Zalꞌꞌiyaara Gayttidaagan Denddiya Ooshshaa Giigissiyoogaa

Koyro Qoronttoosa 6:1-8n deꞌiyaagaadan, kiitettida PHauloosi ba mala Kiristtaanetu giddon merettida mootuwaabaa yootiis. Qoronttoosan deꞌiya issi issi Kiristtaaneti “ammanennaageetu bolli pirddettanau . . . xalidi” biidoogan PHauloosi azzanidoogaa yootiis. (Paydo 1) PHauloosi Kiristtaaneti issoy issuwaa pirdda keettan mootiyoogaappe gubaaꞌiyau imettida kaaletuwaa goꞌettidi ooshshaa giigissana koshshiyo gaasuwaa minttidi yootiis. Ayyaanay denttettin ha zoree aybissi imettidaakko beꞌana; qassi ha zoriyaa oosuwan peeshshiyoogee keehi koshshenna amarida hanotatakka beꞌana.

Zalꞌꞌiyaara gayttidaagan nu mala issi Kiristtaaniyaara ooshshay merettikko, ubbaappe kasetidi yohuwaa nu ogiyan gidennan, Yihoowa ogiyan oyqqana koshshees. (Leemiso 14:12) Maayettennan attido issi hanotay keehi aakkidi wolqqaama ooshsha gidanaappe kasetidi, Yesuusi giidoogaadan sohuwaara giigana bessees. (Maatiyoosa 5:23-26) Gidikkokka, issi issi Kiristtaaneti keehippe palamettiyaageeta gididi, mootuwaa ekkidi ubba pirdda keetta boosona. PHauloosi: “Issoi issuwaa mootiyoogee intte giddon de7ikko, hegee intte kunddidoogaa bessees” yaagiis. Aybissi? Waanna gaasoy, hegaa mala mootoy gubaaꞌiyau deꞌiya loꞌꞌo sunttaanne nuuni ayyo goynniyo Xoossaa sunttaa moorana danddayiyo gishshataassa. Yaatiyo gishshau, PHauloosi: ‘Hegaappe intte naaqettiyoogee kehennee?’ yaagido oyshaa wozanan wottoos.—Paydo 7.

Daro ooshshau siga medhiyo loꞌꞌo giigissuwaa Xoossay gubaaꞌiyau immidoogaakka PHauloosi yootiis. Gubaaꞌiyaa cimati Geeshsha Maxaafaa tumaa eraa demmidi aadhida erancha gidida attuma asata; PHauloosi ‘ha deꞌuwaabaa’ xeelliyaagan eti “ishantta sigettanau danddayiya” asata gidiyoogaa yootiis. (Paydo 3-5) Yesuusi zigirssaanne cimo milatiya, deexo nagaraa gujjiya ooshshay heezzu xekkay deꞌiyo hanotan giigana bessiyoogaa qonccissiis; koyroy, he allaallee xeelliyo naaꞌꞌu asati he yohuwaa banttarkka giigissana bessiyoogaa; naaꞌꞌanttoy, banttarkka giigissana xayikko, issi woy naaꞌꞌu markkati deꞌiyoosan giigissiyoogaa; heezzanttoy qassi, qommoora qonccida naaꞌꞌu ogetun giigana xayikko, cimatun kalꞌꞌatettiya gubaaꞌiyau yootiyoogaa.—Maatiyaasa 18:15-17.

Kiristtaane gubaaꞌiyaa cimati abukato woy zalꞌꞌanachata gidiyoogee koshshiyaaba gidenna; qassi eti immiyo zoree higgiyaara woy zalꞌꞌiyaara gayttidaagaa gidana bessenna. Zalꞌꞌiyaara gayttidaagan ishanttu giddon merettida ooshshaa giigissiyo wodiyan, eti higgiyaara woy zalꞌꞌiyaara gayttida maara goꞌettokkona. Hegaappe, ha allaallee xeelliyoogeeti Geeshsha Maxaafaa zoriyaa oosuwan peeshshanaadaaninne saruwan giigissanaadan eti maaddanau koyoosona. Keehi deexo gidida hanotay gayttiyo wode, cimati woradaa xomoosiyaagaa woy Yihoowa Markkatu macara biiruwaa zoriyaa oychana danddayoosona. Gidikkonne, issi issi hanotati PHauloosi immido zoriyan giigissanau deexxiyaageeta gidana danddayoosona. Hegeetuppe issoti issoti awugeetee?

Issi issi hanotatun, koyiyoobaa polanau woy higgiyan koyettidabaa polanaunne saroy deꞌanaadan oottanau mootiyoogaa koshshana danddayees. Leemisuwau, macho yeddanau woy azinappe kiyidi baanau, naꞌa dichiyo maataa demmanau, shaahettida aqo laggiyaappe koshshiyaabaa demmanau, inshuranssiyaa demmanau, miishshaa talꞌꞌidaagee gamma meetettiyo wode he miishshaa zaarissanau, qassi aquwaa laattiyo maataa demmanau mexi issi ogee mootiyoogaa gidana danddayees. Issi ishay mootoy a xeellennaagaa bessanau zaaridi mootanau qoppanaadan oottiya hanotaykka deꞌees.a

Hegaa mala mootuwaa ooyettana koyidi mootana xayikko, ayyaanay kaalettin PHauloosi immido zoriyaa kanttiyooba gidenna.b Gidikkokka, issi Kiristtaanee ubbabaappe kaseyiyoy, Yihoowa sunttaa bonchissiyoogaanne gubaaꞌiyaa sarotettaanne issippetettaa gidana bessees. Kiristtoosa kaalliyaageeta dummayidi erissiya malaatay eta giddon deꞌiya siiquwaa; qassi “siiqoi . . . uuzettenna.”—1 Qoronttoosa 13:4, 5; Yohaannisa 13:34, 35.