Ubbabau Wodee Deꞌees

Geeshsha Maxaafay: “Ubbabau wodee de7⁠ees; saloppe garssa baggaara oosettiyaabau ubbau a laittai laittai de7⁠ees” yaagees. Hagaa xaafida, beni wode erancha Kawuwaa Solomoni, yelettanaunne hayqqanau, keexxanaunne qolanau, dosanaunne ixxanau wodee deꞌiyoogaa yootiis. Wurssettan i: “Yaatin, oosanchchi ba daafurido daafuraappe aiba wore demmii?” yaagiis. —Eranchchaa 3:1-9.

ISSI issi asay ha xiqisiyaa nabbabidi, ubbabay haniyo wodee kasetidi kuuyettidoogaa Geeshsha Maxaafay tumuppe tamaarissees giidi qoppees; eti Geeshsha Maxaafay qaadan ammaniyoogaa kaafees giidi qoppoosona. Hegee tumee? Deꞌuwan hanettiya ubbabay kasetidi kuuyettiis giyo qofaa Geeshsha Maxaafay kaafii? “Xoossaa maxaafa ubban Xoossaa Ayyaanai” deꞌiyo gishshau, Geeshsha Maxaafan issisan nuuni nabbabiyoobay harasan deꞌiyaagaara moggottana bessees. Yaatiyo gishshau, ha yohuwaa xeelliyaagan Xoossaa Qaalaa, Geeshsha Maxaafay woygiyaakko ane beꞌoos.—2 Ximootiyoosa 3:16.

Wodiyaanne Qoppennan Gayttiyaabaa

Eranchchaa maxaafan Solomoni gujjidikka: “Taani saloppe garssaara harabaakka be7aas; hegeekka, eesotiya wottanchchati ubba wode xoonokkona; woikko mino olanchchatikka ubba wode olan xoonokkona; woikko aadhdhida eranchchati ubba wode qumaa demmokkona; woikko cinccati ubba wode duretokkona; woikko tamaarida asati ubba wode sabettokkona” yaagidi xaafiis. Aybissi? I: “Ubbaikka [“qoppennan gayttiyaabaynne,” NW] wodee oottoogaadan” haniyo gishshataassa gidiyoogaa qonccissiis.—Eranchchaa 9:11.

Solomoni ubbabay deꞌuwan gakkiyoy qaadaana giyoogaappe, asaa naati oottiyoobay kaalettiyoobaa kasetidi erennay “qoppennan gayttiyaabaynne wodee oottoogaadan” haniyo gishshataassa gidiyoogaa qonccissiis. Darotoo, issi ura deꞌuwan hanettiya issibay he uri loꞌꞌo wodiyan loꞌ’ sohuwan deꞌido gishshataassa, woykko iita wodiyan iita sohuwan deꞌido gishshataassa gaana danddayeettees.

Leemisuwau, “Eesotiya wottanchchati ubba wode xoonokkona” giyaagaa qoppa. Amerkkan, Kalforniyan, Los Anjeles kataman, 1984 Olomppikiyan, 3000 meetiriyaa macca naatu wottan hanida, meeze gidenna hanotaabaa erennan woy nabbabennan aggakka. Biritaaniyaa biittaa kalꞌꞌatidanne Amerkkaa biittaa kalꞌꞌatida naaꞌꞌu wottanchatikka worqqa madaaliyaa demmanau hidootidosona. Gidikkokka, bagga gidiyaagaa woxxidi issoy issuwaara domꞌꞌettidosona. Issinna kunddada wottaappe attaagaasu; haranna qassi laappuntta kiyada keehippe azzanaasu.

Hegee hanidoy qaadaanee? Issi issi asay hegaadan gaana danddayees. SHin eti xoonennan attidoy domꞌꞌettido gishshataassa gidiyoogee qoncce; hegaa ooninne kasetidi qoppana danddayenna. Yaatin, eti domꞌꞌettidoy qaadaanee? Haꞌꞌikka issoti issoti hegaadaana gaana danddayoosona. Gidikkokka, ispporttiyaabaa yootiyaageeti he daafay gakkidoy naaꞌꞌu mino wottanchati issoy issuwaa xoonanau baaxetido gishshataassa gidiyoogaa yootidosona. Geeshsha Maxaafay yootiyoogaadan, “ubbabaikka qoppennan gayttiyaabaynne wodee oottoogaadan hanees.” Issi uri ay keena loyttidi giigettikkonne, issi qoppennabay ubbatoo a oosuwaa ayfiyaa bochana danddayees; hegee qaadaara gayttidaba gidenna.

Yaatin, Geeshsha Maxaafay “ubbabau wodee de7⁠ees” giyoogee woygiyoogee? Nu sinttanaa deꞌuwaa bochiya, nuuni oottana danddayiyoobi deꞌii?

Oottiyo Ubbabau Keehippe Loꞌꞌo Wodiyaa

Geeshsha Maxaafaa xaafee issi uraa qaadaabaa woykko wodeppe a deꞌuwan gakkanabaa gidennan, Xoossaa halchuwaabaanne hegee asaa naata bochiyo ogiyaabaa yootiis. Hegaa aybin eriyoo? Yuushuwan deꞌiya qofay hegaa qonccissees. Solomoni a ‘wodee wodee deꞌiyo’ darobaa yooti simmidi: “Taani qassi, asaa naati daafuridi oottana mala, Xoossai immido toohoi keehi deexo gidiyoogaa be7aas. Xoossai ubbabaa a wodiyan wodiyan loittidi oottiis” yaagidi xaafiis.—Eranchchaa 3:10, 11.

Xoossay asaa naati oottanaadan darobaa immiis—Solomoni hegeetuppe daruwaa yootiis. Xoossay nuuni oottanabaa dooranaadan laꞌatettaakka immiis. Gidikkokka, ubba oosuwaukka loꞌꞌo ayfiyaa demissiya injje wodee woy loꞌꞌo wodee deꞌees. Leemisuwau, Eranchchaa 3:2n, Solomoni “tokkanau wodee de7⁠ees; tokkidoogaa shoddanaukka wodee de7⁠ees” giidoogaa akeeka. Ubba kattaa tokkanau a wodee wodee deꞌiyoogaa goshshanchati eroosona. Issi goshshanchay hegaa eriiddi issi kattaa bessenna wodiyan tokkikko shin? I minni oottikkonne loꞌꞌo ayfiyaa demmana xayikko, hegaa qaadan gaasoyana koshshii? Koshshennaagee qoncce. I kattaa bessiya wodiyan tokkibeenna. Medhidaagee giigissido meretaa maaraa goshshanchay kaallidaba gidiyaakko, loꞌꞌo ayfe demmana shin.

Yaatiyo gishshau, Xoossay issi uraa qaadaa woykko haniya ubbabaa gidennan, ba halchuwaara moggottiya hanotan asay oottanaadan issi issi baaso siraatata kuuyiis. Asay ba oottiyooban ayfiyaa demmanau, Xoossaa halchuwaanne a wodiyaa akeekanaunne hegaara moggottidi oottanau bessees. Kasetidi kuuyettidabaynne laamettennabay issi ura gakkanabaa gidennan, Xoossay oottanau halchidobaa. Yihooway hananabaa yootiya Isiyaasa baggaara: “Ta doonaappe kiyiya qaalaikka . . . taani halchchidoogaa polana; qassi kiittidoogaa oottanaappe attin, taakko coo simmenna” yaagiis.—Isiyaasa 55:11.

Yaatin, saꞌaanne asaa naatu sinttanaabaa xeelliyaagan Xoossay ‘kiittidoogaa oottiya’ a ‘qaalay’ woykko halchoy aybee?

Xoossaa Wodiyaa Akeekiyoogaa

Solomoni hegaa akeekanau maaddiyaaba yootiis. “Xoossai ubbabaa a wodiyan wodiyan loittidi oottiis” gi simmidi, “asaa wozanan merinatettaa wottiis; hegaa gidikkonne, Xoossai oottidobaa ubbaa koiruwaappe wurssettai gakkanaashin, asai wurssidi eranau danddayenna” yaagiis.—Eranchchaa 3:11.

Ha xiqisiyaa xeelliyaagan darobay xaafettiis. SHin hegaa birshshettay akeekanau metennaba; nuuni ubbay nu deꞌuwaanne sinttappe nuna naagiyaabaa xeelliyaagan issi wode wozanappe qoppennan aggokko. Asaa naati deꞌido wode ubban, deꞌoy hayqqana gakkanaashin oottana koshshiyaabaa minnidi oottiyoogaa xalla gidiyoogaa asay ammanidi ekkanau metootiis. Asaa naati haꞌꞌibaa xalla gidennan, sintta wodiyaabaakka qoppiyoogan deꞌon deꞌiya mereta ubbaappe dumma. Ubba nuuni merinau deꞌanaukka amottoos. Aybissi? Geeshsha Maxaafay yootiyoogaadan, “Xoossai asaa wozanan merinatettaa” wottido gishshataassa.

He amoy polettanaadan koyiyo gishshau, asay darotoo hayquwaappe simmin deꞌoy deꞌiishsha giidi qoppiiddi takkiis. Issoti issoti nuuni hayqqiyo wode hayqqennabi nu giddon deꞌees giidi ammanoosona. Harati nuuni hayqqiyo wode zaaretti zaaretti yelettiiddi merinau deꞌiyoogaa ammanoosona. Harati qassi deꞌon gakkiya ubbabay nuuni laammana danddayenna, qaadan gakkiyaaba woykko Xoossa shene giidi qoppoosona. Ha giyoobati ubbay aliya zaaruwaa immennaagee azzanttiyaaba. Hegee hanidoy Geeshsha Maxaafay, “Xoossai oottidobaa ubbaa koiruwaappe wurssettai gakkanaashin, asai wurssidi eranau danddayenna” yaagiyo gishshataassa.

Era koshshaynne zaaro demmanau danddayennaagee kaalettido ha daro wodiyau takkida metoy, asi deꞌido wode ubban palasppata barche bessidaba. Gidoppe attin, Xoossay nu wozanan he amuwaa wottido gishshau, he amuwaa polanau aybi koshshiyaakko eranau akko xeelliyoogee bessiyaaba gidennee? Hegaa bollikka, Geeshsha Maxaafay Yihoowa xeelliyaagan: “Neeni ne kushiyaappe yeggada, paxa de7⁠iyaageeta ubbaa amuwaa alaasa” yaagees. (Mazamure 145:16) Xoossaa Qaalaa, Geeshsha Maxaafaa xannaꞌiyoogan, deꞌuwaabaanne hayquwaabaa, qassi saꞌaanne asaa naata xeelliyaagan Xoossaa merinaa halchuwaabaa aliya zaaruwaa demmana danddayoos.—Efisoona 3:11.

[Sinttaa 5n deꞌiya misiliyaa qonccissuwaa]

“Eesotiya wottanchchati ubba wode xoonokkona.” —Eranchchaa 9:11

[Sinttaa 6n deꞌiya misiliyaa qonccissuwaa]

Issi goshshanchay issi kattaa a wodiyan tokkana xayikko, i loꞌꞌo ayfiyaa demmibeennaagaa qaadan gaasoyana koshshii?

[Sinttaa 7n deꞌiya misiliyaa qonccissuwaa]

Nuuni deꞌuwaabaanne hayquwaabaa qoppiyoy Xoossay nu “wozanan merinatettaa” wottido gishshataassa