Unꞌꞌoy Aybee?

Unꞌꞌoy keehi metiya hanotan ne bolla giddon haniyaaba. Ne guuggee keehi daro hormoneta bolla giddon ubbasaa yeddees. He hormoneti ne wozanay keehi diddiqanaadan oottoosona, ne suuttay bessiyaagaadan sugettanaadan oottoosona, ne goofiniyaa aassoosona woy xunttoosona, qassi ne dibbaa minttoosona. Haniiddi deꞌiyaabaa neeni biron loytta akeekennan, ne bollay qohettennan zaaranawu giigettees. Unꞌꞌissiya hanotay aadhdhiyo wode ne bollay qohettennan zaaranawu giigettidoogaa aggidi kase ba sohuwaa simmees.

GOꞌꞌIYAANNE QOHIYA UNꞌꞌUWAA

Unꞌꞌettiyoogee metiya woy qohiya hanotaa eqettanawu nena maaddiya wottin deꞌiyaaba. Unꞌꞌettiyoogee ne guuggiyaa giddon doommees. Goꞌꞌiya unꞌꞌoy neeni issibaa eesuwan oottanaadan denttettees. Issi issi unꞌꞌoy, geella timirtte keettaa paaciyaa wode, ooso oyqqanawu oyshettiyo wode, woy ispporttiyaa wode ne halchchidobaa polanawu woy loytta oottanawu maaddana danddayees.

SHin, gamiꞌꞌya wolqqaama unꞌꞌoy nena qohana danddayees. Ne bollay qohettennan zaaranawu zaari zaaridi woy ubbatoo giigettiyo wode, neeni asatettan, neessi siyettiyaabaaninne ne qofan qohettana danddayaasa. Neeni harata oyqqiyo ogiyaa gujjin ne eeshshay laamettana danddayees. Wolqqaama unꞌꞌoy issi uri likkiyaappe aattidi ushshaa uyanaadan, sijaaraa uyanaadaaninne hara iitabaa oottanaadankka denttettana danddayees. Hegee hirgganaadan, keehi daafuranaadan, woy bana barkka woranawu qoppanaadan oottana danddayees.

Unꞌꞌettiyoogee ubba asaa issi mala ogiyan qohana xayikkonne, cora qommo harggiyaa kaalettana danddayees. Qassi unꞌꞌoy bolla kifileta ubbaa qohana danddayees.