Xoossaayyo Suntti Deꞌii?
Asay darotoo zaariyo zaaruwaa:
▪ “A sunttay Godaa.”
▪ “Assi buzo suntti baawa.”
Yesuusi woygidee?
▪ “Simmi intte hagaadan yaagidi, Xoossaa woossite; ‘Saluwan de7iya nu Aawau, ne geeshsha sunttai anjjetto.’” (Maatiyoosa 6:9) Xoossaayyo sunttay deꞌiyoogaa Yesuusi erees.
▪ “Neeni tana siiqido siiqoi eta giddon de7ana mala, qassi taanikka eta giddon de7ana mala, taani ne sunttaa eta erissaas; sinttaukka erissana.” (Yohaannisi 17:26) Yesuusi Xoossaa sunttaa erissiis.
▪ “Intte, ‘Godaa [“Yihoowa,” NW] sunttan yiyaagee anjjettidaagaa’ gaana gakkanaashin, tana be7ekketa.’” (Luqaasa 13:35; Mazamure 118:26) Yesuusi Xoossaa sunttaa goꞌettiis.
XOOSSAY bari huuphe ba sunttaa nuussi yootiis. I “Taani GODAA [“Yihoowa,” NW]; hegee ta sunttaa” yaagidoogee xaafettiis.a (Isiyaasa 42:8) Xoossay baassi kessido Ibraysxxe sunttay Wolayttattuwan Yihoowa yaagiyaagaa. Ha dumma gidida Ibraysxxe sunttay Geeshsha Maxaafaa beni xuufetun shaꞌan qoodettiyaagaa keenay deꞌiyoogan neeni garamettennan aggakka. Geeshsha Maxaafan deꞌiya hara ay sunttaappekka aaruwan he sunttay darosan deꞌees.
Issoti issoti “Xoossaa sunttay oonee?” giya oyshau “Godaa” giidi zaarana danddayoosona. Gidikkonne, hegee “Doorettiday oonee?” giya oyshau “doorettanau bana shiishshidaagaa” giidi zaariyoogaappe dummatenna. “Godaa” giya qaalaynne “doorettanau bana shiishshidaagaa” giya qaalay suntta gidenna gishshau, hagee qoncce zaaro gidenna.
Xoossay ba sunttaa nuussi yootidoy aybissee? I hegaadan oottidoy nuuni a loyttidi eranaadaana. Leemisuwau, issi uri hanotaadan Daannau, Halaqau, Gaashshee, woy Abbaa geetettidi xeegettana danddayees. Ha boncho sunttati he uraabaa issibaa qonccissoosona. SHin he izaawu sunttay nuuni eriyo abaa ubbaabaa hassayissees. Hegaadan Godaa, Ubbaa Danddayiyaagaa, Aawaanne Medhidaagaa giya boncho sunttati Xoossay oottiyo dumma dummabaa nuuni hassayanaadan oottoosona. SHin Yihoowa giya a buzo sunttay nuuni eriyo abaa ubbabaa hassayanaadan oottees. A sunttaa erennan Xoossaa tumuppe waatada erana danddayay?
Keehippe koshshiyay he sunttaa eriyoogaa xalla gidennan an goꞌettiyoogaa. Aybissi? Geeshsha Maxaafay: “Godaa [“Yihoowa,” NW] sunttaa xeesiya ooninne attana” yaagiyo gishshataassa.—Roome 10:13; Yuꞌꞌelaa 2:32.
[Tohossa qofata]
a Xoossaa sunttaa birshshettaanne issi issi Geeshsha Maxaafaa birshshettati he sunttaa ayssi goꞌettibeennaakko eranau, Yihoowa Markkatun attamettida Tumuppe Geeshsha Maxaafay Tamaarissiyoy Aybee? giya maxaafaa sinttaa 195-197 xeellana danddayaasa.
[Sinttaa 6n deꞌiya misiliyaa qonccissuwaa]
Issi uri hanotaadan Daannau, Halaqau, Gaashshee, woy Abbaa geetettidi xeegettana danddayees. SHin he izaawu sunttay nuuni eriyo abaa ubbaabaa hassayissees