Muusee Midiyaama biittan 40 layttaa deꞌiis. I machidi naata yeliis. I issi gallassi Siinaa Deriyaa matan dorssaa heemmiiddi maalaalissiyaabaa beꞌiis. Buuray eexxees, shin taman xuugettenna! Hegee ayssi haniyaakko beꞌanawu Muusee hegaa mati biido wode, i buuraa giddoppe hagaadan giya cenggurssaa siyiis: ‘Muusee! Haa shiiqoppa; neeni eqqido biittay geeshsha gidiyo gishshawu, ne tohuwan deꞌiya caammaa kessa.’ Hegaa kiitanchaa baggaara haasayiday Yihoowa.

Muusee yayyidi, ba somꞌꞌuwaa kammiis. He cenggurssay hagaadan giis: ‘Taani Israaꞌeelati tuggatiyoogaa beꞌaas. Taani eta Gibxxe biittaa asatu kushiyaappe ashshada, loꞌꞌo biitti ehaana. Ta asata Gibxxeppe kaaletta kessanay nena.’ Hegan Muusee garamettiis gaada qoppikkii?

Muusee, ‘Nena ooni kiittidee giidi asay oychikko taani woygoo?’ yaagiis. Xoossay hagaadan giis: ‘Yihoowi Abrahaama Xoossay, Yisaaqa Xoossay, Yaaqooba Xoossay tana inttekko kiittiis gaada yoota.’ Hegaappe simmin Muusee, ‘Taani odiyoogaa asay siyennan ixxikko waanoo?’ yaagiis. Yihoowi i Muusa maaddanaagaa qonccissiyaabaa oottiis. I Muusee ba xamꞌꞌaa saꞌan olanaadan yootiis. Yaatin xamꞌꞌay shooshsha kiyiis! He shooshshaa goynaa Muusee oyqqin, zaarettidi xamꞌꞌawu laamettiis. Yihoowi, ‘Neeni ha malaataa bessiyo wode, malaatay taani nena kiittidoogaa qonccissana’ yaagiis.

Muusee, ‘Taani loytta haasayana danddayikke’ yaagiis. Yihoowi ayyo, ‘Neeni haasayanabaa taani neeyyo yootana; qassi nena maaddanaadan ne ishaa Aaroona taani kiittana’ yaagidi qaalaa geliis. Muusee Yihoowi banaara deꞌiyoogaa eridi, ba maccaasiyoonne ba attuma naata ekkidi guyye Gibxxe biis.

Gibxxeti Israaꞌeelata aylle oottidi deexo oosuwaa wolqqan ootissidosona. Yihoowi, ‘Bazzuwan taayyo goynnana mala, ta asaa yedda’ yaagidi Paaroonawu yootanaadan, Muusanne Aaroona kiittiis. Paarooni otorettidi, ‘Yihoowi yootiyoobay tana qofissenna; taani Israaꞌeela yeddikke’ yaagiis. Yaagidi, Paarooni wolqqan eta kaseegaappe deexxiya oosuwaa ootissiis. Yihoowi Paaroona issibaa tamaarissana. Waati tamaarissanaakko neeni eray? I Gibxxen Tammu Boshaa yeddiis. Yihoowi Muuseyyo hagaadan giis: ‘Paarooni taani odiyoobaa siyennan ixxiis. Guuran, i Nayle SHaafaa baana. Akko baada, i ta asaa yeddibeenna gishshawu, Nayle haattay suuttawu laamettanaagaa ayyo yoota.’ Muusee azazettidi Paaroonakko biis. Aarooni Nayle SHaafaa ba gatiman shociyo wode Paarooni xeellees; qassi shaafay suuttawu laamettiis. SHaafay xinqqiyoogaa doommiis, molee hayqqiis, Nayle SHaafaa haattay ushshenna. Paarooni haꞌꞌikka Israaꞌeelata yeddennan ixxiis.

Laappun gallassappe guyyiyan Yihoowi, ‘Neeni ta asaa yeddennan ixxikko, Gibxxe biittan shodhee kumana’ yaagidi, Muusa Paaroonakko kiittiis. Aarooni ba gatimaa denttin shodheti biittan kumidosona. SHodheti asaa soo, eta arssaa giddonne eta munaqa keretun gelidosona. SHodhee ubbasan deꞌees! Yihoowi shodhiyaa boshaa diggana mala Paarooni Muusa woossiis. Paarooni Israaꞌeelata yeddanawu qaalaa geliis. Hegaa gishshawu, Yihoowi boshaa xayssiis; qassi Gibxxeti hayqqida shodheta shiishshi shiishshidi dooridosona. Biittay xinqqiyoogaa doommiis. SHin, haꞌꞌikka Paarooni Israaꞌeelata yeddibeenna.

Hegaappe simmin Yihoowi Muusessi, ‘Aarooni ba gatiman biittaa shocin, biittaa buhee biinne kiyana’ yaagiis. Sohuwaara biinnee ubbasan kumiis. Paaroona asatuppe amaridaageeti ayyo, ‘Ha boshay Xoossaappe yiis’ yaagidosona. SHin, haꞌꞌikka Paarooni Israaꞌeelata yeddibeenna.