Hashetiyoogee Ayyaanaaban Diccanau Maaddees
Hashetiyoogee ayyaanaabaa kaseyanau koyiya so asau keehippe koshshiyaaba. Yihooway koyro azinaanne machiyo medhido wode, hashetiyoogee koshshiyoogaa minttidi yootiis. Hewaana Addaameyyo ‘injjetiyaaro’ gidada oottana bessiis. (Doomettaabaa 2:18) Aqo deꞌoy attumaageenne maccaara issoy issuwaara maadettiyo laggetetta gidana koshshees. (Eranchchaa 4:9-12) Yihooway yelidaageetuyyoonne naatuyyo immido aawatettaa polanau hashetiyoogaa koshshees.
So Asay Issippe Goynniyoogaa
Beerayyoonne Hiidiyyo ichashu naati deꞌoosona. Eti so asay issippe Geeshsha Maxaafaa ubbatoo xannaꞌanau hashetiyoogee dichaa bessanaadan maaddidoogaa akeekidosona. Beeri: “Taani so asaa xinaatiyau, naatuyyo wodiyaappe wodiyan amarida oosuwaa immays. Eti Beegottite! maxeetiyaappe giigettidi qofaa immanaadan taani yootiyo wodee deꞌees. Naati giigettidi asaa waatidi haasayissanaakko huuphiyan huuphiyan bessiyo, haggaazuwaara gayttida prograameekka deꞌees” yaagiis. Hiidakka: Nuuni ubbay gakkana koyiyo ayyaana hoolleta xaafi oyqqida; qassi hegaa xeelliyaagan ayba dichaa bessidaakko so asaa xinaatiyaa wode, wodiyaappe wodiyan zaarettoos” yaagaasu. Issi issi qammi televizhiiniyaa beꞌennaagee so asay ubbay nabbabiyo injjiyaa medhidoogaakka he azinaynne machiyaa akeekidosona.
Gubaaꞌiyaa SHiiqota
Miikinne Denssa oyddu naata dichidosona. Issippe oottiyoogan eta soo asay ayba ogiyan goꞌettidee? Miiki: “Issi issitoo loyttidi kessido hoolleekka polettenna; shin hashetiyoogee nuuni saatiyan shiiquwan beettanaadan maaddiyoogaa akeekida” yaagiis. Denssa: “Naati dicciyo wode, eti huuphiyan huuphiyan oottiyo oosoy deꞌees. Nu naꞌiyaa Kiima qumaa kattada aattiyoogan maaddausu” yaagaasu. Eta naꞌay Mikaaꞌeeli: “Masqqaynno Masqqaynno omarssi nu son gubaaꞌiyaa shiiqoy deꞌees. Yaatiyo gishshau, nuuni keettaa pittoosinne oydiyaa giigissoos” yaagidi hassayees. Maatiyu giyo hara naꞌay: “SHiiqoy deꞌiyo gallassi ta aaway nuuni shiiquwan beettanau giigettanaadan maaddanau oosuwaappe kasetidi yees” yaagiis. Wurssettan ay demmidonaa?
He Baaxee Bessiyaaba
Miiki: “Taaninne Denssa 1987n aqinye gididi oottiyoogaa doommida. He wode nu naatuppe heezzay nunaara son deꞌoosona. Guyyeppe, naaꞌꞌati aqinye gididosona; qassi harati Beeteele keettaa keexxiyo oosuwan shaahettidosona. Nu keettaa asau ufayssaa gujjida harabay, 40u asati banttana geppidi xammaqettanaadan maaddidoogaa. Nu so asay issippe gididi nu biittan, ubba hara biittankka keexxiyo oosuwan shaahettiyo maataa demmida” yaagiis.
So asay hashetiyoogee baaxetana bessiyoobanne anjjo demissiyaaba gidiyoogee tuma. Intte soo asay hashetana danddayiyo hara ogee deꞌanee? Hashetiyoogee intte soo asay ayyaanaaban diccanaadan maaddanaagaa ammanettana danddayeeta.
[Sinttaa 30n deꞌiya misiliyaa]
Meezetiyo prograamee haggaazuwan dichaa bessanau maaddees