Geeshsha Maxaafay Ammanttiya Qoncce Zaaruwaa Yootiyoogee Tana Maalaaliis

KASE DEꞌUWAA:

Taani Hanggaare bbiittan deꞌiya keehi daro layttaa gamꞌꞌida kataman yelettaas. Naaꞌꞌantto alamiyaa olay yan gattido azzanttiya qohuwaa hanno gakkanawu hassayays.

Taani naatettan ta aayee aayyeeranne aayee aawaara deꞌaas. Taani etabaa, ubbakka ta aayee aayeebaa keehi ufayssiyaabaa hassayays. A taani Xoossaa mintta ammananaadan baaxetaasu. Tawu layttay heezza gidiyo wode, ubbatoo omarssan Godaa Woosaa giyo woosaa issippe woossoos. Gidoppe attin, tawu layttay 30 matana gakkanaashin he woosay woygiyoogaakko erikke.

Ta aawaynne aayyiyaa deꞌanawu injjetiya keetta shammanawu gidiya miishsha qoraphphanwu giidi gallassinne qammi oottiyo gishshawu, ta aayee aayyiyaanne ta aayee aaway tana guutta naatettan dichchidosona. Naaꞌꞌu saaminttappe issitoo Qeeraa Qeeraa gallassi kumetta keettaa asay issippe shiiqidi qumaa moos. Issippe shiiqiyo he wodetun taani keehi ufayttays.

Nu soo asaa amoy 1958n polettiis; eti nuuni heezzay deꞌanawu gidiya keettaa shammidosona. Wurssettan nu soo asaara deꞌiyoogaa doommido gishshawu keehi ufayttaas! SHin usuppun aginappe simmin, he ufayssay xayi bayiis. Ta aaway kansseriya harggiyan hayqqiis.

Taani keehi kayyottaas. Taani, “Xoossawu, ta aawaa ashshanaadan nena woossaas. I taappe shaahettanaadan koyikke. Ta woosaa ayssi zaarabeykkii?” giidoogaa hassayays. Ta aaway awan deꞌiyaakko eranawu keehi koyaas. Taani, ‘I saluwaa biideeyye? Woy merinawu hayqqidi xayidee?’ gaada qoppaas. Qassi aaway deꞌiyo naata qanaataas.

Daro layttawu, ubba galla giyoogaa keena ta aawaa duufoy deꞌiyoosaa bays. Ta aawaa duufuwaa lanqqen gulbbatada, “Hayyanaa Xoossoo, ta aaway awan deꞌiyaakko tana erissa” gaada woossays. Qassi nuuni merettidoy aybissakko eranawu maaddanaadankka woossays.

Tawu layttay 13 gidiyo wode Jarmmanettuwaa tamaaranawu kuuyaas. Jarmmanettuwan cora allaalliyaabaa yootiya daro xuufee deꞌiyo gishshawu, ta oyshaa zaaruwaa hegaappe demmanaakkonne gaada qoppaas. Yaatada, 1967n he wode Arshsho Jarmmane bagga gidida, Yena kataman tamaariyoogaa doommaas. Jarmmane eranchchati xaafido, ubba qassi asaa deꞌuwaabaa yootiya maxaafata yeemuwan nabbabaas. Taani eridobaa dosaas, shin ta oyshatussi loꞌꞌo zaaro demmabeykke. Zaaruwaa demmanawu woossiyoogaa aggabeykke.

TAANI LAAMETTANAADAN GEESHSHA MAXAAFAY MAADDIIS:

Taani 1970n, Hanggaare simmaas; yaatada, guyyeppe ekkido Rooziira erettaas. He wode Hanggaaree Koministte haaruwan deꞌees. Taani O ekka simmin takkennan Osttiriya biida. Guyyeppe Awusttiraaliyan ta aayee ishay deꞌiyo Sidine katamaa baanawu giidi yaa biido.

Taani Osttiriyan sohuwaara oosuwaa demmaas. Issi gallassi, tanaara oottiyaagee taani ta oyshatu ubbawukka Geeshsha Maxaafaappe zaaruwaa demmana danddayiyoogaa yootiis. I Geeshsha Maxaafaabaa qonccissiya amarida maxaafata tawu immiis. Taani he maxaafata eesuwan nabbabada, gujja eranawu koyaas. Yaatada, he maxaafata giigissida Yihoowa Markkatussi dabddaabbiyaa xaafada hara xuufiyaakka koyiyoogaa yootaas.

Nu bullachchaa koyro layttaa bonchchiyo gallassi, Yihoowa Markka gidida issi yelaga Osttiriya asi Rooziiranne tanaara gayttanwu yiis. I taani oychchido xuufeta ekki yiidi, Geeshash Maxaafaa xannaꞌanaadan tana shoobbin eeno gaas. Taani eranawu keehi koyido gishshawu, saaminttan naaꞌꞌuttoo xannaꞌoos; xannaꞌiyo wode ubban oyddu saate gidiyaagaa takkoos!

Yihoowa Markkati Geeshsha Maxaafaappe tamaarissidobay tana keehi ufayssiis. Eti Xoossaa sunttaa, Yihoowa giyaagaa Hanggaare qaalan xaafettida ta Geeshsha Maxaafaappe bessido wode keehi maalaalettaas. Taani woosa keettaa biido 27 laytta ubban, eti Xoossaa sunttaa xeesishin issitoonne siyabeykke. Ta oyshatuyyo Geeshsha Maxaafay ammanttiya qoncce zaaruwaa yootiyoogee tana maalaaliis. Leemisuwawu, hayqqida asay aynne erennaagaa, xiskkuwan kayrida asaa mala gidiyoogaa akeekaas. (Eranchchaa 9:5, 10; Yohaannisa 11:11-15) Qassi Geeshsha Maxaafay ‘hayqoy deꞌenna’ ooratta alamee yaanaagaa yootiyoogaakka akeekaas. (Ajjuutaa 21:3, 4) He ooratta alamiyan ‘asay hayquwaappe denddiyo’ gishshawu, ta aawaara gayttanaagaa hidootan naagays.—Oosuwaa 24:15.

Roozakka tanaara issippe Geeshsha Maxaafaa ufayssan xannaꞌiyoogaa doommaasu. Nuuni xannaꞌiyo xuufeta naaꞌꞌu agina xallan xannaꞌi wurssi aggida! Yihoowa Markkati SHiiquwaa Addaraashan shiiqiyo shiiqota ubbaa boos. Yihoowa Markkati issoy issuwaa siiqiyoogaa, maaddiyoogaanne eta issippetettaa beꞌidi keehi ufayttida.—Yohaannisa 13:34, 35.

Taaninne Rooza 1976n, Awusttiraaliyan deꞌanawu biida. Yaa biidi, Yihoowa Markkatuura sohuwaara gayttida. Yan deꞌiya Yihoowa Markkati sohuwaara nuuni boorasennaadan oottidosona. Nuunikka 1978n Yihoowa Markka gidida.

TAANI GOꞌETTIDO HANOTAA:

Tana daro wodiyawu qofissiiddi takkida oyshatu zaaruwaa wurssettan demmaas. Xoossaa Yihoowakko shiiqiyoogan ooppenne aadhdhiya Aawaakka demmaas. (Yaaqooba 4:8) Qassi sinttappe yaana ooratta alamiyan tana yelida aawaara gayttanawu hidootan naagays; hegee tana keehi ufayssees.—Yohaannisa 5:28, 29.

Taaninne Rooza 1989n, nu ammanuwaabaa nu laggetuyyo, nu soo asaayyoonne yan nunaara gayttiya haratuyyo yootanawu Hanggaare simmanawu qofaa qachchida. Nuuni xeetan qoodettiya asawu Geeshsha Maxaafaa tamaarissiyo maataa demmida. Hegeetuppe ta aayyiyo gujjin, haꞌꞌi 70ppe dariyaageeti nunaara Yihoowayyo haggaazoosona.

Ta oyshatu zaaruwaa demmanawu 17 layttaa woossaas. Hegaappe simmin 39 layttay aadhdhikkokka, haꞌꞌikka woossays—Taani, “Saluwan deꞌiya ta Aawawu, naatettan taani oychchido oyshata zaarido gishshawu nena galatays” gaana danddayidoy haꞌꞌa.