Ogiyaa Demmiyoogaa

NEENI UFAYTTAY? Ufayttikko, neeni ufayttanaadan oottiyay aybee? Neeni ufayttanaadan oottiyay ne so asay, ne oosoy woy ne ammanoy? Neeni timirttiyaa wurssanawu, ooso demmanawu woy ooratta kaamiyaa shammanawu koyiyoogaa malabay geella neeni ufayttanaadan oottana danddayees.

Daro asay bantta kessido hoolliyaa gakkiyo wode woy koyidobaa demmiyo wode keehi ufayttees. SHin, he ufayssay woqqa wodiyaa takkii? Darotoo, hegee guutta wodiyan xayiyaaba gidiyo gishshawu, hidootaa qanxxissana danddayees.

Ufayssay guuttaa ufayttiyoogaappe keehi hombbociyoogaa gakkanaashin asawu siyettiyaabaanne hegaa aggennaadan koyiyoogaara gayttida xayennan amarida wodiyaa takkiya woppaa geetettiis.

Ufayttidi deꞌanawu, nuussi ubbabay deꞌana koshshenna; qassi nuussi deꞌiyaabay gidana giidi deꞌiyoogaa nuuni tamaarana bessees. Hegaa gishshawu, nuuni, “Taani hagaa demmiyaakko woy hegaa oottiyaakko ufayttana” giikko, nu ufayttidi deꞌana mule danddayokko.

Leemisuwawu, ufayssaa loꞌꞌo payyatettaara geeddarssa. Nuuni waani payya gidana danddayiyoo? Miyoobaanne bollaa minttiyoogaa gujjin, nu deꞌo ubban maara deꞌiyoogaana. Hegaadan, nu deꞌuwan loꞌꞌo ogiyan deꞌiyoogeenne suure maaraa kaalliyoogee ufayssaa demissees.

Ufayssiyaa demissiya maarati woy deꞌo hanotati awugeetee? Issoy haraappe aadhdhiyaaba gidikkonne, kaallidi deꞌiyaageeti keehi koshshiyaaba:

• DEꞌIYAABAN WOPPU GIYOOGAANNE KEHATETTAA

• PAYYATETTAANNE UFAYSSAN GENCCIYOOGAA

• SIIQUWAA

• ATTO GIYOOGAA

• DEꞌUWAWU HALCHCHIDOBAA AKEEKIYOOGAA

• HIDOOTAA

Ha usuppun maaratanne eeshshata ane loytti pilggoos.