Xomoosiya Israaꞌeela asati Yarkko katamaa biido wode, Raꞌaabo giyo maccaasee keettan takkidosona. Yarkko kawoy hegaa siyidi Raꞌaabi soo wotaaddarata kiittiis. A xomoosiya naaꞌꞌu asata shakkuwan qottaasu; qottada wotaaddarata harasaa yeddaasu. A xomoosiya asatuyyo hagaadan gaasu: ‘Yihoowi intte bagga gidiyoogaanne intte ha biittaa xoonanaagaa ta eriyo gishshawu, taani inttena maaddana. Nu soo asaa ashshanawu hayyanintta taayyo qaalaa gelite.’

Xomoosiyaageeti Raꞌaabiyyo, ‘Ne son deꞌiya oonanne qohennaagaa nuuni qaalaa geloos’ yaagidosona. Eti, ‘Zoꞌo wodoruwaa ne maskkootiyan qacha; yaatikko ne soo asay attana’ yaagidosona.

Raꞌaaba xomoosiyaageeta ba maskkootiyaara wodoruwan duge wottaasu. Eti Yaasukko simmanaappe kase deriyaa biidi heezzu gallassaa qosettidosona. Hegaappe simmin, Israaꞌeelati Yorddaanoosa SHaafaa pinnidi biittaa oyqqanawu giigettidosona. Eti xoonidi koyro oyqqido katamay Yarkko. Eti usuppun gallassi gakkanaassi hachi hachi katamaa issitoo yuuyi aadhanaadan Yihoowi etawu yootiis. Laappuntta gallassi, eti katamaa laapputoo yuuyi aadhidosona. Hegaappe guyyiyan, qeeseti bantta xurumbbaa punnidosona; wotaaddarati banttawu danddayettidaagaa keenaa xoqqu oottidi waassidosona. Katamaa dirssaa gimbbee laalettiis! SHin gimbbiyaara gaytti uttida Raꞌaabi keettay laalettibeenna. Raꞌaaba Yihoowan ammanettido gishshawu anne i soo asay attidosona.

Yarkko katamaabaa odoy Kanaanen deꞌiya hara biittaa gakkiis. Eta kawoti issippe gididi Israaꞌeelata olanawu qofaa qachidosona. SHin Gabaaꞌoonati harabaa qoppidosona. Eti wurida maayuwaa maayidi, Yaasukko yiidi hagaadan giidosona: ‘Nuuni haaho biittappe yiida. Yihoowi inttessi Gibxxe biittaaninne Moꞌaaba biittan oottido ubbabaa nuuni siyida. Nuna qohennan agganawu qaalaa gelite; nuuni intteyyo ashkkara gidana.’

Yaasu eti yootiyoobaa ammanidi eta qohennan agganawu maayiis. Heezzantto gallassaappe guyyiyan, ha asati haaho biittappe yibeennaagaa i siyiis. Eti Kanaane biittaappe yiidosona. Yaasu Gabaaꞌoonata, ‘Intte nuussi ayssi worddotidetii?’ yaagidi oychiis. Oychin eti hagaadan giidosona: ‘Nuuni yayyida! Intte Xoossay Yihoowi intteyyo olettiyoogaa nuuni eroos. Hayyanintta nuna woroppite.’ Yaasu ba gelido qaalaa naagiis; qassi eti deꞌanaadan aggiigiis.

Daro takkennan, Kanaane biittaa kawoti ichashatinne eta olanchati Gabaaꞌoonata olanawu denddidosona. Yaasunne a olanchati qamma kumettaa hemetti biidi eta ashshidosona. Olay wonttetta galla maallado guuran doommiis. Kanaaneti ubbasaara baqatiyoogaa doommidosona. Yihoowi eti baqatiyo ubbasan saluwaappe wolqqaama shachay eta bolli wodhanaadan oottiis. He wode Yihoowi awa ayfee wullennan takkanaadan oottana mala Yaasu a oychiis. Awa ayfee hegaappe kase wullennan mule takki erennaba gidikko, Yihoowi hegaadan oottanaadan Yaasu ayssi oychidee? I Yihoowan ammanettiyo gishshataassa. Israaꞌeelati Kanaane kawotanne eta olanchata xoonana gakkanaassi awa ayfee gallassa kumettaa wullennan takkiis.