Nabbabiyaageeti Oychiyo Oyshaa
Dawuttaa Ekkiyoogee Xoossaa Ufayssii?
Ufayssenna; Xoossay Edenen koyro giigissido aqo deꞌuwau kessido maaray issi machiyo ekkiyoogaa. Guyyeppe Yesuus Kiristtoosi bana kaalliyaageetussi he maaraa mintti yootiis.—Doomettaabaa 2:18-24; Maatiyoosa 19:4-6.
Kiristtaanetu wodiyaappe kase deꞌida Abrahaama, Yaaqooba, Daawitanne Solomona mala asati daro maccaasata ekkibookkonaayye? Ee, ekkidosona; shin Geeshsha Maxaafay he hanotaabaa woygi qonccissii? He hanotaappe denddidaagan, Abrahaama sooninne Yaaqooba son denddida walassaabaa qonccissees. (Doomettaabaa 16:1-4; 29:18–30:24) Guyyeppe, Xoossaa Higgee: “A wozanaa balettennaadan, kawoi cora maccaasaa ekkoppo” yaagidi kawota ubbaa azaziis. (Zaarettido Wogaa 17:15, 17) Solomoni 700ppe dariya maccaasata ekkidi, he higgiyaa kanttiis! He daro maccaasatu sugettan, Solomona wozanay Yihoowappe wora simmidoogee keehi azzanttiyaaba. (1 Kawotu 11:1-4) Dawuttaa ekkiyoogaa xeelliyaagan Geeshsha Maxaafay loꞌꞌo gidennabaa yootiyoogee qoncce.
SHin, ba asay dawuttaa ekkiyo wode Xoossay ayssi coꞌꞌu giidi xeellidaakko issoti issoti maalaalettana danddayoosona. Issibaa qoppa: Neeni dosenna issi oosuwaa yeddiyoogee woy laammiyoogee he saatiyan goꞌꞌennabadan woykko ne soo asaa qohiyaabadan qoppada, guutta wodiyau he oosuwan takka eray? Hegaadankka, i dosennabaa ba asay oottiyoogaa Yihooway danddayido, bessiya gaasoy deꞌees. Xoossaa ogeenne a qofay nuugaappe keehi xoqqa gidiyoogee tuma. (Isiyaasa 55:8, 9) Gidikkonne, dawuttaa ekkiyoogaa Xoossay guutta wodiyau coꞌꞌu giidi xeellido bessiya gaasota akeekana danddayoos.
Wurssettan Seexaanaa xayssana ‘zerettay’ yaanaagau Yihooway Edenen qaalaa gelidoogaa hassaya. Guyyeppe, i gita deretettaa aawa gidanaageenne qaalaa gelido Zerettay a zariyaappe yaanaagee Abrahaamassi odettiis. (Doomettaabaa 3:15; 22:18) He Zerettay yeennaadan teqqanau Seexaanay murttiis. Beni wode deꞌida Israaꞌeele deretettaa xayssanau i qofaa qachiis. Israaꞌeeleti Xoossaappe sabaanne naaguwaa demmenna mala darotoo eti nagaraa oottanaadan balettiis.
Israaꞌeelata Seexaanaa qohuwaappe teqqanau, ba asay geeshshatettaa maaraappe deshiyo wode seeranau, Yihooway zaari zaaridi hananabaa yootiyaageeta kiittiis. Gidikkokka, eeqau goynnennaadan diggiyaagaa mala, azazotuppe waannatiyaageetakka eti azazettennaagaa Yihooway kasetidi erees. (Kessaabaa 32:9) Eti hegaa mala waannatiya higgiyau azazettennaba gidikko, dawuttaa ekkennaadan diggiya higgee imettiyaakko waati bonchanee? Asaa naatu hanotaa loyttidi eriyo gishshau, he wodee daro wodiyaa gamꞌꞌida he hanotaa diggiyo wode gidennaagaa Yihooway akeekiis. I hegaadan oottidaba gidiyaakko, Seexaanay Israaꞌeeleta metoy baynnan nagaran yeggana danddayees.
Dawuttaa ekkiyoogaa Xoossay guutta wodiyau coꞌꞌu giidoogau hara goꞌꞌaykka deꞌees. Hegee, he dere asay eesuwan corattanaadan maaddiis. Asay corattidoogee, Masee yaana gakkanaashin he deree xayennan takkanaadan maaddiis. Dawuttaa ekkiyoogee meto wodiyan issi issi maccaasau keettaynne so asi deꞌanaadan oottiyoogankka guutta ogiyan maaddennan aggenna.
Gidikkonne, ha hanotaa Yihooway doomissibeennaagaa hassaya. I qohoy gakkennaadan teqqiya higgiyaa immidi, he hanotaa amarida wodiyau coꞌꞌu giidi xeelliis. (Kessaabaa 21:10, 11; Zaarettido Wogaa 21:15-17) Yihooway baayyo goynniyaageeti dawuttiyo meeziyaa agganaadan koyido wode, Edenen giigissido ekuwaanne geluwaa maaraa zaarettidi mintti yootanau ba Naꞌaa goꞌettiis. Yaatiyo gishshau, Yesuusi bana kaalliyaageeti dawuttennaadan yootiis. (Marqqoosa 10:8) Hegaappe simmin, ha tumay qoncciis: Muuse Higgee ba wode loꞌꞌo gidikkonne, ‘Kiristtoosa higgee’ hegaappekka aadhees.—Galaatiyaa 6:2.