Israaꞌeelati Siinaa Deriyaa matappe denddidi Paaraana bazzuwaa kanttidi Qaadeesa giyoosaa biidosona. Yan Yihoowi Muuseyyo, ‘Taani Israaꞌeelatuyyo immiyo Kanaane biittaa wochana mala 12 asaa kiitta; eta zare ubbaappe issi issi asa kiitta’ yaagiis. Hegaa gishshawu Muusee 12 asata dooridi etayyo hagaadan giis: ‘Biittay kattaa zeranawu loꞌꞌokkonne beꞌanawu, Kanaane biite. Yan deꞌiya asay minokkonne laafakko, qassi eti deꞌiyoy dunkkaaniyaanakkonne katamaanakko beꞌite.’ Yaasanne Kaaleeba gujjin, wochiya 12 asati Kanaane biidosona.

Wochiyaageeti woyniyaa, roomaaniyaanne balasiyaa giyo mittatu ayfiyaa ekkidi, 40 gallassaappe guyyiyan simmidosona. Wochiyaageeti, ‘He biittay loꞌꞌo biitta; shin yan deꞌiya asay wolqqaama; eta katamaykka adussa gimbbe dirssan diretti uttiis’ yaagidosona. Yaagin Kaaleebi, ‘Nuuni eta xoonana danddayoos. Haꞌꞌi eesuwan boos!’ yaagiis. Kaaleebi hegaadan giidoy aybissakko neeni eray? Inne Yaasu Yihoowan ammanettido gishshataassa. SHin wochiya hara tammati hagaadan giidosona: ‘CHii! Yan deꞌiya asay keehi gita! Nuuni eta matan gumbburo milatida.’

Israaꞌeelati hidootaa qanxxidosona. Eti zuuzummidi issoy issuwawu hagaadan giidosona: ‘Nuuni kaalettiya hara uraa dooridi, guyye Gibxxe simmoos. Nuuni hayqqanawu he biitti aybissi biyoonii? Yaasunne Kaaleebi, ‘Yihoowayyo azazettennan ixxoppite; qassi asawu yayyoppite. Yihoowi nuna naagana’ yaagidosona. SHin Israaꞌeelati siyibookkona. Eti ubba Yaasanne Kaaleeba woranawu koyidosona!

Yihoowi ay oottidee? I Muuseyyo hagaadan giis: ‘Taani Israaꞌeelatussi ubbabaa oottin, eti haꞌꞌikka taayyo azazettokkona. Hegaa gishshawu, eti 40 layttaa bazzuwan deꞌana; qassi eti yan hayqqana. Eta naati, qassi Yaasunne Kaaleebi taani etawu immana gaada qaalaa gelido biittan deꞌana.’

Guutta wodiyaappe guyyiyan, Israaꞌeelati bazzon deꞌishin, Qoraahi, Daataani, Abiiraaminne hara 250 asati Muuse bolli makkalidosona. Eti Muusa hagaadan giidosona: ‘Intte darissideta! Neeni nuna kaalettiyaagaa, qassi Aarooni qeese ubbatu halaqa aybissi gideetii? Yihoowi deꞌiyoy nenaaranne Aaroonaara xalla gidenna; i nu ubbaarakka deꞌees.’ Yihoowi hegan ufayttibeenna. I hegaa ba bolli makkaliyoobadan xeelliis!

Muusee Qoraahawunne a citawu hagaadan giis: ‘Xoossaa Dunkkaaniyaa wontto yiite; qassi ixaanaa cuwayiyoogan ixaanaa kunttidi ekki yiite. Yihoowi oona dooridaakko, i nuna bessana.’

Wonttetta gallassi, Qoraahinne 250 asati Xoossaa Dunkkaaniyaa matan Muuseera gayttanawu biidosona. Eti banttana qeesedan qoppidi, yan ixaanaa cuwayidosona. Yihoowi Muusanne Aaroona, ‘Qoraahappenne a asatuppe shaahettite’ yaagiis.

Qoraahi Xoossaa Dunkkaaniyaa matan deꞌiya Muusekko biis; shin Daataani, Abiiraaminne eta soo asay beennan ixxidosona. Yihoowi Israaꞌeelati Qoraaha, Daataananne Abiiraama dunkkaanetuppe kichanaadan yootiis. Sohuwaara, Israaꞌeelati kichidosona. Daataani, Abiiraaminne eta soo asay bantta dunkkaanetuppe karen eqqidosona. Sohuwaara biittay phalqqettidi eta mittiis! Xoossaa Dunkkaaniyaa matan, tamay saluwaappe wodhidi Qoraahanne a asata 250 miis.

Hegaappe guyyiyan Yihoowi Muusa hagaadan giis: ‘Ubba zariyaa halaqatuppe issi issi xamꞌꞌaa ekkada, halaqaa sunttaa xamꞌꞌaa bollan xaafa. SHin Leewa zariyaa xamꞌꞌan Aaroona sunttaa xaafa. Xaafada Xoossaa Dunkkaaniyaa giddon eta wotta; qassi taani dooriyo asa xamꞌꞌay ciiyyana.’

TWonttetta gallassi, Muusee ubba xamꞌꞌaa kare kessidi halaqata bessiis. Aaroona xamꞌꞌay ciiyyidi almonddiyaa giyo mittaa ayfiyaa ayfiis. Yaatiyoogan, qeese ubbatu halaqa gidanaadan Yihoowi Aaroona dooridoogaa erissiis.