Ta Kanatussi Buskutee Imettiis
AMARKKAN, Origen giyosan deꞌiya Niiki hagaadan giis: “Taani 2014 doomettan, ta deꞌiyo heeran ta naaꞌꞌu guutta kanata yuushshanawu katamaa giddo biyoogaa doommaas. Yihoowa Markkati darotoo hegan bantta xuufiyaa wottiyo gaariyaa matan eqqoosona. Eti giiga maayuwaa maayidosonanne ogiyaara biya asa ubbaa noocu giiddi sarotoosona.
“He Yihoowa Markkati asaa xallawu gidennan, ta kanatussikka keha. Issi gallassi, gaariyaa matan eqqida Iilana ta kanatussi amarida buskutiyaa immaasu. Hegaappe simmin daro takkennan, kanati bantta xafiran tana goochchidi ‘buskutiyaa immiyo sohuwaa’ efiidosona.
“Amarida aginati aadhdhidosona. Kanati bantta buskutiyaa miidosona, qassi taani Yihoowa Markkatuura amaridabaa haasayaas. SHin etaara daro haasayanawu koyabeykke. Tawu layttay 70ppe aadhdhiis; qassi Yihoowa Markkati ammaniyoobaa taani erabeykke. Protesttantte woosa keettatun taani hidootaa qanxxido gishshawu Geeshsha Maxaafaa tarkka xannaꞌiyaakko loꞌꞌo gaada qoppaas.
“He wode, katamaa giddon harasan hara Yihoowa Markkati bantta gaariyaa matan eqqidaageeta beꞌaas. Etikka ubbatoo pashkka. Ta oyshatuyyo eti ubbatoo Geeshsha Maxaafaappe zaariyo gishshawu, taani etan kaseegaappe aaruwan ammanettaas.
“Issi galla Iilana, ‘Mehee doꞌay Xoossaa imota gidiyoogaa neeni ammanay?’ gaada tana oychchaasu. ‘Ee, ammanays’ gaada taani zaaraas! Iilana Isiyaasa 11:6-9 tawu nabbabaasu. Hegaappe simmin, taani Geeshsha Maxaafaabaa tamaaranawu koyaas, shin Yihoowa Markkatuppe aybanne ekkada nabbabanawu koyabeykke.
“Kaalliya gallassatun, Iilaniiranne I keettaawaa Brentaara qantta gidikkonne, ufayssiyaabaa tobbida. Kiristtoosa milatiyoogee woygiyoogaakko akeekanawu Maatiyoosa maxaafaappe Yesuusi Kiittidoogeetu Oosuwaa maxaafaa gakkanaashin taani nabbabanaadan eti yootidosona. Hegaa gishshawu, taani nabbabaas. Hegaappe daro takkennan, Brentaaranne Iilaniira Geeshsha Maxaafaa xannaꞌanawu maayettaas. Hegee hanidoy Tamme 2016.
“Taani saaminttan saaminttan Geeshsha Maxaafaa xannaꞌanawunne SHiiquwaa Addaraashan shiiqota shiiqanawu yeemuwan naagays. Geeshsha Maxaafay yootiyoobaa tamaariyoogan taani keehi ufayttaas. Issi layttappe simmin, xammaqettada Yihoowa Markka gidaas. Taassi haꞌꞌi layttay 79, qassi taani tumu haymaanootiyaa demmidoogaa erays. Yihooway taani kumetta saꞌan deꞌiya ba soo asaa yara gidanaadan maaddiyoogan tana anjjiis.”