Bohettida Uraara Deꞌiya Gaytotettaa

Nu dabbo woy nuussi mata lagge gidida uri ba nagaraappe simmennan ixxidi, gubaaꞌiyaappe bohettiyoogee nuna keehippe azzanttees. Ha yohuwaa xeelliyaagan Geeshsha Maxaafaa kaaletuwau immiyo zaaroy, nuuni Xoossaa ay keena siiqiyaakkonne a giigissotun ay keena ammanettiyaakko qonccissees.a Hegaara gayttidaagan denddiya issi issi oyshata qoppa.

Gubaaꞌiyaappe bohettida uraara nuuyyo ay mala gaytotettay deꞌana bessii? Geeshsha Maxaafay: “Ishantta ha77i geetettiyaageetuppe issoinne shaaramuxana qaaqqatiyaagaa woi miishshaa amottiyaagaa woi eeqassi goinniyaagaa woi cayiyaagaa woi mattottiyaagaa woi bonqqiyaagaa gidikko, intte aara issippe gaittenna mala, . . . Hegaa malaara harai atto, qumaakka mooppite” yaagees. (1 Qoronttoosa 5:11) ‘Kiristtoosa timirttiyan deꞌenna uraa’ xeelliyaagan: “Intte soo a gelissoppite; sarokka gooppite. Aissi giikko, a saro giya urai a iita oosuwaa aara shaakkees” yaagiyaagaa nabbaboos. (2 Yohaannisa 9-11) Bohettida uraara nuuni ayyaanaaban woykko issippetettaa medhiyo haraban gayttokko. Masqqala 15, 1981, Wochiyo Keelay sinttaa 25n: “Issi uraa ‘saro’ giyoogee haasayau, ubba hegaappe aadhidi laggetettau doometta gidana danddayees. Bohettida uraara laggetettaa medhiyo koyro tangguwaa nuuni ekkana bessii?” yaagees.

Bohettida uraara deꞌiya gaytotetta ubbaa aggana bessii? Ee, aggana bessiyo daro gaasoti deꞌoosona. Koyruwan, hegaadan oottiyoogee nuuni Xoossaassinne a Qaalaassi ammanettiyoogaa bessees. Deexxenna wode xalla gidennan, deexxiyo wodiyankka nuuni Yihoowaassi azazettana bessees. Yihooway suure pirddiyaagaanne siiqiyaagaa, qassi a higgetikka nuna keehippe goꞌꞌiyaageeta gidiyoogaa nuuni akeekoos. Hegaa gishshau, a siiqiyoogee a azazuwaa ubbaa naaganaadan nuna denttettees. (Isiyaasa 48:17; 1 Yohaannisa 5:3) Naaꞌꞌanttoy, ba oottido nagaraappe simmenna uraappe haakkiyoogee, nuuninne gubaaꞌiyan deꞌiya harati ayyaanaabaaninne kandduwaaban moorettennaadaaninne gubaaꞌiyaayyoonne nuuyyo deꞌiya loꞌꞌo sunttay moorettennaadan oottees. (1 Qoronttoosa 5:6, 7) Heezzanttoy, Geeshsha Maxaafaa baaso siraataa nuuni minttidi kaalliyoogee, ubba bohettida uraakka goꞌꞌana danddayees. Pirdda komitiyaa kuushshaa kaafiyoogan, nagaraa oottida uray ba wozanau simmanaadan oottana danddayoos. I he wode gakkanaashin gubaaꞌiyaa cimati a maaddanau daafurido daafuraa akeekibeenna. Ba siiqotuura deꞌiya loꞌꞌo issippetettay attido hanotay, “ba mooruwaa hassayidi” hegee keehi deexo nagara gidiyoogaa akeekanaadaaninne Yihoowakko simmanau tangguwaa ekkanaadan a maaddana danddayees.—Luqaasa 15:17.

Dabbo issoy bohettidaba gidikko shin? Hegaa mala hanotan, so asaara deꞌiya mata dabbotay, Yihoowa higgiyau ammanettiyoogaa paacciyaaba gidana danddayees. Bohettida dabbuwaara nuuyyo ay mala gaytotettay deꞌana bessii? Merettana danddayiya hanota ubbaa ha xuufiyan denttidi haasayana danddayokko; shin naaꞌꞌu waannabata ane beꞌoos.

Issi issi hanotan, bohettida uri nunaara issippe deꞌiya, nu soo asappe issuwaa gidana danddayees. I bohettidoogee so asaara deꞌiya asho dabbotay duuxxanaadan oottenna. Hegaa gishshau, so asay galla galla oottiyoobaynne eta gaytotettay haꞌꞌikka deꞌana danddayees. Gidikkonne, he uri ba hanotan, Kiristtaane gidida bantta soo asaara ayyaanaaban deꞌiya dabbotaa duuttanau dooriis. Yaatiyo gishshau, ammanettida so asay ayyaanaaban aara deꞌiya issippetettaa aggiigees. Leemisuwau, so asaa Geeshsha Maxaafaa xinaatiyaa wode bohettida uri deꞌiyaaba gidikko, qofaa immiyoogan shaahettenna. SHin bohettida uri gamma gakkibeenna naꞌa gidikko, a tamaarissanaunne seeranau yelidaageetussi haꞌꞌikka aawatettay deꞌees. Hegaa gishshau, siiqiya yelidaageeti he naꞌaa Geeshsha Maxaafaa xannaꞌissana danddayoosona.b—Leemiso 6:20-22; 29:17.

Hara hanotan, bohettidaagee so asaappe issuwaa gididi, nunaara issippe deꞌenna ura gidana danddayees. So asaara gayttidaban guutta gaytotettay deꞌana danddayikkokka, hegaa mala gaytotettay keehi guutta gidana koshshees. Ammanettida Kiristtaane so asati, banttanaara sooni deꞌenna, bantta soo asa gidida bohettida uraara gayttiyo gaaso koyokkona. Hegaappe, Yihoowayyonne a dirijjitiyaayyo ammanettiyoogee, bohettiyoogaara gayttida Geeshsha Maxaafaa maaraa kaafanaadan eta denttettees. Hegaara gayttidaagan eti ammanettidaageeta gidiyoogee, nagaraa oottida uray goꞌettanaadankka qoppidi oottiyooba; hegee imettida seeran i goꞌettanaadan maaddanau danddayees.c—Ibraawe 12:11.