay laamettibeenna.
Yaatin duuqqiyo wode ayba balinne merettibeenna giyoogee?
Kushiyan beni xaafettida shaꞌan qoodettiya Geeshsha Maxaafaa xuufeti beettidosona. He xuufetun issi issi dummatettay deꞌees; shin hegee duuqqiyo wode merettidaba. He dummatettaappe daroy qofay laamettanaadan oottenna guutta bala. SHin qofaa laammiya amarida dummatettay deꞌiyoogeekka erettiis; he qofaappe issoy issoy Geeshsha Maxaafaa qofaa laammanawu eriiddi gujjidoba. Naaꞌꞌu leemisota beꞌa:
1. Issi issi Geeshsha Maxaafaa beni birshshettatun, 1 Yohaannisa 5:7n, “saluwan Aaway, Qaalaynne Geeshsha Ayyaanay deꞌoosona; eti heezzaykka issuwaa” yaagiya qofay deꞌees. SHin he qofay beni xaafettidaagan deꞌennaagaa hara suure xuufeti qonccissoosona. Hegee gujettida qofa. Ha wodiyan deꞌiya Geeshsha Maxaafaa suure birshshettatun he qofay deꞌenna.
2. Xoossaa buzo sunttay kushiyan xaafettida beni Geeshsha Maxaafaa xuufetun shaꞌan qoodettiya sohuwan deꞌees. SHin daro Geeshsha Maxaafaa birshshettatun he sunttay “Godaa” woy “Xoossaa” giyo bonchcho sunttatun laamettiis.
Haꞌꞌikka hara daro bali beettennaagaa aybin erana danddayiyaanaa?
Ha wodiyan, kushiyan xaafettida beni xuufeti daroy beettido gishshawu, bali deꞌikko haꞌꞌi sohuwaara erana danddayettees. He xuufeta geeddarssi xeellidobay, ha wodiyan deꞌiya Geeshsha Maxaafaa tumatettaabaa ay qonccissii?
▪ Eranchchaa Wiliyam H. Grini Ibraawetto Geeshsha Maxaafaa (darotoo “Galꞌꞌa Maachchaa” giyoogaa) xeelliyaagan hagaadan giis: “Beni xaafido ay xuufeenne wodiyaappe wodiyan hegaadan suure duuqetti uttibeenna gaana danddayettees.”
▪ Geeshsha Maxaafaa eranchchaa F. F. Brusi Giriiketto Geeshsha Maxaafaa woy “Ooratta Maachchaa” xeelliyaagan hagaadan giidi xaafiis: “Ooratta Maachchaa xuufee tuma gidiyoogaa bessiya naqaashaa keenay beni xaafettida hara ay xuufiyawunne deꞌenna; shin beni xaafettida he hara xuufeti tuma gidiyoogaa ooninne sirenna.”
▪ Beni xaafettida Geeshsha Maxaafaa xuufeta xannaꞌiyoogan erettida, Ser Frederik Keniyoni issi uri “kumetta Geeshsha Maxaafaa oyqqidi, hegee daro xeetu layttawu yeletaappe yeletaa gakkanawu daro bali baynnan ha wodiyawu gakkida Xoossaa Qaalaa gidiyoogaa yayyennan woy sirennan yootana danddayiyoogaa odiis.”
Geeshsha Maxaafaa qofay laamettennan gammꞌꞌidoogaa ammanettanaadan oottiya gujo naqaashati aybee?
▪ Xuufeta duuqqida Ayhudatikka Kiristtaanetikka Xoossaa asay oottido gita nagaraa yootiya taarikiyaa laammennan xaafidosona. (Qoodaabaa 20:12; 2 Sameela 11:2-4; Galaatiyaa 2:11-14) Qassi Ayhuda deree azazettibeennaagaanne asa wogaa boriya taariketakka laammennan xaafidosona. (Hosee7a 4:2; Milkkiyaasa 2:8, 9; Maatiyoosa 23:8, 9; 1 Yohaannisa 5:21) Duuqqiyaageeti ha taariketa suure xaafiyoogan, ammanettiya asa gidiyoogaanne geeshsha gidida Xoossaa Qaalaa bonchchiyoogaa bessidosona.
▪ Geeshsha Maxaafaa ba ayyaanan xaafissida Xoossay, he maxaafaa qofay laamettennan takkanaadan oottana giidi qoppiyoogee bessiyaaba gidennee? (Isiyaasa 40:8; 1 PHeexiroosa 1:24, 25) Qassi I beni deꞌida asa xallay gidennan, ha wodiyan deꞌiya asaykka goꞌettana mala halchchiis. (1 Qoronttoosa 10:11) Tumukka, “Xoossaa maxaafai nuuyyo immiyo genccaaninne minttettuwan nuuni demmana giidi ufaissan naagi uttidoogee de7ana mala, Xoossaa maxaafan xaafettida ubbabai nuna tamaarissanau xaafettiis.”—Roome 15:4.
▪ Yesuusikka A kaalliyaageetikka beni duuqettida Ibraawetto Geeshsha Maxaafaa xuufiyaappe yootidosona; shin hegee tuma gidiyoogaa siri erokkona.—Luqaasa 4:16-21; Oosuwaa 17:1-3.
XIQIMITA 28–HIDAARE 3
XOOSSAA QAALAN DEꞌIYA ALꞌꞌOBAA | MAZAMURE 103-104
“Nuuni Biitta Gidiyoogaa I Akeekees”
Hanotaadan Haniyoogan Yihoowa Milata
5 Yihoowa ashkketettaynne qaretay hanotaadan hananaadan A denttettees. Leemisuwawu, Sadooman deꞌiya iita asaa xayssido wode Yihooway ashkke gidiyogaa bessiis. Xillo gidida Looxee deretiya heeraakko baqatanaadan Yihooway ba kiitanchchatu baggaara yootiis. Looxee yaa baanawu yayyiis. Hegaa gishshawu, inne A soo asay Yihooway xayssanawu kuuyido Xoohaara giyo guutta katamaakko baqatanaadan paqqadana mala oychchiis. Yihooway ba kaaletuwaa kaallanaadan Looxa iisettana danddayees. SHin, Looxee Xoohaara baanaadan Yihooway paqqadiis; qassi he katamaakka xayssibeenna. (Doo. 19:18-22) Daro xeetu layttappe simmin, Yihooway Nanawen deꞌiya asawu qarettiyoogaa bessiis. Yihooway Nanawen deꞌiya iita asaynne eta katamay xayanaagaa odanaadan hananabaa yootiya Yoonaasa kiittiis. SHin Nanawen deꞌiyaageeti bantta nagaraappe simmido wode Yihooway etawu atto giis, qassi he katamaa xayssibeenna.—Yona. 3:1, 10; 4:10, 11.
Samssoonaagaadan Yihoowan Ammanetta
16 Samssooni balidobay keehi azzanttiyaabaa kaalettikkokka, I Yihooway koyiyoobaa oottanawu baaxetiyoogaa aggibeenna. Nuuni balikkokka, nuussi zoree imettikkokka woy maatay nuuppe halikkokka, hidootaa qanxxana koshshenna. Yihooway nuuyyo atto gaanawu giigi uttidoogaa hassaya. (Maz. 103:8-10) Nuuni balikkonne, Yihooway Samssoonawu oottidoogaadan A sheniyaa polanaadan nuuyyo wolqqaa immana danddayees.
17 Mikaaꞌeela giyo yelaga ishaa hanotaa beꞌa. I gubaaꞌiyawu oottiyaagaanne ubba wode aqinye gididi Yihoowawu minnidi haggaaziis. SHin, gubaaꞌiyan deꞌiya aawatettay appe halanaadan oottida balabaa oottidoogee azzanttiyaaba. I hagaadan giis: “He wode gakkanaashin Yihoowa haggaazuwan minnada oottaas. Qoppennan he ubbabay laametti simmin, Yihoowa haggaazuwan taani aybanne oottana danddayikke gaada qoppaas. Taani Yihooway tana mule aggenna gaada qoppaas, shin taani aara kaseegaadan dabbotaneeshsha woy kaseegaadan gubaaꞌiyan loytta haggaazana danddayiyaanaashsha gaada qoppaas.”
18 Mikaaꞌeeli hidootaa qanxxibeennaagee ufayssiyaaba. I gujjidi hagaadan giis: “Taani Yihoowa ubbatoo woossiyoogan, xannaꞌiyoogaaninne wotta dentta qoppiyoogan akko kaseegaappe aaruwan shiiqanawu baaxetaas.” Guyyeppe, Mikaaꞌeeli gubaaꞌiyan aawatettaa zaarettidi demmiis. I haꞌꞌi gubaaꞌe cimanne ubba wode aqinye gididi haggaazees. I hagaadan giis: “Taani cimatuppe demmido maadoynne minttettoy, Yihooway tana haꞌꞌikka siiqiyoogaa taani akeekanaadan maaddiis. Taani geeshsha kahan gubaaꞌiyan zaarettada haggaazana danddayays. Yihooway tumuppe nagaraappe simmiya ooyyoonne atto giyoogaa ha hanotaappe tamaaraas.” Nuuni moorobaa oottikkokka, hegaa giigissanawu nuussi danddayettida ubbabaa oottiyoonne Yihoowan ubbatoo ammanettiyo wode I nunakka goꞌettanaagaanne anjjanaagaa ammanettana danddayoos.—Maz. 86:5; Lee. 28:13.
Neeni Kessido Ayyaanaabaa Halchchota Polana Danddayaasa
2 Neeni haꞌꞌi polaychchabeenna halchchoy deꞌikko hayyanaa hidootaa qanxxoppa. Guutta halchchuwaakka polanawu darotoo wodeenne baaxee koshshees. Neeni ne halchchuwaa polanawu haꞌꞌikka koyiyoogee ne Yihoowaara dabbotido dabbotaa xoqqu ootta xeelliyoogaanne keehi loꞌꞌobaa awu immanawu koyiyoogaa bessees. Yihooway ne baaxiyaa nashshees. I ne danddayiyoobaappe aarobaa naagennaagee qoncce. (Maz. 103:14; Mik. 6:8) Hegaa gishshawu neeni halchchuwaa kessiyo wode, hegaa polana danddayiyaakkonne shaakka era. Neeni halchchuwaa kessa simmada hegaa polanawu waatana danddayay?
Ayyaanaaban Alꞌꞌobaa
‘Saluwaanne Saꞌaa Medhdhido’ Wolqqaa
18 Yihooway medhdhanawu goꞌettiyo wolqqaappe nuuni ay tamaariyoo? Meretati dumma dumma gidiyoogee nuuni keehi garamettanaadan oottiyaaba. Issi mazamuraawee hagaadan giis: “Abeet GODAU, ne oosoi ai keena daroo! . . . sa7ai neeni medhdhidoban kumiis.” (Mazamure 104:24) Hegee tuma! Deꞌon deꞌiyaabaa xannaꞌiyaageeti saꞌan miilooniyaappe dariya paxa deꞌiya meretatu sheeshshay deꞌiyoogaa eridosona; shin muleera 10 miiloone, 30 miiloone, woy hegaappe daro gidennan aggenna giidi dumma dumma qofaa yootoosona. Misiliyaa medhdhiya asi kaseegaadan oorattabaa medhdhiyo eray bawu baynnaagaa issi issitoo akeekana danddayees. SHin, Yihooway dumma dumma oorattabaa medhdhiyo wolqqay awudenne wurenna.
Haasayaa (5 daq)
Azinay Ba Machchiyo ‘Ba Huuphedan Siiqana Bessees
lmd gujo qofaa A, qofaa 6
Azinay ba machchiyo ‘ba huuphedan siiqana bessees.’—Efi. 5:33; Qol. 3:19.