WOLQQAAMA bashshay gakkanaagaa 2017 doomettan saynttistteti yootidosona. Alamiyan awudeegaappenne wolqqaama bashshay gakkana wodee keehi matidoogaa saynttistteti Ichashiyan awaajjidosona. Saynttistteti alamee xayiyo wodee keehi matidoogaa bessanawu, Bashshaa Gallassaa Saatiyaa giyooban 30 sokonddiyaa gujjidosona. Bashshaa Gallassaa Saatee naaꞌꞌu daqiiqanne baggaa qamma bilahiyaakko matiis; hegee 60 laytta giddon awudeegaappenne aaruwan kumetta saꞌan gakkiya bashshay matidoogaa bessees!

Ha alamiyaa wurssettawu nuuni ay keena matidaakko saynttistteti 2018n zaarettidi yigganawu halchidosona. Bashshaa Gallassaa Saatee bashshay gakkanaagee attennaagaa haꞌꞌikka bessii? Ne qofay aybee? Alamee giigana danddayennee? Neeni ha oyshaa zaaranawu metootana danddayaasa. Hegaara gayttidaagan eranchatu qofaykka dumma dumma. Ha alamee xayiyoogee attenna giyo qofaa maayiyay ubba asaa gidenna.

Miilooniyan qoodettiya asay sinttappe kehabi yaana gi ammanees. Asaynne ha pilaaneetee bashshaappe attanaagaa, qassi nu deꞌuwaa hanotay kaseegaappe loꞌꞌonaagaa bessiya naqaashay deꞌiyoogaa eti yootoosona. He naqaashay ammanttiyaabee? Alamee giigana danddayiiyye, danddayennee?

DARO iitabaa siyiyo gishshawu neeni hirggikko woy yayyikko, hegaadan siyettiyoy ne xallaassa gidenna. Kase Amarkkaa pirezddanttee Barak Obami 2014n, oduwaa yootiyoobati ubbay iitabaa yootiyo gishshawu, ‘alamee giigana danddayenna; qassi oonikka alamiyaa giigissana danddayenna’ giidi daroti kuuyidoogaa yootiis.

SHin, i he qofaa yooti simmidi, alamiyan deꞌiya daro metuwaa giigissana danddayiyo ogiyaa minttidi yootiis. Kawotettay oottanawu halchido issi issibaa i “mishiraacho” yaagiis; qassi i “hidootiyoogaanne sinttappe kehabay yaana giidi qoppiyoogaa” yootiis. Hegee i loꞌꞌobaa qoppiya asati oottiyoobay alamiyaa giigissanawunne kumetta saꞌan bashshay gakkennaadan teqqanawu danddayiyoogaa yootiis giyoogaa.

Daro asaykka a qofaa maayees. Leemisuwawu, tekinolojee eesuwan dicciyoogee alamiyaa metuwaa giigissees gi qoppidi issoti issoti saynisiyan ammanettoosona. Issi eranchay tekinolojeenne oorattabay 2030n “shaꞌu kushe diccanaagaa, qassi 2045n miiloone kushe diccanaagaa” yootiis. I gujjidi hagaadan giis: “Nuuni keehi loꞌꞌobaa oottiiddi deꞌoos. Nuna gakkiya metoy awudenne nu wolqqaappe darenna; nuna metoy gakkanaappe kase nuuni metuwaa giigissoos.”

Alamiyaa hanotay ay keena iitee? Nuuni kumetta saꞌan bashshay gakkiyo wodiyan deꞌiyoo? Amarida saynttisttetinne polotikaa asati keha wodee yaanaagaa yootikkonne, daro asay sinttanaabaa haꞌꞌikka hirggees. Aybissi?

ASAA WURSSIYA OLAA MIISHSHATA. Kawotettatu Issippetettaynne hara dirijjiteti niyukileeriyaa olaa miishshaa xayssanawu danddayettida keenaa baaxetikkonne, xayssibookkona. Olaa miishshaa teqqanawu kessiyo higgiyaa issi issi kawoti xaasayi xeelloosona. Niyukileeriyaa olaa miishshay deꞌiyo biittati bantta kase olaa bombbiyaa zammaana oottoosona; qassi hegaappe aaruwan daro asaa woriya ooratta bombbiyaa medhoosona. Asaa wurssiya olaa miishshay kase baynna biittatussi haꞌꞌi daro asaa xayssana danddayiya olaa miishshay deꞌees.

Kawotettati awudeegaappenne aaruwan niyukileeriyaa olawu giigettiyoogee, saruwan deꞌoos giyo wodiyankka alamee keehi iita soho gidanaadan oottees. “Keemikale olaa miishshay asi zambbennan worees; leemisuwawu, asay hirgganaadan oottiyoogaa” Buleetin of zi Atomik Saynttisttis giyo xuufee yootees.

NU PAYYATETTAA KEEHI QOHIYAABAA. Nu payyatettay loꞌꞌanaadan saynisee maaddana danddayiyoobay he keena. Harggiyan oyqqettanaadan gaaso gidiyaabay, hegeekka suuttaara gayttidabay, likkiyaappe aattidi orddiyoogee, carkkoy hambbalaashettiyoogeenne jallissiyaabaa goꞌettiyoogee gujji gujji biis. Daro asay kansseriyaa, wozanaa sahuwaanne sukkaariyaa sahuwaa mala asappe asa oyqqenna harggiyan hayqqees. Daroti guuggiyaa sahuwaa gujjin, hara harggiyaa gaasuwan qohettidosona. Qassi mata wodeppe haa simmin Ebola bayresenne Zika bayrese mala wurssiya harggee qoppennan denddiis. Qoppana koshshiyaabaa: Sahuwaa asay teqqana danddayenna; qassi sahoy xayiyaaba milatenna!

ASAY MERETAA MOOREES. Paabirkkay ubbatoo carkkuwaa moorees. Hambbalaashettida carkkuwaa gaasuwan miilooniyan qoodettiya asay layttan layttan hayqqees.

Issi issi asay, deretettaynne kawotettati moorettidabaa, xaliyaa, paabirkkaappe kiyiyaabaa, pilasttikiyaanne hambbalaashiyaa harabaakka ano abbawu yeddoosona. “Ha moorettidabay haatta giddon deꞌiya moliyaa, hegaa mala harabaanne haatta giddon mokkiyaabata hambbalaashiyoogaa, ubba qassi haatta giddon deꞌiya meretaa miya asaa qohiyoogaa” Insaykiloppidiyaa of Marin Saynis giyo maxaafay qonccissees.

Qassi geeshsha haattay xayiiddi deꞌees. Inggilize biittan saynisiyaabaa xaafee Robin Makey azzanidi hagaadan yootiis: “Haattay qaxuhatiyoogee kumetta saꞌan deꞌiya meto gidana.” Haattaa metuwaappe dariya baggay asaa gaasuwaana gidiyoogaanne hegee keehi qohiyoogaa polotikaa asati maayoosona.

MERETAY GATTIYO DAAFABAY ASAA QOHEES. Beetay, harken, torinedo, tayfun giyo goteenne biittaa qaattay wolqqaama diꞌoy diꞌanaadan, qassi biittay woddanaadaaninne hara bashshay gakkanaadan oottees. Ha meretay gattiyo daafaban awudeegaappenne daro asay hayqqees woy qassi qohettees. Amarkkan issi dirijjitee (Nashinal Eronotiks end Ispees Administreshin) xannaꞌidobay “wolqqaama beetay denddanaagaa, woriya suuloy daranaagaa, qassi wolqqaama diꞌoynne away qohanaagaa” qonccissiis. Meretay asaa naata xayssanee?

Bashshaappe waani attanee giidi hirgganaadan oottiya harabaa qoppana danddayaasa. SHin, neeni ha wodiyan haniya iitaba ubbaa qoppiyoogan sinttanaabaa xeelliyaagan aliya zaaruwaa demmakka. Issoti issoti polotikaa asatinne saynttistteti yootiyoobaa siyiyoogeekka maaddennaagaa yootoosona. Gidoppe attin, hagaappe kasetiya huuphe yohuwan qonccidaagaadan, alamiyaa hanotaabaanne sinttanaabaa xeelliyaagan denddiya oyshatussi daroti aliya zaaruwaa demmidosona. He zaaruwaa awuppe demmanee?

Leemisuwawu, kaallidi deꞌiya Geeshsha Maxaafaa hiraagata qoppa:

• “Issi biittaa asai hara biittaa asaara olettana; qassi issi kawotettai hara kawotettaara olettana; koshainne biittaa qaattai ubbasan de7ana.”—Maatiyoosa 24:7.

• “Wurssetta gallassi waissiya wodee [yaana]. Aissi giikko, asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, cayiyaageeta, banttana yelidaageetuyyo azazettennaageeta, galatennaageeta, geeshshatetti bainnaageeta, siiqoi bainnaageeta, sigettennaageeta, zigirssanchchata, banttana naagennaageeta, kehennaageeta, lo77obaa dosennaageeta, kashi erikke giyaageeta, eesotiyaageeta, otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana.”—2 Ximootiyoosa 3:1-4.

Issi issi asay ha hiraagati alamee giigana danddayennaagaa keena yaa iitidoogaa qonccissiyaabadan qoppana danddayoosona. Ha alamiyaa asi giigissana danddayennaagee tuma. Geeshsha Maxaafay yootiyoogaadan, alamiyaa giigissanawu asawu eraykka wolqqaykka baawa. Hegee hagaappe kaallidi deꞌiya xiqisetun qoncciis:

• “Asaassi likke milatiya ogee de7ees; shin bin, a wurssettai haiquwan kessi yeggees.”—Leemiso 14:12.

• ‘Issi asi bawu deꞌiya haariyo maataa hara asa qohanawu goꞌettees.’—Eranchchaa 8:9.

• ‘Asi ba hemetaa suurissanaagee aawu shene gidenna.’—Ermmaasa 10:23.

Asay ba koyiyo ubbabaa oottiyoogaa aggennaba gidikko, alamiyan ubbasan bashshay gakkana danddayees. SHin hegee hanenna! Aybissi? Geeshsha Maxaafay hagaadan gees:

• Xoossay ‘saꞌaa a baasuwaa bolli essiis; i meri merinawukka qaaxxenna.’—Mazamure 104:5.

• “Issi yeletai aadhdhiyo wode, hara yeletai sohuwaa oiqqees. SHin ha biittai merinaukka laamettennan de7ees.”—Eranchchaa 1:4.

• “Xilloti biittaa laattananne yan merinau de7ana.”—Mazamure 37:29.

• “Biittan daro kattai mokko; dereti kattan kamettona.”—Mazamure 72:16.

Geeshsha Maxaafay tamaarissiyo ha timirtteti qoncce zaaruwaa yootoosona. Issi issibay hambbalaashettiyoogan, qumaynne haattay qaxuhatiyoogan, woy kumetta saꞌan gakkiya bashshan asay xayenna. Alamee niyukileeriyaa olan xayenna. Ayssi? Xoossay saꞌaa hanotaa naagiyo gishshataassa. Xoossay asawu koyidobaa dooriyo maataa immiis. SHin eti bantta kuuyidobay kaalettiyoobaa cakkana. (Galaatiyaa 6:7) Alamee eqqana danddayennanne kunddanawu eesotiya baabure mala gidenna. Asay ay keena bana qohana danddayiyaakko Xoossay zawaa wottiis.—Mazamure 83:18; Ibraawe 4:13.

SHin Xoossay hegaappe harabaa oottana. I daro ‘sarotettay’ deꞌanaadan oottana. (Mazamure 37:11) Ha huuphe yohuwan qonccidabay miilooniyan qoodettiya Yihoowa Markkati sinttappe yaana kehabaa xeelliyaagan Geeshsha Maxaafaa xannaꞌiyo wode eridobaappe amaridaba xalla.

Yihoowa Markkati layttaaninne diccido wogan dumma dumma gidida, kumetta saꞌan deꞌiya asata. Eti Geeshsha Maxaafay a sunttay Yihoowa gidiyoogaa yootiyo, issi tumu Xoossawu goynnoosona. Geeshsha Maxaafay hagaadan giyo gishshawu eti sinttanaabaa yayyokkona: “Salota medhdhida GODAI, biittaakka giigissidi oottidaagee, qassi asi de7anaadaanappe attin, biittaa coo medhdhibeenna Xoossai hagaadan yaagees; ‘Taani GODAA; taappe hari baawa.’”—Isiyaasa 45:18.