Asay Yihoowappe hara daro xoossatussi goynniyo, Uura giyo katamay Baabilooneppe keehi haakkenna. SHin Uuran Yihoowa xallawu goynniya issi bitanee deꞌees. A sunttay Abrahaama.

Yihoowi Abrahaamayyo, ‘Ne keettaanne ne dabbota aggada, taani nena bessiyo biitti ba’ yaagiis. Hegaappe simmin Xoossay hagaadan giidi qaalaa geliis: ‘Neeni daro dere gidana, taani ne baggaara saꞌan deꞌiya daro asawu loꞌꞌobaa oottana.’

Abrahaamee Yihoowi bana awu kiittiyaakko erenna; shin i Yihoowan ammanettiis. Hegaa gishshawu Abrahaamee, a machiyaa Saara, a aaway Taarinne a ishaa naꞌay Looxee efaana issi issibaa giigissidosona; yaatidi haahosaa biyoogaa doommidosona.

Eti beꞌanaadan Yihoowi koyido biitti eti gakkiyo wode, Abrahaamawu layttay 75. Hegee Kanaane biittaa geetettees. Yan Xoossay Abrahaama haasayissidi hagaadan qaalaa geliis: ‘Neeni beꞌiyo ha biittaa, taani ne naatuyyo immana.’ SHin Abrahaaminne Saara cima; qassi eti naata yelibookkona. Yaatin, Yihoowi ba gelido qaalaa waati polanee?

Abrahaami Saaro ekkoosappe daro layttay aadhiis. Eti Uura kataman deꞌiya bantta injje keettaa aggidi, dunkkaaniyan deꞌoosona. SHin Saara Yihoowan ammanettiyo gishshawu, amassalukku.

Saara naꞌa yelanawu keehi koyiyo gishshawu Abrahaamayyo, ‘Ta aylliyaa Aggaara naꞌa yelikko, i ta naꞌa mala gidana danddayees’ yaagaasu. Guyyeppe, Aggaara attuma naꞌa yelaasu. A sunttay Isimaaꞌeela.

Daro layttappe guyyiyan, Abrahaamayyo layttay 99 gidido wode, qassi Saariyyo layttay 89 gidido wode, heezzu asati eta oychanawu yiidosona. Abrahaami eti mittaa kuwan shemppanaadan shoobbidi, etassi miyoobaa ehiis. Oychanawu yiidaageeti oonakko neeni eray? Eti kiitanchata! Eti Abrahaamayyo, ‘Laytti hannoode, neenne ne maccaasiyaa attuma naꞌa yelana’ yaagidosona. Dunkkaaniyaa giddon deꞌiya Saara hegaa siyaasu. A barkka miccada, ‘Taani keehi cima wuraychada, naꞌa yelana danddayiyaanaa?’ yaagaasu.

Kaalliya laytti, Yihoowa kiitanchay qaalaa gelidoogaadan, Saara attuma naꞌa yelaasu. Abrahaami a Yisaaqa giidi sunttiis; hegaa birshshettay “miichaa” giyoogaa.

Yisaaqayyo layttay ichashaa heera gidiyo wode, Saara Isimaaꞌeeli a baceessiyoogaa beꞌaasu. A ba naꞌaa naaganawu koyido gishshawu Abrahaamakko baada, i Aggaaronne Isimaaꞌeela harasaa yeddanaadan oychaasu. Koyro, Abrahaami hegaa oottanawu koyibeenna. SHin Yihoowi Abrahaamayyo hagaadan giis: ‘Saara yootiyoobaa siya. Taani Isimaaꞌeeli qohettennaadan naagana. SHin taani qaalaa gelidobay Yisaaqa baggaara polettana.’