Siiquwaa

ASAY SIIQUWAA KEEHI KOYEES. Siiqoy baynnan aqo deꞌoy, so asaa deꞌoy woy laggetettay giigana danddayenna. Hegaa gishshawu, guuggiyaa payyatettawunne ufayssawu siiqoy keehi koshshiyaaba giidi qoppiyoogee bessiyaaba. SHin “siiqoy” aybee?

Attuma asi macca asaara siiqettiyoogee koshshiyaaba gidikkonne, ha sohuwan haasayana siiqoy hegaa gidenna. SHin issi uri harata baappe kaseyidi eta payyatettaabaa wozanappe qoppanaadan oottiya, ubbaappe aadhdhiya siiquwaabaa haasayana. He siiqoy Xoossay kessido maaraa kaalliyaaba gidikkokka, dosiyoogeekka aara gayttidaba.

Siiquwaa qonccissiya issi ufayssiya qofay hagaadan gees: “Siiqoi danddayanchcha. Siiqoi kehees. Siiqoi qanaatenna. Ceeqettenna; qassi otorettenna. Siiqoi baassi bessennabaanne oottenna. Uuzettenna. Yiillotenna. Siiqoi naaqettidobaakka paidenna. Siiqoi tumatettan ufaittiyoogaappe attin, wordduwan ufaittenna. Siiqoi ubbabaa danddayees. Ubbabaikka hanana giidi, ufaissan naagees. Ubbabaa genccees. Siiqoi mulekka xayenna.”—1 Qoronttoosa 13:4-8.

Hegaa mala siiqoy “mulekka xayenna,” woykko ay wodekka deꞌees. Ubbakka, siiqoy gamꞌꞌidi minni minnidi baana danddayees. Qassi he siiqoy danddayanchcha, kehanne maariyaagaa gidiyo gishshawu, wottiyoobi baynna ‘issippetettan shiishshi qachchees.’ (Qolasiyaasa 3:14) Yaatiyo gishshawu, hegaa mala siiquwaa siiqettiya asati nagaranchcha gidikkokka, woppu giidi ufayssan dabbotidi deꞌoosona. Leemisuwawu, aqo laggetu issippetettaa qoppa.

‘SHIISHSHI QACHCHIYAABAN’ ISSIPPE GAYTTIDOSONA

Yesuus Kiristtoosi aqo deꞌuwawu keehi koshshiya maarata tamaarissiis. Leemisuwawu, I hagaadan giis: “‘Issi asi ba aawaanne ba aayyiyo aggi bayidi, ba machcheera issippe de7ees; eti naa77ai issi asa gidoosona’ yaagiya qaalaa nabbabibeekketii? . . . Hegaa gishshau, Xoossai issippe gattidoogaa asi shaakkoppo.” (Maatiyoosa 19:5, 6) Keehi koshshiya naaꞌꞌa gidiya maarati hagan qonccidosona.

“ETI NAA77AI ISSI ASA GIDOOSONA.” Aqo laggetu dabbotay asassi aybippenne mata dabbota, qassi siiqoy he dabbotaa shunchchuwaappe, hegee azinay woy machchiyaa ba aqo lagge gidenna uraara ‘issi bolla’ gidiyoogaappe naagees. (1 Qoronttoosa 6:16; Ibraawe 13:4) SHunchchiyoogee issi uri ammanettennaadan oottees; qassi aqo deꞌuwaa laalana danddayees. Naati deꞌikko, hegan eti banttana siiqennabadan qoppana, woy woppaa xayana, woy qassi yiillotana danddayoosona.

“XOOSSAI ISSIPPE GATTIDOOGAA.” Hegaa bollikka, aqo deꞌoy geeshsha issippetetta. Hegaa bonchchiya aqo laggeti bantta aqo deꞌuwaa minttanawu baaxetoosona. Metoy merettiyo wode eti bantta deꞌuwaa laalanawu koyokkona. Eta siiqoy mino, qassi ufayssan genccees. Hegaa mala siiqoy nu aqo deꞌuwan maayettidi sarotettan deꞌanawu baaxetidi metuwaa pagalanaadan nuna maaddiyo gishshawu, “ubbabaa danddayees.”

Yelidaageeti bantta goꞌꞌaa aggibayidi siiqettiyoogee son naati deꞌikko, naata keehi maaddees. Jesiko giyo yelagiyaa hagaadan gaasu: “Ta aawaynne aayyiyaa wozanappe siiqettoosonanne issoy issuwaa bonchchoosona. Ta aayyiyaa hara hanotaappekka aaruwan nunaara naatuura gayttidaagan ta aawaa bonchchiyoogaa taani beꞌiyo wode, hegee ta O milatanawu koyanaadan oottees.”

Siiqoy Xoossawu waannatiya eeshsha. Ubba qassi Geeshsha Maxaafay, “Xoossai siiqo” yaagees. (1 Yohaannisa 4:8) Yaatiyo gishshawu, Yihooway “anjjettida” woykko ufayttiya Xoossakka geetettidoogee garamissenna. (1 Ximootiyoosa 1:11) Nuuni eeshshan nuna Medhdhidaagaa mala, ubba qassi siiquwan A mala gidanawu baaxetikko, nuunikka ufayttana. Efisoona 5:1, 2y, ‘Xoossay siiqiyo naatudan, A milatite. Qassi siiquwan deꞌite’ yaagees.