Yihoowa Markkati Baliya Waati Xeelliyonaa?
Baliya nu xeelliyo ogeenne hegaara gayttidaagan nu oottiyobay, Geeshsha Maxaafay tamaarissiyobaara maayettiyaba gidana koshshees. Hegeetuppe amaridaageeti kaalliyageeta:
Siiqiyo uri hayqqiyo wode kayyottiyogee wottin deꞌiyaba. Yesuusa kaalliyageeti eti siiqiyo uri hayqqido wode kayyottidosona. (Yohaannisa 11:33-35, 38; Oosuwa 8:2; 9:39) Yaaniyo gishshawu, nuuni baliya gibira wodedan xeellokko. (Eranchchaa 3:1, 4; 7:1-4) Yaatiyogaappe, nuuni he wodiya azzanuwa qonccissiyo wodedan xeelloos.—Roome 12:15.
Hayqqidaageeti aybanne erokkona. Nu diccido wogay ayba gidikkonne, hayqqidaageeti hara sohuwan paxa deꞌoosonanne paxa deꞌiyageeta maaddana woy qohana danddayoosona giyo Geeshsha Maxaafan baasettibeenna wogata woy meezeta kaallokko. (Eranchchaa 9:5, 6, 10) Leemisuwawu hegee, taskkaaraa kessiyogaa, baliyawu gita gibiraa giigissiyogaa, issi uri hayqqido gallassaa bonchchiyogaa, hayqqida urawu yarshshiyogaa, hayqqida ura haasayissiyogaa, hayqqida uri issibaa oottanaadan oychchiyogaanne hayqqida ura machchiya A dabbotuura inddaa gayttiyogan geeyiyogaa malabaa xaaxi waaxees. Yaaniyo gishshawu, “eta giddoppe kiyitenne shaahettite, yaatidi geeshsha gidennabaa bochchoppite” giya Geeshsha Maxaafaa azazota nuuni azazettiyo gishshawu, he ubba wogatanne meezeta kaallokko.—2 Qoronttoosa 6:17.
Hayqqidaageetussi hidootay deꞌees. Hayqqidaageeti denddanaagaanne hayqoy muleera xayiyo wodee yaanaagaa Geeshsha Maxaafay tamaarissees. (Oosuwa 24:15; Ajjuutaa 21:4) He hidootay koyro xeetu layttaa Kiristtaaneta maaddidoogaadan, nuunikka bessiyagaappe aaruwan kayyottennaadan maaddees.—1 Tasalonqqe 4:13.
Geeshsha Maxaafay nuuni ashkke gidanaadan zorees. (Leemiso 11:2) Nuuni baliya nuussi ‘deꞌiyabaa asa bessiyo’ injjedan xeellokko. (1 Yohaannisa 2:16) Qassi nuuni baliyawu gita gibiraa giigissiyogan asay allaxxanaadaaninne keehi malaalettanaadan oottokko; woy keehi alꞌꞌo gidida anhaa saaxiniyanne anhaa mayzziyo alꞌꞌo maayuwa shammokko.
Baliyara gayttidaagan nuuni ammaniyobaa harati oottanaadan iisettokko. Hegaara gayttidaagan, “nuuni ubbay haasayidobawunne oottidobawu Xoossaa sinttan pirddawu eqqana” giya maaraa kaalloos. (Roome 14:12) Shin, nuuni injjiya demmikko, ‘ashilaalotettaanne wozanappe bonchchiyogaa’ bessiya ogiyan nu ammaniyobaa yootoos.—1 Pheexiroosa 3:15.
Yihoowa Markkatu balee ay malee?
Sohuwa: Baliya haasayay haasayettanaadan so asay koyikko, Shiiquwa Addaraashan, mooguwa polissiya eqotay giigissido sohuwan, buzo keettan woy moogo sohuwan haasayettanaadan doorana danddayoosona.
Prograamiya: Kayyottidaageeta minttettanawu hayquwabaanne dendduwa hidootaabaa Geeshsha Maxaafay yootiyobaa qonccissiya haasayay haasayettees. (Yohaannisa 11:25; Roome 5:12; 2 Pheexiroosa 3:13) He haasayay hayqqida izaawussi deꞌiya loꞌꞌo eeshshatanne geella I ammanettidi deꞌiyogan leemiso gididobatuppe nu tamaariyo minttettiyabata qonccissana danddayees.—2 Sameela 1:17-27.
Geeshsha Maxaafan baasettida mazamuree yexettana danddayees. (Qolasiyasa 3:16) He prograamee minttettiya woosan kuuyettees.—Piliphphisiyusa 4:6, 7.
Qanxxuwa woy Muxuwaata: Baliya gujjin nu haymaanootiyan imettiya haggaazawu miishsha qanxxissokko; qassi nu shiiqotunkka muxuwataa shiishshokko.—Maatiyosa 10:8.
Shiiqiya asaa: Asa ubbay shiiqana danddayiyo hara nu shiiqotuugaadan, baliyankka Yihoowa Markka gidenna asay Shiiquwa Addaraashan shiiqana danddayees.
Yihoowa Markkati hara haymaanootiya baliyan shiiqana danddayiyonaa?
Hegee ubba Yihoowa Markkay Geeshsha Maxaafan loohida ba kahaa goꞌettidi bawu kuuyiyoba. (1 Ximootiyosa 1:19) Shin, he haymaanootee giigissiyo Geeshsha Maxaafaara maayettennabata oottokko.—2 Qoronttoosa 6:14-17.