Kiristtaanetu Deꞌuwanne Haggaazuwa Shiiquwa Xannaꞌiyo Xuufiyan Odettida Xuufeta
HIDAARE 4-10
XOOSSAA QAALAN DEꞌIYA ALꞌꞌOBAA MAZAMURE 105
“I Ba Maachchaa Merinaassi . . . Naagees”
Yihooway Ooratta Alamiyaa Ehanawu Gelido Qaalan Waati Mintti Ammanana Danddayiyoo?
11 Beni wode, Yihooway ba asawu qaalaa gelido hanana danddayennaba milatiya amarida hanotata beꞌa. Abrahaaminne Saara cimatettaa layttan naꞌaa yelanaagaa Yihooway etawu yootiis. (Doo. 17:15-17) Qassi Yihooway Abrahaamawu, A zareti Kanaane biittaa laattanaagaa yootiis. Abrahaama zare gidida Israaꞌeelati daro layttawu Gibxxen aylle gididi deꞌido wode, Yihooway qaalaa gelidobay polettennaba milatana danddayees. SHin polettiis. Guyyeppe, Elssaabeexa cimikkokka, naꞌaa yelanaagaa Yihooway yootiis. Qassi, geelaꞌiyaa Mayraama Yihoowa naꞌaa yelanaagee iyyo odettiis. Hegee, daro layttaappe kase Yihooway Edene gannatiyan qaalaa gelidobay polettanaadan oottiis!—Doo. 3:15.
12 Yihooway qaalaa gelido ubbabatanne I hegeeta waati polidaakko nuuni loytti qoppiyo wode, A gita wolqqaa akeekoos. Yaatiyo wode, Yihooway ooratta alamiyaa ehaanawu qaalaa gelidobaa mintti ammanoos. (Yaasa 23:14; Isiyaasa 55:10, 11 nabbaba.) Hegee, Xoossay ehaanawu qaalaa gelido ooratta alamee yaanaagee attennaagaa harati eranaadan maaddanawu giigettanaadan oottees. Yihooway ooratta saluwaanne ooratta saꞌaa xeelliyaagan yootido wode hagaadan giis: “Taani haasayiyoogee ammanettiyaagaanne tuma.”—Ajj. 21:1, 5.
it-2 1201 ¶2
Qaalaa
Xoossay medhdhido deꞌuwan deꞌiyanne deꞌuwan deꞌennabati A qaalawu azazettoosona; qassi I ba halchchuwa polanawu eta goꞌettana danddayees. (Maz. 103:20; 148:8) Xoossaa qaalay ammanttiyagaa, qassi I ba gelido qaalaa hassayidi polees. (Zaa. 9:5; Maz. 105:42-45) Xoossay ba huuphen giidoogaadan, A “qaalai merinau eqqidi de7ees”; qassi I halchchidobaa polanaappe attin akko coo simmenna.—Isi. 40:8; 55:10, 11; 1 Phe. 1:25.
Ayyaanaaban Alꞌꞌobaa
Hanotay Laamettikkonne Sarotettan Deꞌa
3 Yooseefa ishantti A qanaatidi aylletettawu bayzzido wode, ayyo layttay 17 heera. Hegaappe kase, Yooseefa A aaway A ishanttuppe aaruwan siiqees. (Doo. 37:2-4, 23-28) Yooseefi siiqiya ba aawaa Yaaqoobappe haahosan Gibxxen, 13 laytta gidiyaagaa aylletettaaninne qasho keettan genccana koshshiis. Yooseefi hidootaa qanxxennaadaaninne yiillotennaadan aybi maaddidee?
4 Yooseefi qashuwan waayettiiddi, Yihooway A anjjidobaa ubbatoo qoppennan aggenna. (Doo. 39:21; Maz. 105:17-19) Yooseefi sinttappe hananabaa naatettan aymuwan beꞌidobay Yihooway A nashshiyoogaa ammanettanaadankka oottennan waayi aggana. (Doo. 37:5-11) I ba metuwaa Yihoowawu zaari zaaridi yootennan aggenna. (Maz. 145:18) Yooseefi ba waaye ubban Yihooway ‘banaara issippe’ deꞌiyoogaa ba wozanan ammananaadan oottiyoogan, I wozanappe woossido woosaa Yihooway zaariis.—Oos. 7:9, 10.
HIDAARE 11-17
XOOSSAA QAALAN DEꞌIYA ALꞌꞌOBAA MAZAMURE 106
“Eti Banttana Ashshida Xoossaa Dogidosona”
‘Yihoowa Bagga Gidiya Asi Oonee?’
13 Israaꞌeelati sikkida shaaraa, wolqqanttaanne Xoossay oottido hara maalaalissiyaabaa beꞌidi yayyidosona. Eti oychchidoogaadan, Muusee Siinaa Deriyan eta gishshaa Yihoowaara haasayanawu maayiis. (Kes. 20:18-21) Muusee deriyaa huuphiyan daro wodiyaa takkiis. Israaꞌeelati kaalettiya uri baynnan bazzuwan banttarkka attidabadan hanidosona. Eti waatanee? Israaꞌeelati banttana kaalettiya uran, Muusen keehi ammanettennan aggokkona. Eti hirggidi Aaroonayyo hagaadan giidosona: “Neeni nuna kaalettiya xoossata nuuyyo medhdha. Aissi giikko, ha nuna Gibxxeppe ehiida Muusee waanidaakkonne nuuni erokko!”—Kes. 32:1, 2
Ayyaanaaban Alꞌꞌobaa
Ne Ayfee Awa Xeellii?
14 Muusee hegaadan makkalanaadan oottiday aybee? Haꞌꞌikka Mazamure 106:32, 33 qoppa: “Mariiba pulttuwaa matan GODAA hanqqetissidosona; eta gaasuwan Muuse bolli metoi gakkiis. Aissi giikko, eti a yiilloyidosona; yiillotin Muuse doonaappe bessenna qaalai kiyiis.” Israaꞌeelati hanqqetissidoy Yihoowa gidikkonne, yiillotiday Muusa. I bana naagibeenna gishshawu, hegee kaalettanabaa qoppennan haasayiis.
15 Muusee harati oottiyoobaa gaasuwan, Yihoowakko xeelliyoogaappe ba ayfiyaa wora zaariis. Muusee koyro hanotan yohuwaa maara oyqqiis. (Kes. 7:6) Gidoppe attin, I makkalanchcha Israaꞌeelatubaa daro layttawu siyiiddi takkidi dafurananne yiillotana danddayees. Muusee Yihoowa waati bonchchanaakko qoppiyoogaa aggidi bawu siyettidabaa qoppideeshsha?
HIDAARE 18-24
XOOSSAA QAALAN DEꞌIYA ALꞌꞌOBAA MAZAMURE 107-108
“Yihooway Keha Gidiyo Gishshawu A Galatite”
w07 4/15 20 ¶2
Galchchay Yihoowa Sabbo
2 Galchchay asay issippe shiiqidi medhdhido coo cita gidenna. Galchchay deretettan issi mala gididanne ispporttiyan woy issi allaxxiyoban issi mala koshshay deꞌiyo asatu cita malakka gidenna. Shin, galchchawu bayra halchchoy Xoossaa Yihoowa sabbiyogaa. Mazamure maxaafay qonccissiyogaadan, benikka galchchaa halchchoy hegaa. Mazamure 35:18y hagaadan gees: “Kunttida yaa7an taani neeyyo galataa immana; cora asaa shiiquwan taani nena galatana.” Hegaadankka, Mazamure 107:31, 32y nuna hagaadan giidi minttettes: “Aggenna a siiquwaayyoonne i asaassi oottido maalaalissiyaabaayyo eti [Yihoowa] galatona. Eti a asatu yaa7an xoqqu xoqqu oottona.”
Yihoowa Galata, Yaatada Anjjetta
4 Nuuni ubbatoo galatiyaageeta gidanawu, Yihooway nuuyyo immidobaa akeekidinne nashshidi yererana, qassi i nuussi ba aggenna siiquwan oottidobaa qoppana bessees. Mazamuraawee yaatido gishshawu, Yihooway oottido gita gidida daroban maalaalettiis.—Mazamure 40:5; 107:43 nabbaba.
Ayyaanaaban Alꞌꞌobaa
‘Yihooway Nena Waati Minttii?’
Nuuni daafurikkokka, ‘Xoossay nuussi wolqqaa immees.’ (Maz. 108:13) Wolqqaa demmanawu neessi koshshiyabaa Yihooway giigissiis. Yaatiyo gishshawu issi aawatettaa polanawu, metuwa genccanawu, woy ubbatoo ufayttanawu neessi maadoy koshshiyo wode, Yihoowa woossanne buzo xannaꞌa. Kiristtaane ishanttinne michchontti immiyo maaduwa ekka. Ubbatoo wodiya bazzada ne hidootaabaa qoppa. Yaatiyo wode neeni “ubbaban ufaissan genccanaadaaninne danddayanaadan, Xoossai ba bonchchuwaa gitaadan immiyo wolqqa ubban [minnana].”—Qol. 1:11.
ijwyp 90—Cuccumaa:
Iitabaa Qoppiyogaa Waata Aggana Danddayiyanaa?
YELAGATI OYCHCHIYO OYSHAA
Iitabaa Qoppiyogaa Waata Aggana Danddayiyanaa?
Nena ay mala asadan xeellay?
Hegee qofissiyaba gidiyoy aybissee?
Neeni oottana danddayiyobaa
Hegaabaa gujjada nabbaba
Ne laggeti woygiyonaa?
Nena ay mala asadan xeellay?
□ Loꞌꞌobaa hidootiyogaa
“Tawu danddayettida keenan ufayttanawunne yiillotennan agganawu baaxetays. Taani ubba galla pashkki gaada ufayttaydda deꞌennay aybissee?”—Valeero.
□ Iitabaa qoppiyogaa
“Issi loꞌꞌobaa siyiyo wode, taani sohuwara hagee hananawu danddayenna woy bala gaada qoppays.”—Rebeko.
□ Hanotaadan qoppiyogaa
“Taani loꞌꞌobaa hidootikko ta qoppidobay polettennan attiyo wode ubbatoo azzanays, qassi iitabaa qoppikko ubbatoo ufayttikke. Hanotaadan qoppiyogee haniyabaa ammani ekkanaadan maaddees.”—Aano.
Hegee qofissiyaba gidiyoy aybissee?
Geeshsha Maxaafay “ufaittiya asati ubbatonkka bantta de7uwaa” aliyogaa yootees. (Leemiso 15:15) Ubbatoo iitabaa qoppennaageeti, qassi bantta deꞌuwabaanne haratubaa loꞌꞌobaa qoppiyageeti darotoo ufayttiyogee qoncce. Qassi eti daro laggeta demmana danddayoosona. Gido shin, ubbatoo ufayttenna uraara wodiya aattanawu koyiya asi oonee?
Gidikkonne, ubbatoo loꞌꞌobaa hidootiyageetakka eta deꞌuwan gakkiya metoy deꞌees. Leemisuwawu:
● Oduwan olaabaa, shabbirssaabaa woy danobaa darotoo siyaasa.
● Intte so asaa metiyabay gakkin genccennan aggakka.
● Neeni agganawu baaxetiyo balaynne mooroy deꞌiyogee qoncce.
● Ne laggee oottidoban woy haasayidoban azzanennan aggakka.
He metoota sheneho giyogaappe woy hegan keehi unꞌꞌettiyogaappe tumaa ammana ekkanawu baaxeta. Tumaa ammani ekkiyogee neeni iitabaa qoppennaadaaninne deꞌuwan gakkiya he metotun yibbaatada hidootaa qanxxennaadan maaddana.
Neeni oottana danddayiyobaa
● Ne balaa bessiyagaadan xeella.
Geeshsha Maxaafay hagaadan gees: “Xillobaa xalaalaa oottiiddi, nagara oottennan de7iya asi ha sa7aa bollan baawa.” (Eranchchaa 7:20) Neeni baliyogeenne mooriyogee ne nagaranchcha asa gidiyogaa besseesippe attin aynne maaddenna asa gidiyogaa bessenna.
Hanotaadan qoppiyagaa waana gidana danddayay? Ne balaa suurissanawu baaxeta, shin neeni nagaranchcha asa gidiyogaa akeeka. Kaaleeba giyo yelagay hagaadan giis: “Taani hidootaa qanxxennaadan ta balan xeelaa wottikke. Yaatiyogaappe, ta mooruwa giigissiyo ogiya akeekanawu ta balaappe tamaaranawu baaxetays.”
● Nena haratuura geeddarssoppa.
Geeshsha Maxaafay hagaadan gees: “Ane otorettiyoogaa, woikko issoi issuwaa yiilloyiyoogaa, woikko issoi issuwaa qanaatiyoogaa aggoos.” (Galaatiyaa 5:26) Neeni shoobettabeenna hanotatun harati denddido pootota sooshal miidiyan beꞌiyo wode yiillotana woy azzanana danddayaasa. Hegee neeni ne mata laggeta morkkedan xeellanaadan oottana danddayees.
Hanotaadan qoppiyagaa waana gidana danddayay? Neeni ubbabawu shoobettana danddayennaagaa ammanada ekka. Hegaa bollikka, sooshal miidiyan wottido poototi ubba hanotaa qonccissokkona. Aleksis geetettiya yelagiya hagaadan gaasu: “Sooshal miidiyan asay darotoo bantta deꞌuwan keehi ufayttidoba xallaa wottees. Darotoo oottido ubbabaa wottenna.”
● Haratuura, ubba qassi intte so asaara sarotettan deꞌa.
Geeshsha Maxaafay hagaadan gees: “Asa ubbaara sarotettan de7anau, intte baggaara, intteyyo danddayettidabaa ubbaa oottite.” (Roome 12:18) Neeni oottiyobaappe attin harati oottiyobaa laammana danddayakka. Shin sarotettan deꞌanawu doorana danddayaasa.
Hanotaadan qoppiyagaa waana gidana danddayay? So giddon metoy yaa daranaadan oottenna mala naagetta, shin ne laggetuura sarotettan deꞌiyogaadan so asaarakka saruwan deꞌa. Melinddo giyo yelagiya hagaadan gaasu: “Nagari baynna asi baawa, qassi issoy issuwa qohiyogee attenna. Nuuni hanotaa sarotettan oyqqanawu woy agganawu doorana koshshees.”
● Galatiyagaa gida.
Geeshsha Maxaafay “galatite” yaagees. (Qolasiyaasa 3:15) Galatiyagaa gidiyogee deꞌuwan haniya neeni dosennaban gidennan, loꞌꞌoban xeelaa wottanaadan maaddana.
Hanotaadan qoppiyagaa waana gidana danddayay? Ne metuwa akeeka, shin ne deꞌuwan haniya loꞌꞌobaa dogoppa. Rebeko giyo yelaga maccaasiya hagaadan gaasu: “Ubba galla, hanida loꞌꞌo gidida issibaa xaafa oyqqays. Tana gakkiya metoy deꞌikkokka, taani qoppana danddayiyo loꞌꞌobay ubbatoo deꞌiyogaa hassayanawu koyays.”
● Ne dooriyo laggeti ay malakko qoppa.
Geeshsha Maxaafay hagaadan gees: “Iita laggetettai lo77o hanotettaa moorees.” (1 Qoronttoosa 15:33) Neeni etaara wodiya aattiyogeeti boriyageeta, siriyageeta, woy ufayttennaageeta gidikko, neenikka eta iita eeshshaa kaalliyogee attenna.
Hanotaadan qoppiyagaa waana gidana danddayay? Ne laggeta wolqqaama metoy gakkiyo wode, eti guutta wodiyawu azzanananne unꞌꞌettana danddayoosona. Danddayettida keenan eta maadda, shin eta metuwan keehippe unꞌꞌettoppa. Misheelo giyo yelaga maccaasiya hagaadan gaasu: “Issibawu loꞌꞌo xeeli baynnaageetu xallaara wodiya aattoppite. Hisaabiyan naaꞌꞌu aco paydota issippe gujjiyo wode gita aco paydo gidees.”
Hegaabaa gujjada nabbaba
Geeshsha Maxaafay nuuni deꞌiyo wodee keehippe ‘wayssiya wode’ gidiyogaa yootees. (2 Ximootiyoosa 3:1) Daro metoy kumido ha alamiyan ubbatoo loꞌꞌobaa qoppanawu metootay? “Tuggay Keehi Daridoy Aybissee?” giyagaa nabbaba.
Ne laggeti woygiyonaa?
“Taani issi issitoo iitabaa qoppiyo wode, he hanotaabaa loꞌꞌobaanne iitabaa xaafays. Hegaadan oottiyogee hanotaabaa dumma ogiyan xeellanaadan oottees. Darotoo iita milatiya hanotankka loꞌꞌobay deꞌees.”—Eemo.
“Taani iitabaa qoppiyo wode, issi ura maaddana danddayiyo ogiya woy haratussi oottana danddayiyobaa koyays. Yesuusi immiyogee ufayssiyogaa yootiis, qassi taani haratuyyo immiyo wode iitabaa darin qoppikke.”—Jeesa.
Zaaretuwa: Iitabaa qoppiyogaa waata aggana danddayiyanaa?
Ne balaa bessiyagaadan xeella. Ne balaa suurissanawu baaxeta, shin neeni nagaranchcha asa gidiyogaa akeeka.
Nena haratuura geeddarssoppa. Issibawu shoobettabeennaba gidikko, shoobettabeennay ne xalla gidennaagaa akeeka.
Haratuura, ubba qassi intte so asaara sarotettan deꞌa. Kasekka so giddon deꞌiya metoy yaa gujjanaadan oottoppa, shin sarotettay deꞌanaadan neeyyo danddayettidabaa ootta.
Galatiyagaa gida. Ne metuwa akeeka, shin ne deꞌuwan haniya loꞌꞌobaa dogoppa.
Ne dooriyo laggeti ay malakko qoppa. Deꞌuwan gakkiya metuwan keehi unꞌꞌettenna laggeta doora.
Deꞌuwan gakkiya metuwa gotiya kantta kiyana danddayaasa, zaarettada pooꞌuwa beꞌanaagaa ammanetta
HIDAARE 25–TISAASE 1
XOOSSAA QAALAN DEꞌIYA ALꞌꞌOBAA MAZAMURE 109-112
Kawuwa Yesuusawu Exatite!
w06 9/1 13 ¶6
Mazamure Maxaafaa Shaahotuppe Ichchashanttuwan Deꞌiya Kulkka Qofata
110:1, 2—“[Daawita] Goday,” Yesuus Kiristtoosi Xoossaa ushachchan uttido wode ay oottidee? Yesuusi hayquwappe denddidi saluwa biidi 1914n Kawo gididi haariyogaa doommana gakkanaashin Xoossaa ushachchan uttidi naagiis. He wodiyan Yesuusi, ayyaanan tiyettidaageeta haariiddi takkiis. Sabbakiyonne erissiyo ashkkara oottiyo oosuwawu, qassi aara issippe A Kawotettan haaranawu eta giigissiis.—Maatiyosa 24:14; 28:18-20; Luqaasa 22:28-30.
w00 4/1 18 ¶3
Xoossaara Eqettiyageeti Xoonokkona!
3 Yihoowa asay 20tta xeetu layttaa doomettaa heeraappe doommidi qohettiiddi deꞌees. Daro biittatun, iita asati Xoossaa Kawotettaa mishiraachchoy aakkennaadan teqqanawu koyidosona. Eta hegawu denttettiyagee ‘mittiyo uraa koyidi, gudiya gaammuwadan gudiiddi nu lanqqiyan yuuyiya’ nu waanna morkkiya Dabloosa. (1 PHeexiroosa 5:8) “Aihuda gidenna deretu wodee” 1914n wurin, Xoossay ha saꞌawu ooratta Kawo oottidi ba Naꞌaa sunttiis; qassi hagaadan giidi A azaziis: ‘Ne morkketu giddon haara!’ (Luqaasa 21:24; Mazamure 110:2) Yesuusi ba maataa goꞌettidi Seexaanaa saluwappe saꞌawu oliis; qassi I saꞌaappe harasaa beennaadan oottiis. Seexaanay baayyo guutta wodee attidoogaa eriyo gishshawu, tiyettida Kiristtaanetunne eta laggetu bolli keehi hanqqettees. (Ajjuutaa 12:9, 17) Xoossaara olettiyageeti zaari zaaridi qohuwa gattiyogee ay kaalettidee?
lff 55 qofaa 1
Intte Galchchaa Maadda
Nuuni ubbaykka galchchan maaddana danddayoos. Leemisuwawu, intte galchchan deꞌiya amaridaageeti cimee woy abbe pacee? Eti shiiquwawu baanaadan maaddana danddayay? Woy etawu koshshiya issi issibaa shammiyoogaa woy keettaa pittiyoogaa mala haraban maaddana danddayay? (Yaaqooba 1:27 nabbaba.) Nuuni nu SHiiquwaa Addaraashaa geeshshiyoogaaninne issi issibaa giigissiyoogankka maaddana danddayoos. Hegeeta oottanaadan ooninne nuna giddenna. Nuuni Yihoowanne nu ishantta siiqiyoogee, “Hekko, tana kiitta” gaanaadan denttettees.—Isiyaasa 6:8.
Haattan muukettida Yihoowa Markkati hara ogetunkka galchchaa maaddana danddayoosona. Geeshsha Maxaafan etappe koyettiyaabaa oottiya ishantti galchchawu oottiyaageeta woy cima gididi maaddana danddayoosona. Ishanttikka michchonttikka aqinye gididi mishiraachchuwaa minnidi yootiyoogan maaddana danddayoosona. Yihoowa Markkatuppe amaridaageeti goynuwaa sohota keexxiyoogan woy hara ogetun maaddana koshshiyo galchchaa biidi maaddana danddayoosona.
Ayyaanaaban Alꞌꞌobaa
Xoossaa Kawotettaa Minttada Ammana
15 Abrahaamaara maacettido maachaynne Daawitaara maacettido maachay, maccaasee zerettay kawo gidanaagaa qonccissiyaaba gidikkokka, asaa naati ubbay anjjettanaadan i kawo gidiyoogaa xallay gidenna. Eti tumuppe anjjettana mala, nagaraa aylletettaappe naxa kiyananne Yihoowa keettaa asa gidana bessees. He zerettay ha ubbabaa polanawu qeese gididikka oottana koshshees. Aadhida erancha gidida Xoossay hanotaa giigissanawu Malkki-Xedeqa mala qeese gidiyo maachaa giyo hara maachaa maacettiis.
16 Xoossay Yesuusaara buzo maachaa maacettanaagaa Kawuwaa Daawita baggaara qonccissiis. He maachay naaꞌꞌubay qoncciis. Koyruwan, Yesuusi ba morkketa xoonana gakkanaashin ‘Xoossaappe ushacha baggaara uttana.’ Naaꞌꞌanttuwan, Yesuusi “Malkki-Xedeqi qeese gididoogaadan, . . . merinau qeese gidana.” (Mazamure 110:1, 2, 4 nabbaba.) “Malkki-Xedeqi qeese gididoogaadan,” Yesuusi qeese gidana koshshiyoy aybissee? Abrahaama zareti Hidootaa Biittaa laattanaappe daro wodiyaappe kase, Saleema kawoy, Malkki-Xedeqi ‘Ubbaappe Bolla Xoossaa qeese’ gididi oottiis. (Ibr. 7:1-3) I kawokka qeesekka gididi oottana mala sunttidaagee Yihoowa; qassi Yesuusappe kase he naaꞌꞌu oosuwaa oottidaagee Malkki-Xedeqa xalla. Qassi Malkki-Xedeqappe kase woy appe simmin hara uri hegaadan oottidoogaa qonccissiyaabi baynna gishshawu, i “merinau qeese” geetettiis.
17 Yihooway ha maachaa baggaara, Yesuusi qeese gidanaadan sunttiis; qassi “Malkki-Xedeqi qeese gididoogaadan, [i] merinau qeese gidana.” (Ibr. 5:4-6) Ha maachay Yihooway koyro asaa naatuyyoonne saꞌaayyo halchidobaa Masiyaa Kawotettaa baggaara polanaagaa bessees.
Ootti-besuwa.
ijwfq 23
Yihoowa Markkati Olettennay Aybissee?
Yihoowa Markkati, kaallidi deꞌiyabatu gaasuwan olaa olettokkona:
Xoossawu azazettoosona. Geeshsha Maxaafay Xoossaa ashkkarati “bantta bisuwaa marasha” kessanawu qoxxanaagaanne “mulekka olaa timirttiyaa” tamaarennaagaa yootees.—Isiyaasa 2:4.
Yesuusawu azazettoosona. Kiitettida Pheexiroosawu Yesuusi hagaadan giis: “Ne bisuwaa a shoohuwan zaarada wotta; aissi giikko, biso shoddiya ubbai bison haiqqana.” (Maatiyoosa 26:52) Yaatiyo gishshawu, Yesuusi bana kaalliyageeti ola miishshaa goꞌettana koshshennaagaa yootiis.
Yesuusi erissiyo ashkkarati polotikaaban oossinne exatennan deꞌiyogan, ‘saꞌaa bagga gidennaadan’ I azazidobawu azazettoosona. (Yohaannisa 17:16) Wotaaddarati oottiyobaa eti eqettokkona, woy wotaaddara gidanawu dooriyageetu allaalliyan kelttiya gelokkona.
Harata siiqoosona. Yesuusi I erissiyo ashkkarati ‘issoy issuwara siiqettanaadan’ azaziis. (Yohaannisa 13:34, 35) Yaatiyogan, eti kumetta saꞌaa ishanttu maabaray deꞌanaadan oottido gishshawu, ooninne ba ishaara woy ba michcheera mule olettenna.—1 Yohaannisa 3:10-12.
Beni Kiristtaanetu leemisuwa kaalloosona. Insayklopiidiya of Rilijin end Wor giyo maxaafay yootiyogaadan, “beni Yesuusa kaalliyaageeti olettanawunne wotaaddara gidanawu koyibookkona.” Ayssi giikko, hegaadan oottiyogee “Yesuusi tamaarissido siiquwa higgiyaranne nu morkketa siiqanaadan imettida azazuwara maayettennaagaa” akeekidosona. Jarmane biittaa asa gidida, haymaanootiya eranchay Piter Minholtti, beni Yesuusa kaalliyageeta xeelliyagan hagaadan giis: “Issi uri Kiristtaanenne wotaaddara gididi deꞌiyogee danddayettennabadan qofettees.”
Nu heeran deꞌiya asawu loꞌꞌobaa oottoos
Yihoowa Markkati bantta heeran deꞌiya asawu loꞌꞌobaa oottoosona, qassi eti bantta deꞌiyo biittan deretettan woppay xayanaadan oottiyageeta gidokkona. Nuuni Geeshsha Maxaafay yootiyo kaallidi deꞌiya azazota azazettiyogan, kawotettaa sunttata bonchchoos:
“Asai ubbai deriyaa heemmiyaageetuyyo haarettanau bessees.”—Roome 13:1.
“Qeesaaraagaa Qeesaarassi, Xoossaagaa Xoossaassi immite.”—Maatiyoosa 22:21.
Yaatiyo gishshawu, nuuni higgiyawu azazettoos, giiraa giiroos, qassi kawotettay deretettan woppay deꞌanaadan oottiyobaa maayettoos.
TISAASE 2-8
XOOSSAA QAALAN DEꞌIYA ALꞌꞌOBAA MAZAMURE 113-118
Yihoowa Galatiyogaa Waatidi Bessana Danddayiyoo?
w01 1/1 11 ¶13
Siiquwa minttite
13 Yesuusi yootidoogaadan, nuuni ubbaappe kaseyidi Yihoowa siiqana bessees. Shin, nuuni yelettiyo wode kumetta hanotan Yihoowa siiqiyageeta gidokko. Siiqoy nuuni dichchana bessiyabaa. Nuuni Yihoowabaa koyro siyidobay akko shiiqanaadan oottiis. I ha saꞌaa, asawu waati giigissidaakko loddan loddan tamaarida. (Doomettaabaa 2:5-23) Koyro asati nagaraa oottido wode asaa olibayiyogaa aggidi nuna wozanawu I oottidobaa tamaarida. (Doomettaabaa 3:1-5, 15) I ammanettiyageetusi loꞌꞌobaa oottiis; qassi nuuni atotettaa demmanaadan ba mexi issi Naꞌaa immiis. (Yohaannisa 3:16, 36) Nu erido ha ubbabay Yihoowa keehi nashshanaadan oottiis. (Isiyaasa 25:1) Yihooway siiquwan awu koshshiyabaa kunttido gishshawu Kawuwa Daawiti Yihoowa siiqiyogaa yootiis. (Mazamure 116:1-9) Ha wodiyankka, Yihooway nuussi koshshiyabaa kunttees, nuna kaalettees, nuussi wolqqaa immees, qassi nuna minttettees. Nuuni Yihoowabaa kaseegaappe aaruwan eriyo wode nu siiqoy minni minni bees.—Mazamure 31:23; Sofonaasa 3:17; Roome 8:28.
w09 7/15 29 ¶4-5
Galatiiddi Ekkite; Qassi Kumetta Wozanaappe Immite
Mazamuraawee “I taassi kehido kehatettaa gishshaa taani GODAASSI ai qanxxanau danddayiyaanaa?” yaagiis. (Maz 116:12) Yihooway awu aybin kehidee? I ‘unꞌꞌettido’ wode Yihooway A minttettiis. Qassi Yihooway A “haiquwaappe” ashshiis. Hegaassi I Yihoowawu issibaa oottidi “qanxxanau” koyiis. Yaatin mazamuraawee ay oottana danddayii? I “taani shiiquwaa [Yihoowayyo] gattana” yaagiis. (Maz. 116:3, 4, 8, 10-14) I gelido qaalaanne Yihoowassi oottanawu ekkido aawatettaa ubbaa polanawu murttiis.
Neenikka hegaadan oottana danddayaasa. Waatada? Ne deꞌuwan ubbatoo Xoossay kessido higgetanne marata kaalliyogaana. Yaaniyo gishshawu, ne deꞌuwan Yihoowa goynuwa aybippenne sinttaya, qassi ne oottiyo ubbaban Yihoowa ayyaanay kaalettanaadan eeno ga. (Era. 12:13; Gal. 5:16-18) Yihooway neessi oottido ubbabawu neeni mule qanxxana danddayennaagee qoncce. Shin, kumetta wozanaappe neeni awu haggaaziyogaa beꞌiyo wode ‘Yihoowa wozanay ufayttees.’ (Lee. 27:11) Hegaadan Yihoowa ufayssiyogee keehi gita maata!
Wogaabaa Maxaafaappe Nuuni Tamaariyoobaa
9 Tamaariyo naaꞌꞌanttobaa: Nuuni Yihoowa galatanawu ayyo haggaazoos. Nuuni Israaꞌeelati yarshshiyo issippetettaa yarshshuwaabaa pilggiyo wode hegaabaa tamaarana. Wogaabaa maxaafan issi Israaꞌeela asi issippetettaa yarshshuwaa “galata yarshsho” oottidi shiishshana danddayiyoogaa akeekoos. (Wog. 7:11-13, 16-18) I yarshshana bessiyo gishshawu gidennan, koyiyo gishshawu yarshshees. I ba Xoossaa Yihoowa siiqiyo gishshawu, ba dosan yarshshees. Yarshshida uri, A so asaynne qeeseti yarshshettida mehiyaa ashuwaa moosona. SHin, ashuwaappe amaridaagee Yihoowa xallawu imettees. Hegee awugee
10 Tamaariyo heezzanttobaa: Nuuni Yihoowa siiqiyo gishshawu nuussi deꞌiya keehi loꞌꞌobaa ayyo immoos. Issi mehiyaappe Yihooway handdaa loꞌꞌobadan xeellees. Qassi kilahota gujjin, mehiyaa ashuwaappe amaridaagee dumma gidiyoogaa I yootiis. (Wogaabaa 3:6, 12, 14-16 nabbaba.) Hegaa gishshawu, issi Israaꞌeela asi ba dosan he ashotuppe yarshshiyo wode, Yihooway keehi ufayttees. Hegaa Yihoowawu immida Israaꞌeela asi I baassi deꞌiya keehi loꞌꞌobaa Xoossawu immanawu koyidoogaa bessees. Hegaadan, Yesuusi Yihoowa siiqiyo gishshawu, Yihoowawu haggaazanawu bawu danddayettida ubbabaa oottiyoogan, ba dosan baassi deꞌiya keehi loꞌꞌobaa Yihoowawu immiis. (Yoh. 14:31) Xoossaa sheniyaa oottiyoogee Yesuusa ufayssees; I Xoossaa higgiyaa keehi siiqees. (Maz. 40:8) Yesuusi ba dosan haggaaziyoogaa beꞌidi Yihooway keehi ufayttiis!
11 Nuuni Yihoowawu haggaaziyoogee A xeelliyaagan nuussi siyettiyaabaa ayyo bessiyooba gidiyo gishshawu, hegee he issippetettaa yarshshuwaara issi mala. Nuussi deꞌiya keehi loꞌꞌobaa Yihoowayyo immoos; qassi nuuni A nu kumetta wozanaappe siiqiyo gishshawu hegaadan oottoos. Bantta dosan goynniya miilooniyan qoodettiya asay Yihoowanne A ogiyaa wozanappe siiqidi haggaaziyoogaa beꞌidi Yihooway ay keena ufayttaneeshsha! Yihooway nuuni oottiyoobaa xalla gidennan, nu hegaa aybissi oottiyaakko akeekeesinne xoqqu ootti xeellees. Hegee nuna keehi minttettees. Leemisuwawu, neeni cima gidikko, ne koyiyoogaadan oottana danddayennaagaa Yihooway akeekiyoogaa ammanettana danddayaasa. Yihoowawu darobaa oottana danddayennabadan neessi siyettennan waayi aggana; shin neeni oottana danddayiyoobaa oottanaadan nena denttettiyay Yihoowa wozanappe siiqiyoogaa gidiyoogaa I akeekees. Neeni immana danddayiyo, neessi deꞌiya loꞌꞌobaa I ufayttidi ekkees.
Ayyaanaaban Alꞌꞌobaa
‘Hayqqidaageeta Xoossay Denttanaagaa Ammanays’
9 Mazamure 118:22y daro xeetu layttappe guyyiyan polettana dendduwaabaa yootees. Masee ixettananne hayqqana; shin i godaa xaphuwaa minttiya, ubbaappe aadhdhiya shuchcha gidanawu hayquwaappe denddana. Yaaniyoogan, hayquwaappe denddida he Naꞌaa xalaalay ‘nuuni attana mala asassi imettida’ sunttay deꞌiyoogaa gidiis.—Oos. 4:12; Efi. 1:20.
TISAASE 9-15
XOOSSAA QAALAN DEꞌIYA ALꞌꞌOBAA MAZAMURE 119:1-56
‘Yelagati Bantta Ogiya Geeshsha Oottidi Waati Naagana Danddayiyonaa?’
w87 11/1 18 ¶10
Oottiyo Ubbaban Ne Geeshshatettaa Naagay?
10 Phawuloosi Efisoona 5:5n, “Hagaa erite; ooninne shaaramuxiyaagaa woi tunabaa oottiyaagaa, woi miishsha amottiyaagaa gidikko, Kiristtoosa kawotettaanne Xoossaa kawotettaa laattanau danddayenna; miishsha amottiyoogee eeqau goinniyoogaappe dummatenna” yaagiis. Shin, ‘shaaramuxidi bantta bolli nagaraa oottiyogaa’ gaasuwan layttan layttan shaꞌan qoodettiyageetussi seeray imettees woy bohettoosona. (1 Qoronttoosa 6:18) Hegee darotoo haniyoy Xoossaa “qaalai giyoogaadan” banttana naagennaagaappe denddidaagaana. (Mazamure 119:9) Leemisuwawu, daro ishantti oosuwappe shemppiyo wodiyan bantta kandduwa geeshshatettaa naagokkona. He shemppo wodiyan eti bantta ishanttuuranne michonttuura gidennan ammanennaageetuura laggetiyogaa doommoosona. Issi issi Kiristtaaneti ‘hageeti loꞌꞌo asa’ gi qoppidi bessennabaa etaara oottoosona. Hegaadankka, haraati qassi bantta ooso miiretuura laggetaa minttoosona. Issi galchchaa cimay banaara oottiya maccaaseera siiqettido gishshawu, ba soo asaa aggidi iira deꞌiyogaa doommiis! Yaatidi galchchaappe bohettiis. Hegee “iita laggetettai lo77o hanotettaa moorees” giya Geeshshaa Maxaafaa zoree tuma gidiyogaa bessiyaba.—1 Qoronttoosa 15:33.
w06 6/15 25 ¶1
“Neeni Yootidoogee Tana Ufaissees”
YIHOOWAY ha meto wodetun eta gakkiya tuggaa genccanaadan maaddiya akeekissota ba asawu giigissees. Hegeetuppe amaridaageeta Geeshsha Maxaafaa buzo nabbabiyo wode demmana, harata qassi Kiristtaane shiiqotun tamaariyobaappe woy ishantti yootiyo qofaappe demmana danddayoos. He wodetun nu nabbabiyo woy siyiyobaappe daroy nuussi ooratta gidenna. Hegaa mala qofay kase nu eriyoba gidana danddayees. Shin nuuni dogiyo gishshawu, Yihoowa halchchuwadan, higgiyadaaninne azazuwadan qoppana mala nu qofaa ubbatoo ooraxissana koshshees. Nuuni Xoossaa akeekissota nashshana bessees. He akeekissoti, Yihoowa ufayssiya ogiyan deꞌanawu nuna denttettida gaasuwa ubbatoo qoppanaadan maaddiyogan nu ayyaanaa ooraxissoosona. Hegaa gishshawu, mazamuriya yexxiyagee Yihoowayyo “neeni yootidoogee tana ufaissees” giidi yexxiis.—Mazamure 119:24.
w10 4/15 20 ¶2
Pattennabaa Xeellenna Mala Intte Ayfiyaa Teqqite!
2 Gidikkokka, nuuni beꞌiyoobay nuna qohanakka danddayees. Nu ayfee nu guuggiyaara keehippe gayttidaba gidiyo gishshau, nuuni ayfiyan beꞌiyoobay amottanaadan oottana woy amuwaa denttettana danddayees. Nuuni deꞌiyo alamee Seexaanaa Dabloosi haariyo iitanne ba ufayssa xallaa koyiyaagaa gidiyo gishshau, lemꞌꞌi ootti xeellikkonne nuna sohuwaara wora zaarana danddayiya misiletuuninne woriya gattiyo darobatun kumiis. (1 Yohaannisa 5:19) Yaatiyo gishshau, Mazamuraawee: “Pattennabaa xeellenna mala, ta aifeta teqqa; ne ogiyan ta de7uwaa ooraxissa” yaagidi Xoossaakko woossidoogee garamissiyaaba gidenna.—Mazamure 119:37.
Ayyaanaaban Alꞌꞌobaa
w05 4/15 10 ¶2
Yihoowa Qaalan Ammanetta
2 Mazamure 119y yootiyo waanna qofay, Xoossaa qaalay woy kiitay keehi maaddiyaba gidiyogaa. Hegaa xaafidaagee hassayanawu maaddanaadan qoppidi pitaliya kasiya kaaluwan xaafiis. He mazamuriyawu deꞌiya 176 paydoti Ibraawetto pitaletu kasiya kaaluwadan xaafettidosona. Ibraawettuwan koyro xaafettida mazamuriyan deꞌiya 22 menttotun issi mala pitaletun doommiya 8n maarati deꞌoosona. He mazamuree Xoossaa qaalaabaa, higgiyabaa, akeekissotubaa, ogetubaa, azazotubaa, wogatubaa, maaratubaa, pirddaabaanne yootidobaa qonccissees. Ha huuphe yohuwaninne kaalliyagan, Mazamure 119 qofaa tuma gidida Ibraawetto Geeshsha Maxaafaa birshshettaa maaran pilggana. Beni wodiyan deꞌidanne ha wodiyan deꞌiya Yihoowa ashkkaratubaa wotti dentti qoppiyogee, ayyaanay denttettin xaafettida ha mazamuriya nashshanaadaaninne xaafettida Xoossaa Qaalaa Geeshsha Maxaafaa gishshawu kaseegaappe aaruwan galatanaadan oottees.
ijwyp 83—Cuccumaa
Paaciya Waatada Xoonana Danddayiyanaa?
YELAGATI OYCHCHIYO OYSHAA
Paaciya Waatada Xoonana Danddayiyanaa?
Kiitettida Phawuloosi hagaadan giis: “Taani lo77obaa oottanau dosishin, iitabaa oottiyoogee tau higge gidiyoogaa demmaas.” (Roome 7:21) Inttiyo hegaadan siyetti erii? Yaanikko, iitabaa oottanaadan intte paacettiyo wode xoonanawu ha huuphe yohoy maaddana danddayees.
Intte erana koshshiyabaa
Intte oottana danddayiyobaa
Intte laggeti giyobaa
Intte Erana Koshshiyabaa
Paaceenne laggeti iisettiyogee kirenne marppe mala. Geeshsha Maxaafay “iita laggetettai lo77o hanotettaa moorees” gees. (1 Qoronttoosa 15:33) Harati woy sooshal miidee iisettiyogee intte paaciyan gelanaadan oottiya amuwa denttettananne “iitabaa oottanau daro asaa” kaallanaadankka oottana danddayees.—Kessaabaa 23:2.
“Harati dosiyonne nashshiyo asa gidanawu keehi koyiyogee, eta ufayssanawu eti oottiyo ubbabaa oottanaadan denttettana danddayees.”—Jereema.
Intte qoppana bessiyabaa: Woyganddee inttena bessiyagaappe aaruwan qofissiyaba gidikko paacee intteyyo keehi deexxana danddayees.—Leemiso 29:25.
Waanna qofaa: Laggeti inttena iisettido gishshawu, intte kaalliyo maarata kanttoppite.
Intte oottana danddayiyobaa
Intte ammaniyobaa loytti erite. Intte ammaniyobaa loytti erana xayikko, haratuyyo kushe miishsha mala gideeta. Yaatiyogaappe ‘ubbabaakka paaccite; loꞌꞌobaa mintti oyqqite’ giya Geeshsha Maxaafaa zoriya kaalliyogee keehi loꞌꞌo. (1 Tasalonqqe 5:21) Intte ammaniyobaa loytti eriyo wode, hegaa mintti oyqqanawunne paaciya xoonanawu metootekketa.
Intte qoppana bessiyabaa: Xoossay kessido kandduwa maarata kaalliyogee inttessi loꞌꞌo gidiyogaa intte ammanana koshshiyoy aybissee?
“Taani ammaniyobawu xalatettan exatiyonne paaciyan xoonettennan ixxiyo wode, harati tana loytti bonchchiyogaa akeekaas.”—Kimbberl.
Geeshsha Maxaafan deꞌiya leemiso gidiya asa: Daaneela. Daaneeli Xoossaa higgeta azazettanawu “ba wozanan qofaa” qachchidoy yelagatettaana gidennan aggenna.—Daaneela 1:8.
Intte lefa miyyiya erite. Geeshsha Maxaafay ‘wodallatettaa amoti’ intte yelagatettaa wodiyan wolqqaamiyogaa yootees. (2 Ximootiyosa 2:22) He amoti mattumaa gaytettaa koshsha xallaa bessiyabata gidennan, haratun nashettanawunne baree gakkennan yelidaageetuppe shaahettidi deꞌanawu koyiyogaakka xaaxi waaxiyaba.
Intte qoppana bessiyabaa: Geeshsha Maxaafay, “asi huuphiyan huuphiyan ba huuphe iita amuwan gooshettiyo wodenne cimettiyo wode paacettees” yaagees. (Yaaqooba 1:14) Inttena keehi paacciya amoy awugee?
“Inttena haraappe aaruwan xooniya paacee awugaakko shaakki eranawu suuretettan inttena qorite. He paaceta waati xoonana danddayiyakko eranawu pilggite; qassi intte goꞌettana danddayiyo qofata xaafi oyqqite. Yaatikko, he paacee haranttuwa inttena gakkiyo wode, waati xoonanaakko ereeta.”—Silvo.
Geeshsha Maxaafan deꞌiya leemiso gidiya asa: Daawita. I issi issitoo, harati iisettin, qassi ba huuphe amuwankka xoonettiis. Shin Daawiti ba balaappe tamaariis; qassi loꞌꞌobaa oottanawu baaxetiis. I Yihoowa “geeshsha wozanaa ta giddon medhdha; ammanettiya ayyaanaa ta giddon ooraxissa” giidi woossiis.—Mazamure 51:10.
Xoonettoppite. Geeshsha Maxaafay, “Iitabaa lo77oban xoonappe attin, iitabai nena xoonoppo” yaagees. (Roome 12:21) Hegaa giyogee paaciyawu kushiya immana koshshenna giyogaa. Intte likkebaa oottanawu doorana danddayeeta.
Intte qoppana bessiyabaa: Balabaa oottanawu paacettiyo wode, he paaciya xoonidi ubbatoo likkebaa waati oottana danddayeetii?
“Paaciyan xoonettada likke gidennabaa oottikko tawu aybi siyettanaakko qoppays. Tawu loꞌꞌobay siyettanee? Geella qantta wodiyawu tawu hegaadan siyettana danddayees. Daro wodee aadhdhi simminkka tawu hegaadan siyettanee? Akkay, taani keehi azzananaagee attenna. Guutta wodiya ufayssawu gaada hegaa keena yarshshuwa qanxxana koyikke.”—Soofiyo.
Geeshsha Maxaafan deꞌiya leemiso gidiya asa: Phawuloosa. Awu iita qofay deꞌiyogaa yootikkonne, hegan xoonettennan agganawu dooriis. I hagaadan giis: “Ta bollaa yimppada haarissais.”—1 Qoronttoosa 9:27.
Waanna qofaa: Iitabaa oottanawu nena gakkiya paaciyan xoonettanaakko agganaakko kuuyiyay nena.
Paacee guutta wodiyassa gidiyogaa hassayite. Iyyo layttay 20 gidido Meeliisa hagaadan gaasu: “Naaꞌꞌantto xekkaa timirtte keettan taani tamaariyo wode tana gakkiya wolqqaama paaceti haꞌꞌi tawu keehi laafaba. Taani hegaa qoppiyogee, haꞌꞌi tana gakkiya metoykka aadhdhiyogee attennaagaanne sinttappe taani he wodiya qoppada paaciya xoonidoogan keehi ufayttanaagaa ammanettays.”
Intte laggeti giyobaa
“Issibawu murttiyogeenne hegaa polanawu xalatettan oottidoogee paaciya xoonanawu tana maaddiis. Leemisuwawu, taani issibaa oottennan agganawu kuuyikko, he kuuyidobaa mulekka laammikke; qassi hegaabaa zaarettada qoppikke woy ta kuuyidobaa ooninne laamissanaadan eeno giikke.”—Oliviyo.
“Yelagati gibirati deꞌiyosaa baanaadaaninne yan deꞌiya asay oottiyo ubbabaa hegeekka, mattoyiya ushshaa uyanaadan, jallissiyabaa goꞌettanaadan, qassi mattumaa gayttanaadan harati eta keehi iisettoosona. Hegaabaa tana yelidaageetuura qoncciyan haasayidoogee tana maaddiis. Hegaa bollikka, shemppo wodiyan dumma dummabata oottiyogan tawu oosoy daranaadan oottidoogee, iitabaa oottanawu paacettennaadan tana maaddiis.”—Jeereda.
“Xoonanawu tawu deexxida paacetuppe issoy, harati balabadan xeellana xayikkonne tawu bala gididabaa oottanaadan tana iisettiyogaa; leemisuwawu allaxxiyobaa dooriyo wode hegaa mala paacee tana gakkees. Hegaa mala paaciya xoonanawu ta ammaniyobaa loytta erana koshshees; qassi hegee wodiyanne meeziya koyiyaba.”—Mayano.
“Paaciya xoonanawu, intte ammanettidaageeta gidana koshshees. Internneetiya goꞌettiyo wode, paacciya pokkobati darotoo gakkana danddayiyo hanotatanne hegaa malabati yiyo wode waatana bessiyakko intte kasetidi giigettana koshshees. Paaciyan xoonettenna mala loꞌꞌo halchchuwa kessana bessees.”—Juliyana.
TISAASE 16-22
XOOSSAA QAALAN DEꞌIYA ALꞌꞌOBAA MAZAMURE 119:57-120
Metuwa Waati Genccana Danddayiyoo?
w06 6/15 20 ¶2
“Taani Ne Higgiyaa Aiba Siiqiyaanaa!”
2 “Xoossaa higgeti mazamuraawiyawu waanidi minttettuwa pultto gididonaa?” giidi oychchana danddayoos. Yihooway awu qoppiyogaa ammanettido gishshawu I minettiis. He higgee siiquwan imettidaba gidiyogaa I eridoogee, eqettiyageeti A bolli gattiyo wolqqaama metoy deꞌishinkka mazamuraawee ufayttanaadan oottiis. Yihooway A kehatettan oyqqidoogaa eriis. Qassi, mazamuraawee Xoossaa higgiya ba deꞌuwan oosuwan peeshshidoogee I ba morkketuppe aaruwan eranchcha gidanaadaaninne deꞌuwan takkanaadan maaddiis. Yihoowa higgiyawu azazettidoogee, sarotettaynne loꞌꞌo kahay awu deꞌanaadan maaddiis.—Mazamure 119:1, 9, 65, 93, 98, 165.
w00 12/1 14 ¶3
Yihoowa Hassayissota Keehi Siiqay?
3 Mazamuraawee Xoossaa hassayissota keehi siiqiyo gishshawu hagaadan yexxiis: “Taani ne azazuwaa naaganau, eesotanaappe attin takkikke. Iitati tana wodoruwaara dooddikkokka, taani ne higgiyaa dogabeikke.” (Mazamure 119:60, 61) Morkketi nuna dooddanawu dooqqiyo wodorota saluwan deꞌiya nu Aaway qanxxanaagaa nuuni ammanettiyo gishshawu, Yihoowa hassayissoti yedetaa genccanaadan nuna maaddoosona. Nuuni mishiraachchuwa yootana mala hegaa mala xubeta I bessiya wodiyan xayssees.—Marqqoosa 13:10.
w06 9/1 14 ¶4
Mazamure Maxaafaa Shaahotuppe Ichchashanttuwan Deꞌiya Kulkka Qofata
119:71—Metuwaa gencciyoogee loꞌꞌo gidiyoy aybissee? Metoy nuuni Yihoowan ammanettanaadan, A mintti woossanaadan, Geeshsha Maxaafaa loytti xannaꞌanaadaaninne hegaa oosuwan peeshshanaadan nuna tamaarissana danddayees. Ubbaappe aaruwan, metoy gakkiyo wode nuuni oottiyobay nu giigissana koshshiya eeshshaa qonccissana danddayees. Metoy nuna geeshshanaadan eeno giikko, hegee keehi azananaadan oottenna.
‘Yeekkiyaageetuura Yeekka’
3 Nuna ooppenne aaruwan minttettiyay saluwan deꞌiya, qarettiya nu Aawaa Yihoowa gidiyoogee qoncce. (2 Qoronttoosa 1:3, 4 nabbaba.) Ooppenne aaruwan qarettiya Yihooway, “Inttena minttettiyaagee tana” yaagidi ba asawu yootiis.—Isi. 51:12; Maz. 119:50, 52, 76.
5 Yihooway nuna maaddanaagaa wozanappe ammanettana danddayoos. Yaatiyo gishshawu, nu azzanuwaabaa Yihoowawu loytti yootanawu yayyana bessenna. Yihooway nu waayiyaa akeekidi, nuuyyo keehi koshshiya minttettuwaa immanaagaa eriyoogee keehi ufayssees! SHin i nuna waati minttettii?
Ayyaanaaban Alꞌꞌobaa
w17 05/15 19-20 ¶11,12
Ne Siiqoy Irxxanaadan Oottoppa
11 Nuuni tumu Kiristtaaneti tumaa dosoosinne mintti oyqqoos. Tumawu pulttoy Xoossaa Qaalaa xalla. Yesuusi ba Aawaa woossiiddi, “Ne qaalaikka tumatettaa” yaagiis. (Yoh. 17:17) Hegaa gishshawu, Xoossaa Qaalaa suure eriyoogan tumaa siiqiyoogaa doommoos. (Qol. 1:10) SHin, eraa demmiyoogaappe aadhiyaabaa koshshees. Mazamure 119 ayyaanay denttettin xaafidaagee Geeshsha Maxaafaa tumaa siiqiyoogee woygiyoogaakko nuuni akeekanaadan waati maaddiyaakko beꞌa. (Mazamure 119:97-100 nabbaba.) Nuuni Geeshsha Maxaafaa qofaa gallassa kumettaa wotti denttidi qoppanawu wodiyaa bazziyoo? Nuuni nu deꞌuwan oosuwan peeshshidi goꞌettiyo ogiyan wotti dentti qoppiyo wode, Geeshsha Maxaafaa tumaa kaseegaappe loyttidi nashshoos.
12 Mazamurawee, “Ne qaalai aiba mal77ii! Eessaa ililuwaappekka aadhdhidi, ta manggaagan mal77ees” yaagiis. (Maz. 119:103) Hegaadan, Xoossaa dirijjitiyaappe nuuni demmiyo Geeshsha Maxaafaa qofay deꞌiyo malꞌꞌiya ayyaanaabaa quman nuuni ufayttana danddayoos. Leemiso hanotan nu manggaagan takkana mala nuuni “likke gidida qaalaa” tumaa hassayana danddayoos; qassi hara asaa maaddanawu hegaa goꞌettoos.—Era. 12:1.
TISAASE 23-29
XOOSSAA QAALAN DEꞌIYA ALꞌꞌOBAA MAZAMURE 119:121-176
Bessennaban Azzaniyogaappe Waani Naagettana Danddayiyoo?
Xoossaa Higgiyaaninne Maaran Ne Kahaa Loohissa
5 Nuuni Xoossaa higgiyan goꞌettanawu, hegaa nabbabiyoogaa woy eriyoogaa xallay gidenna. He higgeta keehi siiqananne bonchchana bessees. Xoossaa Qaalay, “Iitabaa ixxite. Lo77obaa dosite” yaagees. (Amo. 5:15) SHin waatidi hegaadan oottiyoo? Hegawu maaddiya waannabay ubbabaa Yihoowaagaadan xeelliyoogaa tamaariyoogaa. Leemisuwawu, neeni loytta xiskkanawu metootidabadan qoppa. Maanabaa, bollaa minttanawu oottanabaanne ne deꞌuwan laammanabaa haakimee neeyyo yootiis. Hegaadan oottada hegee maaddiyoogaa akeekadasa! Ne deꞌoy giiga gidanaadan haakimee maaddido gishshawu, neeni A keehi nashshennan aggakka.
6 Hegaadankka, nuna Medhdhidaagee nagaray gattiyo qohuwaappe nuuni naagettanaadaaninne loꞌꞌo deꞌuwaa deꞌanaadan maaddiya higgeta immiis. Wordduwaa, iita maqquwaa, wuussaa, pokkobaa oosuwaa, kobaanne iita ayyaanaa oosuwaa xeelliyaagan nuuni Geeshsha Maxaafaa higgiyaa kaallidi waani goꞌettidaakko qoppa. (Leemiso 6:16-19 nabbaba; Ajj. 21:8) Yihooway koyiyoobaa oottiyoogan nuuni daro anjjuwaa demmiyo wode, nu wozanan Yihoowanne A ogiyaa kaseegaappe aaruwan nashshoos.
w93 4/15 17 ¶12
Yelagatoo, Intte Oottana Koyiyobay Aybee?
12 Iitabaa keehi ixxitenne shenetite. (Mazamure 97:10) Geella kase intte dosiyo woy ufayttiyobaa waati ixxana danddayeetii? Hegee kaalettanabaa qoppiyogaana! “Inttena intterkka cimmoppite. Ooninne Xoossaa bolli qilliiccanau danddayenna; aissi giikko, asi ba zeriyoogaa zaarettidi cakkana. Ba asatettaa amuwan zeriyaabaa gidikko, asatettaa amuwaappe haiquwaa cakkana.” (Galatiya 6:7, 8) Paaciyan xoonettiyogee kaalettiyo gita metuwa, hegeekka Xoossaa Yihoowa waati qohana danddayiyakko qoppite. (Mazamure 78:41ra gatta xeella.) Koyennan shahaarana woy Eediisiya mala aggenna harggee oyqqana danddayiyogaa qoppite. Intte, qofan qohettanaagaanne inttena pattennabadan xeellidi azzananaagaa hassayite. Hegee adussa wodiyawu qohana danddayees. Issi michchiya hagaadan gaasu: “Taaninne ta azinay aqo oyqqanaappe kase shori baynnabaa oottida. Haꞌꞌi nu naaꞌꞌaykka Kiristtaane gidikkonne, nu kase oottidobay nu son ubbatoo ooshshaynne qanaatee deꞌanaadan oottiis.” Hegee galchchan inttiyo deꞌiya maatay intteppe halanaadan oottana danddayiyogaa woy intte bohettana danddayiyogaakka xaasayi xeellana koshshenna! (1 Qoronttoosa 5:9-13) Guutta wodiya ufayssawu giidi ha ubba qohuwan kunddiyogee bessiyabee?
Ayyaanaaban Alꞌꞌobaa
Xoossaa ‘Qaalay Tuma’ Gidiyoogaa Mintta Ammana
2 Nuuni Yihoowa ashkkarata gidiyo gishshawu, I ‘tumu Xoossaa’ gidiyoogaanne ubbatoo nuna maaddiyaabaa oottiyoogaa ammanettoos. (Maz. 31:5; Isi. 48:17) Nuuni “[Xoossaa] qaalay ubbay tuma” gidiyoogaa eriyo gishshawu, Geeshsha Maxaafay yootiyooban ammanettana danddayoos. (Mazamure 119:160 nabbaba.) Geeshsha Maxaafaa eranchchay hagaadan giidoogaa nuuni maayettoos: “Xoossay yootidobay mule worddo gidi woy polettennan atti erenna. Xoossaa asay Geeshsha Maxaafaa xaafissida Xoossan ammanettiyo gishshawu, I yootiyoobaa ammanettees.”
TISAASE 30–ICHCHASHE 5
XOOSSAA QAALAN DEꞌIYA ALꞌꞌOBAA MAZAMURE 120-126
Yeekkiiddi Zeridosona, Shin Ufayttiiddi Cakkidosona
Xoossaa Bonchchiyageeti Anjjettidaageeta
10 Nuuni erissiyo ashkkara gidido wode, Seexaanaara olettiyogaa doommida. Yaaqooba 4:7y, Seexaanaa ‘eqettite; I intteppe baqatana’ yaagees. Hegaadan oottiyogee wayssiyaba. Xoossawu oottanawu keehi baaxetana koshshees. (Luqaasa 13:24) Shin Geeshsha Maxaafay Mazamure 126:5n, “Yeekkiiddi zeridaageeti, ufaissau yexxiiddi” cakkana yaagees. Ee, nuuni goynniyo Xoossay galati baynnaagaa gidenna. I ‘bana koyiyageeta woytees,’ qassi I bana bonchchiyageeta anjjees.—Ibraawe 11:6.
Ne Ammanoy Ay Keena Minoo?
17 Neeni siiqiyo asi hayqqin kayyottaydda deꞌay? Geeshsha Maxaafay hayquwaappe denddidaageetubaa yootiyo taariketa nabbabiyoogan dendduwaa hidootan ne ammaniyo ammanuwaa minttanawu takki gaada qoppa. Intte soo asaappe issi uri bohettido gishshawu azzanaydda deꞌay? Xoossaa seeray ubbatoo loꞌꞌo gidiyoogaa akeekanawu xannaꞌa. Nena gakkiya metoy ayba gidikkonne, ne ammanuwaa minttanawu hegaa loꞌꞌo injjedan goꞌetta. Neessi siyettiyaabaa Yihoowawu yoota. Haratuppe shaahettoppa; qassi ne ishanttuuranne michchonttuura matattada deꞌa. (Lee. 18:1) Neeni ne bolli gakkidabaa qoppiyoogee yeekkanaadan oottiyaaba gidikkonne, neeni genccanaadan maaddiyaabata ootta. (Maz. 126:5, 6) SHiiqota shiiqiyoogaa, sabbakiyoogaanne Geeshsha Maxaafaa nabbabiyoogaa aggoppa. Qassi Yihooway sinttappe neeyyo immanawu qaalaa gelido ufayssiyaabata ubbatoo qoppa. Yihooway nena waati maaddiyaakko neeni akeekiyo wode, ne A ammaniyo ammanoy kaseegaappe aaruwan minnana.
w01 7/15 18-19 ¶13-14
Cahaa Oosuwa Minnidi Oottite!
13 Cahaa oosuwa oottiyageeta ubba qassi yedetay gakkiyogeeta Mazamure 126:5, 6n deꞌiya qofay keehi minttettees; hagaadan gees: “Yeekkiiddi zeridaageeti, ufaissau yexxiiddi cakkona. Zerettaa tookkidi, yeekkiiddi biidaagee, ufaissa yettaa yexxiiddi, mirqqiyaa tookkidi simmana.” Mazamuraawee zerettaabaanne cahaabaa yootido leemisoy, beni Baabiloone omooduwappe simmida asatussi Yihooway koshshiyabaa kunttidoogaanne eta anjjidoogaa bessees. Eti yaappe laꞌa kiyidoogan keehi ufayttidosona; shin 70 layttawu oosettibeenna biittan zerettaa zeriyo wode yeekkennan aggokkona. Shin, zeriyonne keexxiyo oosuwa aggennan oottidaageeti bantta daafuraa ayfiyan ufayttidosona.
14 Nuuni metootiyo wode, qassi nu bolli woy nu ishanttu bolli xillotettaa gaasuwan metoy gakkiyo wode yeekkana danddayoos. (1 PHeexiroosa 3:14) Nuuni haggaazuwan oottiyo baaxee loꞌꞌo ayfiya demissibeennaba milatiyo gishshawu, koyro heeran cahaa oosoy wayssiyaba milatana danddayees. Shin nuuni zeriyogaanne ushshiyogaa aggana xayikko, Xoossay nuuni qoppidoogaappe aaruwan dichchees. (1 Qoronttoosa 3:6) Geeshsha Maxaafatanne eta qofay deꞌiyo xuufeta asawu gattanawu nuuni oottido oosuwa ayfiyappe hegaa akeekoos.
Ayyaanaaban Alꞌꞌobaa
‘Xoossay Nu Qatoy’ Naagiyo Wolqqaa
15 Koyruwan, asatettaaban naagiyoogaabaa ane qoppa. Nuuni Yihoowayyo goynniyaageeta gidiyoogaadan, asatettaaban I nuna citan naagees giidi qoppana danddayoos. Hegee baynnaakko, nuuni Seexaanaa piriyan sohuwaara geloos. Hagaa qoppa: ‘Ha saꞌaa haariya,’ Seexaanay tumu goynuwaa muleera xayssiyaakko ixxenna. (Yohaannisa 12:31; Ajjuutaa 12:17) Saꞌan deꞌiya keehi wolqqaama kawotettatuppe amaridaageeti sabbakuwaa oosuwaa teqqidosonanne nuna muleera xayssanawu malidosona. SHin, Yihoowa asay minnidi deꞌiisinne aggennan sabbakiis! Ha guuttanne ashshiyaabi baynnaba milatiya Kiristtaanetu oosuwaa wolqqaama kawotettati digganawu danddayibeennay aybissee? Yihooway ba wolqqaama qefetun nuna naagido gishshataassa!—Mazamure 17:7, 8.