HA SAꞌAY BASHSHAAPPE ATTANEE?
HAATTAA
HAATTI baynnan, ubba qassi uyanawu haniya haatti baynnan ha saꞌan deꞌoy deꞌana danddayenna. Deꞌon deꞌiya mereta ubbaa giddon deꞌiyabaappe dariya baggay haattaa. Qeeri abbay, shaafay, careenne biitta giddon deꞌiya haattay asaynne mehee uyanawu, qassi kattaa waaruwawu goꞌettanawu maaddees.
Nuussi Uyiyo Geeshsha Haattay Qaxuwatiyoy Aybissee?
Ha saꞌaappe dariya baggay haattan kamettiis. Gidikkokka, Alamiya Carkkuwa Hanotaa Xannaꞌiya Dirijjitee giidoogaadan, “ha saꞌan deꞌiya haattaappe uyanawunne goꞌettanawu maaddiyay 0.5% xalaala.” Saꞌan deꞌon deꞌiyabatussi koshshiya haattay hegaa keena guutta gidikkokka, hegaappekka dariya baggay moorettiis, woy koyiya asaa qooday daridoogaappenne carkkuwa hanotay laamettidoogaappe denddidaagan demmanawu metees. Eranchchati, sinttappe 30 layttaa giddon, ichchashu biiloone gidiya asay uyiyo haattaa demmana danddayennaagaa yootoosona.
Ha Saꞌay Bashshaappe Attanaadan Giigidi Merettiis
Ha saꞌay ubba wode asawu koshshiya gidiya haattay deꞌanaadan giigidi merettiis. Biittay, haatta giddon deꞌiya meretatinne awaa pooꞌoy issippe haattaa geeshshoosona. Ha saꞌay bashshaappe attanaadan giigidi merettidoogaa bessiya amarida naqaashata akeeka.
Haattaa mooriya darobata gaccidi digganawu biittay maaddana danddayees. Caretiya biittan, issi issi dozati naytroojiiniya, posporesiyanne guxune malabata woriya xaliya xayssiyogan erettoosona.
Haattay meretan waanidi iitabaappe geeyiyakko saynttistteti eridosona. Eesuwara goggiya haattay mooriyabatuppe geeyi geeyi bin, bakitereti he mooriyabata xayssoosona.
Goꞌettanawu haniya haattaa giddon deꞌiya kilam giyonne messil giyo meretati qohiya keemikaaleta guutta gallassaa giddon haattaa giddoppe xayssana danddayoosona; ubba, haattaa geeshshoosona giyo dozatuugaappekka aaruwan hegaadan oottana danddayoosona.
Ha saꞌay haattaara gayttidaagan simmi simmi haniyabaa baggaara haattaa dagayees. Ha simmi simmi haniyabay, meretan polettiya harabatuura issippe, haattay saꞌaa yuushuwappe harasaa beennaadan woy xayennaadan oottees.
Metuwa Pagalanawu Asay Ay Oottiiddi Deꞌii?
Kaamiyappe xokkiya zaytiya giigissiyogaaninne qohiyabata bessiya ogiyan xayssiyogan haattaa pulttoy geeshsha gidanaadan maaddoos.
Eranchchati, ubba wode haattaa qoraphphidi goꞌettanaadan zoroosona. Haattay keehi moorettiyogaa teqqanawu, kaamiyan deꞌiya zaytee xokkikko sohuwara giigissanaadan, qassi goꞌettibeenna xaliya woy qohiyabata haattan qolennaadan zoroosona.
Eranchchati, abbaa haattaappe maxiniya shaakkiyo, dissalineshin giyo malaaliya hiillaa demmidosona. Hegaa halchchoy goꞌettanawu haniya daro haattay deꞌanaadan oottanaassa.
Shin, haꞌꞌikka darobay koshshees. Abbaa haattaappe maxiniya shaakkiyo hiillawu daro miishshaynne wolqqay koshshiyo gishshawu, hegeekka metuwa pagaliya loꞌꞌo hiilla gidenna. Uyiyo haattaa waati naagana koshshiyakko Kawotettatu Issippetettay 2021n kessido iripporttee hagaadan gees: “Kumetta saꞌan oosettiiddi deꞌiyabaa haꞌꞌiigaappe naaꞌꞌu kushe gujjana koshshees.”
Saꞌay Bashshaappe Attanaagaa Ammaniyo Gaasota—Geeshsha Maxaafay Woygii?
“Xoossai haattaa sa7aappe pude saluwaa efees; efiidi yan ira kessees. He irai shaaraappe kiyidi, asau daro bukkanaadan oottees.”—Iyyooba 36:26-28.
Xoossay saꞌan deꞌiya haattaa mooriyabaappe naaganawu meretan simmi simmi haniyabaa giigissiis.—Eranchchaa 1:7.
Hagaa qoppa: Medhdhidaagee ha saꞌay ubbatoo haattaa geeshshanaadan oottidaba gidikko, I asay mooridobaa giigissanawu koyees, qassi yaatanawu awu wolqqay deꞌees gi ammaniyogee bessiyaba gidennee? Sinttaa 15n, “Ha Saꞌay Bashshaappe Attanaagaa Xoossay Qaalaa Geliis” giya huuphe yohuwa xeella.